22
1 “Sèot'ı̨ı̨ eyıts'ǫ goɂǫhdaà yàahłı̨ı̨ sìı, edegha gohde ha t'à seàhkw'ǫ,” gòhdı.
2 Aramaıc gıyatıì k'ę̀ę̀ godee gıìkw'o ts'ǫ̀et'ıì ts'èwhı̨į̀ agı̨ı̨t'eè agejà. Eyıt'à Paul gots'ǫ̀ goı̨de, hadı,
3 “Sı̨ Israel got'ı̨į̀ aht'e, Cılıcıa nèk'e, kǫ̀ta Tarsus segǫ̀hłı̨, hanìkò jǫ Jerusalem deehzhǫ hǫt'e. Dǫ-hoghàehtǫǫ-deè, Gamalıel wìyeh, gocho gınàowoò hazǫǫ̀ hoghàseèhtǫ hǫt'e. Eyıts'ǫ dıì dànì gocho gınàowoò k'ę̀ę̀ Nǫ̀htsı̨ ghǫ hòtł'ò dahwhǫǫ sìı sı̨ sı haht'e ı̨lè.
4 Dǫ Zezì wenàowoò k'ę̀ę̀ agı̨ı̨wǫǫ sìı dagìıhɂa eyıts'ǫ mǫ̀hdaa ełaàgìıhdè ı̨lè. Dǫzhìı eyıts'ǫ ts'èko dǫ-danìı̨laa-kǫ̀ ts'ǫ̀ agèhłà ı̨lè.
5 Yahtıı-wet'àaɂàa-deè eyıts'ǫ k'aodèe gı̨ı̨lı̨ı̨ sìı eyı gık'èezǫ t'à seghǫ gogede ha dìì-le. Kǫ̀ta Damaskus k'aodèe gı̨ı̨lı̨ı̨ ts'ǫ̀ segha gı̨ı̨tł'è ı̨lè. Damaskus ekǫ Zezì wenàowoò k'ę̀ę̀ agı̨ı̨wǫǫ sìı dageechı gà Jerusalem gıxè hoìla ha ekǫ ts'ǫ̀ agehłe ha dehwhǫ ı̨lè.
6 “Hanìkò dzętanı ekìıyeè k'e eyı kǫ̀ta ts'ǫ̀ nıwà-le naehtłe ekò hǫtsaa yak'e gots'ǫ semǫǫ̀ hazǫǫ̀ dzęh agòjà.
7 Dèè k'e ts'ǫ̀ nàehkw'o eyıts'ǫ sets'ǫ̀ gots'edeè hǫt'e, ‘Saul, Saul, dànìghǫ dasenèehɂa?’ sèts'edıì hǫt'e.
8 “ ‘Sets'ǫ̀ K'àowo amìı anet'e?’ dehsı̨.
“ ‘Nazareth got'ı̨į̀ Zezì aht'e. Sı̨ sìı dasenèehɂa hǫt'e,’ sèhdı.
9 Dǫ sexè aget'ı̨ı̨ sìı goxè dzęh agòjà gıaɂı̨ hanìkò sets'ǫ̀ gots'edee sìı gınıedì-le.
10 “ ‘Sets'ǫ̀ K'àowo, ayìı dàhłe ha neewǫ?’ dehsı̨.
“ ‘Nıį̀tła, kǫ̀ta Damaskus nàątła. Ekǫ ayìı dàąle ha sìı nets'ǫ̀ hagedı ha,’ sèhdı.
11 Sıì sexè dzęh agòjà t'à sedaà goìle ajà. Dǫ sexè aget'ı̨ı̨ sìı k'esegeehɂı̨ t'à kǫ̀ta Damaskus ts'ǫ̀ asegį̀į̀là.
12 “Dǫ ı̨łè Ananıas wìyeh sets'àèhtła. Eyı dǫ Moses wenàowoò k'èı̨t'e eyıts'ǫ Israel got'ı̨į̀ hazǫǫ̀ eyı nàgedèe sìı dǫ nezı̨ ne, gı̨ı̨hwhǫ.
13 Eyı dǫ segà nàwo xè hadı, ‘Sèot'ı̨ Saul, k'achı̨ k'enaı̨t'į̀,’ sèhdı. Ekòet'ıì segha xègoèht'į̀ anajà.
14 “Sets'ǫ̀ hadı, ‘Gocho Gınǫ̀htsı̨ dànıwǫǫ sìı wek'èı̨zǫ ha nìį̀hchì hǫt'e. Ehkw'ı Edaa Elı̨ı̨ sìı weneɂį̀ ha eyıts'ǫ weyatıì sı ı̨į̀kw'o ha, nìį̀hchì hǫt'e.
15 Ayìı neeɂı̨ı̨ eyıts'ǫ ayìı ı̨į̀kw'oo sìı wet'à dǫ hazǫǫ̀ ts'ǫ̀ goı̨de ha.
16 Hot'eè ayìı k'enaąɂı̨, nıį̀tła! Gots'ǫ̀ K'àowo wıızì t'à nek'ètaìdzı̨ ha eyıts'ǫ nehołı̨į̀ neghǫ nahoezhe ha,’ sèhdı.
17 “Jerusalem ts'ǫ̀ anahjà tł'axǫǫ̀ ekǫ Nǫ̀htsı̨kǫ̀-gocho gà yahtı ekò, k'achı̨ senazhıı xègoèht'į̀.
