Dhaŋum nhan Bolyu wukirri djorra' bala dhanaliŋgu Gulutjayḻi waŋalaḻi Garraywurumiwu warrawu bukmakku yana. Ga djingaryuwanam nhan gayŋan dhaŋum ŋirrima galki Yipatjatj waŋgala, ga ŋurruwuŋmi nhan dhaŋu waŋgalam. Ŋarru nhanmam banha Bolma dhuŋa bayikuya ŋirrimawu, ŋarru nhan banha ŋayaŋu-ŋuwatjinan dhäwum ŋäkul banha Garraywuruminham yolŋuny warrany banhambalayam waŋgalaḻi, ḻinygu dhanaliŋgu banha mä-wulitjinyaram ŋuthanan murrukayyinan. Ga dhäwum banha ŋuwakurrum dhanal ŋäkul yolŋuwuŋ yäkuwuŋ Yipaparatjkuŋ banha nhan gayŋan nyenan dhanaliŋguḻ banhalaya. Ga banha nhan Bolyu wukirrim bitjuwayiŋ dhaŋu djorram' nhanmam banhayam yolŋu Yipaparatjma yäku gayŋan ŋunhalayan nyenan rrambaŋin dhupalin Bolnha.
Ga banhalayam gayŋan banha yolŋu warra nyenan Gulutjayma guḻkuwun gayŋan batjiwarrwu ga guyaŋinyarawu malthuwan. Ga bitjanan dhanal gayŋan banha guyaŋinam gam; Banha dhanal ŋarru gulitjtjumanma gayŋa mä-ŋalthun God-Waŋarrwum dhanalim ŋarru guluna waripuŋurum djämaŋuru mala ga buku-ŋalthunma dhanal ŋarru gayŋa djiwarr'puywun yana yolŋuwu warrawu ga ŋunhuŋ nhäwun ganydjarr-murrukaymiwun birrimbirrwu malanyŋuwu. Ŋarru nhanmam dhanaliny Bolyum muḻkurrmiŋgan bitjan; Banha Garray Djesu gayŋa nyena ŋunham djiwarr'ŋam God-Waŋarrwuḻim wanydji'ŋa ga anhä malany dhaŋu ganydjarr malany dhaŋu ḏämbu ḻiw'yuman banhayam dhaŋu nhanguḻ dhungalŋa.
1
1 Dhaŋum djorra nyäkuŋ Bolwuŋ banha ŋaya dhaŋu djarr'yunda God-Waŋarrwuŋ. Ga djarr'yuwanam nhan nhänany ŋaya ŋarru djuy'yundamin yolŋu nhangun Djesu-Christkun. Ga nhän mu dhaŋu waripum Dimithi wäwa'miŋu ŋalmaliŋgu Garraywurumi.
2 Ga nhumaliŋgu ŋalinyu gayŋa dhaŋu yängumam Garraywurumiwu warrawu banha nhuma gayŋa nyena dhuwaniya ŋirrimaŋa yäkuŋa Gulutjay. Ŋaya gayŋa bukumiŋgan nhumaliŋgu mä nhan ŋarru God-Waŋarrma nhumaliŋgu maŋutji-wuyunna ga nyenam nhuma ŋarru gayŋa mägayayun romdhum.
Bolyu buku-wuŋan God-Waŋarrnha ŋayaŋuyu buku-wuŋandayu
3 Banha ŋanapu bayiŋ manapanmim bala ŋanapu bayiŋ buku-guŋanma God-Waŋarrnham banha nhan bäpa'miŋu ŋalmaliŋguru Garraywu Djesu-Christku.
4 Bilin ŋanapu dhaŋu dhäwum nhumaliŋguruy ŋäman banha nhuma gayŋa marimin yan mä-nhinathuŋganmi Djesu-Christkuḻim, ga djämam nhuma bayiŋ gayŋa ŋuwakurrun yana marimin guŋga'yunma ŋarra ŋunha God-Waŋarrwuruminham yolŋuny warrany bukmaknhan yan ŋayaŋuyum mä-ŋuwatjinyarayun.
5 Ga nhä malany nhuma gayŋan banha ŋuwakurru dhäwu malany ŋäkul bitjuwayiŋ Djesuwuruyma, bayikuyam nhuma ŋarru gayŋa marimim gatjpu'yun, gäḻkuḻaŋan warra batjiwarr-nhäŋan bayikuyam banha ŋuwakurruwum malanyŋuwu banha gayŋa ŋoya ŋunha djiwarr'ŋa djägaŋa ŋuwakurruŋa.ss