Baluwa jha Pauli kwa
Akakolochahe
Ulongolelo
Baluwa jha Ntenga Pauli kwa Akakolochahe kikajhandikwe na Pauli mu chula jha 1:1. Akajhandike baluwa jhenje pakibha mukipungo pange pakibha ku muche gwa ku Loma muchaka cha makome chita pabhelwika njwe Yecho Kilichitu. Baluwa jhenje kwa Akakolochahe na baluwa jhela kwa Akaepecho na baluwa kwa Akafilemone ikemwa baluwa ya ku kipungo nhwalo Pauli akajhandike pakibha kwenio. Akajhandike baluwa kwa likunde lya bhando lilinnyeketii Kilichitu lilibhii ku muche gwa Kolochahe. Pauli akatumbulichejhe likunde lya bhando lilinnyeketii Kilichitu ku Kolochahe ngita chaichimulila mu chula jha 2:1, nambo apalitwa kulitangatila likunde lende lilinnyeketii Kilichitu. Pange iwechekana Epafula ndi jwatumbulicha lilongo lende lya bhando bhibhannyeketii Kilichitu nhwalo ahumila ku muche gwa ku Kolochahe.
Pauli akachitwichwe na mabholo ghuwange nkate jha lilongo lya bhando lilinnyeketii Kilichitu lya kwenio ku Kolochahe, chehemo jhenje ndi ikatoi pwache ngolonga kuchimulila nhwalo gwenio. Iwechekana pange pakibha na lilongo lya Akakilichitu lihembukilo lyabhe likibha kwa Akayahude bhubhajhighita kwachokolekeya Akakilichitu bhange bhankengame malaghilo ghabhe gha Kiyahude ghighaumila mu Lilaghano lya Makacho, na achwa kujhingii jando. Pauli akajhandike hotu kubhehe Akakilichitu bhipalwajhe kilebhe chochoha, nambo nga Kilichitu ndo, mu chula jha 1:15-20, na mabholo ghighahumita kwa bhando ghakwetejhe mana, mu chula jha 2:8.
Ghughabhii mukitabo
Pauli atumbuu kulijhambucha lilongo lya bhando lilinnyeketii Kilichitu lya ku Kolochahe, mu chula jha 1:1-2.
Peniya Pauli ijhandika ukolo gwa Kilichitu, na ndi pajhangwila kwa nhwalo gwa mabholo ghuwange ghighajhenii ku Kolochahe, mu chula jha 1:3-3:4.
Ngita chayobalile mu baluwa yake yamahele, Pauli itumii nucho jhenge jha baluwa kwalaghalalikiya Akakilichitu chibhipalwa kutama, mu chula jha 3:5-4:6.
Pauli ijhomolela kwa kwajhambucha kabhele na kwalaghalikii bhando kubhehe baluwa jhenje ichomwa palonge jhabhe kwa lilongo lya bhando lilinnyeketii Kilichitu na kwa bhando bhange, mu chula jha 4:7-18.
1
Baluwa jha Pauli kwa Akakolochahe
1 Nenga Napauli, natenga jwa Yecho Kilichitu kwa kupala Chapanga, pamonga na Timocheyo nnongo gwito.
2 Punnyandikila mangota mabhando bha Chapanga bhumitama ku Kolochahe, makolongo bhito bhumuhobholeka kwa kulombana na Kilichitu.
Tunnyopela umbone na uteeke kuhumii kwa Chapanga Tate gwito.
Pauli inyopa Chapanga na kunchengula
3 Machiko ghoha putunnyopela tunchenguu Chapanga, Tate gwa Bhambo gwito Yecho Kilichitu,
4 nhwalo tujhohine chimunhobholela Bhambo Yecho Kilichitu, na chimwapala bhando bhoha bha Chapanga.
5 Nhwalo gwa kihobholelo chino na upalo gwino lihobholelo lela limekwii kunane kwa Chapanga, ndi lela linyohina kuhumii makacho kwa lilobhe lya chakaka lya Lilobhe lya Mbone.
6 Lilobhe lya Mbone lyenio linhikilii mangota na kujhenela pannema ghoha na kuleta ghambone, ngita chiliteila kwino mangota kuhumii lichiko lela punyohina umbone gwa Chapanga na kumanya uteeke chiubhile.
7 Mukibholite umbone gwa Chapanga kuhumii kwa Epafula, nhenga lihengo nnyito jhutumpahii, ntumiche jwahobholeka jwa Kilichitu kunhwalo ghito.
8 Jwenio ndi jwatuchimulila malobhe gha upalo gwino ghupekiwe na Uhuke gwa Chapanga.
9 Kunhwalo gwenio kubhoke putujhohina malobhe ghino, tujhendelela kunyopela. Tunnyopa Chapanga ampelengane kumanya ghoha ghaghapala kwa malango ghoha na kumanya kutupatite na Uhuke gwa Chapanga.
