އީސާ އަލްމަސީޙުގެ ހާމަކޮށްދެއްވުންތަކެއް
ތަޢާރަފް
މި ވަޙީ ފޮތްކޮޅު އީސާގެފާނުގެ އަސްޙާބީއެއް ކަމުގައިވާ ޔޫޙަންނާ ލިޔެފައި ވަނީ މަސީޙީންނާއި މެދުގައި އެންމެ ބޮޑަށް އަނިޔާވެރިވެގެންވާ ދުވަސްތަކުގައި ވެސް މެއެވެ. އެބައިމީހުންނަށް އަނިޔާ ދެވެން ފެށީ މާތްސާހިބާ އީސާ އަލްމަސީޙާއި މެދު ވާ އީމާންތެރިކަމުގެ ސަބަބުންނެވެ. މި ފޮތުގެ މުސައްނިފްގެ އެންމެ ބޮޑު ވިސްނުމަކީ ކިޔުންތެރިންނަށް އުންމީދާއި ހިތްވަރު ދިނުމެވެ. އަދި މުސީބާތާއި އަނިޔާގައި ވީ ހިނދު އީމާންތެރިކަމުގައި ފުރިހަމައަށް ސާބިތުވެ ހުރުމަށް އެދި ނަސޭޙަތްތެރި ވުން ވެސްމެއެވެ.
މިފޮތުގެ ގިނަބައިތަކުގައި ހިމެނިފައި ވަނީ އިލާހީ ސޫރަވުންތަކާއި، ވަޙީ އާއި އަދި ނިދާގެ ސިލްސިލާ ތަކެކެވެ. އެ ތަކެތި ހުށަހަޅާދީފައި ވަނީ ރަމްޒީ ބަހުރުވައިންނެވެ. އެއީ އެދުވަސްވަރުގެ މަސީޙީންނަށް އެނގިގެންވީ ބަހުރުވައެއް ވެސް މެއެވެ. ނަމަވެސް ގިނަބަޔަކަށް މިކަންތައްތަކަކީ ވަންހަނާ ކުރެވިގެންވާ ކަންތަކެވެ. މި ފޮތުގެ މައިގަނޑު މަޢުޟޫޢު ވަރަށް ސާފުކޮށް އެނގިގެންވެއެވެ. އެއީ މާތްސާހިބާ އީސާ އަލްމަސީޙު މެދުވެރި ކުރައްވައި މާތްރަސްކަލާނގެ އެކަލޭގެފާނުގެ އަދުއްވުންގެ މައްޗަށް ފަތަޙަ ހޯއްދަވާނެ ކަމެވެ. ޚާއްސަކޮށް ޝައިތާނާގެ މައްޗަށް ވެސް މެއެވެ. އަދި އެއަށް ފަހު އެކަލާނގެ ކިބަފުޅަށް ތެދުވެރި ގޮތުގައި އީމާންތެރިވާ ފަރާތްތަކަށް ހެޔޮ ޖަޒާ ދެއްވައި ސުވަރުގޭގެ ބަރަކާތްތެރިކަން ލިބިދެއްވާނެކަން ސާފުކޮށް ބަޔާން ކުރައްވާފައި ވެއެވެ. އަދި ފުރިހަމަ ކާމިޔާބު ޙާސިލުވާހިނދު އާ ސުވަރުގެއާއި އާ ދުނިޔޭގައި އާ ޙަޔާތު ފުރިހަމަ ކުރާނެ ގޮތްތައް ބަޔާންކޮށް ދެއްވާފައިވާ ބަސްފުޅު ވެސްމެއެވެ.
