Baluwa jhukutumbula jha
Petile
Ulongolelo
Baluwa jha kutumbula jha Petile ikajhandikwe na ntenga Petile. Petile akatumbwii kujhandika baluwa jhake kwa kukikilenga jwenio meneke na bhando ghane abhajhandikila. Baluwa jhenje abhajhandikila bhando bhoha bhubhanhobholela Kilichitu, bhibhapechangine pannema ghoha, bheniya ndi kila kipinde mu baluwa jhenje bhikemwa “akaghene,” chula jha 1:1, 1:17 na 2:11. Nhwalo baluwa jhake ilandine na baluwa jha Pauli kwa Akaepecho, bhando bhamahele bhihobholela kubhe baluwa jha kutumbula jha Petile ikajhandikwe mu kipinde chikibhandikii muchaka cha makome chita na nhwano pabhelwikwa njwe Yecho Kilichitu. Petile akajhandike baluwa jhenje patamita ku kilambo chuku Loma chehemo jhainkemita Babilone, mu chula jha 5:13.
Petile alenga kubhehe aijhandike baluwa jhenje nhwalo gwa, “Kunkangamalicha mwojho na kulonge kubhehe kuhenga kongo umbone gwa Chapanga ndi chakaka,” mu chula jha 5:12. Kubhii kulandana pakate jha 1Petile mu chula jha 2:11-3:7 na Akaepecho 5: 18-6:9 na Kolochai 3:18-4:6. Chula yenio itato ilangii matyango ghambone mu lilongo na kujhokanikii ilongoche. Hele abhakangamalicha mwojho bhando bhoha bhubhanhobholela Kilichitu bhaimbilile mang'ahe nhwalo kupeheke kwa nnema kubhandikile, mu chula jha 4: 1.
Ghughabhii mukitabo
Petile akichimulii jwenio kwa bhabhajhandikila, mu chula jha 1: 1-2.
Kabhele inchengu Chapanga nhwalo gwa ughombokeko, bhando bhoha bhipalwa kujhingii mwenio na nike mana jha ughombokeko gwenio mu ughome gwabhe, mu chula jha 1:3-2:10.
Kabhele abhalaghii bhando bhibhahobholela Kilichitu bhatame maha pannema na abhachimuli ilebhe twe ngita kutangatilana akanalome na akakeghe na mmanda na munahota gwake, mu chula jha 2:11-4:11.
Kubhoke penia Petile abhakangamalicha mwojho bhabha akaimbalilu pibhakongana na malagho, mu chula jha 4:12-5:11.
Kabhele Petile ajhomole baluwa jhake, mu chula jha 5: 12-14.
1
1 Ne Petile, natenga jwa Yecho Kilichitu.
Ninyandikila mangota bhuhaghulilwe na Chapanga, bhumpechengine na kubhehe ngita makaghene kwenio ku kilambo chuku Ponto na ku kilambo chuku Galatiya na ku kilambo chuku Kapadokiya na kilambo chuku Asiya na ku Betaniya.
2 Chapanga Tate akaumanye mangota kuhumii makacho na ngahagwila, atendingine manyahinyahi kwa Uhuke gwake, nhotole kunyokanikiya Yecho Kilichitu na kuchukwa kwa miyahe jhake.
Tunnyopelangana umbone na uteeke gwamahele kubhoka kwa Chapanga.
Lihobholelo lilibhii ghome
3 Tunnombe Chapanga, Tate jwa Bhambo gwito Yecho Kilichitu! Kwa kiya jhake ngolongwa ngabhatupila ughome nhyono mu lihobholelo kwa kuyokecha Yecho kuhumii kubhawile,
4 bhahe, tulole kupata mota twe ya Chapanga yabhabhekii bhando bhake. Mota yenio ibhola jhe amu ihangabhika jhe amu itundingii jhe, ibhii kunane kwa Chapanga kwa nhwalo gwino.
5 Na mangotamwe mulondwa na makakala gha Chapanga kwa ndela jha kihobholelo, kupala mpatangane ughombokeko ghupakubhonekana kipinde cha kupehekeya.
6 Nhwanganile kwa kilebhe chenie bhahe, ata anda ngohe kwa kipinde kichokombe mmi ngolongonde na kulagha kwa majhighanikilo ndii.
