☰ Matthew 9
9
Dǫ wekw'ǫǫ̀ ełaı̨dèe sìı k'aàt'ıì ajà
1 Zezì elà yìetła gà edecheekeè xè ı̨nǫ̀ǫ̀ nawheɂe, edekǫ̀ta nìagı̨ı̨ɂe. 2 Dǫ mǫ̀hdaa dǫ wekw'ǫǫ̀ ełaı̨dèe tè k'e whetı̨ı̨ Zezì ts'ǫ̀ geèhchì. Zezì dǫ gınì nàtsoo gok'èezǫ t'à dǫ eyaelı̨ı̨ ts'ǫ̀ hadı, “Àgı̨ą, nehołı̨į̀ neghǫ nahoazha t'à nınà welè,” yèhdı.
3 Hadı t'à Nǫ̀htsı̨-yatıì-k'ègedìı-dǫǫ̀ mǫ̀hdaa hagı̨ı̨wǫ, “Dıı dǫ sıì Nǫ̀htsı̨ k'èch'a gode!” gı̨ı̨wǫ.
4 Zezì dànì nànıgedèe sìı gok'èezǫ t'à hagòhdı, “Dànìghǫ naxıdzeè yìı nàowołı̨ı̨ t'à nànıahdè? 5 Dǫ wekw'ǫǫ̀ ełaı̨dèe sìı dàwets'edı nı̨dè denahk'e dezhì-le: ‘Nehołı̨į̀ neghǫ nahoazha,’ hanì-le-ı̨dè ‘Nıį̀tła gà k'eı̨tło.’ 6 Dıı nèk'e Dǫ-wet'àaɂàa-deè dǫ hołı̨ı̨ ghǫ nahoele ha weghàhòt'ǫǫ sìı, wek'èahsǫǫ̀ anaxehłe ha,” gòhdı tł'axǫǫ̀ dǫ wekw'ǫǫ̀ ełaı̨dèe sìı ts'ǫ̀ hadı, “Nıį̀tła, netè nı̨į̀ɂa gà nekǫ̀ ts'ǫ̀ naı̨tłe,” yèhdı. 7 Eyıt'à eyı dǫ nıìtła gà edekǫ̀ ts'ǫ̀ naèhtła. 8 Dǫ hazǫǫ̀ eyı hagòjà gıaɂı̨ ekò sıì gıgha enıìyah dìì, eyıt'à Nǫ̀htsı̨ ghàsǫgeedı, hagedı, “Dıı dǫ Nǫ̀htsı̨ dahxà eghàlaedaà at'ı̨ sǫnı,” gedı.
Matthew Zezì k'èè èhtła
9 Zezì ekǫ gots'ǫǫ̀ naèhtła tł'axǫǫ̀, sǫǫ̀mba-nàhtsį̀ı̨-dǫǫ̀ Matthew wìyeh ladà k'e eghàlaeda yaɂı̨. Zezì “Sek'èı̨tła!” yèhdı. Eyıt'à Matthew nıìtła gà Zezì k'èè èhtła.
10 Eyı tł'axǫǫ̀ Zezì Matthew wekǫ̀ shètı̨ ekò sǫǫ̀mba-nàhtsį̀ı̨-dǫǫ̀ gı̨ı̨lı̨ı̨ eyıts'ǫ hołı̨ı̨-hogehtsı̨ı̨-dǫǫ̀ łǫ Zezì eyıts'ǫ wecheekeè xè shègıazhe. 11 Pharısee gı̨ı̨lı̨ı̨ sìı gogıaɂı̨ ekò Zezì wecheekeè ts'ǫ̀ hagedı, “Dànìghǫ naxıts'ǫ̀ k'àowo sǫǫ̀mba-nàhtsį̀ı̨-dǫǫ̀ eyıts'ǫ hołı̨ı̨-hogehtsı̨ı̨-dǫǫ̀ xè shètı̨?” gògedı.