18 Gots'ǫ̀ K'àowo weehɂı̨ sets'ǫ̀ gode, hadı, ‘Jerusalem got'ı̨į̀ segodıì t'à gıts'ǫ̀ goı̨dee sìı gıgha ehkw'ı-ahodı-le t'à, ı̨whąą̀ Jerusalem gots'ǫǫ̀ naı̨tłe,’ sèhdı.
19 “Wets'ǫ̀ haehsı̨, ‘Sets'ǫ̀ K'àowo, Jerusalem got'ı̨į̀ ayìı dàhłàa sìı gık'èezǫ hǫt'e. Gıts'ǫ ełègehdèe-kǫ̀ gòlaa sìı gıta nàwhıhtła gà dǫ gıgha ehkw'ı-ahodıı sìı dǫ-danìı̨laa-kǫ̀ ts'ǫ̀ agèhłà ı̨lè.
20 Eyıts'ǫ kwe t'à Stephen ełaàgı̨ı̨hwho ekò sìghà aget'ı̨ dehwhǫ t'à dǫ gıgha gıɂeè k'èhdì ı̨lè.’
21 “Hanìkò gots'ǫ̀ K'àowo sets'ǫ̀ hadı, ‘Nıį̀tła, nıwàa nèk'e dǫ eyıì-le xàɂaa gıts'ǫ̀ anehłe ha,’ sèhdı,” Paul hadıì dǫ hazǫǫ̀ ts'ǫ̀ goı̨de.
Paul Roman got'ı̨į̀ gha wııtà
22 Dǫ hazǫǫ̀ hagǫǫwa gots'ǫ̀ Paul gı̨į̀hkw'ǫ̀, hanìkò eyıì-le dǫ xàɂaa gıts'ǫ̀ ahde ha, gòhdı ts'ǫ̀et'ıì dǫ yagìzeh xè hagedı, “Eyı dǫ weweè aahłe! Ełaàwèahwhı!” gedıì yagìzeh.
23 Sıì gık'èch'a t'à yagìzeh xè edeɂeè yı̨ı̨ɂǫ̀ǫ̀ geèwa gà ehtł'è ı̨dòo yagìts'ò.
24 Hagòjà ts'ıhɂǫ̀ eghǫǫ-dǫǫ̀-gha-k'àowo weyatıì k'e Paul eghǫǫ-dǫǫ̀-kǫ̀ goyageèhchì. Dànìghǫ dǫ Paul ts'ǫ̀ yagìzeh sìı yegòhɂà ha nıwǫ t'à, nàgeehkwa gà dageehke ha gòhdı.
25 Hanìkò Paul nàgeehkwa ha dageèzhà ekò k'àowo-k'è-whedaa yegà nàwoo sìı ts'ǫ̀ hadı, “Roman got'ı̨į̀ gha wııtàa sìı weghǫnàyaetì-le-t'ıì nàwı̨ı̨hkwa, eyı asį̀į̀ ehkw'ı ne?” yèhdı.
26 K'àowo-k'è-whedaa eyı ghǫ ıìkw'o ekò, eghǫǫ-dǫǫ̀-gha-k'àowo ts'ǫ̀ èhtła, Paul dàdıı sìı yets'ǫ̀ hadı, “Dıı dǫ Roman got'ı̨į̀ gha wııtà ne t'à, dàwı̨ı̨le ha?” yèhdı.
27 Eghǫǫ-dǫǫ̀-gha-k'àowo Paul ts'ǫ̀ èhtła, dayeehke, “Sets'ǫ̀ haı̨dı, Roman got'ı̨į̀ anet'e nì?” yèhdı.
“Hęɂę, Roman got'ı̨į̀ gha sııtà ne,” Paul yèhdı.
28 Eghǫǫ-dǫǫ̀-gha-k'àowo hadı, “Sǫǫ̀mba łǫ k'èxa Roman got'ı̨į̀ whıhłı̨ hǫt'e,” hadı.
Paul yets'ǫ̀ hadı, “Ekò sı̨ segǫ̀hłı̨ gots'ǫ Roman got'ı̨į̀ aht'e,” yèhdı.
29 Dǫ Paul dageehke ha ı̨lèe sìı hǫtsaa gıts'ǫǫ̀ naèhde. Eghǫǫ-dǫǫ̀-gha-k'àowo, dǫ Roman got'ı̨į̀ gha wııtàa sìı satsǫ̀tł'ıì t'à daetł'ı̨į̀ ayį̀į̀là yenıedì t'à, dèhyeh lajà.
Paul wesınìyaetı gha k'aodèe nadąą̀ nàwo
30 Ek'èdaedzęę̀ k'e eghǫǫ-dǫǫ̀-gha-k'àowo dànìghǫ Israel got'ı̨į̀ Paul k'e nìdahogeeɂàa sìı yek'èezǫ ha nıwǫ t'à dǫ-danìı̨laa-kǫ̀ gots'ǫ xàyeèhchì. Yahtıı-gha-k'aodèe eyıts'ǫ Israel gha k'aodèe gı̨ı̨lı̨ı̨ sìı hazǫǫ̀ łą̀ą geèhkw'eè agǫ̀ǫ̀là. Eyı tł'axǫǫ̀ Paul gonadąą̀ tanı nàwoò ayį̀į̀là.