10
Zezì-Krı ı̨łàà zǫ dǫ gha ełaı̨wo
1 Moses wenàowoò sìı ı̨daà t'asìı wedeèdlı̨ı̨ nèhòkw'ı gha ekìı weɂı̨zhı̨į̀ lanì hǫt'e, eyı nàowo sìı xàè wedeèdlı̨ı̨ k'aɂį̀ hǫt'e. Hanì ts'ıhɂǫ̀ xo taàt'eè tıts'aàdìı Nǫ̀htsı̨ gha ełaàgıhdee sìı wet'à dǫ Nǫ̀htsı̨ ts'ǫ̀ agede gha deghàà degaı agedle ha nıìle.
2 Wet'à dǫ deghàà degaı ade ha nı̨dè tıts'aàdìı Nǫ̀htsı̨ gha ełaàgıhde ghǫnaget'è ha-le ı̨lè. Dǫ hazǫǫ̀ gıhołı̨į̀ gıghǫ whìle ade ha ı̨lè, eyıts'ǫ edehołı̨į̀ k'egı̨ı̨lı̨ ha-le ı̨lè.
3 Hanìkò xo taàt'eè Nǫ̀htsı̨ ts'ǫ̀ tıts'aàdìı k'egeehk'ǫ̀ǫ sìı wet'à t'aats'ǫǫ̀ edehołı̨į̀ nagedì gha hǫt'e.
4 Ejıezǫǫ̀ eyıts'ǫ sahzǫǫ̀ gıdoò t'à dǫ-hołı̨į̀ whìle adle ha nıìle.
5 Eyıt'à Zezì-Krı dıı nèk'e ts'ǫ̀ ajà ekò, Nǫ̀htsı̨ ts'ǫ̀ dıı hadı,
“Dǫ tıts'aàdìı nets'ǫ̀ ełaàgehde eyıts'ǫ t'asìı neghàgeedıı sìı weneewǫ nıìle, hanìkò dǫzhį̀į̀ t'à ehdaà asèneelà.
6 T'asìı nets'ǫ̀ gık'eehk'ǫ̀ǫ eyıts'ǫ gıhołı̨į̀ k'èxa tıts'aàdìı ełaàgehdee sìı weghǫ sìghà neewǫ nıìle.
7 Eyıt'à nets'ǫ̀ dıı haehsı̨, ‘Seghǫ dek'eèhtł'è k'ę̀ę̀ jǫ nenadąą̀ nàhwho. Senǫ̀htsı̨, nınì k'ę̀ę̀ eghàlaehda ha jǫ nèehtła,’ dehsı̨,” yèhdı.
8 T'akwełǫ̀ǫ̀ dıı hadı, “Tıts'aàdìı nets'ǫ̀ wek'eek'ǫ̀ǫ, t'asìı ts'eedèe nets'ǫ̀ wek'eek'ǫ̀ǫ, eyıts'ǫ hołı̨ı̨ k'èxa tıts'aàdìı ełaàgehdee sìı weghǫ sìghà neewǫ nıìle,” (Moses wenàowoò k'ę̀ę̀ hanì eghàlageeda ha hòɂǫ kò).
9 Eyı tł'axǫǫ̀ dıı hadı, “Jǫ ts'atà whıhda, nınì k'ę̀ę̀ eghàlaehda ha jǫ nèehtła,” dı. Hadı t'à nakenahòdlı̨ı̨ wezǫą wedę ayį̀į̀là, eyıts'ǫ nakenahòdlı̨ı̨ wegòò whehtsı̨.
10 Nǫ̀htsı̨ wınì k'ę̀ę̀ Zezì-Krı ı̨łàà zǫ gogha ełaı̨wo t'à welǫ whìle ts'ǫ̀ degaı ts'ı̨ı̨lı̨į̀ agǫ̀ǫ̀là.
11 Dzę taàt'eè yahtıı hazǫǫ̀ Moses wenàowoò k'ę̀ę̀ Nǫ̀htsı̨ ladà k'e edılaà ghàlageeda. Eyı nàowo k'ę̀ę̀ k'ègok'e Nǫ̀htsı̨ ts'ǫ̀ t'asìı k'egeehk'ǫ̀, hanìkò wet'à dǫ gıhołı̨į̀ whìle ade hǫı̨lı̨ ha nıìle.
