105
Uaminifu wa Mlungu kpwa atue
(1 Nyakati 16:8–22)
1 Mshukuruni Mwenyezi Mlungu, mvoyeni,
amanyiseni mataifa mambo arigohenda.
2 Muimbireni, imbani mawira ga kumtogola,
semurirani mahendoge ga ajabu!
3 Hendani ngulu kpwa sababu ya dzinare takatifu.
Hinyo amuogophao Mwenyezi Mlungu naahererwe.
4 Muendzeni Mwenyezi Mlungu na nguvuze,
chila wakati londani kukala aripho iye.
5 Tambukirani mahendo ga ajabu arigohenda,
vilinjevye na hukumu arizolavya,
6 mwimwi chivyazi cha Burahimu mtumishiwe,
mwimwi chivyazi cha Jakobo, atue ariokutsambulani.
7 Iye Mwenyezi Mlungu, ndiye Mlungu wehu,
uamuliwe wa haki unaonekana duniani kosi.
8 Iye anatambukira chilaganeche cha kare na kare,
na anatambukira ahadiye hadi vivyazi elufu,
9 chilagane arichoika na Burahimu,
na ahadi ariyomuapira Isaka.
10 Ariyomuhakikishira Jakobo dza amuri
kpwa Iziraeli dza chilagane cha kare na kare,
11 waamba, “Ndakupha tsi ya Kanani
ikale seemu ya urisi wenu.”
12 Ariphokala ni achache,
ee achache sana, na ajeni mumo,
13 adengereke kula taifa hadi taifa,
kula ufalume mmwenga hadi wanjina,
14 kayamruhusu yeyesi aaonere,
waademurira afalume kpwa sababu yao.
15 Waamba, “Msigute apakpwa mafuha angu,
wala msiahende mai manabii angu.”
16 Mlungu wareha ndzala kahi ya tsi
naye achibananga chakurya chao chosi.
17 Ela kala akaatangulizira mutu mmwenga,
Yusufu yekala akaguzwa dza mtumwa.
18 Maguluge gafungbwa silisili,
na achimfunga silisili ya chuma singoni,
19 hadi gariphotimiya gara arigotabiri,
hadi neno ra Mwenyezi Mlungu ririphomanyikana kukala ni ra kpweli.
20 Mfalume walagizira kukala avugulwe,
mtawala wa mataifa wamrichira huru.
21 Achimuhenda muimirizi wa nyumbaye,
na mkpwulu wa malize zosi,
22 Aafundze akulu a utawalawe kama aonavyo sawa
na aafundze ikima atumiae.
23 Ndipho Aiziraeli achiinjira tsi ya Misiri,
Jakobo achisagala dza mjeni kpwenye tsi ya Hamu.
24 Phahi Mwenyezi Mlungu wahenda atue avyalane,
na achiahenda akale na mkpwotse kuriko aviha ao.
25 Achihenda Amisiri azire atue
na aahendere mai atumishie.
26 Chisha wamhuma mtumishiwe Musa,
phamwenga na Aruni ariyekala akamtsambula.
27 Achihenda vilinjevye kahi za Amisiri,
na mahendoge ga ajabu kpwenye tsi ya Hamu.
28 Wahuma jiza kpwenye yo tsi,
ela Amisiri achirema kulunga manenoge.
29 Madzi gao achigagaluza kukala milatso,
na achihenda ngʼonda aho afwe.
30 Tsi yao ichigota magula,
hata vyumbani mwa atawala ao.
31 Achigomba na kuchedza maindzi
na madadada tsi yosi.
32 Achiarehera mvula ya mawe
na limeme richimeka kula pembe mwenga ya tsi hadi yanjina.
33 Wabananga mizabibu na mitini yao,
na achivundza-vundza mihi yosi ya tsi yao.
34 Mlungu walagiza na kuchedza ndzije,
na maelufu ga fumbiri,
35 achedzarya mimea yosi ya tsi yao,
achirya matunda ga tsi yao.
36 Halafu waolaga ana a mwandzo osi a tsi yao,
matunda ga kpwandza ga nguvu zao.
37 Ndipho achiatuluza Aiziraeli kula tsi hira kuno akatsukula feza na zahabu,
wala taphana hata mmwenga wao ariyekpwala.
38 Amisiri ahamirwa ariphouka,
mana kala anaogopha sana.
39 Mlungu waaikira ingu kufwinika dzuwa ra mutsi
na moho ili uaangʼazire usiku.
40 Achimvoya, naye achiarehera makpware,
achiapha chakurya kpwa unji kula mlunguni.
41 Waahula dziwe, richituluza madzi
gachijera dza muho hiko jangbwani.
42 Mana kala akatambukira ahadiye takatifu,
ariyomupha mtumishiwe Burahimu.
43 Kpwa hivyo achilongoza atue na raha
atu arioatsambula achiphiya kuno anashangiliya.
44 Achiapha tsi za mataifa ganjina,
achihala minda ambayo kala ikarimwa ni atu anjina,
45 ili mwishowe akale andagbwira malagizoge
na kulunga shariyaze.
Mwenyezi Mlungu naatogolwe!
Haleluya.