ތަޢާރަފް (1:1-8)
ފުރަތަމަ ނިދާ އަދި މަސީޙީ ހަތް ޖަމާޢަތަށް ލިޔެވުނު ހަތް ސިޓީ (1:9—3:22)
ހަތް ސިލު އާއި ފޮތެއް (4:1—8:1)
ހަތް ތާޅަފިލި (8:2—11:19)
ޑްރޭގަން އާއި ދެ ދާއްބަ (12:1—13:18)
ތަފާތު އިލާހީ ސޫރަވުންތައް (14:1—15:8)
މާތްރަސްކަލާނގެ ކޯފާގެ ހަތް ބޯތަށިކޮޅު (16:1-21)
ބާބިލް ނެތިކުރެވި، ދައްޖާލުގެ މައްޗަށް ފަތަޙަ ހޯއްދެވުން، ދޮގު ނަބީބޭކަލުން އަދި ޝައިތާނާ (17:1—20:10)
އެންމެ ފަހު ފައިސަލާ ކުރެއްވުން (20:11-15)
އާ ސުވަރުގެ، އާ ދުނިޔެ، އާ ޖެރޫސަލަމް (21:1—22:5)
ނިންމުން (22:6-21)
1
އިސްބަސް
1 މި ފޮތަކީ އީސާ އަލްމަސީޙަށް މާތްރަސްކަލާނގެ ހާމަކޮށްދެއްވި ހާމަކޮށްދެއްވުން ތަކެކެވެ. އެއީ ދުރުނޫން ގޮތެއްގައި ހިނގާނެ ޙާދިސާ ތަކެއްގެ ޚަބަރު އެކަލޭގެފާނުގެ ޚާދިމުންނަށް ބުނެދެއްވުމަށެވެ. އަދި އަލްމަސީޙުގެ މަލާއިކަތާ އެކަލޭގެފާނުގެ ޚާދިމު ޔޫޙަންނާއަށް ހިނގާނެ މި ޙާދިސާތައް އަންގައި ދިނުމަށް ފޮނުއްވިއެވެ.
2 އެގޮތުން ޔޫޙަންނާއަށް ފެނުނު ކަންތައްތައް އެ ހިނގާދިޔަ ފަދައިން ބުނެދިނެއެވެ. މިއީ މާތްރަސްކަލާނގެ ދެއްވި އެކަލާނގެ ޚަބަރުފުޅުތަކާއި މެދުވާ ސާބިތު ހެކިތަކެއްގެ ވާހަކަތަކެވެ. އަދި އީސާ އަލްމަސީޙު ފައުޅު ކޮށްދެއްވި ތެދު ބަސްފުޅެވެ.
3 މިފޮތުގައިވާ ޣައިބުގެ ބަސްފުޅުތައް މީހުންނަށް ކިޔާދޭ ކޮންމެ ފަރާތަކަށް މާތްރަސްކަލާނގެ ރަޙުމަތް ލައްވަތެވެ. އަދި މި ބަސްފުޅުތައް އަހައި ކިޔަމަންގަތް ކޮންމެ އަޅަކަށް ވެސް އެކަލާނގެ ރަޙުމަތް ލައްވަތެވެ. ސަބަބަކީ މި ބަޔާންކުރާ ފަދަ ޙާދިސާތައް ހިނގައިދިއުމުގެ ވަގުތު މިވަނީ އައިސް ކައިރިވެފައެވެ.
މަސީޙީ ޖަމާޢަތުގެ ހަތް ޖަމާޢަތަށް ތަހުނިޔާ
4-5 މި ސިޓީ އަކީ އޭޝިޔާ ސަރަހައްދުގައި ތިބި މަސީޙީ ޖަމާޢަތުގެ ހަތް ޖަމާޢަތަށް ޔޫޙަންނާގެ ފަރާތުން ލިޔެ ފޮނުވާ ސިޓީއެކެވެ.
މިހިނދުގައިމެ ވޮޑިގެންވާ، މާޒީގައި ވޮޑިގެންވި، އަދި މުސްތަޤްބަލުގައި ވެސް އަބަދަށްމެ ވޮޑިގެންވާނެ މާތްރަސްކަލާނގެ ކިބަފުޅުންނާއި، އަދި އެކަލާނގެ ތަޚުތުކޮޅުގެ ކުރިމަތީގައިވާ ހަތް ރޫހުފުޅުގެ ފަރާތްޕުޅުންނާއި، ވަފާތެރި ހެކިވެރިޔާ އަދި ޚަލްޤުތަކުންގެ ތެރެއިން އަވަހާރަވެ ވަޑައިގެންނެވުމަށް ފަހު އެންމެ ފުރަތަމަ އަލުން ދިރިދުނިޔެއަށް ވަޑައިގެންނެވި ފަރާތް ކަމަށްވާ މިދުނިޔޭގެ ހުރިހާ ރަސްރަސްކަލުންގެ ވެރިޔާ އީސާ އަލްމަސީޙުގެ ފަރާތްޕުޅުން ތިޔަބައިމީހުންނަށް ނިޢުމަތާއި ސުލްހަވެރިކަން ރައްދުކުރަމެވެ.
