11
Fwaida ya kukala na chadi
1 Tsupha chakuryacho madzini,
nawe bada ya siku nyinji undachiphaha tsona na zaidi.
2 Ganyira mali uriyo nayo atu sabaa au hata anane,
mana kumanya tsi indaphahwa ni shaka rani.
3 Maingu gachiodzala madzi,
mvula nkunya duniani.
Na muhi uchigbwa kulola uphande wa mwakani au uphande wa vurini,
phapho ugbwapho ndipho ndipholala.
4 Alolaye phepho, kandaphanda,
na alolaye maingu kandavuna.
5 Uwe kumanya ni wakati wani phepho nkugaluza riphiyako. Piya kumanya mwana aumbwavyo ndanini mwa nine. Kpwa hivyo kuweza kumanya chila kazi ihendwayo ni Mlungu, iye ahendaye chila chitu.
6 Phanda ligundzu na uphande dziloni, mana kumanya ni mbeyu ziphi ndizomerato, ichikala ni hizi au hizi, au ichikala zosi zindavyala vinono.
Ushauri kpwa anache na atumia
7 Kukala moyo kunahama. Kuona mwanga wa dzuwa nkunono.
8 Mutu achiishi miaka minji, naahamirwe ni gosi. Ela naatambukire kukala siku mbii zindakala nyinji, na kukala mambo gosi ndigokpwedza siku zedzazo tagana mana.
9 We barobaro hamirwa ni ubarobaroo na moyoo ukuphe raha siku za ubarobaroo. Lunga moyoo umendzavyo na chinacholondwa ni matsogo. Ela umanye kukala Mlungu andakuamula kulengana na vira urivyoishi.
10 Usa utsungu mwako moyoni na utundze afya ya mwirio mana ubarobaro na nyere nyiru nkuyaya upesi.