9
Lipenenga lya nhwano
1 Peniya, ntumiche jwa kunane kwa Chapanga jwa nhwano ngahonita lipenenga lyake. Ne nginilubhonita lundondwa luhuma kunane, lugwelelii panane pakilambo, lwenio ndi ngalupilwa upungulo lwa ndela jha kujhingii muluonyo lwa nyolii lwangapehekeya.
2 Lundondwa lwenio ngulujhogwila libhomba lyanyolii lyenio, malyoi ghighahukika mulibhomba lyenio ghabhonikina ngita malyoi ghighauka pa litanule likolongwa. Lyobha na mahunde ghajhakubhehe mulubhendo kwa malyoi gheniya ghighahuma mu libhomba lyenio.
3 Madidima ghighakemwa nchige ngaghapitila mulyoi lyenio na kupechengana pannema ghoha, kubhoke peniya ngaghapilwa makakala ngita gha kipyelele.
4 Madidima gheniya ngaghalaghilwa ghakoto kuhangabhana mahamba pannema amu ituto amu mikongo, nambo ghahangabhana bhando bhangabhehe na lulembo lwa Chapanga pa ibhonge yabhe.
5 Madidima gheniya ghakibha jhe na ukindendeke gwa kukoma bhando, nambo kwang'aha kwa miyehe nhwano. Kubhiniya kwake kulandina ngita kipyelele pikinuma mundo.
6 Machiko gheniya bhando nabhapalaha kuwe nambo nabhawe jhe, nabhapala kuhwe nambo kuhwe nachatila.
7 Madidima gheniya ghabhonekina ngita falache bhibhalenganikiwe kwa nhwalo gwa ngondo. Umitwe jhabhe ibhii ilebhe ilandana na hupo jha chaabo na kumiho kwabhe kulandana ngita kumiho kwa bhando.
8 Majhunjo ghabhe ghakibha ngita majhunjo gha mwikeghe na mino ghabhe ghakibha ngita mino gha lihimba.
9 Na panganga yabhe ikibha ighubikwe ilebhe ngita ngobho jha choma. Lilobhe lya mapapanilo ghabhe ghakibha ngita chilumbii mutuka jhihutwa na falache twe ghighajhenda kungondo.
10 Ghakibha na mikila jhibhii ngita chindano jha kipyelele na kwa mikila jhene ikibha na makakala gha kwaluma bhando kwa miyehe nhwano.
11 Kabhele pabhii na munahota nkolongwa jwabhalongocha na jwenio ndi Ntumiche jwa ku libhomba lanyolii lyangapekeheya, liina lyake ku Kiebulaniya ndi Ebadone na kwa Kigilike ndi Apolione, mana jhake, Jwahangabhana.
12 Choto chukutumbula kijhomwike, kwa mambu mabhoho ghighapitile nambo ghamela mabulo mabhoho ghange mabhele ghighahika.
13 Peniya, ntumiche jwa chita ngahonita lipenenga lyake. Nganyohina lilobhe kuhumii mu manyelo ncheche gha kichangwale cha chaabo chikibhii palonge jha Chapanga.
14 Lilobhe lyenie linobholila ntumiche jwenio jwa chita jwabhii na lipenenga, “Majhogholele akatumiche ncheche bha Limbembela bhibhatabhitwe mu lukemba lukolongwa lwa Fulate!”
15 Akatumiche ncheche bha limbembela nabhalekekewa, bheniya bhakibha bhalenganikilwe kwa nhwalo gwa lichaa lele, lichiko lele na mwehe ghogho na chaka chenie bhakome chehemo jhimo jha bhando pannema.
16 Nganyohina ichabo jha akakomana ngondo bhibhabhalangilwe bhibhahombe falache ikibha milione miya mbili.
17 Mu maloto ghango ibhonikina yenio, falache na bhibhahobhokii falache. Bhawalite ngobho ya choma kuyekelela nganga, ikibha ngele pyuu ngita mwotu na lange jha kibuluu ngita lihunde na manjano ngita uhembe gwa balute. Mitwe jha falache yenio ikalandine ngita mitwe jha lihimba, na mwotu na lyoi na balute chiijhaka ipitita munnomo gwabhe.
18 Cheluchi jhimo pakate jha bhando bhakakomitwe na kwa mabulo gheniya matato yane mwotu na malyoi na balute jhipitita mu milomo jha falache.
19 Makakala gha falache yenie ghakibha mu milomo jhabhe na mu mikila jhabhe. Ndi nhwalo mikila jhabhe ikalandine ngita lijhoka na ikibha na mitwe, itumila jhene kwalumi bhando.
20 Bhando bhange bhibhaighii bhangakomwa kwa mabulo matato gheniya, bhakaghalambwike jhe na kuileka ilebhe yabhe ibhakitengenechile bhene, hilu bhakalekite jhe kujhinamila nchuka amu inyagho ya chaabo na inyagho ya madine gha feza na inyagho ya maghanga gha shaba na inyagho ya maghanga na inyagho ya mikongo. Ilebhe yenio ihoto jhe kulola hilu kujhoha amu kutyanga.
21 Hilu bhando bheniya bhakaghalambwike jhe na kuleka itendwa yabhe ya kukoma bhando amu uhabhe amu ngongola hilu lukwatulo.