2 Johanisi
Di fu tu biifi di Johanisi sikiifi
Wan wowtu a fesi
We, disi na di fu tu biifi di Johanisi, a apaiti bosikopuman fu Masaa Jesesi sikiifi. Da a sikiifi a biifi ya gi wan biibi uman di a sabi.
A sikiifi a biifi ya gi den biibiwan anda fu meke a lobi fu den kon moo bigi. Soseefi tu, fu bali den fu den luku bun anga den sani fu goontapu di e koli sama poli a biibi libi. Ai bali den fu den wai a pasi gi ogii, da den du soso bun. A bali den fu den de na ain, da den poti den seefi moo anga moo gi Masaa Gadu fu den sa si, te falisi leli e opo a den mindii.
1
Bigin fu a biifi
1 We, na mi Johanisi, a gaansama fu keliki e meke a biifi ya sende gi wan apaiti uman, di e biibi a Masaa Gadu.
Mi e gi en anga ala den pikin fi en bigi odi. Fa mi anga u de a biibi ya, da mi lobi u tuutuu. Soseefi ala sama di de fu Masaa Gadu lobi u tu.
2 Bika a tuutuu leli fu Masaa Gadu de a ini wi ati naamo sondee fu kaba.
3 Da meke Masaa Gadu, u Tata anga Jesesi Kelestesi en Manpikin, teke gaan bun ati fasi luku u. Soseefi teke tyali ati fasi luku u. Soseefi, meke u ati de switi. Meke Masaa Gadu du san mi begi ya gi u, te u sa tan biibi a tuutuu bosikopu fu Masaa Gadu, anga te u lobi taawan.
A weiti fu lobi
4 We, gaan piisii fuu mi ati. Bika di mi kon ya, mi si wantu pikin fi yu, di e libi leti enke fa a tuutuu leli fu Masaa Gadu de.
5 Da mi lobi sisa! Meke u tan lobi useefi naamo sondee kaba. Disi a ná wan nyun weiti. Ma na a gaan haw wan, di Masaa Gadu be gi wi, senten di u be bigin waka a Jesesi Kelestesi baka. Na so mi sikiifi taigi u.
6 Bika, san e soi u taki wi lobi useefi? Na te u e waka enke fa Masaa Gadu weiti taki. Bika, fanafu u bigin waka a Jesesi Kelestesi baka, ne a gi u a weiti fi en taki: “U mu lobi useefi!”
Poti den falisi leliman a wanse
7 Bika, somen leiman paati lontu goontapu e koli sama. Den nái biibi taki Jesesi Kelestesi kon a goontapu enke libisama. Da den sowtu sama ya na den buuseman fu Jesesi Kelestesi. Ma den e koli sama puu a Gadu pasi.
8 A dati meke u mu koni anga den fu a á de taki, na fu soso u meke moiti anga u na a biibi libi. Ma u mu e meke moiti fu fende a hiihii paiman fu u di Masaa Gadu paamisi u.
9 Da ibii sama di fika a leli fu Kelestesi go e biibi wan taa sani, da sowan sama á de a Masaa Gadu se moo. Ma sama di tan e biibi san di Kelestesi leli en, da a Tata anga a Manpikin o de anga en.
10 A dati meke efu wan sama kon a yu, ma a á tyai a leli ya, ná opo i doo gi en. Ná gi en odi seefi tu.
11 Bika, efi i gi en odi, da i taampu anga en a wanse kaba fu du a ogii di ai du.
A kaba pisi fu a biifi
12 Mi lobi sisa! Somen sani de, di mi be sa wani taigi i ete. Ma mi á wani sikiifi den a pampila sende gi yu. Ma, te mi kon anda, da u sa miti fesi fesi, fu sidon taki anga useefi. Da, wi ati sa de anga gaan piisii. Bika mi e denki fu kon a yu anda dyonson.
13 We, den pikin fi yu lobi sisa dise sende bigi odi gi yu tu.