Baluwa jhukutumbula jha Pauli kwa
Akakolintu
Ulongolelo
Baluwa jhukutumbula jha Pauli jhijhandikwe na ntenga jwa Pauli pakate jha muchaka cha makome nhwano na nhwano kubhoke Yecho Kilichitu pabhelwika, mu chula jha 1:1. Jhenje ndi ikibha baluwa jhukutumbula pakate jha baluwa ibhele ya Pauli ikajhandikwe na Pauli kwa makunde gha bhando ghhighannyeketii Kilichitu gha ku Kolintu. Akajhandike baluwa jhenje pakibha atamita ku Epecho kabula jha kuhamuu kutyangila ku Kolintu, pakibha ajhahwila na kubhujha ku Makedoniya, mu chula jha 16:5-9.
Baluwa jhenje ndi Pauli ajhanguu malobhe gha jhiletitwe na bhando kwa bhange, malobhe ghighalongelwa ghighateii na kikunde cha bhando chikinnyeketii Kilichitu, gwanganandela gwenio ndi mpechengano na ngongola. Muche gwa ku Kolintu ukamanyikine hake kwa ngongola, yenio lijhambu lya yakukangacha kwa kikunde cha bhando bhibhannyeketii Kilichitu kwa mambu gheniya. Helahela baluwa jhenje jha kutumbula kwa bhando bha ku Kolintu, mu chula jha 13 ghabhii malobhe gha upalu.
Ghughabhii mukitabo
Pauli abhajhambucha bhando bha ku Kolintu na innomba Chapanga kwa nhwalo gwabhe, mu chula jha 1:1-9.
Pauli ilonge malobhe gha mpechengano pakate jha likunde lilinnyeketii Kilichitu lya kwenio ku Kolintu, mu chula jha 1:10-4: 21.
Pauli ilongelela malobhe gha ngongola na kupelekana pamihalo bhene kwa bhene, mu chula jha 5-6.
Pauli ilongelela malobhe gha ipwatilila panane jha kutolelana, helahela mapwatalilo panane jha kupiya litambiko kwa inyagho na mapwatalilo panane jha kuyoka, mu chula jha 7-15.
Pauli ijhomolela kwa kukilongelela jwenio na mahengo ghake, mu chula jha 16.
1
1 Nenga Napauli, jhungemitwe kubhehe natenga jwa Kilichitu Yecho kwa kupala Chapanga, na nnongo gwito Sositenesi.
2 Tunyandikile mangota ma bhando bhumunyeketii Chapanga bhumii ku Kolintu, mangota nhengitwe kubhehe bhanyahinyahi mu kulombana na Kilichitu Yecho, pamonga na bhando bhoha popoha bhubhannyopa Bhambo gwito Yecho Kilichitu.
3 Ninyope umbone na uteeke kuhumii kwa Chapanga Tate gwito na Bhambo Yecho Kilichitu.
Mota ya Chapanga
4 Ninchenguu Chapanga kwa machiko ghoha kwa nhwalo gwino mangota mme na umbone gwake kwa ndela jha Kilichitu Yecho.
5 Nhwalo, kwa kulombana na Kilichitu, mangota nnyambulile ilebhe yoha. Nnyambulile mukulonge na kumanya.
6 Nhwalo malobhe gha uchakaka gha Kilichitu ghajhemite mbone nkate jhino.
7 Hilu mpungokilwe jhe na hupo jhojhoha kubhoke kwa Uhuke gwa Chapanga, kongo mmii mu kunendelela Bhambo gwito Yecho Kilichitu papala kubhonekana.
8 Jwenio nakangamalicha mangota ade lichiko lya kujhomolela, nkotoka kubhonekana kubhehe na ulemo lichiko lela lya Bhambo gwito Yecho Kilichitu.
9 Chapanga ndi jwahobholeka, jwenio ankemite mangota maghumba nde na Mwana mundo Yecho Kilichitu, Bhambo gwito.
Mpechanganiko gwa bhando bhubhannyeketii Kilichitu
10 Makalongo bhango, ninyopa kwa liina lya Bhambo gwito Yecho Kilichitu, nnyilane kwa kila kilebhe chimulongela, panga mpechangano pakate jhino, mme na liwacho limo na lilobhe limo.
