Baluwa jha Pauli kwa
Akafilipe
Ulongolelo
Pauli akajhandike baluwa jhenje kwa makunde gha bhando bhibhannyeketii Kilichitu bhubhatamita ku kilambo cha ku Filipe mu yaka ya makome chita na jhimo kuhumii Yecho pakibha pannema. Akajhandike pakibha mukipungo ku Loma, mu chula jha 1:13. Baluwa jhene ikajhandikwe kwa makunde gha bhando ghughannyeketii Kilichitu bhubhatamita mu kilambo cha ku Filipe. Tuhoto kumanya malobhe gha muche gwa ku Filipe putuchoma mukitabo cha Mahengo gha Akatenga. Filipe ukibha muche nkolongwa kilambo cha ku Makedoniya. Helahela likibha ndi likunde lilitumbwila lya bhando lilinnyeketii Kilichitu lya kwenio ku Makedoniya. Pauli na Sila kwa pamonga bhakatumbwii kwatangachii makunde gha bhando bhibhannyeketii Kilichitu na bhajhakwatabha mukipungo kwa uhiko ghumo pubhakibha kwenio ku muche gwenio, Mahengo gha Akatenga chula jha 16.
Mu chula jha 4:10-19, Pauli akibha na mambu twe ghighanteila ajhandike baluwa jhenje. Akatumii pwache jhene kwa chenguu makunde gha bhando bhibhannyeketii Kilichitu kwa ilebhe ibhampelikila pubhajhohina abhii mukipungo. Helahela akapahi bhamanye chajhendelela pabhii mukipungo, na akabhahagwii Timocheyo na Epafulodito bhaghatyangile makunde gha bhando bhibhannyeketii Kilichitu gha kwenio ku Filipe, mu chula jha 2: 19-30, yenio alipala likunde lyenio lya bhando bhibhannyeketii Kilichitu lyapokele na lyajhokanikiye anda ilongoche yabhe.
Ghughabhii mukitabo
Pauli alijhambucha likunde lya bhando lilinnyeketii Kilichitu, mu chula jha 1:1-2.
Pauli abhalobholela chajhendelela na mambu ghaghapala kwenio, mu chula jha 1:3-2:30.
Pauli alaghalikiya makunde gha bhando bhibhannyeketii Kilichitu, mu chula jha 3:1-4:9.
Pauli ijhomolela kwa kulichenguu likunde lya bhando lilinnyeketii Kilichitu lya kwenio ku Filipe kwa kunnete ilebhe na peniya abhajhambucha, mu chula jha 4:10-13.
1
1 Nenga Pauli na Timocheyo, akatumiche bha Yecho Kilichitu.
Tunnyandikila mangota bhando bha Chapanga kwenio ku Filipu mangota bhinombine na Kilichitu Yecho, pamonga na ilongoche na bhibhatangatila likunde lya bhando bhubhannyeketii Kilichitu.
2 Tunnyope umbone na uteeke ghihuma kwa Chapanga Tate gwito na Bhambo gwito Yecho Kilichitu.
Pauli abhajhope bhando bhu ku Filipe
3 Ninchenguu Chapanga gwango kila pininkomboka,
4 na kila pininyopela mangota mabhoha, ninyope kwa kuhangana,
5 nhwalo chiundangatila mukuhenga lihengo lya kutangacha Lilobhe lya Mbone, kuhumii mukutumbula ade deleno.
6 Nenga nimanya kwa uchakaka kubhehe ndi Chapanga jwatumbulicha lihengo lende, nalijhendelecha ade piipala kujhomolela lichiko lela lya Kilichitu Yecho.
7 Ndi kilebhe cha mbone nenga kunkomboka naha, nhwalo mmii mu mwojho gwango. Ata pamonga ndabhitwe amu nekekiwe, mangota mabhoha mukalombine na nenga mu umbone gwambekii Bhambo gwa kulikengelela Lilobhe lya Mbone na kulangiya uchakaka gwake kwa bhando.
8 Chapanga amanya ngita chinilongela chakaka, kubhehe noghilwe hake kummona kwa upalo ghogholaghola gwa Yecho Kilichitu.
9 Ninyopa Chapanga upalo gwino uchocha kujhonjekeka na mme umanye hake na malango ghoha,
10 kupala nhoto kuhaghula ghughabhii ghambone. Peniya ndi namma na mwojho gwambone na nankolajhe ulemo mulichiko lela lya Kilichitu.
