8
Bilidadi naye anagomba
kano ya kpwandza
1 Chisha Bilidadi kula Shuwa achimjibu Ayubu achiamba,
2 “Undaenderera kugomba gaga hata rini?
Undagomba dza chikulukulu hadi rini?
3 Dze, Mlungu nkulavya uamuli usiokala wa haki?
Unaona ye Mwenye Nguvu Zosi nkugaluza haki ikakala handzo?
4 Ichikala anao amuhendera dambi,
iye akaatiya adabu kpwa uasi wao.
5 Ela uchimuendza Mlungu
na kumvoya ye Mwenye Nguvu Zosi,
6 ichikala kuna dowa na u mutu wa haki,
kpwa kpweli andakpwedzakuterya
na kukuuyizira makalogo kama garivyokala.
7 Dzagbwe mwandzo maishago kala si manono,
maishago ga mbereni gandakala manono sana.
8 Dzifundze kula kpwa hinyo ariokutanguliya,
na uririkane go garigogunduliwa ni akare.
9 Kpwa kukala swiswi hu a dzana, naswi tahumanya rorosi,
mana siku zehu phapha duniani ni dza chivurivuri.
10 Ikale taandakufundza na kukuambira?
Ikale taandagomba garigo mwao mioyoni?
11 Dze, miduga nkumera phatu phasipho matope?
Au mikangaga inaweza kukula phatu phasipho na madzi?
12 Madzi gachinywa wakati ichere mitsanga na taiweza kukatwa ili ihumirwe,
nkunyala mapema kabila ya mimea yanjina.
13 Zizo ndizo njira za amyalao Mlungu,
matumaini ga asiommanya nkuangamika.
14 Tegemeo rao nkuvundzika-vundzika,
na kuluphiro rao ni dza muhambo wa dzwidzwidzwi.
15 Nkujejemera nyo muhambo, ela tauazuwiya,
nkuugbwira ngingingi ela tauaterya.
16 Iye nkukula dza mmea mnono uphahao mwanga wa dzuwa,
utuluzao panda zikagota mo mwakpwe mundani.
17 Miziye nkudzilinga-linga maweni,
na kuendza mwanya kahi-kahi ya mawe makulu.
18 Unaphongʼolwa kula phatuphe,
pho phatu phandaurema phaambe,
‘Sidzangbwekuona uwe.’
19 Uho ndio mwisho wa maishage,
na yanjina indamera kula mtsangani kuhala nafwasiye.
20 Lola, Mlungu kandamrema mutu asiyekala na lawama,
na kandagbwira mkpwono mutu ahendaye mai.
21 Iye andahenda mromoo uodzale chitseko,
na madomogo gapige njerejere.
22 Osi akuberao andatiywa waibu,
na makalo ga atu ayi tagandakalako tsona.”