Baluwa jhubhele jha Pauli kwa
Akakolintu
Ulongolelo
Baluwa jha ubhele jha Pauli kwa Akakolintu ikajhandikwe mu yaka makome nhwano na nhwano ade mu yaka makome nhwano na chita kuhumii mu kubhelukwa Yecho Kilichitu, mu chula jha 1:1. Baluwa jhenje ndi jha ubhele pakate jha baluwa ibhele ya Pauli abhajhandikile likunde lya bhando lilinyeketii Kilichitu ku Kolintu. Bhando bhubhachomite bhamanye kubhehe Pauli kwenio kunyuma akalongolile kujhandika baluwa jhenge jha lilaka kupeta jhenje jha ubhele. Na baluwa jhene ailongii, mu chula jha 2:3-4. Nambo twenga tukwetijhe baluwa jhene. Baluwa jha ubhele jha Pauli kwa Akakolintu ilongelwa ikajhandikwe pakibha atamita ku Makedoniya, mu chula jha 2:13.
Mu baluwa jhake jha ubhele kwa bhando bhubhanyeketii Kilichitu bhubhabhii ku Kolintu Pauli ilonge luhangano pala Titu pannobholela malobhe gha likunde lya bhando bhibhannyeketii Kilichitu bhubhabhii kwenio. Mu baluwa jhake jhenje tumona Pauli abhabhola Akakolintu bhabhaghulile mbijha kwa bhando bhubhannyeketile Kilichitu bhubhabhii kwenio ku Yeluchalemo mu chula jha 8:9. Ibhonekana kubhehe ntenga bha uwange kubhoka panja jha likonde bhakatei bhulo pakate jha bhando bhubhakibha nkate ya lilongo kunkana Pauli bhakitondobhehe bhene. Bhabhola bhabhe bhakibha na mbwelelo na ukindendeke gwa Pauli, na jwenio Pauli akabhalobhalile ukindendeke gwabhii nako kubhehe jwenio ndi ntenga jwa Yecho Kilichitu pala piijhomokela baluwa jhake jha ubhele kwa Akakolintu.
Ghughabhii mukitabo
Pauli itumbuu baluwa jhake kwa kwajhambucha bhando bhibhannyeketii Kilichitu bha kwenio ku Kolintu, mu chula jha 1:1-7.
Pauli ilongela mwanja gwake chiughalambwike, chajhohine kuhumii kwabhe na chabhajhangwii mu baluwa jhake jhiilongolile, mu chula 1:8-7:16.
Pauli ipiya malaghilo gha kuchangii mbijha kwa nhwalo gwa bhando bhibhannyeketii Kilichitu bha kwenio ku Yeluchalemo, mu chula jha 8:1-9:15.
Pauli ijhomolela kwa kukengelela utenga gwake na abhalobholela malobhe gha kwatyangila kabhele Akakolintu, mu chula jha 10:1-13:10.
1
1 Nenga Pauli, natenga jwa Kilichitu Yecho kwa kupala kwake Chapanga, na nnongo gwito Timocheyo.
Tughajhandikila malongo gha bhando ghighannyeketii Kilichitu gha kwenio ku Kolintu, na bhando bhoha bha Chapanga bhubhabhii ku kilambo cha ku Akaya.
2 Ninyope umbone na uteeke kuhumii kwa Chapanga Tate gwito na Bhambo Yecho Kilichitu.
Pauli inchenguu Chapanga
3 Tunnombe Chapanga, Tate Bhambo gwito Yecho Kilichitu, Tate jwa kiya na Chapanga jwapepecha.
4 Chapanga jwatupepecha twenga mu malola ghito ghoha, na twenga twapepeche bhange mu malola ghabhe kwa mbepecho jhela jhitupokii kuhumii kwa Chapanga.
5 Anda mang'ahicho gha Kilichitu pighachocha nkate jhito, ndi pitujhendelela kupepechwa na Kilichitu.
6 Anda tung'ahika, tung'ahika tupala mangota tupepechwa kwa nhwalo gwa kukombolelwa kwino. Kupepechwa kongo nakuhenga lihengo kwa kuhimbililwa malagho ghaghala ghighatukolela twenga.