12 Hanìkò dıı yahtıı-wet'àaɂàa-deè sìı welǫ whìle ts'ǫ̀ gha ı̨łàà zǫ gohołı̨į̀ k'èxa Nǫ̀htsı̨ ghàdìtı̨ tł'axǫǫ̀, Nǫ̀htsı̨ gà nàgòts'ehnèe wheda.
13 Ekò gots'ǫ wets'ǫ̀ xànegı̨ı̨ɂa gı̨ı̨lı̨ı̨ sìı goghǫį̀hnè awedle gha naèhɂı̨ hǫt'e.
14 Įłàà zǫ dǫ gha ełaı̨wo t'à dǫ degaı agohɂı̨ı̨ sìı welǫ whìle ts'ǫ̀ deghàà degaı gı̨ı̨lı̨į̀ agǫ̀ǫ̀là.
15 Yedàyeh Nezı̨ı̨ ededı̨ sı eyı ghǫ gots'ǫ̀ gode hǫt'e. T'akwełǫ̀ǫ̀ dıı hadı:
16 “Naxıgha K'àowo dıı hadı: Įdaà nı̨dè hanì gıxè nakenahohtsı̨ ha. Senàowoò gıdzeè yìı wheɂǫ ahłe ha, eyıts'ǫ gınì yìı senàowoò dek'eèhtł'è ahłe ha,” hadı.
17 Eyı tł'axǫǫ̀ dıı hadı,
“Gıhołı̨į̀ eyıts'ǫ senàowoò k'èagı̨ı̨t'e-le sìı wenahdì ha-le,” hadı.
18 Nǫ̀htsı̨ dǫ-hołı̨į̀ nahoı̨la ne t'à, hołı̨ı̨ k'èxa k'achı̨ tıts'aàdìı ełaàwı ha hòɂǫ-le agòjà.
T'aats'ǫǫ̀ weyatıì ts'ıtǫ̀ ha hǫt'e
19 Eyıt'à sèot'ı̨ı̨, Zezì wedoò dahxà eyı Denahk'e Degaı K'è gòɂǫǫ goyats'eedè gha goghàhòt'ǫǫ sìı sıì gogha ehkw'ı-ahodı hǫt'e.
20 Nàowo wegòò wet'à ts'eedaa sìı ts'ǫ̀ dexats'eède hǫt'e, gots'ǫǫ̀hk'e enìı̨t'ı tanı ts'ǫ̀ tàı̨dlà t'à, eyı sìı Zezì wezhį̀į̀ lanì hǫt'e.
21 Nǫ̀htsı̨ wekǫ̀ gha yahtıı-wet'àaɂàa-deè gots'ǫ ne t'à,
22 hotıì gogha ehkw'ı-ahodı eyıts'ǫ godzeè ehkw'ıı xè Nǫ̀htsı̨ ts'ǫ̀ ats'ııde. Wedoò godzeè k'e adlà t'à k'achı̨ hołı̨ı̨ edek'e nìdahots'eeɂà ha-le, eyıts'ǫ yak'e gots'ǫ tı t'à gok'enaatso hǫt'e.
23 Nǫ̀htsı̨ sìı t'aats'ǫǫ̀ edeyatıì k'èdì ne t'à, goınì nàtsoo xè t'aats'ǫǫ̀ weyatıì ts'ıtǫ̀ ha hǫt'e.
24 Eyıts'ǫ ełeghǫnets'eètǫ gha eyıts'ǫ ełets'ǫ̀ nezı̨į̀ eghàlats'eeda gha godzeè nàtsoò ats'ııle.
25 Łą̀ą ełènats'eedè ghǫ nats'ııt'è-le. Dǫ mǫ̀hdaa haget'ı̨-le agejà. Hanìkò godzeè nàtsoò ałets'ehɂı̨ gha t'aats'ǫǫ̀ ełènats'ııdè; nǫǫde dzęę̀ ts'ǫ̀ nıwà-le t'à denahk'e t'aats'ǫǫ̀ hats'et'ı̨ welì.
26 Nàowo ehkw'ıı wek'èts'eezǫǫ̀ agòìdlà kò k'èdaà hołı̨ı̨ hots'ehtsı̨ ha ts'ı̨ı̨wǫ nı̨dè, gohołı̨į̀ k'èxa t'asìı Nǫ̀htsı̨ ghàts'eɂà ha sìı gǫ̀hłı̨-le agode ha,
27 eyıt'à dǫ Nǫ̀htsı̨ dzagı̨ı̨hwhǫǫ sìı Nǫ̀htsı̨ nàgoehkwa ha eyıts'ǫ kǫ̀ nàtsoo t'à gık'eek'ǫ̀ ha gıdawheɂǫ t'à sıì geejı̨ hǫt'e.
