1 ‑Bhö ‑a pö 'dhang ‑bho Yesu "dhiʋ̈ ‑mɛ ‑nu ‑dhɛ ‑wo wo "tʋ 'to "sɛ ‑gɔmɛ ‑nu ‑wʋ ‑bha, kö 'pë 'wo‑ pö‑ ‑nu ‑dhɛ ‑wa kë. ‑A pö‑ ‑nu ‑dhɛ ‑wo kë 'wɔnsëkëmɛ 'ka, 2 'wa 'dho mɛ 'bha ‑dhiang yaa zë, 'wa 'dho "dhinaa 'ma, 'wa 'dho ‑dɔn bho. ‑Wo kë dhɔngsü mɛ ꞊gban "pɛpɛ "piʋ̈, kö ‑wo mɛ ꞊gban ꞊bhlëë ‑ya ‑kpɛakpɛawo. 3 ‑A ‑gɛn ‑mü ꞊dhɛ kwaa ‑dɩ 'pö kwa ‑gun ꞊dhɛng ‑sü 'ka ‑blɛɛsü 'ö 'wɔndɔdhe 'yaa gun kwa ‑gɔ, 'ö 'kwa mɛ ‑nu ꞊bhlëë ‑siö, kwa ‑gun ꞊dhuëngdhɛ 'gü kwa dhɔɔbhaa ‑pë ‑nu waa‑ kwa ‑zʋgɔngüwɔn ‑nu ‑gɔ, 'ö 'kwa ‑tosɛa ‑kë ‑mawɔn yaa ‑dhɛ waa‑ ‑ya pë ‑dhɔ 'ka ‑sü ‑nu 'gü, 'ö 'kwa ‑ya mɛ ‑nu ‑san 'ka, 'ö 'wo kwa ‑san ‑kë 'pö. 4 "Kɛɛ ꞊dhɛ 'ö Atanna 'ö kwa Dhamɛ 'ka bha‑ ‑bha ‑dhɔ 'ö‑ ‑kë kwa 'ka, waa‑ ‑bha "klʋsëdhɛ bha‑ ‑zɔn mɛ "bhɩɩ‑ ‑nu kwa ‑dhɛ "tʋ̈ng ꞊ya ꞊loo, 5 'yö kwa dha, "kɛɛ 'sa kwa ‑wëë ꞊dede ꞊në‑ ‑kë 'yö kwa dha bha‑ wo, 'yii kë ꞊dhɛ ‑a dhɔɔbhaawɔn ꞊në 'kwa‑ ‑kë 'yö 'kwa dha‑ ‑wɔn 'gü; "kɛɛ kwa 'kpɔ ‑dee 'ö‑ wo, 'ö 'kwa‑ 'gü ‑zu bho bha, waa‑ ‑bha 'Nii‑ "slʋ̈ʋ̈slʋ̈ 'ö kwa "gla 'ö‑ wo kö 'kwa kë mɛ ‑dee 'ka bha ꞊në kë ‑sü 'ka kwa dha ‑kɔ ‑dee bha‑ 'ka. 6 Atanna ‑yö ‑bɔ Yesu Klisi 'ö kwa Dhamɛ 'ka bha ꞊në‑ ‑ta 'yö 'Nii‑ "slʋ̈ʋ̈slʋ̈ 'gbɛ ꞊dede ꞊gbaɔ kwa ‑gɔ. 7 Kë "dhʋ̈ kö (kwa 'ö 'kwa ‑kë ‑a ‑bha 'në ‑nu 'ka bha) ꞊sɔng 'ya 'dho kë kwa ‑bha 'ö wëëdhö ‑a ‑bha ‑gasitɛ 'ö‑ ‑kë kwa ‑dhɛ bha‑ ‑wɔn 'gü, kë "dhʋ̈ kö 'kwa ‑tosɛa ‑së 'ö Atanna "piʋ̈ 'ö kwa ‑zʋ 'dhö‑ 'gü bha‑ ‑slɔɔ. 8 'Wɔn 'ö tɛan‑ 'ka 'yö 'a‑ pö bha.

