4
Abraham wegha ehkw'ı-ahodı t'à Nǫ̀htsı̨ ehkw'ı edaa k'ę̀ę̀ yııhtà
1 Eyıt'à hanì hòɂǫ nı̨dè gocho Abraham weghǫ dàts'edı lì? Nǫ̀htsı̨ k'ę̀ę̀ dǫ ehkw'ı ts'ı̨ı̨lı̨ı̨ sìı ghǫ ayìı k'èhoèhzà?
2 Abraham nezı̨į̀ eghàlaı̨dà k'èxa ehkw'ı awììdlà nı̨dè yeghǫ xàdahodì ha dìì-le ı̨lè. Hanìkò Nǫ̀htsı̨ nadąą̀ edeghǫ xàdahodì ha dìì.
3 Nǫ̀htsı̨ Nı̨htł'è k'e dıı hanì dek'eèhtł'è: “Abraham Nǫ̀htsı̨ yegha ehkw'ı adı ts'ıhɂǫ̀, ehkw'ı edaa k'ę̀ę̀ wııtà ayį̀į̀là,” dek'eèhtł'è.
4 Dǫ eghàlaeda nı̨dè wek'èxa wets'àɂeedì hǫt'e. Eghàlaeda k'èxa sǫǫ̀mba weghǫ̀zhaa sìı ekìı weghǫ̀zha nıìle, hanìkò eyı sǫǫ̀mba k'èxa eghàlaı̨da t'à weghǫ̀zha hǫt'e.
5 Hanìkò Nǫ̀htsı̨ gogha ehkw'ı adı nı̨dè gogha hanì nıìle. Dǫ wejıı sìı Nǫ̀htsı̨ ehkw'ı ayehɂį̀ wegha ehkw'ı-ahodı nı̨dè, ehkw'ı edaa k'ę̀ę̀ wııtà ha. Nezı̨į̀ eghàlats'eeda k'èxa ehkw'ı ts'eedaa k'ę̀ę̀ goıtà edèts'edı ha dìì.
6 K'àowocho Davıd eyı xèht'eè xàyaı̨htı ı̨lè. Dǫ yek'èxa eghàlaı̨da-le kò, Nǫ̀htsı̨ ehkw'ı edaa k'ę̀ę̀ yııhtàa sìı wexè sìghà hǫt'e hadı ı̨lè. Davıd dıı hanì enı̨ı̨tł'è ı̨lè:
7 “Nǫ̀htsı̨ dǫ wehołı̨į̀ yeghǫ nahoelee sìı wexè sìghà hǫt'e, hołı̨ı̨ hòèhtsı̨ı̨ sìı Nǫ̀htsı̨ yenadì ha nıìle.
8 Eyıts'ǫ Nǫ̀htsı̨ dǫ wehołı̨į̀ k'èxa yesınìyaehtı-le sìı wexè sìghà hǫt'e,” dek'eèhtł'è.
9 K'àowocho Davıd amìı ghǫ eetł'è-adı? Dǫ gıkwǫ̀ nàt'àa gı̨ı̨lı̨ı̨ sìı ededı̨ zǫ gıxè sìghà ha nì? Hanì-le-ı̨dè dǫ gıkwǫ̀ nàt'à-le sìı ededı̨ sı gıxè sìghà hòɂǫ ha nì? Abraham weghǫ dıı hats'edı ı̨lè, Nǫ̀htsı̨ yegha ehkw'ı adı t'à Nǫ̀htsı̨ ehkw'ı edaa k'ę̀ę̀ yı̨ı̨htà, ts'edı ı̨lè.
10 Nǫ̀htsı̨ Abraham ehkw'ı edaa k'ę̀ę̀ yııhtà ekò asį̀į̀ hòt'a wekwǫ̀ nàat'a ı̨lè? Į̀le, wekwǫ̀ nàat'a kwe Nǫ̀htsı̨ ehkw'ı edaa k'ę̀ę̀ yııhtà ı̨lè.
11 Eyı tł'axǫǫ̀ k'ǫǫ̀t'a Abraham wekwǫ̀ nàat'a hǫt'e. Abraham wegha ehkw'ı-ahodı t'à wekwǫ̀ nàat'a hǫt'e. Eyıts'ǫ Nǫ̀htsı̨ ehkw'ı edaa k'ę̀ę̀ yııhtàa sìı wekwǫ̀ nàat'a weghàà wek'èhoedzǫ gha adlà hǫt'e. Hanìkò wekwǫ̀ nàat'a kwe-t'ıì Nǫ̀htsı̨ ehkw'ı edaa k'ę̀ę̀ yııhtà ı̨lè. Hanì ts'ıhɂǫ̀ dǫ gıkwǫ̀ nàt'à-le kò gıgha ehkw'ı-ahodıı sìı Abraham hazǫǫ̀ gogha gotà elı̨ lanì hǫt'e. Hanì-ı̨dè Nǫ̀htsı̨ sìı eyı dǫ hazǫǫ̀ ehkw'ı geedaa k'ę̀ę̀ goıhtà hǫt'e.
12 Eyıts'ǫ Moses wenàowoò k'ę̀ę̀ gıkwǫ̀ nàt'àa sìı ededı̨ sı gogha gotà elı̨ hǫt'e. Gıkwǫ̀ nàat'a zǫ t'à gotà elı̨ nıìle, hanìkò Nǫ̀htsı̨ gıgha ehkw'ı-ahodı t'à gotà elı̨ hǫt'e, Abraham nàat'a kwe hanì wegha ehkw'ı-ahodı ı̨lè k'ę̀ę̀.