28 Dǫ Moses wenàowoò k'èı̨t'e-le nı̨dè eteweèɂı̨-le ı̨lè; dǫ nàke hanì-le-ı̨dè dǫ taı gıdaà nàhòwoo sìı gık'e nìdahogį̀ı̨ɂǫ nı̨dè ełaàgıìhwhı ha hǫt'e.
29 Dǫ Nǫ̀htsı̨ Weza wegha t'asìı elı̨-le, wedoò t'à nakenahòdlı̨ı̨ t'à wehołı̨į̀ whìle adlàa sìı wegha wet'àaɂà-le nı̨dè, eyıts'ǫ Nǫ̀htsı̨ wesǫnıwǫ t'à Yedàyeh Nezı̨ı̨ goghǫ̀t'ǫǫ sìı yek'èch'a eghàlaı̨dà nı̨dè eyı dǫ sìı denahk'e hòtł'ò nàweekwa ha hǫt'e.
30 Nǫ̀htsı̨ wek'èts'eezǫǫ sìı ededı̨ dıı hadı, “Dǫ nàgeehkwa ha sìı sı̨ sets'ǫ̀ hoèlı̨ hǫt'e, eyıts'ǫ dǫ ekǫ-le hogehtsı̨ı̨ k'èxa ek'èt'à gıghàhoehɂà ha,” eyıts'ǫ k'achı̨ dıı hadı, “Gots'ǫ̀ K'àowo edets'ǫ dǫ gosınìyaehtı ha,” dek'eèhtł'è.
31 Nǫ̀htsı̨ edaa sìı nàgoehkwa ha nı̨dè sıì goxè hoìla ha hǫt'e.
32 Ek'èt'à kenaahdì, t'akwełǫ̀ǫ̀ Nǫ̀htsı̨ wegodıì wek'èhoahzà aahjà ekò, naxıxè hoìla kò ı̨łaà naxıgha ehkw'ı-ahodı xè ı̨łaà naxınì nàtsoò aahwhǫ ı̨lè.
33 Ǫhk'è dǫdaà t'asìı aahłı̨-le ts'ǫ̀ naxık'adageedè xè danaxegį̀ı̨hɂa ı̨lè. Eyıts'ǫ ǫhk'è dǫ hanì gıxè hoìlaa sìı gıxè aaht'ı̨ xè gıts'àahdı ı̨lè.
34 Dǫ gıdanìı̨laa sìı etegıahɂı̨ ı̨lè, eyıts'ǫ t'asìı naxıghǫ gį̀į̀hchì kò ı̨łaà naxınà ı̨lè, eyı wenahk'e t'asìı nezı̨ı̨ sìı, welǫ whìle ts'ǫ̀ naxıghaelı̨ ha wek'èahsǫ t'à.
35 Eyıt'à gots'ǫ̀ K'àowo weghǫ naxınì nàtsoo sìı wedę aahłe-le, hanì-ı̨dè wek'èxa Nǫ̀htsı̨ t'asìı nechàa naxıghàɂà ha.
36 Naxıxè hoìla kò ı̨łaà naxınì nàtso ha hǫt'e. Nǫ̀htsı̨ wınì k'ę̀ę̀ aahda tł'axǫǫ̀ nı̨dè naxıgha edeyatıì k'ę̀ę̀ eghàlaeda ha hǫt'e.
37 Whaà-le-t'ıì, “Amìı nììtła ha sìı hotıì nììtła ha hǫt'e, eyıts'ǫ whaà wewhìle ha nıìle.
38 Secheekeè ehkw'ıı elı̨ı̨ sìı wegha ehkw'ı-ahodı t'à eda ha. Hanìkò ek'èt'à anajà nı̨dè weghǫ sınà ha nıìle,” dek'eèhtł'è.
39 Hanìkò goxı̨ sìı dǫ ek'èt'à anagejà t'à gıdıhòłı̨ı̨ sìı gıta gots'ǫ ats'ı̨ı̨t'e nıìle, dǫ gıgha ehkw'ı-ahodıı xè edaxàgı̨ı̨dee sìı gıta ats'ı̨ı̨t'e.