10 Tujhopa yenio kupala nhoto kutama ngita chapala Bhambo, na nnyendelela kuhenga ghighanhalalicha jwenio. Na nnyendelela kuhenga ghughabhii ghambone na nchocha kukola mukumanya Chapanga.
11 Chapanga ampela makakala kwa uhotolo gwake mu ng'alicho nkolongwa nhoto kuhimbilila ghoha changatotokela.
12 Na kwa luheko muchengula Tate jwantehi mme chehemo jha mambu ghabhabhekii akanyahinyahi bhake mu unahota nkolongwa gwa lumule.
13 Jwenie ndi jwatughombwila kubhoke mu makakala gha lubhendo, na kutujhingiya munahota nkolongwa gwa Mwana mundo jwampala,
14 kupete kwa jwenio tughombokoka na kulekekewa uhakaho gwito.
Kilichitu na lihengo lyake
15 Kilichitu jhumumwene alandine njwe na Chapanga jwangabhonekana. Jwenio akibha kabula jha ihumbi yoha kupanganwa.
16 Nhwalo kupete jwenie, Chapanga akapangine ilebhe yoha,
ibhii kunane kwa Chapanga na ibhii pannema,
ibhonekana na yangabhoneka, ibhehe ihumbi ya kihuke ibhii na makakala na,
akanahota na bhibhalongocha na bhubhabhii na ukindendeke.
Yoha ikapanginwe kupete jwenio na kwa nhwalo gwake.
17 Kilichitu akibha kabula jha ilebhe yoha, ilebhe yoha ikamulana nde pamonga kwa jwenio.
18 Jwenio ndi muto gwa yegha, yegha jhene ndi lilongo lya bhando bhibhanyeketii jwenio. Kilichitu ndi lihembuko lya ughome gwa yegha jhene. Jwenio ndi jwayokichwa abhehe jwakutumbula kwa ilebhe yoha.
19 Nhwalo Chapanga jwenio akahalalichwe ukamilicho gwake ghoha ubhehe nkate jha Kilichitu.
20 Kupete Mwana mundo, ilebhe yoha ijhelanichwe na Chapanga jwenio, na kwa miyahe jhake jhijhitike pa nchalaba aleta uteeke na ilebhe yoha ibhii pannema na ibhii kunane kwa Chapanga.
21 Peniya makacho mangota mukibha kutale na Chapanga na helahela mukibha akamakoko bhake nhwalo gwa malango ghino ghanganandela na matendwa ghino ghanganandela.
22 Nambo ngohe, Chapanga antei mangota akakoche mundo kupetele kuwe kwa yegha jha Mwana mundo, ndi ampeleke palonge jhake kongo mmii nyahinyahi na bhamaha changalemwa.
23 Nambo chimupalwa, nnyendelela kukikamulii kihobholelo chino kone nchengwitwe mu chinge nganganga, hilu nkotoka kujheketela kunyuanyua kubhoke mu lihobholelo lela lipilwe pala punyohina Lilobhe lya Mbone. Ne Pauli ndeilwe natumiche jwa Lilobhe lya Mbone ndi lilitangichwe kwa bhando bhoha bha pannema.
Lihengo lya Pauli kwa lilongo lya bhando lilinnyeketii Kilichitu
24 Ngohe nihanganila kung'ahika kwa nhwalo gwino mangota, mitweleya jhegha jhango kwa ghala ghighapongwii mumang'ahiko gha Kilichitu kwa nhwalo jha yegha jhake ndi lilongo lya bhando bhubhanyeketii Kilichitu.
25 Na nenga mekwite na Chapanga mme natumiche jwa lilongo lya bhando bhubhanyeketii Kilichitu. Ambii lihengo lya kutangacha Lilobhe lya umbone gwake gwamaha,
26 lijhambu lyenio ndi chile jhela jhikahihitwe kuhumii kwa bhando machiko ghoha ghangapeta, nambo ngohe iyekulilwe kwa bhando bhake.
27 Chapanga akapahile kwatenda bhando bhake bhamanye ulohe na ukolongwa gwa chile jhenje nkate jha nnema ghoha, na jhene ndi jhenje, Kilichitu abhii nkate jhino na nhwalo gwenio ulangiya mangota natujhingila mung'alicho gwa Chapanga ghuuhobholeka.
28 Ndi mana tutangacha Kilichitu kwa bhando bhoha na kwa malango ghoha, tunkelebhuwa na kubhola mundo jhojhoha kupala tuhoto kunneta kila mundo palonge jha Chapanga kone abhii akomile mu kolombana na Kilichitu.
29 Kutangacha lilobhe lyenio, nenga ndenda kughagha kone nitumii likakala lya Kilichitu lilihenga lihengo nkate jhango.