13
Edek'eahłı̨-le nı̨dè naxıdıhołè ha
1 Dǫ mǫ̀hdaa Zezì xè geèhkw'e ekò Zezì ts'ǫ̀ hagedı, “K'àowo Pılate Galılee got'ı̨į̀ mǫ̀hdaa ełaàgòı̨hdè. Nǫ̀htsı̨ ts'ǫ̀ tıts'aàdìı k'egeehk'ǫ̀ ekò dǫdoò eyıts'ǫ tıts'aàdìıdoò ełeta ayį̀į̀là,” gıìhdı.
2 Zezì gots'ǫ̀ hadı, “Eyı Galılee got'ı̨į̀ ełaàgı̨ı̨dèe sìı gıghǫ dàahwhǫ? Galılee got'ı̨į̀ hazǫǫ̀ gonahk'e hołı̨ı̨ hogèhtsı̨ t'à hanì dagı̨ı̨ɂà dahwhǫ nì?
3 Į̀le, hanì nıìle ne! Hanìkò naxı̨ edek'eahłı̨-le xè naxınì ładı̨į̀ aahłe-le nı̨dè, naxı̨ sı hazǫǫ̀ naxıdıhołè ha.
4 Eyıts'ǫ ı̨nę̀ę dàgòjàa sìı ghǫ nànıahdè. Sıloam gòyeh ekǫ dǫ hoònǫ-daats'ǫ̀-ek'èdı̨ gık'e kǫ̀ nechàa nàı̨tł'ı ı̨lè. Eyı dǫ ełaàgı̨ı̨dèe sìı Jerusalem got'ı̨į̀ hazǫǫ̀ gonahk'e hołı̨ı̨ hogèhtsı̨ t'à gıxè hagòjà dahwhǫ nì?
5 Į̀le ne. Hanìkò edek'eahłı̨-le xè naxınì ładı̨į̀ aahłà-le nı̨dè, naxı̨ sı hazǫǫ̀ naxıdıhołè ha,” gòhdı.
6 Zezì hadı tł'axǫǫ̀ dıı godı t'à hoghàgoehtǫ, hadı, “Dǫ ı̨łè jìecho dehshee k'è wets'ǫ. Jìechochı̨į̀ ı̨łè wek'e jìecho hanıwǫ, hanìkò jìecho wı̨ı̨zìı wek'e dawheɂǫ-le nǫǫ̀.
7 Eyıt'à jìecho-k'èdìı-dǫǫ̀ ts'ǫ̀ hadı, ‘Dıı ts'ı wek'e jìecho dehshe ha dehwhǫ t'à dıì xè taı xo gots'ǫ jǫ nǫèhdà, hanìkò jìecho wı̨ı̨zìı wek'e dawheɂǫ-le. Ts'ı wek'ı̨ı̨hkà! Ayìıha dèè nezı̨ı̨ wets'ǫ̀ wek'ehowı lì?’ yèhdı.
8 “Jìecho-k'èdìı-dǫǫ̀ hadı, ‘K'àowo, ı̨łaà ı̨łè xo ts'ǫ̀ t'asanele-le. Wemǫǫ̀ dèè xàgohge ha eyıts'ǫ wet'à t'asìı nezı̨į̀ dehshee wemǫǫ̀ ahłe ha.
9 Įdae-xo wek'e jìecho dèhshǫ nı̨dè, sìghà. Dàwhìdì nı̨dè wek'ets'ıhkà nǫǫ̀,’ yèhdı,” Zezì hadıì dǫ xè godo.
Nǫ̀htsı̨ Dzęę̀ k'e ts'èko k'aàt'ıì awììdlà
10 Nǫ̀htsı̨ Dzęę̀ k'e Zezì ełègehdèe-kǫ̀ goyìı dǫ hoghàehtǫ.
11 Ts'èko ı̨łè hoònǫ-daats'ǫ̀-ek'èdı̨ xo gots'ǫ ı̨nìłı̨ı̨ dayį̀ı̨hɂa t'à eyaelı̨. Wenǫkw'ǫǫ̀ ı̨zhıì ts'ǫ̀ whezòo t'à ehkw'ıìɂah nàwo ha dıì.
