Baluwa jhukutumbula jha Pauli kwa
Akatecholonike
Ulongolelo
Baluwa jhukutumbula kwa Akatecholonike ikajhandikwe na ntenga Pauli mu chula jha 1:1. Pange baluwa jhenje ndi jhikibha jha kutumbula kujhandikwa na Pauli ihoto kubhehe chehemo jha Bibliya, pange jhenje ikajhandikwe mu chaka cha makome nhwano na limo pabhelwikwa njwe Yecho Kilichitu. Pauli akibha atamita ku Kolintu pajhandika baluwa jhukutumbu kwa lilongo lya bhando lilinnyeketii Kilichitu lya ku Tesolonike, lilongo lyenio lya bhando lilinnyeketii lyatumbulicha mu mwanja gwake gwa ubhele gwa kiutenga, Mahengo gha akatenga mu chula jha 17:1-10. Ijhandikwe mukitabo cha mahengo kubhehe lilongo lya bhando bhubhahobholela bhandina bhubhakibha na lihembuko lya Akayahude, na Akayunane ndi bhubhakibha bhamahele.
Pauli akahotwijhe kuhighilika kwenio ku Tesolonike kwa machiko ghamahele pajhomolila kulitumbulicha lilongo lyenio lya bhando lilinnyeketii Kilichitu lya kwenio, yenio akatumite baluwa jhenje palongolo kwakangamalicha mwojho kwa bhubhakanyeketii Kilichitu bhubhabhii kwenio. Baluwa jhenje ibhii na mambu ghamahele ghangalengana, na ghabhii malaghilo twe gha pamonga ghighilangii chiipalwa kutama Akakilichitu. Pauli ichimulila mambu gha kuhika kwa Kilichitu kwa mala jha ubhele. Ibhonikine kwa bhando bhubhahobholela Kilichitu bha ku Tesolonike bhakibha na kilolo chakupala kumanya kwa nhwalo gwa lijambo lyenio. Pauli ichimulila lijhambu lya kuhika kwa Kilichitu kwa mala jha ubhele, kubhehe anda ndela jha kwatangatila bhatame kwa kunhalalicha Chapanga, mu chula jha 5:6-8.
Ghughabhii mukitabo
Pauli itumbuu baluwa jhake kwa kulijhambucha lilongo lya bhando lilinnyeketii Kilichitu na kunchenguu Chapanga kwa nhwalo gwabhe, mu chula jha 1.
Pauli ichimulila panane ya lihengo lyake, akahanganichwe na lilobhe lyampelikila Timocheyo, mu chula jha 2-3.
Pauli ipiya malaghilo chibhapalwa kwa bhando bhubhanyeketii Kilichitu bhatame kongo bhakamulile kihobholelo chabhe cha kuhika kwa Kilichitu mala jha ubhele, Mu chula jha 4:1-5:15.
Pauli ijhomolela mu baluwa jhake kwa kulijhambucha kabhele lilongo lya bhando lilinnyeketii Kilichitu, na kwalobholela bhubhahobholela bhoha nkate jha lilongo lyoha lilinnyeketii Kilichitu bhaichome baluwa jhenje mu chula jha 5:16-28.
1
1 Ne Pauli, Silwano na Timocheyo.
Tunnyandikila mangota lilongo lya bhando bha kwenio ku Tesolonike, bhubhabhii bhando bhake Chapanga Tate, na bha Bhambo Yecho Kilichitu.
Tunnyopa Chapanga ampeke umbone na uteeke.
Ughome na kihobholelo cha ku Tesolonike
2 Ninchenguu Chapanga machiko ghoha kwa nhwalo gwino, na machiko ghoha putujhopa tunkomboka mangota.
3 Nhwalo palonge jha Chapanga Tate gwito, tukomboka mahengo ghino ghihuma mu kihobholelo chino na ghilangii upalo gwino, pumuhobhalela Bhambo gwito Yecho Kilichitu kwa uhimbililo.
4 Makalongo bhito, twenga tumanye Chapanga ampahii na ahagwi kubhehe bhando bhake,
5 nhwalo Malobhe gha Mbone pughahikilila, ghakahikitii jhe kwa lilobhe tugha nambo helahela ikahikite kwa makakala gha Uhuke gwa Chapanga, kongo umanye njwe kubhehe lilobhe lyenio ndi lya uchakaka. Umanye kubhehe chitutamita pamonga na mangota, tukatamite mbone kuntangatii mangota.
6 Mangota mukatujhighe twenga na Bhambo. Pamonga na kung'ahichwa hake, mukapokii lilobhe lya kuhangana kuhumii kwa Uhuke gwa Chapanga.
7 Nhwalo mangota ndi nnandanikiho gwa kujhigwa kwa lilongo lya bhando bhibhannyeketii Kilichitu lyoha lya ku Makedoniya nuku Akaya.
8 Nhwalo gwa kughagha kwino lilobhe lya Bhambo likajhenile chi kwenio ku Makedoniya nuku Akaya tugha, nambo kihobholelo chiminacho kwa Chapanga kijhenile poha. Yene kibhii jhe chukujhonjekeya.
9 Bhando bheniya bhilonge nhwalo gwa mwanja gwito putuntyangila, na chimpokila, na chimuilekita inyagho, na kunhengela Chapanga jwabhii chakaka na ghome,
10 ngoheno tunnendelela Mwana gwake ahuluke kuhumii kunane kwa Chapanga, ndi Yecho, Chapanga akayokiche kuhumii kwa bhando bhubhawile, na jwenio atughombole mu lilaka lya Chapanga lilihika.