Yö ꞊në‑ ‑wɔn 'gü 'yö 'i dho mɛ ‑nu draan‑ 'ka glɔglɔdhö. Kë "dhʋ̈ kö 'dhang ‑bho Atanna "dhiʋ̈ ‑mɛ ‑nu ‑wo faan ꞊slɔɔ ꞊dedewo kö ‑wo 'wɔn ‑së ꞊në‑ kë ‑kpɛawo. ‑A ‑gɛn ‑mü ꞊dhɛ 'wɔn ‑së kë ‑sü ꞊në ‑së, yö ꞊në ꞊mɔɔ‑ ‑bha 'ö mɛ ‑nu ‑zʋ kun. 9 'Bha 'dho zaɔdhe "wlaasü ‑da mɛ ‑nu 'ka 'wɔn ‑nu 'ö‑ ꞊trɔɔn 'yaa 'dhö bha‑ 'gü. I "tʋ 'ya 'dho kë mɛ "bhɛma ‑nu ‑gɛngodhɛ ‑wɔn ‑bha. ‑Bhö i bo "dhinaa waa‑ "dhi ‑ko zë ‑sü 'ö ‑gban Zuifö ‑nu ‑bha 'tɔng‑ ‑nu ‑bha bha‑ 'ka. 'Bha 'dho‑ kë, ‑a ‑gɛn ‑mü ꞊dhɛ ‑a ꞊trɔɔn 'yaa 'dhö, ‑a ‑wɔn 'gü 'yii 'dho 'wɔn ‑së kë mɛ 'bha ‑dhɛ. 10 'Mɛ 'ö 'dhang ‑bho Yesu "dhiʋ̈ ‑mɛ ‑nu "pɛ sië‑ 'gü, ‑dhio dɔ‑ ‑mɛ ‑ta ꞊dhɛ do ꞊plɛ ‑nu 'dhö ꞊kö ‑blɛɛsü kö ‑yö ö bo‑ ‑kë "dhʋ̈ ‑sü 'ka. ꞊Ya kë ꞊dhɛ 'yii i ‑wʋ ma tongtongdhö, ‑bhö ‑a kë kö ‑yö 'go 'dhang ‑bho Yesu "dhiʋ̈ ‑mɛ ‑nu kpö 'gü. 11 ‑A ‑gɛn ‑mü ꞊dhɛ bhii ꞊dede i‑ ‑dɔ ꞊dhɛ 'mɛ 'ö suu 'dhö "dhʋ̈ bha kö ꞊ya ö ꞊taa ꞊në‑ zun tɛan‑ ‑zian ‑gɔ, 'yö‑ këwɔn ‑nu ‑wa ‑zɔn ꞊dhɛ ꞊ya 'go zian ‑ta bha.

12 ‑Wʋ ‑totaamasü 'a dho‑ 'kpɔ i ‑bha yö ‑mü ꞊dhɛ: a ‑dho Atemasö waa‑ Tisikö bha‑ mɛ do bɔ i ‑dhɛ. 'Mɛ 'ö "dhʋ̈ bha ꞊ya ꞊loo i ‑dhɛ 'gü kö bhi ‑zë 'i nu "vaandhö kö 'i ‑kpan n ‑bha Nikopodhi ‑pö 'gü, ‑a ‑gɛn ‑mü ꞊dhɛ ‑yö n "piʋ̈ ꞊dhɛ 'a "nɛnɛ "tʋ̈ng ya‑ kë mü. 13 ‑Bhö i 'gü dɔ "gbɩɩ‑ kö 'tɔngdɔmɛ Zenasö waa‑ Apodhɔsö 'wo 'dho sië "ta 'ö‑ 'gü bha 'i‑ ‑nu ‑ta 'kun kö 'wa 'dho ‑kpla pë 'bha ‑wɔn 'gü ‑a ‑nu ‑bha "ta ‑zian bha‑ "dhiʋ̈. 14 'Wɔn 'ö "dhʋ̈ bha bhii do 'bhii 'dho kë‑ këmɛ 'ka. ‑A ‑gɛn ‑mü ꞊dhɛ kwa ‑bha mɛ ‑nu 'wo mü 'pö bha‑ ‑dhɛa ‑bha kö ‑wo gbaɔ‑ ‑sü draan‑ 'pö kö ‑wo mɛ ‑nu ‑mawɔn 'dhɛ 'ö "vaandhö ‑wɔn 'ka ‑a ꞊yaɔn, kö‑ ‑nu ‑bha ‑tosɛa ‑yö mɛ ‑nu ‑zʋ 'kun 'pö.

15 'Dhang ‑bho Yesu "dhiʋ̈ ‑mɛ ‑nu 'wo ‑dhɛ ya‑ 'gü ꞊wa i ꞊tua bho. 'Ya 'dhang ‑bho Yesu "dhiʋ̈ ‑mɛ ‑nu 'ö yi ‑dhɔ ‑ya ‑nu ‑kë 'pö kwa ‑bha ‑kplü ‑a ‑bha ‑sü ‑kë do ‑sü ‑wɔn 'gü, 'wo i "piʋ̈ mü bha‑ ‑nu ꞊tua bho 'pö 'gbɛ.

Atanna ‑bha 'dhuë‑ ‑yö mɛ ꞊gban ka 'kun!