11 Makalongo bhango, bhando bhange kubhoke munyumba jha Kuloe bhanobhalile mangota mjhangulana jhe.
12 Nipala kulonge chenje, kila jhumo alonge lyake, jhumo alonge, “Nenga naningekama Pauli,” na jhonge alonge, “Nenga naningengama Apolu,” na jhonge ilonge, “Nenga naningengama Kefa,” na jhonge alonge, “Nenga naningengama Kilichitu.”
13 Bho, Kilichitu apechanganike? Bho, Pauli ndi jwakabhambitwe panchalaba kwa nhwalo gwino? Bho, makabatichwe mme bhabholwa bha Pauli?
14 Ninchenguu Chapanga nhwalo nikabatiche jhe mundo jhojhoha mu lilongo lino nambo Kilisipo na Gayo tugha.
15 Yene mundo jhojhoha akotoka kulonge akabatichwe kwa liina lyango.
16 Ngohe ngombwike! Helahela nakabatiche Sitefano na bhando bhibhakibha nkate jhake, nambo nikomboka jhe anda nikambatiche mundo jhonge.
17 Kilichitu akandumite jhe nenga kubaticha, nambo andumite kwatangachii bhando Malobhe gha Mbone, changahobholela bhando bhina malango, nhwalo likakala lya kuwe kwake Kilichitu pa nchalaba kibhonekana kilebhe nacho.
Kilichitu ndi likakala na malango gha Chapanga
18 Nhwalo malobhe gha kuwe kwa Yecho Kilichitu pa nchalaba ndi kilebhe cha ndindilima kwa bhala bhubhabhii mulilongo lya bhibhahobholela, nambo kwa twenga bhutughombokoka, tulibhona likakala lya Chapanga.
19 Nhwalo Majhandiko gha Chapanga ghalonge,
“Chahangabhana malango ghabhe kwa bhando bhubhabhii na malango,
nu kumanya kwabhe chandaghila kutale.”
20 Bho, bhabhii ko, bhando bhubhabhii na malango? Bho, bhabhii ko, bhabhola bha malaghalikilo? Bhabhii ko bhina malango hake? Chapanga alangi njwe malango gha bhando bha nnema ghongo kubhehe undindilima.
21 Kwa malango gha Chapanga, ihotoleka jhe bhando kummanya Chapanga kwa malango ghabhe, Chapanga akapahi kwakombola bhala bhubhajheketii kupete malobhe ghatutangachila, malobhe ghala ghughabhonekana undindilima kwa bhando bhina malango.
22 Akayahude bhapala ikangacho, na Akagilike bhapala malango.
23 Nambo twenga tuntangacha malobhe gha Kilichitu jwabhambitwe panchalaba. Kibhonekana kingobhahe kwa Akayahude, na undindilima kwa bhando bha ilambo henge.
24 Nambo kwa bhala bhubhakemitwe na Chapanga, bhoha Akayahude na Akagilike, Kilichitu ndi likakala lya Chapanga na malango gha Chapanga.
25 Nhwalo chikibhonekana undindilima kwa Chapanga, kibhii na malango kupeta malango gha mundo, na chikibhonekana kikwete jhe makakala kwa Chapanga, kibhii na makakala kuliku makakala gha bhando.
26 Makalongo bhango, ngohe nkomboke pingemitwa na Chapanga, bhamahele pakate jhino mukibha jhe na malango kulengana na mawacho gha bhando, bhamahele jhe bhumukibha na likakala amu bhando bhumukibha aakolongwa.
27 Nambo Chapanga akahagwile ilebhe ya pannema ibhonekane ya undindima, kupala kwapeke hone bhubhabhii na malango, Chapanga akahagwii ilebhe ileghelike kupala kwapeke hone bhala bhubhakwete makakala.
28 Chapanga ahagwii ilebhe ibhonekana ipechelike na bhando na ghala ghabhonekana kilebhe nacho na yanganandela, kupala kughahangabhana ghighabhonekana na bhando kubhehe makolongwa pannema.
29 Chapanga akatehi yenio kupala mundo jhojhoha akotoka kukiloka palonge jhake.
30 Chapanga ndi jwanombaniche mangota na Kilichitu Yecho. Chapanga antei Kilichitu kubhehe malango ghito, kwa ndela jhake twenga tujhelanichwa na Chapanga, tubhehe bhando bha nyahinyahi na kughombokoka.
31 Bhahe, ngita chighalongela Majhandiko gha Chapanga, “Jwapala kukiloka, na alokela lihengo lya Bhambo.”