12 Zezì yaɂı̨ ekò yekàehɂà gà yets'ǫ̀ hadı, “Ts'èko, dıı netàdaà ch'à k'aàt'ıì anììdlà,” yèhdı.
13 Edılà yek'e ayį̀į̀là, ekòet'ıì eyı ts'èko ehkw'ı nàwoò ajà, eyıt'à Nǫ̀htsı̨ ghàsǫedı.
14 Nǫ̀htsı̨ Dzęę̀ k'e Zezì k'aàt'ıì ayį̀į̀là t'à, ełègehdèe-kǫ̀ gha k'àowo wek'èch'a. Eyıt'à dǫ hazǫǫ̀ ts'ǫ̀ hadı, “Eghàlats'eeda gha ek'ètaı dzęę̀ whela hǫt'e. K'aàt'ıì aahde ha dahwhǫ nı̨dè eyı dzęę̀ k'e aaht'ı̨, hanìkò Nǫ̀htsı̨ Dzęę̀ k'e haaht'ı̨-le,” gòhdı.
15 Zezì yets'ǫ̀ hadı, “Degaı daahtsı̨ kò wek'ę̀ę̀ aahda nıìle! Nǫ̀htsı̨ Dzęę̀ k'e naxıts'ǫ ejıe, hanì-le-ı̨dè naxıtłı̨tsoa tı gıghàahdı ha, dagıahge xè tı ts'ǫ̀ agıahɂı̨-le nì?
16 Ekò dıı ts'èko, Abraham gots'ǫ dǫ sìı, hoònǫ-daats'ǫ̀-ek'èdı̨ xo gots'ǫ wehłı̨ı̨ dayį̀ı̨hɂa hǫt'e. Nǫ̀htsı̨ Dzęę̀ k'e ayìı t'à eyaelı̨ı̨ sìı ch'à k'aàt'ıì awedle ha-le nì?” gòhdı.
17 Zezì hanì gots'ǫ̀ xàyaı̨htı t'à dǫ gık'èch'a agedı ı̨lèe sìı edeghǫ į̀į̀zhagehłè. Hanìkò enıìyah łǫ hohtsı̨ t'à dǫ hazǫǫ̀ sıì gınà.
Jìe nechà-lea eyıts'ǫ łèt'èa
18 Eyı tł'axǫǫ̀ Zezì dagoehke, “Nǫ̀htsı̨ Wenàowoò k'ę̀ę̀ hòɂǫǫ sìı ayìı xèht'e lanì?
19 Jìe nechà-lea lanì hǫt'e. Eyı sìı dǫ neyıìchı gà dèè goyìı yı̨ı̨ɂǫ. Dèhshǫ xè ts'ı nechàa whelı̨ eyıts'ǫ wekw'ıhchı̨į̀ k'e chı̨ą daèhkw'e,” gòhdı.
20 K'achı̨ Zezì dagoehke, “Nǫ̀htsı̨ Wenàowoò k'ę̀ę̀ hòɂǫǫ sìı ayìı xèht'e lanì?
21 Łèt'èa lanì hǫt'e. Eyı sìı ts'èko łè ta ayį̀į̀là, łèt'èa xè łè yeehtì gà tsı̨yeehdı. Hanì t'aa łè tsı̨èhdìı sìı łèt'èa hazǫǫ̀ weta-ts'ǫ̀ at'į̀,” gòhdı.
Enìı̨tǫ neghoa k'è goyaahdè
22 Eyı tł'axǫǫ̀ Zezì Jerusalem ts'ǫ̀ èhtła. Ekǫ naetłe ekò kǫ̀ta łǫ gok'ıìtła, eyıts'ǫ dǫ hoghàgoehtǫ.
23 Dǫ ı̨łè dayeehke, “K'àowo, asį̀į̀ dǫ łǫ-lea zǫ edaxàgeedè ha?” yèhdı.
Eyıt'à Zezì dǫ hazǫǫ̀ ts'ǫ̀ hadı,
24 “Enìı̨tǫ neghoa k'è goyaahde ha hòtł'ò edeahdzà. Dǫ łǫ goyageedè ha degeèhdzà, hanìkò gıgha dìì ha.