އެކަލޭގެފާނު އަހަރެމެން ދެކެ ވާލޯބިފުޅުގެ ސަބަބުން އަހަރެމެންނަށްޓަކައި ޤުރުބާން ކުރެވި އަވާހަރަވެ ވަޑައިގެންނެވީ އެކަލޭގެފާނުގެ ލޭފޮދުން އަހަރެމެން ފާފަވެރިކަމުން މިނިވަން ކޮށްދެއްވުމަށެވެ.
6 އަދި އެކަލޭގެފާނުގެ ރަސްކަލާނގެ ކަމަށްވާ މަތިވެރި ބައްޕާފުޅުގެ ޚިދުމަތުގައިވާ އިމާމުންގެ ރަސްކަންފުޅެއް ކަމުގައި އެކަލޭގެފާނު އަހަރެމެން އައްޔަން ކުރެއްވިއެވެ. އީސާ އަލްމަސީޙަށް ޖަލާލަތާއި ބާރު އަބަދުގެ އަބަދަށް ދެއްވާށިއެވެ! އާމީން.
7 ދެކިބަލާށެވެ! އެކަލޭގެފާނު އެވަޑައިގަންނަވާނީ ވިލާގަނޑުތަކުގެ ތެރެއިންނެވެ. ހުރިހާ އެންމެންނަށް އެކަލޭގެފާނު ފެނިގެންވާނެއެވެ. އެކަލޭގެފާނުގެ ހަށިކޮޅު ތޮރުފައި އަނިޔާވެރިވީ މީސްތަކުން ވެސް އެކަލޭގެފާނު ދެކޭނެވެ. ދުނިޔޭގައި ވާ އެންމެހާ މީސްތަކުން އެކަލޭގެފާނުގެ މައްޗަށް ފުން ހިތާމަ ކުރާނެއެވެ. އާނއެކެވެ. މިފަދައިން މިކަންތައްތައް ހިނގާނެއެވެ! އާމީން.
8 ސާހިބުވަންތަ ރަސްކަލާނގެ ވަޙީކުރެއްވިއެވެ. ”އަހަރެންނަކީ އަލްފާ އަދި އޮމޭގާ. އަދި އަހަރެންނަކީ މިހިނދުގައިމެ ވޮޑިގެންވާ، މާޒީގައި ވޮޑިގެންވި އަދި މުސްތަޤްބަލުގައި ވެސް އަބަދަށްމެ ވޮޑިގެންވާނެ ކުޅަދުންވަންތަ މާތްރަސްކަލާނގެ.“
އީސާގެފާނު ފެނިވަޑައިގަތުން
9 އަހަރެންނީ ތިޔަބައިމީހުންގެ އަޚު، ޔޫޙަންނާއެވެ. އަލްމަސީޙުގެ ރަސްކަންފުޅުގައި ވޭން ތަޙައްމަލުކުރުމުގައި ޙިއްސާވާ އަދި އެކަލޭގެފާނު ދެއްވާ ކެތްތެރިކަމުގައި ކުރިޔަށް ދާ ތިޔަބައިމީހުންގެ ބައިވެރިޔަކީމެވެ. އަހަރެން ޕާތުމޮސް ކިޔާ ރަށަށް އަރުވާލީ މާތްރަސްކަލާނގެ ބަސްފުޅުންނާއި އަދި އީސާގެފާނުގެ ހެޔޮ ޚަބަރުފުޅުން ވަޢުޡު އިއްވަމުން ދިއުމުގެ ސަބަބުންނެވެ.
10 މާތްސާހިބާގެ ދުވަހުގައި މާތްރޫޙުފުޅުގެ ބާރުފުޅުން އަހަރެން ފުރިގެން ވިއެވެ. އަދި ތާޅަފިލީގެ އަޑުފަދަ ގަދަ އަޑެއް އަހަރެންނަށް އިވުނެވެ. އެ ހިނދު އެއަޑު އަހަރެންގެ ފުރަގަހުން ވާހަކަ ދައްކަމުން ދިޔައެވެ.
11 އެއަޑު އަހަރެންނަށް ބުންޏެވެ. ”ތިބާއަށް ފެންނަ އެންމެހާ ކަންތައް ފޮތެއްގައި ލިޔެ މި ހަތް ސަހަރުގެ މަސީޙީ ޖަމާޢަތްތަކަށް ފޮނުވާ. އެއީ: އެފޭސުސް، އިޒުމީރު، ޕެރުގަމޫމު، ތިޔާތިރާ، ސަރުދީސް، ފިލަދެލްފިޔާ އަދި ލަވުދީކިޔާ.“
12 އަހަރެންނާއި ވާހަކަ ދެއްކީ ކާކުތޯ ބެލުމަށް ފަސްއެނބުރި ވަށައިގެން އަހަރެން ބެލީމެވެ. އެ ހިނދު އަހަރެންނަށް ފެނުނީ ދިއްލާފައިވާ ބައްތި ބަހައްޓާ ރަނުގެ ހަތް ހަރެވެ.
