16
Tımothy, Paul eyıts'ǫ Sılas goxè ajà
1 Paul, kǫ̀ta Derbe eyıts'ǫ kǫ̀ta Lystra nàhtła, Nǫ̀htsı̨ wecheekeè ı̨łè Tımothy wìyeh ekǫ nàdè. Tımothy wemǫ Israel got'ı̨į̀ hǫt'e eyıts'ǫ wegha ehkw'ı-ahodı hǫt'e, hanìkò wetà Greece got'ı̨į̀ hǫt'e.
2 Kǫ̀ta Lystra eyıts'ǫ kǫ̀ta Iconıum gots'ǫ Nǫ̀htsı̨ wecheekeè Tımothy ghǫ nezı̨į̀ gogede.
3 Paul, Tımothy edexè kǫ̀ta ayele ha nıwǫ, eyıt'à Moses wenàowoò k'ę̀ę̀ wekwǫ̀ k'e nàat'a ayį̀į̀là. Israel got'ı̨į̀ eyı nàgedèe sìı Tımothy wetà Greece got'ı̨į̀ ne gık'èezǫ t'à ayį̀į̀là.
4 Kǫ̀ta yàgòlaa gota k'egedè ekò Zezì wecheekeèdeè eyıts'ǫ k'aodèe gı̨ı̨lı̨ı̨ Jerusalem ekǫ nàowo dǫ gha gèhtsı̨ ı̨lèe sìı k'èagı̨ı̨t'e ha gògedı.
5 Eyıt'à Nǫ̀htsı̨ wecheekeè hazǫǫ̀ gınì nàtsoò ajà, eyıts'ǫ dzę taàt'eè dǫ łǫ gotagı̨ı̨de.
Paul wenazhıı xègoèht'į̀
6 Paul eyıts'ǫ dǫ gıxè at'ı̨ı̨ sìı Phrygıa nèk'e eyıts'ǫ Galatıa nèk'e hazǫǫ̀ k'egıadè, hanìkò Yedàyeh Nezı̨ı̨ Asıa nèk'e godı nezı̨ı̨ dǫ ts'ǫ̀ agı̨į̀là agǫ̀ǫ̀là-le.
7 Mysıa nèk'e ts'ǫ̀ nıwà-le nègı̨ı̨de ekò Bıthynıa nèk'e agede ha hogeèhdzà hanìkò Zezì wets'ǫ Įnì Degaı ekǫ agejà-le agǫ̀ǫ̀là.
8 Eyıt'à Mysıa nèk'e goxa geèhde, kǫ̀ta Troas ts'ǫ̀ agejà.
9 Eyı toò k'e Paul wenazhıı xègoèht'į̀. Macedonıa nèk'e gots'ǫ dǫ nàwo xè yeghǫnàdaetì, hadı, “Gonèk'e Macedonıa ts'ǫ̀ anede, gots'ànedı,” yèhdı, wenazhıı hagòjà.
10 Paul wenazhıı xègoèht'į̀ tł'axǫǫ̀ ekòet'ıì Macedonıa nèk'e ts'ǫ̀ ts'eedè ha sınìts'ı̨ı̨de. Nǫ̀htsı̨ hagòhdı wek'èts'eezǫ t'à, ekǫ godı nezı̨ı̨ dǫ gıghàts'eɂà ha ts'eède.
Lydıa wegha ehkw'ı-ahodıì ajà
11 Kǫ̀ta Troas gots'ǫ ts'eèɂe, kǫ̀ta Samothrace ts'ǫ̀ ehkw'ıì ats'ejà. Ek'èdaedzęę̀ k'e kǫ̀ta Neapolıs ts'ǫ̀ ts'eède.
12 Eyı gots'ǫ kǫ̀godeè Phılıppı ts'ǫ̀ ats'ejà. Roman got'ı̨į̀ eyı kǫ̀godeè gogèhtsı̨ ı̨lè. Macedonıa nèk'e hazǫǫ̀ gogha kǫ̀godeè wet'àaɂà hǫt'e. Whaà-lea gots'ǫ̀ eyı nàts'ı̨ı̨dè.
13 Nǫ̀htsı̨ Dzęę̀ k'e kǫ̀ta gà deh nıɂàa ekǫ dǫ yagehtı ha sǫnı ts'ı̨ı̨wǫ t'à, ekǫ ts'ǫ̀ ats'ejà. Ts'èko mǫ̀hdaa eyı łą̀ą nègı̨ı̨dee sìı gıxè ts'eèhkw'e eyıts'ǫ gıts'ǫ̀ gots'ı̨ı̨de.
14 Ts'èko ı̨łè eyı goèhkw'ǫǫ sìı Lydıa wìyeh. Eyı ts'èko kǫ̀godeè Thıyatıra gots'ǫ ɂehtł'ı̨-dek'oo weghǫ nàedìı dǫǫ̀ elı̨ eyıts'ǫ Nǫ̀htsı̨-ghàtsį̀edıı-dǫǫ̀ elı̨. Eyı ts'èko sìı Paul dàdıı yeèhkw'ǫ t'à gots'ǫ̀ K'àowo wegha ehkw'ı-ahodı ayį̀į̀là.
