18
Imocac ngadeau hemba angero mong garengyunuudeac uayoac nga kuctoa metarec, ye kurumennunac mau yeac kperagingo bangec mekperagiec. 2-3 Mekperagiu enacudumengtoayango kucgoc yofi arohoec,
“Babirongtoa ye makpema hadehade yeneac amabangec nga asu wonongnginagoc sasawa amma neng sasawa mangac manganea wonongnginagoc, yeneac amabangec fingerec.
Yeac kaisero fakayaac waindoku bangeha bangeha ngicngac sasawa yeni imoc negec. Bangecac ngictau yeni yegoc serofaka anggec nga bangecac emekeng emehaac ngickuneng yeni yeac kuc nga finactoa gombunga uaya kpac, ihacnac finactoanginagoc anggec.”
4-5 Anu negemba kurumennunac enacudumeng mongngo yofi deec,
“Ngicngacfocna, yeac kopocsicgoc mi anggecde nga kpendzenga mi kpegecdeac ngeni yearunac wama kenggec.
Yeac kopocsicngo kurumennungoc heiengkefu Anutungo imoc negensima kecde. Nga yeng ngeni ngemmeec, ngeni imocac turunga ifi meremmima angammemeyaacsoc naso yohockang amma migec. Nga ye kpakenec yerecgeec, imohai noc wiac tarec negemma ngeneng naso yohockang yerecgemigec. Ifi anu ye yengena sebia meemma finac nga kekec uaya kpac, imohai faiemeec, imocac sirihau kpendzeng nga ubahodung migec. Ye ubeau yofi dekecde, ‘Ni hodzec kpac, ni ngactau kecma ubahodung naric mi negembade.’ Imocac amma uameme mocguac manau homec nga ubahodung amma here homehome hanahemima yeac witiau kpendzeng ifia fingeru ngac ye gerecfu dzeude. Imoc yofiac, Kebu Anutu ye kuhagoc, yeac faka isinggema foraya desiec.
Nga bangecac ngictau ngac yegoc serofaka angkecgec amma finactoa nga kekec uaya kpac mekecgec, yeni gerehaac hosuc hemma yeac kiacsonggong anggecde. 10 Yeni yeac kpendzenggac kengec amma hereau yombong namma yofi degecde,
‘Ge aua mocguac manau hanahema yoacfu faifaiguac forayaga bic hadacde. Imocac amma yei yei Babirong, ge taongtoa nga taong kucgagoc.’
11 Nga bangecac emekeng emehangic yeni finacngina wageu faiandae, imoc mongngo monggoc mi bummeudeac yeac amma kiacsonggong anggecde. 12 Finac goa, gol nga siriwa amma hoc seria nga gombunga nga kubu buma kuneng amma wamba gombunga siricngina giweng giweng nga kpaua amma hiring harang. Nga ic sasawa homuna gombunga amma wiac sasawa erefanggac baihango memea nga wiac hania hania ic seria buma kunengngo memea amma kopango nga aiengngo memea nga hoc seria nga kibia gombunga wiac sasawa imocngo memea. 13 Imoc mosoki nga wiac hosuc homung kerengagoc nga kerecdoku homuna gombunga nga hosuc homuna gombunga kendo isoc seria amma waingdoku nga kerecdoku nga flawa uuha nga wit gbomea. Burumaka nga rama amma becosic nga keretac. Nga ngicngac sebi nga ubaonganginagoc momoc wanac megec, imoc sasawa wagenginau wakema kengha anggec.
14 Amma geac ubasebigango wiac forayaac ammikefec, imocngo waguma wiac sasawa gombunga kibikperaginginagoc, imoc gearunac bic woraec. Worau ifia monggoc mi meficgegecde.
15 Ifi anu emekeng emehangic yeni singtoangacngo meficyunuu wiac sasawa yomoc faima finactoanginagoc anggec, yeneng yeac kpendzenggac kengec amma hereau yombong namma kiacsonggong anggecde. 16 Amma yofi degecde,
‘Yei yei taongtoa, ge wamba gombunga giweng giweng nga kpauc kpauc nga gol nga hoc seria buma kuneng, amma kubu buma kuneng, imocngo faifaia heidang.
17 Imoc aua mocguac manau finactoa sasawa gerecngo memanganeu kpac andarec.’ Amma wage kisang kisang sasawa nga yeneac bagenginau wageu ua meandae amma ngicngac sasawa kondunnu ua meandae, yeni hereau namma 18 yeac gerecac hosuc hemma yofi dema kpacgec,
‘Taongtoa ifia mong mi fede, kpac.’
19 Yeni orucnginau sendung ukuma kiacsonggong amma kpacma degec,
‘Ye aua mocguac manau gerecngo memanganeu kpac anecac amma, yei yei taongtoa. Nga yeac ngicngac sasawa wagenginagoc kondunnu kengandae, yeni yearunac finactoanginagoc anggec.’
20 Anutungo ngeneac turunga yeac witiu faiecac amma kurumeng nga kpetiac areng kecdae nga aposoro amma profete, ngeni yeac amma sogaibisia.”
21 Anu angero kuhagoc mong, yeng dzamandzingtoa mong mema kondunnu ukuma yofi deec,
“Yeni Babirong taongtoa gereagoc kondunnu ifi ukugec monggoc naric mi meficgegecde. 22 Ukugec gitakpekpe nga yegec heihei nga kungac fifi fifi nga trampet fifi fifi, imoc geac manau naric monggoc mi negenggecde. Nga marikibi hania hania imocac uamemengic, yeni geac manau monggoc naric mi kecgecde. Nga hocfu flawa uuha medzameandae, imocac udumeng geac manau monggoc naric mi negenggecde. 23 Geac manau kifaac kperagia monggoc naric mi kperagiude. Nga ngicngac meturangemebeso andape, yereac ubangerecac arohoandae, udumeng ifia geac manau monggoc naric mi negenggecde. Ge mosoc fakagango bangeha bangeha imocac ngicngac sasawa uba mesufu ayemmenec. Imocac amma geac emekeng emehangic yeni bangecac ngickuneng kecgec. 24 Nga taongtoa imocac manau profete nga ngicngac kpetiac amma ngicngac sasawa bangecfu yunuhomegec, yeneac sacngina meficgegec.”