12 Zezì ıìkw'o t'à gots'ǫ̀ hadı, “Dǫ hotıì geedaa sìı nàèdı-k'èezǫǫ gıgha wet'àaɂà nıìle, dǫ eyagı̨ı̨lı̨ı̨ sìı zǫ nàèdı-k'èezǫǫ gı̨ı̨wǫ hǫt'e. 13 Hanìkò dıı hanì dek'eèhtł'è: ‘Sets'ǫ̀ t'asìı k'eahk'ǫ̀ nahk'e dǫ ts'ǫ̀ naxıdzeè eteèɂı̨ ha dehwhǫ,’ ayìı awèts'edıı sìı wedaànıahdè. Dǫ ehkw'ı geedaa sìı gıkayahtı gha jǫ ts'ǫ̀ ahjà nıìle, hanìkò hołı̨ı̨-hogehtsı̨ı̨-dǫǫ̀ gıgha ahjà hǫt'e,” gòhdı.
Edets'egǫ ghǫ Zezì dageehke
14 Eyı tł'axǫǫ̀ John-Baptıst wecheekeè Zezì gà nègı̨ı̨de, gıts'ǫ̀ hadı, “Goxı̨ eyıts'ǫ Pharısee gı̨ı̨lı̨ı̨ sìı edets'egǫ, hanìkò dànìghǫ necheekeè edegegǫ-le?” gıìhdı.
15 Zezì gots'ǫ̀ hadı, “K'ǫadzàa ı̨łaà goxè wheda et'ıì, dǫ gıghǫ nìı̨dee sìı edegegǫ ha nì? Į̀le ne, hanìkò ı̨łè dzęę̀ k'ǫadzàa gıghǫ wììchì ha hǫt'e, eyı dzęę̀ k'e nı̨dè edegegǫ ha.
16 “Dǫ wı̨ı̨zìı goht'ǫ zǫą k'e ɂehtł'ı̨gòò nètèyeèlı nıìle. Hayį̀į̀là nı̨dè ɂehtł'ı̨gòò ełeechı t'à wemǫǫ̀ tàedlà ha. Hajà nı̨dè, goht'ǫ zǫą denahk'e wetàedlà ha. 17 Eyıts'ǫ dǫ wı̨ı̨zìı jìetì wegòò hoèlı̨ı̨ sìı jìetìwò wezǫą yìı yehtł'ì nıìle. Hayį̀į̀là nı̨dè wewòzǫą wenìtsǫedlà xè jìetì xàetł'ì ha, eyıts'ǫ jìetìwò wezǫą sı wedıhołè ha. Hanì ha nıìle, jìetì wegòò hoèlı̨ı̨ sìı jìetìwò wegòò yìı yehtł'ì ha hǫt'e, hanì-ı̨dè į̀łah nezı̨į̀ wek'èhodì ha,” Zezì hadıì goxè godo.
T'eekoa ełaı̨woo eyıts'ǫ ts'èko eyaelı̨ı̨
18 Zezì ı̨łaà goxè godo ekò, k'àowo ı̨łè yegà nììtła gà yets'ǫ̀ nàgòı̨hgè, hayèhdı, “Setì dıìhk'ǫ̀ą ełaı̨wo. Hanìkò sexè sekǫ̀ nàwheętła xè nılà wek'e anelà nı̨dè naìdà ha,” yèhdı. 19 Eyıt'à Zezì nıìtła gà eyı dǫ k'èè naèhtła; wecheekeè sı gık'èède.
20 Ekìıyeè k'e ts'èko ı̨łè Zezì chį̀ht'a nììtła xè yeɂeè welǫ daachì. Eyı ts'èko hoònǫ-daats'ǫ̀-nàke xo gots'ǫ edoò weɂǫ̀-at'ı̨ t'à eyaelı̨. 21 Ts'èko hanıwǫ, “Weɂeè zǫ kò daehchì nı̨dè k'aàt'ıì ahde ha,” hanıwǫ.
22 Zezì yets'ǫ̀ ets'aèhtła, yaɂı̨ t'à hayèhdı, “Ts'èko, nedzeè t'à nınà welè. Negha ehkw'ı-ahodı t'à k'aàt'ıì anejà,” yèhdı. Eyı ts'èko ekòet'ıì k'aàt'ıì ajà.
