8
Yecho ndi mpiya litambiko gwito Nkolongwa
1 Bhahe, lilobhe likolongwa mu ghanga ghutulonge ndi lende: Twenga tukwete mpiya litambiko nkolongwa jwabhii ngita jhonjo, jwatama lubhoko lwalelo lwa kigoda cha Unahota Nkolongwa cha Ukolongwa kwenio kunane kwa Chapanga.
2 Jwenie ahenga lihengo ngita Mpiya Litambiko chehemo jha unyahinyahi, pupachengwite lihema lela lya uchakaka na Bhambo, na chi na bhando.
3 Kila Mpiya Litambiko Nkolongwa ahaghulilwe ampihikiye Chapanga hupo na litambiko, ngohe tubhii na Mpiya Litambiko Nkolongwa gwito ndi Yecho Kilichitu hele abhaha na kilebhe cha kumpihikiya Chapanga.
4 Anda jwenio ngabhehe jwapamba pannema, ngabhii ng'o mpiya litambiko, nhwalo bhabhii bhapiya matambiko bhange bhibhapiya matambiko ngita chililaghalikilwe mu lilaghalikilo lya Mucha.
5 Mahengo ghabhe gha upiya litambiko ndi nnandanikiho tugha na kiyeka cha ghala ghughabhii kunane kwa Chapanga. Nhwalo Mucha pakibha pahina nu kutengenecha lihema lela, Chapanga akannaghalikiye: “Dolekeya, ntendekeye kila kilebhe kibhaha ngita nnandanikiho ghola ghunikanangiye ku kitombe.”
6 Nambo ngohe Yecho apekiwe mahengo gha upiya litambiko lilibhii lyambone kupeta lyabhe, ngita chabhii nnyemelela jwa lilaghalikilo lilibhekitwe pakate jha bhando bha Chapanga ndi lyambone hake, nhwalo lijhemite mu lilobhe lya mbone lyalaghii Chapanga.
7 Nhwalo ngita lilaghilo lela lilongolila likibha jhe na ulemo, lipalwa jhe na lilaghano lya ubhele.
8 Nambo Chapanga ngabhakokolikiya bhando bhake pubhalongila:
“Bhambo alonge machiko ghahika,
pumbala kubheka lilaghano liyono na bhando bha ku Ichilahele na bha ku Yuda.
9 Lilaghano lende nalilandanajhe na lela limekita na akahoko bhabhe,
lichiko lela panakamula lubhoko na kwabhoha kuhumii ku kilambo chuku Michile.
Nhwalo bhalikamwiijhe lilaghano lyango,
na nenga nganakanita.
10 Lende ndi lilaghano limbala kuhenga na bhando bha ku Ichilahele:
machiko ghughahika, ilonge Bhambo:
Nameka lilaghalikilo lyango mu malango ghabhe,
nanyandika mumiojho jhabhe.
Nenga namma Chapanga gwabhe,
na bheniya nabhabha bhando bhango.
11 Abhii jhe jwapala kummola nnyake,
amu kunnobholela nnongo mundo,
‘Mummanye Bhambo.’
Nhwalo bhando bhoha,
yana na ata akanahota, nabhamanya.
12 Nanekekeya ulemo gwabhe,
na uhakaho gwabhe nakombokela jhe kabhele.”
13 Kwa kulonge lilaghano lende liyono, Chapanga akalitehi lela lililongalile litundangalile na kilebhe chochoha chikitundangalila kibhandikii kutukutuka.