7 Helahela, lihobholelo litubhinagho ndi nganganga, nhwalo tumanye tung'ahika pamonga na helahela mupepechwa anda twenga putupepechwa.
8 Makalongo bhango, tupala mmanye malola tughapatite kola ku Asiya, malola gheniya ghakachochite makakala ghito, ade kuwacha tuhoto jhe kulama.
9 Tuhambwika tukibha ngita bhando bhubhahadabwilwe kuwegha, ipitila yenio tukotoka kukihobholela tabhete, tunhobholele Chapanga jwabhayokicha bhubhawile.
10 Chapanga atukombwile kuhumii mukuhandahanda jha ngondo jha kuwegha, na ajhendelila kutukombola. Na twenga tunhobhalela jwenio chatukombola kabhele,
11 mangota mututangatila kwa kutujhopela. Mambu twe ghambone tughapatite kwa nhwalo gwa bhando kutujhopela, ghatenda bhando bhamahele bhanchenguu Chapanga gwito.
Pauli aghalambuya mwanja gwake
12 Twenga tukilokela kilebhe chimo tugha: Miojho jhito ilangiya tukwete jhe ulemo ilangiya kubhehe tutamite pannema pano, na achwa pakate jhino, tukatamite kwa unyahinyahi na uhobholeko ghutupatite na Chapanga. Tulongwichwe jhe na malango gha bhando bha pannema nambo tutehi yenio kwa umbone gwa Chapanga.
13 Tunnyandikila mangota ilebhe muihotola kuchoma na kuimanya. Nihobholela naumanya njwe chakaka ghanga,
14 nhwalo ade ngohe mmanyite pandina tugha. Nihobholela nahumanya kwa uchakaka palonge kupala lichiko lya Bhambo Yecho ahotole kutulokela twenga ngita twenga chitupala kunnokela mangota.
15 Na nenga mmi mu kuhobholela gheniya, nikapahile kuntyangi mangota mpate mota kabhele.
16 Nikapahile kuntyangila punipeta mu mwanja kujhenda ku Makedoniya na lichiko lya kubhujha, nhwalo mangota mbala undangatile umwanja gwango gwa kujhenda ku Yudeya.
17 Bho, mangota miwacha nhengite gheniya ngita bhando bha pannema pibhalongela? Bho, miwacha kubhehe nihenga mipangu kwa malango jha kimundo na kubhehe nilonge “Chakaka” amu “Ng'oo,” kwa pamonga?
18 Anda hela Chapanga chahobholeka, malobhe ghito chi kulonge, “Chakaka” amu “Ng'oo,” kwa mala jhimo.
19 Nhwalo Kilichitu Yecho, Mwana gwa Chapanga, jhutuntangicha kwino, nenga na Silwano na Timocheyo, akibha jhe mundo jwakulonge “Chakaka” amu “Ng'oo,” nambo kwa jwenio kila lichiko ndi “Chakaka.”
20 Nhwalo malaghano ghoha gha Chapanga ndi kulonge Chakaka. Helahela kwa ndela jha Yecho Kilichitu tulonge “Amina” kwa kunnomba Chapanga.
21 Chapanga jwenio ndi jwatutenda kubhehe nganganga kwa kulombana na Yecho Kilichitu. Ndi Chapanga jwenio jwatuhaghwile twenga.
22 Helahela atubhekite unepo ghulangiya twenga ndi bhake na atupekiye Uhuke gwake umiojho jhito ibhehe chamana kwa ghala ghoha ghipala ghatubhekile.
23 Chapanga ndi jwamanya mambu ghoha, jwenio aumanya mwojho gwango! Nenga nhikite jhe kabhele ku Kolintu kwa nhwalo gwa kunkole kiya.
24 Tupalandeka kuchokolekeya mu kihobholelo chino, twenga tumanya nyemite nganganga mu kihobholelo chino, nambo tuhenga lihengo pamonga na mangota kwa nhwalo gwa kuhangana kwino.