Baluwa jhubhele jha Pauli kwa
Akatecholonike
Ulongolelo
Baluwa jhubhele jha Pauli kwa Akatecholonike ikajhandikwe na ntenga Pauli, mu chula jha 1:1. Akajhandike baluwa jhenje pajhomolila kujhandika jhela jha kutumbula kwa Akatecholonike, pange muchaka cha makome nhwano na jhimo pabhelwika njwe Yecho Kilichitu. Pauli akibha amela atama ku muche gwa ku Kolintu pajhandika baluwa jhenje kwa likunde lya bhando bhubhajheketii Kilichitu lilikibha kwenio ku Tesolonike, lilongo lya bhando lilinnyeketii Kilichitu lyatumbulicha pakibha mumwanja gwake gwa ubhele gwa kiutenga, Mahengo gha akatenga mu chula jha 17:1-10. Ijhandikwe mukitabo cha Mahengo gha akatenga kubhehe lilongo lya bhando lyenio lya lilinyeketii Kilichitu pakate jha bhubhanyeketii Kilichitu bhubhakibha na lihembuko lya Akayahude, na Akayunane ndi bhubhakibha bhamahele.
Yene lilongo lya bhando bhubhanyeketii Kilichitu ku Tesolonike bhapalita hake kumanya mambu ghamahele gha machiko gha kujhomolela na kuhika kwa Kilichitu mala jha ubhele, nhwalo Pauli akajhandiki ghamahena panane jha malobhe ghanga mu baluwa yoha ibhele kwa Akatecholonike. Ibhandikii nucho jhoha jha baluwa jhenje jha ubhele kwa Akatecholonike ilongelela machiko gha kujhomolela. Helahela Pauli ipwatalila utotoho. Kila mundo ahenge lihengo ndi apata chakulya, mu chula jha 3:6-10.
Ghughabhii mukitabo
Pauli itumbuu kujhandika baluwa jhake kwa kukilonge jwenio ndi ghane na bhajhake, mu chula jha 1:1-2.
Kabhele Pauli inchengu Chapanga kwa nhwalo gwa lilongo lya bhando bhubhanyeketii Kilichitu lya ku Tesolonike na kulijhopela, mu chula jha 1:3-12.
Pauli ichimulila machiko gha kujhomolela, mu chula jha 2.
Kabhele Pauli ilakalila utotoho na kwalobholela bhando chipalwa bhahenge lihengo, mu chula jha 3:1-15.
Kwa kujhomolela, Pauli ijhambucha lilongo lya bhando bhubhanyeketii Kilichitu kwa mala jhenge kwa bheniya, mu chula jha 3:16-18.
1
1 Ne Pauli na Silwano na Timocheyo.
Tulijhandikila lilongo lya bhando lilinnyeketii Kilichitu lya kwenio ku Tesolonike, ndi bhando bhake Chapanga Tate gwito na Bhambo Yecho Kilichitu.
2 Ninyope umbone na uteeke kuhumii kwa Chapanga Tate gwito na Bhambo Yecho Kilichitu.
Kuhadabulwa papala kuhika kabhele Kilichitu
3 Makalongo bhango, tupalwa kunchenguu Chapanga machiko ghoha kwa nhwalo gwino mangota. Tupalwa kuhenga gheniya nhwalo gwa kihobholelo chino nakikola hake na kupalana kwino na kujhonjekeka hake.
4 Ndi nhwalo twenga tukiloke mangota pakate jha makunde gha bhando bhibhannyeketii Chapanga. Tukiloke ndela jhimujhendelela mangota kunnyeketela nu kuhimbilila mang'ahiko na malagho ghumikongana nako.
5 Gheniya ghoha ghilangii ngita luhadabulo lwa Chapanga lwa uchakaka, mitopela kujhingii mu unahota nkolongwa gwa Chapanga ghumung'ahikiya.
6 Chapanga nahenga lijhambu lilibhi tela, nalepechela malagho ghala ghubhang'ahita mangota,
7 na kuntenda mangota bhung'ahitwa ibhehe mbaa pamonga na twenga helahela. Nahenga naha Bhambo Yecho papala kupitila kuhumii kunane kwa Chapanga pamonga na akatumiche bha Chapanga jwa kunane bhubhabhii na makakala,
8 na ndentelekana ya mwotu, kwahadabula bhala bhubhankana Chapanga na bhala bhubhakana kujheketela Malobhe gha Mbone gha Bhambo gwito Yecho.
9 Nabhahadabulwa kwa kukomelekelwa machiko ghoha ghangapeta kubhehe kutale na Bhambo na ung'alicho gha makakala ghake,
10 papala kuhika lichiko lyenio kulombwa na bhando bhake na kuhanganilwa na bhando bhoha bhubhannyeketile. Mangota helahela namma pakate jhabhe, nnyeketile lilobhe lela litunnongolile.
11 Yene machiko ghoha tunnyopela kwa Chapanga gwito antende mangota nhoto kutama ngita chakemita ntame. Tunnyopa kwa makakala ghake ahenge kila kilebhe chambone chimipala kuhenga na kila lihengo lya kihobholelo.
12 Tujhopa naha, tupala liina lya Bhambo gwito Yecho lilombwe nkate jhino na mangota nnombwe kwa kulombana nako kwa umbone gwa Chapanga gwito na gwa Bhambo Yecho Kilichitu.