4
Ufalume wa Amani
Siku za mwisho
mwango wa nyumba ya Mwenyezi Mlungu undaimarishwa
ukale mwango mkpwulu kahi za myango yosi,
mure kuriko vidzango vyosi,
na atu andaphiya hiko kpwa unji.
Atu a mataifa ganjina manji andakpwedza aambe,
“Ndzoni, huambuke mwango wa Mwenyezi Mlungu,
huphiye nyumba ya Mlungu wa Jakobo.
Ili ahufundze njiraze,
naswi huhende gara alondago.”
Mana shariya indala Sayuni,
na neno ra Mwenyezi Mlungu rindala Jerusalemu.
+Andaamula malau ga atu anji
na andaamula mataifa manji genye mkpwotse ga phephi na ga kure.
Nao andabanda panga zao zikale majembe
na mafumo gao gakale marumu ga kutsatsurira.
Takuna taifa ndiropigana na ranjina
wala taandadzifundza viha tsona.
+Ela chila mmwenga andasagala tsini ya mzabibuwe
na muhiwe wa mtini,
na takuna ndiyeaogofyera,
mana Mwenyezi Mlungu, Mlungu wa majeshi akagomba.
Atu a mataifa andalunga milungu yao
ela swiswi hundalunga Mwenyezi Mlungu,
Mlungu wehu, ta kare na kare.
Mwenyezi Mlungu andativya Sayuni
Mwenyezi Mlungu anaamba, “Siku iyo
nindakusanya virema osi,
na niarehe hara ariokala akatsamizwa kpwa lazima
phamwenga na hinyo nrioagayisa.
Aho ni dza viswere ario kure na kpwao,
ela ndakala na mwandzo muphya na nyo ariosala, nao andakala taifa kulu.
Mwenyezi Mlungu andaatawala kula mwango Sayuni
hangu wakati uho hata kare na kare.
Na hiko Jerusalemu ambako Mwenyezi Mlungu anarinda atue,
dza mrisa arindavyo mifugoye kula mnara wa urindzi,
kundakala tsona mudzi mkpwulu wa ufalume wa Iziraeli.
Mwango wa mwana mchetu wa Sayuni,
undauyizirwa utawalao wa kare,
yani ufalume wa mwana mchetu wa Jerusalemu.”
Sambi kpwa utu wani unarira na raka ra dzulu?
Kpwani kuna mfalume?
Dze, mshaurio akafwa,
ndipho ukale na utsungu dza mchetu ariye na utsungu wa kudzivugula?
10 Galagala na uule kpwa utsungu uwe mwana mchetu wa Sayuni
dza mchetu ariye na utsungu wa kudzivugula.
Mana vivi undatuluka kondze ya mudzi
ukasagale kpwereru,
undaphiya Babeli
hiko undativywa,
na kuko Mwenyezi Mlungu andakukombola
kula mikononi mwa maaduigo.
11 Vivi mataifa ganjina manji
gakakusanyika chinyume na uwe.
Ganaamba, “Mriche atiywe najisi,
matso gehu nagafwaidi kuona Sayuni ichibanangbwa!”
12 Ela taamanya
maazo ga Mwenyezi Mlungu
taaelewa mipangoye,
kukala akaakusanya dza masuche hipho muhala wa kuwagira.
13 “Unuka uwage, uwe mwana mchetu wa Sayuni
mana pembeyo ndaihenda chuma;
kpwatsazo ndazihenda shaba,
undavundza-vundza mataifa manji.”*
 
Mapato gao haramu undagatenga kpwa ajili ya Mwenyezi Mlungu,
hinyo utajiri wao undamupha Mlungu wa dunia yosi.
+ 4:3 4:3 Isaya 2:4; Joeli 3:10 + 4:4 4:4 Zakariya 3:10 * 4:13 4:13 hipha Jerusalemu inalinganishwa na ndzau yenye mkpwotse ambayo nkuhumira kpwatsaze kusaga mtsere kahi ya phatu pha kuwagira.