14
Dǫ gınì nàtso-le eyıts'ǫ dǫ gınì nàtso
1 Dǫ wınì nàtso-le sìı wedę aahłe-le, t'asìı wet'àaɂà-le k'èxa wek'e nìdahoahɂà-le.
2 Dǫ mǫ̀hdaa gınì nàtso t'à t'asìı hazǫǫ̀ xàɂaa ghǫ shègezhe ha gıgha t'asanìle, hanìkò dǫ mǫ̀hdaa gınì nàtso-le t'à dèè gots'ǫ t'asìı dehshee zǫ ghǫ shègezhe.
3 Dǫ t'asìı hazǫǫ̀ xàɂaa ghǫ shètı̨ı̨ sìı dǫ hanì nàowo gıtǫ̀-le sìı gınahk'e dǫ nezı̨ı̨ aht'e edeewǫ ha nıìle. Eyıts'ǫ dǫ t'asìı hazǫǫ̀ xàɂaa ghǫ shètı̨-le sìı dǫ hat'ı̨ı̨ sìı yesınìyaehtı ha nıìle, Nǫ̀htsı̨ sìı eyı dǫ edeza elı̨ gha yį̀į̀hchì ne t'à.
4 Eyı dǫ wets'ǫ̀ k'àowo anet'e nıìle t'à wesınìyaąhtı ha nıìle. Dǫ nezı̨ı̨ elı̨, hanì-le-ı̨dè dǫ nezı̨-le elı̨ı̨ sìı wets'ǫ k'àowo wets'ǫ̀ hoèlı̨ hǫt'e. Gots'ǫ̀ K'àowo dǫ nezı̨ı̨ elı̨į̀ ayele ha dìì-le t'à dǫ nezı̨ı̨ elı̨ k'ę̀ę̀ wııtà ha.
5 Dǫ ı̨łè dzęę̀ hazǫǫ̀ nahk'e dzę ı̨łè wegha degaı hǫt'e. Hanìkò dǫ eyıì-le wegha dzę hazǫǫ̀ ełèht'eè hǫt'e. Dǫ hazǫǫ̀ xàè gınì t'à dànì ehkw'ı agı̨ı̨wǫǫ sìı k'ę̀ę̀ geeda ha hǫt'e.
6 Dǫ dzę ı̨łè wegha denahk'e elı̨ nı̨dè, gots'ǫ̀ K'àowo wınà hohtsı̨ gha at'ı̨ hǫt'e. Dǫ bò edèe sìı Nǫ̀htsı̨ ts'ǫ̀ masì nıwǫ t'à, gots'ǫ̀ K'àowo wınà hohtsı̨ gha at'ı̨ hǫt'e. Eyıts'ǫ dǫ bò edè-le sìı gots'ǫ̀ K'àowo wınà hohtsı̨ gha at'ı̨ xè Nǫ̀htsı̨ ts'ǫ̀ masì nıwǫ hǫt'e.
7 Gota gots'ǫ dǫ wı̨ı̨zìı edegha zǫ eda nıìle, eyıts'ǫ dǫ wı̨ı̨zìı edegha zǫ ełaàwı nıìle.
8 Ts'eeda nı̨dè gots'ǫ̀ K'àowo wegha ts'eeda hǫt'e, eyıts'ǫ ełaàts'ewı nı̨dè wegha ełaàts'ewı hǫt'e. Eyıt'à ts'eedaa, ts'eeda-le ehk'ę̀ę̀ t'aats'ǫǫ̀ gots'ǫ̀ K'àowo wets'ǫ dǫ ats'ı̨ı̨t'e hǫt'e.
9 Eyı gha Zezì-Krı ełaı̨wo eyıts'ǫ naìdà, eyıt'à dǫ geeda eyıts'ǫ dǫ ełaı̨dèe gogha k'àowo whelı̨.
10 Eyıt'à dànìghǫ naxèot'ı̨ gısınìyaahtı? Eyıts'ǫ dànìghǫ naxèot'ı̨ t'asìı elı̨-le k'ę̀ę̀ wets'ǫ̀ naahɂa? Goxı̨ hazǫǫ̀ Nǫ̀htsı̨ nadąą̀ nàts'eèhza gà gosınìyaetı ha hǫt'e wedaànıahdè welè.