13 އަދި އެ ތަކެތީގެ މެދުގައި އިންސާނާގެ ދަރިކަލުން ފަދަ މީހަކު ވިއެވެ. އެމީހަކު ލައިގެން ހުރި ރިދާކޮޅު އެމީހެއްގެ ފައިތިލައާއި ހަމައަށް ދިގުވެގެންވިއެވެ. އަދި މޭމަތީގައި ވަށައިގެން ރަން ބާސްކީއްޔެއް އަޅާފައިވިއެވެ.
14 އެމީހެއްގެ އިސްތަށިގަނޑު ކަފަ ފަދައިން ނުހަނު ހުދު ކުލައިގައި ވިއެވެ. އަދި އެމީހެއްގެ ލޯ ވަނީ އަލިފާނުގެ ހުޅުކޮޅެއް ފަދައިންނެވެ.
15 ވިރުވާފަ އޮފްއަރުވާފައިވާ ރަތުލޮއި ފަދައިން އެމީހެއްގެ ފައިތިލަ ވިދާ ބަބުޅައެވެ. އަދި އެމީހެއްގެ އަޑުގައި ވަނީ ގަދަފަދަ ކޮޅިގަނޑެއްގެ ވިއްސާރައިގެ އަޑުފަދަ އަޑެކެވެ.
16 އެމީހެއްގެ ކަނާއަތުގައި ހަތް ތަރި ވިއެވެ. އަދި ދެމިޔަލީ ތޫނު ކަނޑިއެއް އެމީހެއްގެ އަނގައިގެ ތެރެއިން ނުކުތެވެ. އެމީހެއްގެ މޫނު މެންދުރު ވަގުތުގެ އިރު ބަބުޅާ ފަދައިން ބަބުޅައެވެ.
17 އަހަރެންނަށް އެމީހަކު ފެނުނު ހިނދު މަރުވެގެން ވެއްޓުނު މީހަކު ފަދައިން އެމީހާގެ ފައިމައްޗަށް ވެއްޓުނީމެވެ. ނަމަވެސް އެމީހާގެ ކަނާއަތުން އަހަރެން ނަންގަވައި ވިދާޅުވިއެވެ. ”ބިރު ނުގަނޭ! އަހަރެންނަކީ އެންމެ ފުރަތަމަ އަދި އެންމެ ފަސް ވެސްމެ.
18 އަހަރެންނީ ދާއިމަށް ދެމި ވޮޑިގެންވާނެ ފަރާތް! އަހަރެން މަރުވެދިޔަ. ނަމަވެސް އަހަރެންނީ އަބަދުގެ އަބަދަށް ދިރިދެމި ވޮޑިގެންވާނެ ފަރާތް. މަރުގެ ތަޅުދަނޑި އަހަރެން ހިފަހައްޓަން. އަދި މަރުގެ މަންޒިލްގެ ތަޅުދަނޑިވެސް އަހަރެން ހިފަހައްޓަން.
19 ތިބާ ދުށް އެންމެހާ ކަންތައް ލިޔޭ! އެއީ މިހާރު ހިނގާ ކަންތައްތަކާއި، އަދި ކުރިއަށްއޮތް ތާނގައި ހިނގާނެ ކަންތައްތައް.
20 ތިބާއަށް އަހަރެންގެ ކަނާއަތުގައި ވަނިކޮށް ފެނުނު ހަތްތަރިއާއި، އަދި ދިއްލާފައިވާ ބައްތި ބަހައްޓާ ރަނުގެ ހަތް ހަރުގެ ފޮރުވިފައިވާ މާނައަކީ މިއީ. އެ ހަތްތަރި ރަމްޒު ކޮށްދެނީ މަސީޙީ ހަތް ޖަމާޢަތުގެ މަލާއިކަތުން. އަދި ދިއްލާފައިވާ ބައްތި ބަހައްޓާ ރަނުގެ ހަތް ހަރު ރަމްޒު ކޮށްދެނީ މަސީޙީ ހަތް ޖަމާޢަތް.“