2
Shaka hiro kpwa aonerao ayawao
1 Shaka hiro kpwa apangao kuhenda mai,
anaopanga uyi mwao vitandani,
ligundzu kunaphocha anagahenda
kpwa sababu ana uwezo.
2 Nkuaza minda na akaihala,
akaaza nyumba na akazihala.
Nkumuonera mutu na atu a nyumbaye,
na nkufuta mutu urisiwe.
3 Kpwa hivyo Mwenyezi Mlungu anaamba hivi,
“Lola, ninapanga kureha shaka kpwa atu aha,
namwi tamundaweza kudzikombola enye,
tamundanyendeka tsona na shobo
mana undakala wakati mui.
4 Siku iyo atu andakutungirani wira wa sonono wa kukunyeterani
nao andaamba,
‘Hukaangamizwa tsetsetse,
Mwenyezi Mlungu akaganya vitu vya atu angu.
Iye akanifuta mtalo hinyo,
na minda yehu akaipha atu ario uhala mateka.’ ”
5 Kpwa hivyo takundakala na mutu ndiyekupima na kukuganyani minda, kpwa kupiga kura,
kahi ya kusanyiko ra atu a Mwenyezi Mlungu.
Manabii a handzo
6 Manabii aho nkuamba, “Usihubiri, usihubiri mambo higo,
swiswi tahundagbwirwa ni waibu.”
7 Mwi atu a Jakobo, gano mgombago ni sawa? Mnaphouza,
“Kpwani Roho wa Mwenyezi Mlungu kavumirira?
Vino iye nkuhenda mambo dza higa?”
Mwenyezi Mlungu anaamba, “Dze maneno gangu tagamuhendera manono
mutu ahendaye irivyo sawa?”
8 Ela siku hizi mukaaunukira atu angu
dza maadui,
munaavula vwazi ra chitajiri
atu atsupao kpwa amani
ambao taatarajiya viha.
9 Munaazola achetu a atu angu
kula kpwenye nyumba zao nono,
munaausira ana ao
baraka zangu hata kare na kare.
10 Unukani mphiye vyenu!
Hipha sipho phatu pha kuoya,
kpwa sababu ya phakanajisika,
phakabanangika kutsupa chiasi.
11 Ichikala mutu wa handzo amendzaye kuchenga atu andakpwedza aambe,
“Ndakutabiriani kukala kundakala na uchi munji na vinwadzi vya kulevya,”
Muhubiri iye andamendzwa ni atu hinya!
Mwenyezi Mlungu andakombola atue
12 Kpwa kpweli ndakukusanyani phamwenga mwimwi atu a Jakobo.
Ndaakusanya phamwenga atu a Iziraeli achiosala.
Ndaareha phamwenga dza mangʼondzi kpwenye chaa,
dza mifugo phao marisani,
napho phandakala na atu anji.
13 Hiye awezaye kuvugula njira andaatanguliya,
nao andavundza ryango ra mudzi na kutuluka kondze.
Mfalume wao andaatanguliya,
Mwenyezi Mlungu andakala chilongozi wao.