25 Kǫ̀ ts'ǫ̀ k'àowo naxıts'ǫdanìı̨hgè nı̨dè mǫ̀ht'a nàahza ha. Enìı̨tǫ ts'aaht'ı xè dıı haahdı weghǫnàdaahtì ha, ‘K'àowo, gots'ǫ̀ enìxàı̨chı,’ dahdı kò dıı hanaxèhdı ha, ‘Naxık'èehsǫ-le eyıts'ǫ edı̨į̀ gots'ǫ aaht'ı̨ı̨ sìı wek'èehsǫ-le,’ naxèhdı ha.
26 “Eyıt'à dıı hawèahdı ha, ‘Goxè shènetı̨ ı̨lè eyıts'ǫ gokǫ̀ta hoghàgoı̨htǫ ı̨lè,’ wèahdı ha.
27 “Hanìkò naxıts'ǫ̀ dıı hadı ha, ‘Naxık'èehsǫ-le eyıts'ǫ edı̨į̀ gots'ǫ aaht'ı̨ı̨ sìı wek'èehsǫ-le. Hołı̨ı̨-k'alaahdèe-dǫǫ̀ aaht'e, hazǫǫ̀ sets'ǫǫ̀ naahdè!’ naxèhdı ha.
28 “Abraham, Isaac eyıts'ǫ Jacob eyıts'ǫ nakwenàoɂǫǫ hazǫǫ̀ Nǫ̀htsı̨ Wenàowoò k'ę̀ę̀ hòɂǫǫ ekǫ geèhkw'e gıahɂį̀ ha, hanìkò naxı̨ xànaxegeehdè ha. Ekǫ aahtse xè naxıgha hoìla ha.
29 Hazǫǫ̀ nèk'e gots'ǫ dǫ łǫ, Nǫ̀htsı̨ Wenàowoò k'ę̀ę̀ hòɂǫǫ goyageedè ha. Ekǫ gıxè nàsı̨ hołè ha.
30 Hęɂę, dǫ nǫǫde gı̨ı̨lı̨ı̨ sìı t'akwe geèhkw'e ha, eyıts'ǫ dǫ t'akwe gı̨ı̨lı̨ı̨ sìı nǫǫde geèhkw'e ha,” Zezì gòhdı.
Zezì Jerusalem ghǫ ts'ǫǫ̀nıwǫ
31 Ekìıyeè k'e Pharısee gı̨ı̨lı̨ı̨ mǫ̀hdaa Zezì ts'ǫ̀ geède, hagıìhdı, “Jǫ gots'ǫǫ̀ t'asį̀ı̨ aąde, k'àowocho Herod ełaànìhwhı ha nıwǫ,” gıìhdı.
32 Zezì gots'ǫ̀ hadı, “Eyı eghǫyaeɂàa-dǫǫ̀ dıı hawèahdı: ‘Dıì eyıts'ǫ satsǫ sı ı̨nìłı̨ı̨ xàdeehshı ha eyıts'ǫ dǫ k'aàt'ıì agehłe ha, taı dzęę̀ t'à nı̨dè la ghǫ naht'è ha,’ wèahdı.
33 Hanìkò dıı dzęę̀, satsǫ eyıts'ǫ ek'èdaedzęę̀ k'e ı̨łaà ı̨daà naehtłe ha hǫt'e, nakwenàoɂǫǫ sìı Jerusalem ekǫ zǫ ełaàgede ne t'à!
34 “Jerusalem got'ı̨į̀, nakwenàoɂǫǫ naxıts'ǫ̀ adlàa sìı naxı̨ kwe t'à ełaàgìahde hǫt'e. K'àba edezaa edı̨ı̨ts'ǫǫ̀ tł'a gòhłaà lanaxehłe ha t'aats'ǫǫ̀ hahwhǫ kò naxı̨ haahwhǫ-le.
35 Hotıì aàhkw'ǫ, naxıkǫ̀ gokw'ǫǫ̀ gòɂǫǫ̀ agode ha. Įłè dzęę̀ dıı hasèahdı ha, ‘Gots'ǫ̀ K'àowo wedahxà goghǫ nììtłaa sìı wexè sìghà hǫt'e.’ Hasèahdı gots'ǫ̀ k'achı̨ seahɂį̀ ha-le,” Zezì gòhdı.