Baluwa jha Pauli kwa
Akaepecho
Ulongolelo
Baluwa jha Pauli kwa bando bha ku Epecho kikajhandikwe pamonga na baluwa jha Akakolochahe muchaka cha makome chita pabhelwika njwe Yecho Kilichitu. Mundo jwajhandika amanyikina ngita Ntenga Pauli, mu chula jha 1:1. Akachomi twe bhajheketela kubhehe Pauli ndi jwajhandika baluwa kwa Akaepecho, pamonga na gheniya baluwa jhene atei jhe nyambuchilo yake jwenio ngita chateii kwa baluwa jha Akakolochahe. Kwa nhwalo ghongo, pange ipalitwa itindile kwa malongo gha bhando ghighannyeketii Kilichitu ghughabhii ku muche gwenio. Helahela Pauli ichimulila pajhandikila baluwa jhenje akibha mukipungo mu chula jha 3:1; 4:1; na 6:20. Pauli akankamwii Tikiko baluwa jhenje pakibha atyangila makunde gha bhando ghighannyeketii Kilichitu gha ku Epecho mu chula jha 6:21-22.
Epecho ukibha ndi muche nkolongwa gwa ulongoche gwa Kiloma mu Asiya Njokombe. Epecho ukamanyikine hake kwa nyumba jha chapanga jhichengwitwe mwenio jhikapihitwe palonge jha ichapanga mwikeghe jwa Kiyunane jwakemitwa Atemi mukitabo cha mahengo gha Akatenga, mu chula jha 19: 23-31. Likunde lya bhando lilinnyeketii Kilichitu lya bhando bha ku Epecho likibha na makakala hake pulitumbwila nambo paligha lijhakuhobheya makakala ghake, Ulot 2:1-7.
Munucho jha baluwa jhenje jha Akaepecho, Pauli ichimulila Chapanga chabhahagwii bhando na kwakombola kubhoka muhakaho gwabhe kwa ndela jha Yecho Kilichitu. Na alandanikiya likunde lya bhando lilinnyeketii Kilichitu na yegha, Kilichitu ndi muto, na helahela alandanikiya likunde lya bhando lilinnyeketii Kilichitu ndi nyumba, na Kilichitu ndi nchinge. Na chehemo jha ubhele jha baluwa chenje Pauli ilangii akakilichitu bhoha chiipalwa bhatame pamonga na Kilichitu mutamo gwabhe.
Ghughabhii mukitabo
Pauli itumbuu kukilongele jwenio na ajhambucha bha ku Epecho, mu chula jha 1:1-2.
Peniya ichimulila chibhajhelana pakate jha likunde lya bhando lilinnyeketii Kilichitu na Kilichitu, mu chula jha 1:3-3:21.
Pauli ijhandika kone ilangii chiipalwa kwa Nkilichitu kubhegha, mu chula jha 4:1-6:20.
Pauli akajhomolile kwa kupiya malaghilo ghake, mu chula jha 6:21-24.
1
1 Ne Pauli, natenga jwa Yecho Kilichitu kwa kupala Chapanga.
Ninyandikila mangota mabhando bha Chapanga bhumii kwenio ku Epecho, bhinnyeketii njwe mu kulombana na Yecho Kilichitu.
2 Ninyope umbone na uteeke kuhumii kwa Chapanga Tate gwito na Bhambo Yecho Kilichitu.
Mota ya kihuke kwa kulombana na Kilichitu
3 Alombwe Chapanga, Tate jwa Bhambo gwito Yecho Kilichitu! Nhwalo kwa kulombana na Kilichitu atupekii mota yoha ya ki Uhuke mu nnema gwa kihuke.
4 Kabula jha kupanganwa kwa nnema, Chapanga akatuhagwii njwe twenga tubhehe bhake kwa kulombana na Kilichitu kupala tubhehe nyahinyahi na twanga malemo palonge jhake.