23 Zezì k'àowo wekǫ̀ goyaèhtła ekò dǫ łǫ xè nàdahoowo eyıts'ǫ dǫ mǫ̀hdaa dechı̨shì geehdı, goaɂı̨. 24 Zezì gots'ǫ̀ hadı, “Naahdè. T'eekoa ełaı̨wo nıìle, ekìı whetı̨ hǫt'e,” gòhdı t'à dǫ gıghaedlò. 25 Dǫ hazǫǫ̀ xàgeèdeè agogį̀į̀là tł'axǫǫ̀, Zezì edı̨į̀ t'eekoa whetı̨ı̨ sìı ekǫ goyaèhtła. T'eekoa wılà nıìchı-t'ıì t'eekoa nıìtła. 26 Eyı nèk'e hazǫǫ̀ eyı wegodıì ajà.
Dǫ wedaà goìlee nàke eyıts'ǫ dǫ gode-le k'aàt'ıì agejà
27 Zezì eyı gots'ǫ naèhtła ekò dǫ nàke gıdaà goìlee gık'èè łeèhtła, nagıìzeh xè Zezì ts'ǫ̀ hagedı, “K'àowocho Davıd Weza, etegòı̨hɂı̨!” gedı nagıìzeh.
28 Zezì kǫ̀ ı̨łè goyaèhtła ekò dǫ gıdaà goìlee gıgà nèłegeètła t'à dagoehke, “K'aàt'ıì anaxehłe gha naxıgha ehkw'ı-ahodı nì?” gòhdı. “K'àowo, hęɂę,” gedı.
29 Eyıt'à godaà k'e whehdì xè hagòhdı, “Naxıgha ehkw'ı-ahodı k'ę̀ę̀ naxıxè agode,” Zezì gòhdı. 30 Ekòet'ıì gıdaà gǫ̀hłı̨ anagejà. Zezì yatı nàtsoo t'à hagòhdı, “Dıı hagòjàa sìı dǫ wı̨ı̨zìı yek'èızà sǫ̀ǫ̀,” gòhdı. 31 Hanìkò eyı nèk'e dǫ hazǫǫ̀ ts'ǫ̀ hagedı.
32 Eyı dǫ nàke Zezì ts'ǫǫ̀ nałegeèhtła tł'axǫǫ̀ dǫ ı̨nìłı̨ı̨ wets'ǫ̀-èlı̨ t'à gode-le sìı Zezì gà nègeèchì. 33 Zezì ı̨nìłı̨ı̨ xàdeèzhì tł'axǫǫ̀, eyı dǫ gode-le ı̨lèe sìı godeè ajà. Dǫ hazǫǫ̀ gıgha enıìyah dìì t'à hagedı, “Israel nèk'e dıı hagòjà ts'aɂı̨ whìle,” gedı.
34 Hanìkò Pharısee gı̨ı̨lı̨ı̨ sìı hagedı, “Įnìłı̨ı̨ gha k'àowo dahxà ı̨nìłı̨ı̨ xàdeezhıì at'ı̨,” gedı.
Eghàlageedaa-dǫǫ̀ łǫ-le
35 Zezì eyı nèk'e kǫ̀ta hazǫǫ̀ gota k'eetło. Ełègehdèe-kǫ̀ goyìı dǫ hoghàehtǫ. Nǫ̀htsı̨ Wenàowoò k'ę̀ę̀ hòɂǫǫ wegodıì nezı̨ı̨ t'à dǫ ts'ǫ̀ gode, eyıts'ǫ tàda hazǫǫ̀ t'à dǫ eyagı̨ı̨lı̨ı̨ sìı k'aàt'ıì anagǫ̀ǫ̀là. 36 Dǫ łǫ ełèwhede goghàeda ekò dǫ ts'ǫ̀ wedzeè eteèɂı̨. Dǫ gıxè hoìla xè sahzǫ̀ą dǫ gok'èdìı whìle lagı̨ı̨t'e. 37 Eyıt'à Zezì edecheekeè ts'ǫ̀ hadı, “Dèè k'e t'asìı dıìdìı łǫ dìì hanìkò dǫ nàyehtsį̀ ha łǫ-le. 38 Eyıt'à t'asìı dehshee nàgehtsį̀ ts'ǫ̀ k'àowo sìı weahkè, hanì-ı̨dè t'asìı dehshee nàgehtsį̀ı̨ dǫǫ̀ gots'ǫ̀ ayele ha,” gòhdı.
☰