13 Nǫ̀htsı̨ dıı hadı ı̨lè, Abraham, weza eyıts'ǫ wets'ıhɂǫ̀ǫ-dǫǫ̀ gı̨ı̨lı̨ı̨ sìı dıı nèk'e k'àhogedè agole ha, gòhdı ı̨lè. Moses wenàowoò k'èagı̨ı̨t'e t'à gıxè hagode ha, gòhdı nıìle, hanìkò gıgha ehkw'ı-ahodı t'à ehkw'ı geedaa k'ę̀ę̀ goıhtà ts'ıhɂǫ̀ gıxè hagode ha, gòhdı.
14 Dǫ Moses wenàowoò k'ę̀ę̀ geedaa zǫ dıı nèè gıghaelı̨ ha nı̨dè Nǫ̀htsı̨ edeyatıì goghàı̨ɂǫǫ eyıts'ǫ gogha ehkw'ı-ahodıı gogha wet'àaɂà ha nıìle.
15 Moses wenàowoò k'èats'ı̨ı̨t'e-le nı̨dè nàgoehkwa ha hǫt'e. Hanìkò eyı nàowo gǫ̀hłı̨-le nı̨dè nàgoehkwa ha nıìle, eyı nàowo k'èch'a hots'ehtsı̨-le t'à.
16 Eyıt'à Nǫ̀htsı̨ gogha ehkw'ı adı nı̨dè, Nǫ̀htsı̨ ayìı goghàɂà ha dıı sìı goghǫet'a ha hǫt'e. Nǫ̀htsı̨ gots'ǫ̀ wesǫnıwǫ ts'ıhɂǫ̀ goghàyeɂà hǫt'e, eyıts'ǫ dǫ hazǫǫ̀ Abraham wets'ıhɂǫ̀ǫ-dǫǫ̀ agı̨ı̨t'ee sìı hanì gıxè hòɂǫ ha hǫt'e. Hanìkò dǫ Moses wenàowoò gıghǫ̀t'ǫ zǫ gha nıìle, Abraham k'ę̀ę̀ Nǫ̀htsı̨ gıgha ehkw'ı-ahodıı sìı ededı̨ sı gıgha hǫt'e. Eyıt'à Abraham hazǫǫ̀ gogha gotà elı̨ hǫt'e.
17 Dıı hanì dek'eèhtł'è k'ę̀ę̀, “Dǫ hazǫǫ̀ xàɂaa gha gotà nèwhıhtsı̨ hǫt'e,” dek'eèhtł'è. Nǫ̀htsı̨ sìı dǫ ełaı̨dèe nagìdà agohɂı̨, eyıts'ǫ dǫ t'asìı gı̨ı̨lı̨-le sìı gıt'àaɂàa agohɂı̨ hǫt'e. Ededı̨ Abraham gha ehkw'ı adı t'à gotà elı̨į̀ ayį̀į̀là hǫt'e.
18 Chekoa wets'ǫ ha wegha ahxe whìle kò, Abraham Nǫ̀htsı̨ dàyèhdı ı̨lèe sìı wegha ehkw'ı-ahodı. Eyıt'à dǫ łǫ xàɂaa gha gotà whelı̨. Nǫ̀htsı̨ dıı hayèhdı ı̨lè, “Nets'ıhɂǫ̀ǫ-dǫǫ̀ gı̨ı̨lı̨ı̨ sìı whǫ̀ laàtłǫ lagı̨ı̨t'e ha,” yèhdı ı̨lèe sìı wek'ę̀ę̀ agòjà.
19 K'àhdzǫ ı̨łèakw'eènǫ weghoò ı̨lè, eyı xè sıì ǫhdah whelı̨ eyıts'ǫ wets'èkeè Sarah sıì ts'ǫǫ̀ko whelı̨ t'à chekoa wets'ǫ ha dìì, hotıì yek'èezǫ, hanìkò edınì nàtso ayį̀į̀hwhǫ.
20 Nǫ̀htsı̨ yets'ǫ̀ dànì eghàlaeda ha dı ı̨lèe sìı ghǫ wınì nàtso-le ajà-le, hanìkò Nǫ̀htsı̨ ts'ǫ̀ denahk'e wegha ehkw'ı-ahodıì ajà, eyıt'à Nǫ̀htsı̨ ghàsǫedı.
21 Nǫ̀htsı̨ dànì yatı whehtsı̨ı̨ sìı yek'ę̀ę̀ eghàlaeda ha wegha dìì-le, hotıì yek'èezǫ hǫt'e.
22 Abraham Nǫ̀htsı̨ yegha ehkw'ı adı t'à “Nǫ̀htsı̨ dǫ ehkw'ı geedaa k'ę̀ę̀ yııhtà.”
23 Dıı yatı “Nǫ̀htsı̨ dǫ ehkw'ı edaa k'ę̀ę̀ yııhtàa” sìı, Abraham wegha zǫ hanì dek'eèhtł'è nıìle,
24 hanìkò goxı̨ sı gogha hanì dek'eèhtł'è hǫt'e. Nǫ̀htsı̨, Zezì-Krı naìdà ayį̀į̀làa sìı gogha ehkw'ı adı nı̨dè, goxı̨ sı ehkw'ı ts'eedaa k'ę̀ę̀ goıtà ha hǫt'e.
25 Zezì gohołı̨į̀ k'èxa ełaı̨wo awììdlà hǫt'e, eyıts'ǫ gogha naìdà. Eyı ts'ıhɂǫ̀ Nǫ̀htsı̨ gha ehkw'ı ts'eedaa k'ę̀ę̀ goıtà hǫt'e.