11 Ughome gwino na utwelele mambu ghoha ghaumbone ghala tugha Yecho Kilichitu ihoto kumpela, ndi bhando bhoha bhannombe na kumpe ulombo Chapanga.
Kubhehe na Kilichitu umwojho
12 Makalongo bhango, nipala umanye kubhehe mambu ghala ghughambitile ghatangatii hake kupechengana Lilobhe lya Mbone.
13 Nhwalo gwenio, akalonda bhoha bha nyumba jha nduna pamonga na bhando bhange bhoha bhamanya kubhehe mmi mukipungo nhwalo nenga ninhengela Kilichitu.
14 Na kongo kubhehe kwango mukipungo kwatei akalongo bhamahele bhannyeketele hake Bhambo, na bhakangamalichwe mukutangacha Lilobhe lya Chapanga changa ubhoghohe.
15 Chakaka bhando bhange bhintangacha Kilichitu nhwalo bhabhii na wiho na bhando bhubhabhii na milomo, nambo bhando bhange bhintangacha Kilichitu kwa mwojho gwambone.
16 Bhando bhamba bhitangacha mbone kwa upalo, bheniya bhimanya ngita Chapanga ambekiye lihengo lende lya kulikengelela Lilobhe lya Mbone.
17 Nambo bhando bhange bhintangacha Kilichitu kwa nginyika hilu kwa mwojho gwa mbonejhe, bhihwacha kwa kuhenga yenio nabhajhonjekeya malagho ghango mukipungo.
18 Nambo gheniya ghoha kwa nenga kilebhe nacho! Nenga nihangana tugha anda bhando bhintangacha Kilichitu kwa kila ndela, ibhaha kuhola kwa chakaka amu kwa mawacho ghanganandela. Nenga nijhendelela kuhangana,
19 nhwalo nimanya kwa kunnyopa kwino Chapanga na kwa utangatilo gwa Uhuke gwa Yecho Kilichitu, nanekekewa kubhoka mukipungo.
20 Chinikipala na chinikihobholela nenga ngoto kukola hone, nambo ngangamalichwa machiko ghoha na achwa ngohe ndi Kilichitu alombwe muughome gwango, punibhe ghome amu punihwegha.
21 Kwa nenga kutama kubhehe na Kilichitu nkate jha mwojho gwango, nambo kuwe ndi ninomenekeya.
22 Anda najhendelela kutama muyegha jhenje, lihengo lyango nalijhonjekeka hake, kwale aghuu nike!
23 Nihutwa na mambu ghanga. Mbala kuleka utamo ghongo, nyende nakatame na Kilichitu ndi lijhambu lya mbone hake,
24 nambo ndi lijhambu lyamaha hake kwino anda nijhendelela kutama pannema.
25 Mmii na uchakaka nanama, na nanyendelela kutama pamonga na mangota mabhoha, ndi kihobholelo chino na luhangano lwino lujhonjekeke,
26 kupala punibhehe na mangota maka Filipe kabhele, nankola kilebhe cha kukilokela kwa nenga mukulombana na Yecho Kilichitu.
27 Yene kilebhe chikipalwa ndi ughome ghino ulengane ngita chikipalwa na Lilobhe lya Mbone lya Kilichitu, na anda hotwi kuhika kwino amu ngoto kuhika, nyohe nnyemite nganganga kwa mwojho ghumo na mukomana ngondo kwa mwojho ghumo kwa nhwalo gwa kihobholelo cha Lilobhe lya Mbone.
28 Nkoto kwajhoghopa akamakoko bhino, machiko ghoha nkangamalichwe, chenje nachalangiya kubhehe bhene bhahobhite na mangota nkombolilwe. Chapanga ndi jwabhakombola.
29 Nhwalo mangota mpatite umbone kwa nhwalo gwa Kilichitu chi kwa kunhobholela tugha helahela na kung'ahika kwa nhwalo gwake.
30 Ngohe mihoto kubhehe pamonga na nenga mubhulo. Na bhulo ghola ghumujhohina kuhumii makacho ade ngohe nnyohine namela mubhulo.