15 Eyı ts'èko ededı̨ eyıts'ǫ dǫ yekǫ̀ nàgedèe sìı gık'ètaìdzǫ, eyı tł'axǫǫ̀ wekǫ̀ ts'ǫ̀ agǫ̀ǫ̀là, hadı, “Gots'ǫ̀ K'àowo segha ehkw'ı adı aht'e seahwhǫ nı̨dè sekǫ̀ aaht'e,” gòhdı. Goghǫ daèhnǫ t'à wekǫ̀ ts'ǫ̀ ats'ejà.
Paul eyıts'ǫ Sılas gıdaàtǫ
16 Įłàà Israel got'ı̨į̀ edı̨į̀ yagehtıı k'è gòɂǫǫ ts'ǫ̀ ts'adè ekò t'eekoa dǫ nàyeèhdìı sìı goghaetła. Įnìłı̨ı̨ wets'ǫ̀-èlı̨ t'à nadąą̀ k'eet'į̀. Nadąą̀ gode t'à, wets'ǫ̀ k'àhogedè gı̨ı̨lı̨ı̨ sìı gha sǫǫ̀mba łǫ ehtsı̨.
17 Eyı t'eekoa Paul eyıts'ǫ goxı̨ gok'èè k'etło xè hadıì yaìzeh, “Dıı dǫ sìı Nǫ̀htsı̨ wenahk'e gǫ̀hłı̨-le wecheekeè agı̨ı̨t'e. Dànì edaxàts'eedè ha sìı naxıts'ǫ̀ hagedı ha,” hadıì yaìzeh.
18 Łǫ dzęę̀ ts'ǫ̀ hadı xè gok'èè k'eda. Nǫǫdea Paul wegha dìì agòjà t'à yets'ǫ̀ naɂa gà ı̨nìłı̨ı̨ ts'ǫ̀ hadı, “Zezì wıızì dahxà t'eekoa weyìı gots'ǫ xàı̨tłe!” yèhdı. Ekòet'ıì ı̨nìłı̨ı̨ wets'ǫǫ̀ ajà.
19 T'eekoa ts'ǫ̀ k'ahogedè gı̨ı̨lı̨ı̨ sìı k'achı̨ gıt'à sǫǫ̀mba gehtsı̨ ha-le gık'èezǫ t'à Paul eyıts'ǫ Sılas dagogıachì. Kǫ̀ta k'aodèe ts'ǫ̀ agogele ha t'asìı nàedìı k'è yàgòlaa ekǫ ts'ǫ̀ gogeèwa.
20 K'aodèe nadąą̀ nègogį̀ı̨wa, hagedı, “Dıı dǫ Israel got'ı̨į̀ agı̨ı̨t'e, gıts'ıhɂǫ̀ kǫ̀ta hazǫǫ̀ dǫ xè nàdahoowo.
21 Goxı̨ Roman got'ı̨į̀ ats'ı̨ı̨t'ee sìı gonàowoò k'èch'a dǫ hoghàgogeehtǫ,” gedı.
22 Hagedı t'à dǫ łǫ Paul eyıts'ǫ Sılas k'èch'a gogedeè agejà. Eyıt'à k'aodèe gıyatıì k'e gıgoht'ǫǫ̀ gok'e nàgį̀ı̨hdlah gà nàgogı̨ı̨hkwa.
23 Hòtł'ò nàgogı̨ı̨hkwa tł'axǫǫ̀ dǫ-danìı̨laa-kǫ̀ ts'ǫ̀ agogį̀į̀là. Dǫ-danìı̨laa-k'èdìı-dǫǫ̀ hotıì nezı̨į̀ goxoehdı ha gıìhdı.
24 Hagedı t'à kǫ̀ goyìı xàts'etła ha dìì sìı nègogį̀ı̨wa, eyıts'ǫ gıkechı̨į̀ dechı̨ t'à wedaàdoò agı̨į̀là.
25 Totanı ekìıyeè k'e Paul eyıts'ǫ Sılas yagehtı xè Nǫ̀htsı̨ ts'ǫ̀ gejı̨, dǫ eyıì-le gıdanìı̨laa sìı gogeèhkw'ǫ.
26 Hǫtsaa dèè hòtł'ò nàgoèhdǫ t'à yìetł'aà hazǫǫ̀ nàedaà ajà. Ekòet'ıì enìı̨tǫ hazǫǫ̀ ehghàà enìxànııtł'ı, eyıts'ǫ dǫ hazǫǫ̀ satsǫ̀tł'ıì gık'e whelaa sìı nàı̨tł'ı.
