3
Yecho ndi nkolongwa kuliku Mucha
1 Makalongo bhango, bhando bha Chapanga nkemitwe na Chapanga, nhwachile panane jha Yecho ntenga na Mpiya Litambiko Nkolongwa jwa kihobholelo chitutangacha pakongoloho.
2 Jwenio ndi akibha jhuna kuhobholeka na Chapanga jwanhagwile kuhenga lihengo lyake ngita Mucha chakibha anhobholika kwahengela bhando bhoha bha ku Ichilahele bhubhakemitwa nyumba yoha ya Chapanga.
3 Jwachenga ilombwa kupeta nkolo nyumba, ngohe Yecho ilombwa kuliku Mucha.
4 Nyumba ichengwa na mundo, nambo Chapanga ndi nchenga jwa ilebhe yoha.
5 Mucha akibha ahobholika munyumba jhoha jha Bhambo ngita ntumiche, na akalongii mambu ghala Chapanga ngalongila palongoloho.
6 Nambo Kilichitu ndi jwa kuhobholela ngita Mwana jwajhemelela nyumba jha Chapanga. Twenga twabhete ndi nyumba jhake anda natujhendelela kubhehe nganganga hake na kukihobholela mu chela chitulokela.
Kupomolela kwa bhando bha Chapanga
7 Kwa yenio, bhahe, ngita chalonge Uhuke gwa Chapanga,
“Anda nnyokweniokiye lilobhe lya Chapanga deleno,
8 Nkoto kujhundupa miojho jhino,
ngita chibhahengita akahoko bhino pibhakanita kunnyokonikiya,
machiko ghala pininnyighita kola kunjenga.
9 Kwenio akahoko bhino bhajhakunnyigha na kunningukiya,
bhakalolite mahengo ghango ghihengita kwa yaka makome ncheche!
10 Kwa nhwalo gwenio nganayomila bhando bheniya nganongila.
Machiko ghoha kibheluko chela kihobholela, na kimanya jhe kihobhalile,
na bhaimanye jhe ndela jhango.
11 Bhahe, nganapila kwa lilaka nganongila:
‘Nabhajhingila ng'o chehemo jhango jha kupomolela.’ ”
12 Ngohe akalongo bhango, mu kichunge akoto kubhehe mundo jhojhoha pakate jhino jhuna mwojho mmoho na jwangahobholela na kubhehe kutale na Chapanga jwabhii ghome.
13 Anda yenio, “Deleno,” chighalonge Majhandiko ghitupala twenga, tupalwa kutangatilana machiko ghoha, angapitii jhe mundo pakate jhino jwakunkolowa na uhakaho na kubhehe jhuna ngandango.
14 Nhwalo twenga twabhoha tubhii pamonga mu kulombana na Kilichitu, natukamulila kwa makakala lihobholelo lito litupokila pilitumbwila.
15 Majhandiko ghilonge naha:
“Anda nnyohine deleno lilobhe lya Chapanga,
nkoto kuitenda miojho jhino kujhundupa,
ngita chibhahengita akahoko bhino pibhankanita Chapanga.”
16 Ndi akina ghane bhubhajhohina lilobhe lya Chapanga na kulikana? Bho, chi bhala bhoha bhibhalongichwa na Mucha kuhumii ku Michile?
17 Bho, akina ghane Chapanga kwakole lilaka kwa yaka makome ncheche? Akakolii lilaka bhala bhubhatehila uhakaho, malelo ghabhe ghakapechingine kunjenga kola.
18 Bho, Chapanga palapila: “Nabhajhingila ng'o chehemo jhene jha kupomolela jhango,” akibha abhalongila akina ghane? Abhalongila bhala bhubhakanita kunnyokonikiya.
19 Ngohe, tulola bhakahotwii jhe kujhingii kwenio nhwalo bhakajheketii jhe.