7 Kujhighanikilwa kwenioko kupala kumanya kihobholelo chino kibhii bhole. Ata chaabo ndi kilebhe cha kuhangabhika nambo ade ijhighanikilwe pamwotu. Helahela kihobholelo chino kilebhe chambone kuliku chaabo, ade nnyighanikilwe kupala nkwime. Ndi pumpa kupoke chipwa na ung'alicho na ichima mu lichiko Yecho Kilichitu papakubhonekana.
8 Pamonga jwenio manamona jhe mipala, kabhele pamonga mumwona jhe, minnyeketela na kubhehe na kiheko changachimulika chikibhii na ung'alicho twe,
9 nhwalo mipoke ughombokeko gwa uhuke gwino ndi nhwalo gwa kihobholelo chino kwake.
10 Akalondole bha Chapanga bhakalingukiye na kulingukiya ughombokeko gwenio na ngabhalondwila kubhehe umbone gwa Chapanga ngampekiya mangota.
11 Ngabhajhighita kumanya kipinde ghane chiipa kubhehe kilebhe chenie chikipa kupitila. Yane kipinde chapwepwita Uhuke gwa Kilichitu jwakibha nkate jhabhe ngalondwila malagho ghighapa kunkolela Kilichitu na ung'alicho ghupa kukengama.
12 Chapanga akayekulile akalondole bhake kubhehe lihengo likibha jhe kwa nhwalo gwabhe bhene, nambo kwa nhwalo gwino ngita chililonge Lilobhe lya Mbone kwa makakala gha Uhuke gwa Chapanga kubhoka kunane. Ilebhe yenio ata akatumiche bha kunane kwa Chapanga bhakapahi kuilolekeya.
Lukemo lwa kutama nyahinyahi
13 Ngohe bhahe, nkoto kukihibhuka. Bhahe, milibheke lihobholelo lino lyoha mu umbone ghola ghupakupelwa kipinde Yecho Kilichitu papakubhonekana!
14 Anda yana innyokanikii Chapanga, mangalogwa jhe kabhele kukengama tama mbajha ngita kipinde chimikibha mandindilima.
15 Nambo ngita Chapanga jwakemengine chabhii hela jwanyahinyahi na mangota mipalwa kubhehe nyahinyahi mu matyangii ghino ghoha.
16 Nhwalo Majhandiko gha Chapanga ghilonge,
“Mmangana manyahinyahi, nhwalo nenga nanyahinyahi.”
17 Mangota pumunnyopa Tate, jhola jwahadabuu kila mundo kulengana na itendwa yake changannoleke kumiho, bhahe, ntamangane pannema ngita makaghene mu kuntembekeya Chapanga.
18 Na mangota mmanye kubhehe nkombolilwe chi kwa ilebhe ihangabhika kwa feza amu chaabo na nhoto kubhoka mu matyangilo ghino ghanganandela ghumpokii kuhumii kwa tate gwino,
19 nambo nkombolilwe kwa miyahe jha chamane hake jha Kilichitu, jwakibha ngita mwana limbelele jwangalemala amu libaka.
20 Jwenio akahagwulilwe na Chapanga nnema nakupanganwa jhe, na ngayekulilwa machiko ghakujhomolela ghano kwa nhwalo gwino mangota.
21 Kwa ndela jhake, mangota muhobholela Chapanga jwayokicha kubhoka kubhawile na kumpeke ung'alicho, yenio kuhobholela kwino na lihobholelo libhaha kwa Chapanga.
22 Nhwalo ngohe nnyelewike kumwojho kwa kujhokanikiya chakaka, kupala mapale akajhino changabhonekana nambone, bhahe, mupalane kwa mwojho ghoha.
23 Nhwalo kwa ndela jha Lilobhe lya Chapanga lilibhii ughome, mangota mmelwikwe nhyono, chi ngita yana chibhelukwa na tate jwawegha, nambo jwatamikii machiko ghoha ghangapeta.
24 Ngita Majhandiko gha Chapanga chighalonge:
“Kila mundo abhii ngita mahamba,
na ung'alicho gwake ngita lilobha lya kwanyahe,
nhwalo mahamba unyala na malobha upuluta.
25 Nambo lilobhe lya Bhambo litamikii machiko ghoha ghangapeta.”
Lilobhe lyenio ndi Lilobhe lya Mbone lilitangichwe kwino.