5
Mwibhambale ngongola
1 Ghabhii malobhe gha uchakaka kubhehe bhabhii akatenda ngongola pakate jhino, kabhele ngongola yenio inapitila jhe hilu kwa bhando bhangaummanya Chapanga. Nobholilwe kubhehe jhumo gwino igholoka na mwikeghe jwa tate mundo!
2 Nauhotola bhole kuloka? Mbaha kwino kubhehe ngolongondi, na mundo jwahenga mambu gheniya abhengwa pakate jhino.
3 Na nenga, kiyegha mii kutale na mangota, nambo kiuhuke tubhii pamonga, anda mmi pakate jhino ninhadabwii njwe kwa liina lya Bhambo Yecho mundo jwenio jwahengite mambu gheniya gha hone.
4 Pumukonganika pamonga, na nenga mmii na mangota mu uhuke gwango, na likakala lya Bhambo gwito Yecho ibhii peniya,
5 mundo jwenio munkamuye kwa Limbembela kupala yegha jhake ihangalabhanwe na uhuke gwake ukombolelwe lichiko lela Bhambo papakuhika kwahadabuu bhando.
6 Kuloka kwino kuchata jhe! Bho, umanyitii jhe kubhehe kimela chandina kituta libuluma lya ukobha?
7 Mukijhelebhuhe kwa kuileka ngedule gha makacho jha uhakaho na mme mukumuku. Peniya nanandana na libuluma liyono lyangabhekwa ngedule. Ngita chimupalwa kubhehe. Nhwalo, Kilichitu ndi jwabhii Pachaka abhohitwe kubhehe litambiko.
8 Bhahe, tuhenge unyagho gwenio gwa Pachaka, chi kwa libumunda lya makacho, kimela cha ulemo na ubhoho. Nambo kwa libumunda lyangalekelwa ngedule, ndi mwojho gwambone na uchakaka.
9 Nikanyandikile mu baluwa jhango jhenge, nkoto kuhangalwana nako bhibhatenda ngongola.
10 Nilonge jhe kubhehe nkoto kuhangalwa nabho bhando bhangaummanya Chapanga, akatenda ngongola na bhubhapoka ilebhe na bhubhajhima na bhubhalongela uwange na bhubhaijhinamii inyagho. Nhwalo, kupala kwabhambala bheniya ndi ipalwa kubhoka pamba pannema!
11 Nambo ngohe ninyandikila nkoto kuhangalwanwa na mundo jhojhoha jwalonge anyeketela Kilichitu kone ndi ntenda ngongola na nnyime, ajhinamii inyagho na jhuna maligho na jwalobhela na jwapoka ilebhe. Mundongita jwenio nkoto kulye nako.
12 Bho, ndi lihengo lyango kwahadabhula bhando bhubhabhii panja jha bhubhannyeketii Kilichitu? Bho, mangota mipalwa ndeka kwahadabhula bhando bhubhabhii pakate jhino mabhene?
13 Nambo Chapanga jwenio nabhahadabula bhando bheniya bhibhabhii panja jha bhibhannyeketii Kilichitu, ngita Majhandiko gha Chapanga chighalonge, “Mabhenge kutale bheniya bhibhatenda ubhoho pakate jhino.”