Kwa nhwalo gwa mapalo ghake,
5 Chapanga akahamwii na kutuhaghuu tubhehe twakayana yake kwa ndela jha Yecho Kilichitu. Yene ndi chahalilwa na chapalita.
6 Ngohe tunombe Chapanga nhwalo jha umbone gwake gwamaha gwatupekii jhajhe kupete Mwana mundo jwampahile!
7 Nhwalo gwa miyahe jha Kilichitu, twenga tukombolilwe, yane uhakaho gwito ulekekekiwe. Yene ndi chibhii kwa ukolongwa gwa umbone gwake,
8 atupekii mbwe mwenio,
kwa malango na kumanya kwake koha.
9 Chapanga atuyekulile chile jhijhihitwe jhapalita kuitenda. Akahalalichwe na ajhakutuhenge lende kwa ndela jha Yecho Kilichitu.
10 Gheniya ghoha pukipala kuhika kipinde chapangite Chapanga, Kilichitu naleta ilebhe yoha ya kunane kwa Chapanga na ya pannema pamonga na ilongochwe na jwenio.
11 Chapanga akatei yoha ngita chapalita, Chapanga akatuhagwii twenga kwa kulombana na Kilichitu, tubhehe bhando bhake ngita chapalita, akahamwii naha kuhumii makacho.
12 Chapanga akatehi yenio, twenga bhitulongolile kunhobholela Kilichitu tuulumbulile ung'alicho gwa Chapanga!
13 Na mangota helahela punombikina na Kilichitu pala punyohina lilobhe lya chakaka ndi Lilobhe lya Mbone lilinetii ukomboche, mukanyeketii Kilichitu, na jwenio Chapanga kwa kulangii mangota ndi bhando bhake, amekite unepo kwa kumpelengana Uhuke gwa Chapanga jwatulaghii.
14 Uhuke gwenio gwa Chapanga ndi poni jha kupata ghala ghoha gha bhando bhake, kilebhe chenje ndi kitulangii kubhehe Chapanga nabhakombola bhando bhake bhoha. Tulumbilile ung'alicho gwake!
Pauli innyopa Chapanga
15 Yene, kubhoke punyohina chimuhobholela Bhambo Yecho na chimwapala bhando bhoha bha Chapanga,
16 ngotwike jhe kunchenguu Chapanga kwa nhwalo gwino. Nanikombokangana mu kunnyopa kwango Chapanga,
17 nijhendele kunnyopa Tate jwa ung'alicho, Chapanga jwa Bhambo gwito Yecho Kilichitu, ampelengane Uhuke jwapala kuntenda mme na malango na kuyekulila mumanye Chapanga chamaha hake.
18 Ninyopa Chapanga haijhoghole miojho jhino mupokele lumule lwake, nhoto kulimanya lihobholelo lela lyankemile na ung'alicho nkolongwa gwa ghala lyabhabhekii bhando bhake,
19 na umanye likakala lyake chibhii likolongwa kwa twenga bhituhobholela. Likakala lyenio ndi lihenga lihengo nkate jhito lilandana na likakala lela likolongwa,
20 lyayokiche nako Kilichitu kuhumii kwa bhubhawile, ngamekita lubhoko lwalelo kwenio kunane kwa Chapanga.
21 Kwenio, Kilichitu ndi nkolongwa kuliku ilongoche yoha ya kunane kwa Chapanga na kila ukindendeke na kila likakala na akabhambo, na ilongocha ukindendeke ghoha gwa pannema ghongo na ghola ghupala kuhika.
22 Chapanga ampekii ukindendeke mu ilebhe yoha, ajhakumeka abhehe nkolongwa jwa makunde gha bhando bhibhanyeketii Kilichitu abhe nkolongwa kwa ilebhe yoha kwa nhwalo gwa bhando bhibhannyeketii Kilichitu.
23 Bhando bheniya ndi yegha jha Kilichitu, na bhando ndi ukamilicho gwa jwenie jwalenganikiya ilebhe yoha kila chehemo.