11 Dıı hanì dek'eèhtł'è hǫt'e:
“Gots'ǫ̀ K'àowo dıı hadı, ‘Xàè sıızì dahxà dıı haehsı̨ hǫt'e, Dǫ hazǫǫ̀ sets'ǫ̀ nàgògehgè ha, eyıts'ǫ dǫ hazǫǫ̀, Nǫ̀htsı̨ aht'e sègedı xè seghàsǫgeedı ha hǫt'e,’ ” dek'eèhtł'è.
12 Eyıt'à dǫ hazǫǫ̀ Nǫ̀htsı̨ ts'ǫ̀ edeghǫ gogede ha hǫt'e.
13 Eyıt'à ełesınìyats'ehtı welè-le. Naxèot'ı̨ naxıt'à hołı̨ı̨ hogehtsı̨ ch'à naxınì nàtsoò aahwhǫ xè edek'èahdì.
14 Gots'ǫ̀ K'àowo wexè ehda hǫt'e, eyıt'à weghǫ shèts'ezhee wı̨ı̨zìı sìı hołı̨ı̨ nıìle hotıì wek'èehsǫ hǫt'e. Hanìkò dǫ wegha wets'àet'ǫ nı̨dè wegha hołı̨ı̨ hǫt'e.
15 Ayìı ghǫ shèahzhee sìı wets'ıhɂǫ̀ naxèot'ı̨ ekǫ-le eghàlaeda xè daı̨ɂa nı̨dè, ełeghǫnets'eètǫǫ sìı wek'ę̀ę̀ aahda nıìle. Zezì yegha ełaı̨wo hǫt'e, eyıt'à ayìı ghǫ shèahzhe ts'ıhɂǫ̀ wedıhoahtsı̨-le.
16 T'asìı naxıgha nezı̨ı̨ dahwhǫǫ sìı wet'à dǫ gha hołı̨ı̨ welè-le.
17 Nǫ̀htsı̨ wenàowoò sìı dǫ shègezhee eyıts'ǫ t'asìı gedǫ hanıı ghǫ nıìle, hanìkò Yedàyeh Nezı̨ı̨ wedahxà ehkw'ı ts'eedaa, goxè sìghà hòɂǫǫ eyıts'ǫ godzeè t'à goınàa, eyı ghǫ ahodı hǫt'e.
18 Dǫ hanì Zezì gha geedaa sìı Nǫ̀htsı̨ wınì k'ę̀ę̀ aget'ı̨ hǫt'e, eyıts'ǫ dǫ sı gha nezı̨ı̨ aget'ı̨ hǫt'e.
19 Eyıt'à ełexè ts'èwhı̨į̀ ts'eeda gha hòtł'ò eghàlats'eeda welè, eyıts'ǫ ełınì nàtso hots'ehtsı̨ ha ełets'àts'edı welè.
20 Bò ghǫ shèahzhe ts'ıhɂǫ̀ Nǫ̀htsı̨ dànì dǫ xè eghàlaedaa sìı wedıhoahtsı̨-le. Weghǫ shèts'ezhee hazǫǫ̀ nezı̨ hǫt'e, hanìkò bò ghǫ shèts'ezhee sìı wets'ıhɂǫ̀ dǫ hołı̨ı̨ hohtsı̨ nı̨dè eyı sìı ehkw'ı nıìle.
21 Bò ghǫ shèts'ezhe-le, jìetì ts'edǫ-le eyıts'ǫ t'asìı wet'à naxèot'ı̨ hołı̨ı̨ hohtsı̨ ha sìı k'alats'edè-le nı̨dè eyı denahk'e nezı̨ hǫt'e.
22 Eyıt'à eyı weghǫ dànì naxıgha ehkw'ı-ahodıı sìı naxı̨ eyıts'ǫ Nǫ̀htsı̨ sı zǫ wek'èahsǫ welè. Amìı t'asìı wegha ehkw'ı hǫt'e sìı k'ę̀ę̀ eda nı̨dè, wegha sìghà hǫt'e. Eyı dǫ sìı edınì k'èch'a edesınìyahtı nıìle.
23 Hanìkò amìı wegha hotıì-le kò ı̨łaà yeghǫ shètı̨ nı̨dè eyı dǫ wesınìyaetı hǫt'e, wegha ehkw'ı-ahodı k'ę̀ę̀ eda-le ts'ıhɂǫ̀. T'asìı hazǫǫ̀ weghàlats'eedaa sìı gogha ehkw'ı-ahodı k'ę̀ę̀-le nı̨dè eyı gogha hołı̨ı̨ hǫt'e.