27 Dǫ-danìı̨laa-k'èdìı-dǫǫ̀ ts'ı̨ı̨wo. Dǫ-danìı̨laa-kǫ̀ enìı̨tǫ hazǫǫ̀ enìxàı̨la yaɂı̨ ekò behcho edets'ǫ̀ xàechì, dǫ hazǫǫ̀ xàtı̨mǫgeède sǫnı nıwǫ t'à ełaàdìwı ha k'ehoɂa.
28 Hanìkò Paul yets'ǫ̀ whezeh, hadı, “T'asadı̨ı̨le-le, hazǫǫ̀ jǫ ts'eèhkw'e hǫt'e,” yèhdı.
29 Eyıt'à dǫ-danìı̨laa-k'èdìı-dǫǫ̀, ek'aèk'ǫ sets'ǫ̀ ààhchı, gòhdı. Ekòet'ıì goyaèhtła gà, dèhyeh t'à Paul eyıts'ǫ Sılas gogà nàgòı̨hgè.
30 Xàgoèwa tł'axǫǫ̀ dagoehke hadı, “K'àowo, edaxàseetè gha ayìı dàhłe ha?” gòhdı.
31 Gıts'ǫ̀ hadı, “Zezì gots'ǫ̀ K'àowo ehkw'ı adı neewǫ nı̨dè edaxàneetè ha, eyıts'ǫ nèot'ı̨ nexè nàgedèe sı edaxàgeedè ha,” gıìhdı.
32 Eyıt'à ededı̨ eyıts'ǫ wekǫ̀ dǫ nàdèe sìı gots'ǫ̀ K'àowo weyatıì t'à gots'ǫ̀ gogı̨ı̨de.
33 Totanı ekìıyeè k'e dǫ-danìı̨laa-k'èdìı-dǫǫ̀ whatsǫǫ̀ nègòı̨wa gà gokaà k'enaı̨htso. Eyı tł'axǫǫ̀ ededı̨ eyıts'ǫ wèot'ı̨ hazǫǫ̀ ekòet'ıì gık'ètaìdzǫ.
34 Dǫ-danìı̨laa-k'èdìı-dǫǫ̀ Paul eyıts'ǫ Sılas edekǫ̀ ts'ǫ̀ nagòowa, eyıts'ǫ shègetı̨ ha t'asìı goghàı̨dì. Nǫ̀htsı̨ yegha ehkw'ı adıì ajà t'à sıì wınà, wèot'ı̨ sı hazǫǫ̀ gınà.
35 K'omǫǫ̀dǫǫ̀ dzęh agòjà ekò kǫ̀ta k'aodèe edecheekeè dǫ-danìı̨laa-k'èdìı-dǫǫ̀ ts'ǫ̀ gogeèhɂà. Yatı gıdanìı̨ɂǫ hagedı, “Eyı dǫ xàgeedè agı̨ı̨le,” gıìhdı.
36 Eyıt'à dǫ-danìı̨laa-k'èdìı-dǫǫ̀ Paul ts'ǫ̀ hadı, “Kǫ̀ta k'aodèe, nı̨ eyıts'ǫ Sılas xàahdè ha naxègedı. Eyıt'à naahdè ha dìì-le. Naxıxè sìghà welè,” gòhdı.
37 Hanìkò Paul kǫ̀ta k'aodèe cheekeè ts'ǫ̀ hadı, “Gosınìyagı̨ı̨htı-le et'ıì dǫ daà nàgogı̨ı̨hkwa. Roman got'ı̨į̀ k'ę̀ę̀ goıtà kò dǫ-danìı̨laa-kǫ̀ ts'ǫ̀ agogį̀į̀là. Ekìı hanì dǫ naàhtǫ nagogeehɂà ha gı̨ı̨wǫ nì? Į̀le, ededı̨ gots'ǫ̀ gııdè gà xàgogııwa,” gòhdı.
38 Kǫ̀ta k'aodèe cheekeè Paul dàdıı sìı hazǫǫ̀ k'aodèe ts'ǫ̀ hagedı. K'aodèe, Paul eyıts'ǫ Sılas, Roman got'ı̨į̀ k'ę̀ę̀ gııtà gok'èhogeèhzà ekò geèhyeh lagejà.
39 K'aodèe, Paul eyıts'ǫ Sılas ts'ǫ̀ dǫ nezı̨ı̨ gı̨ı̨lı̨ ha gı̨ı̨wǫ t'à dǫ-danìı̨laa-kǫ̀ gots'ǫ xàgogeèwa, ts'èwhı̨į̀ kǫ̀ta ts'ǫǫ̀ naahdè gògedı.
40 Paul eyıts'ǫ Sılas dǫ-danìı̨laa-kǫ̀ gots'ǫ xàgeède tł'axǫǫ̀ Lydıa wekǫ̀ ts'ǫ̀ t'akwełǫ̀ǫ̀ agejà. Ekǫ Nǫ̀htsı̨ wecheekeè xè gıakw'è. Yatı nezı̨ı̨ t'à nàgetsoò agogį̀į̀là tł'axǫǫ̀ nageèhde.