Baluwa jhukutumbula jha Pauli kwa
Timocheyo
Ulongolelo
Kitabo cha kutumbula cha Timocheyo ndi baluwa chikajhandikwe na Ntenga Pauli kujhenda kwa mmola gwake Timocheyo. Kitabo chenje kikajhandikwe muchaka cha makome chita na ubhele hade makome chita na ncheche pabhelwika njwe Yecho Kilichitu. Pange iwechekana kipinde chenie ndi ukibhe ubhandikila ujhomolelo gwa ughome gwa Pauli. Pauli akibha pahina na Timocheyo, pipipi ankemita mwana mundo, Filemone, mu chula jha 2:22, Timocheyo mu chula jha 1:2,18.
Baluwa jhenje ndi jhimo pakate jha baluwa ncheche ya Pauli yajhandikwe kwa bhando kajhika na chi kwa lilongo lya bhando lilinyeketii Kilichitu. Baluwa henge itato ndi baluwa jha ubhele kwa Timocheyo na kwa Titu na kwa Filemone. Kitabo cha kutumbula cha Timocheyo kilongelela mambu gha mahena hake ilongelela panane ya kunnyinamii Chapanga, muchula jha 2:1-15, chipwa chibhipala kubhe nako ilongoche ya bhubhajheketile muchula jha 3:1-13, na lupwato kwa bhabhola bhuwange muchula jha 1:3-11, 6:2-5. Jhenje ilangii Pauli pubhakibha imola Timocheyo kubhehe kilongoche jwa lilongo lya bhando bhibhannyeketii Kilichitu. Kitabo cha kutumbula cha Timocheyo kibhii na malaghilo ghamahele ghighahoto kwatangatila ilongoche ya bhando bhibhanyeketii Kilichitu mu machiko ghanga.
Ghughabhii mukitabo
Pauli itumbu kwa kunnyambucha Timocheyo, mu chula jha 1:1-2.
Pauli impwatalila Timocheyo akichunge na bhabhola bha uwange, mu chula jha 1:3-11.
Pauli ajhendelela kuchenguu ngita hela chabhile kwa nhwalo gwa Yecho Kilichitu, muchula jha 1:12-19.
Yene Pauli impe malaghilo Timocheyo nhwalo gwa kunnyinami Chapanga na ilongoche ya bhando bhibhannyeketii Kilichitu, mu chula jha 2-3.
Pauli ijhomolee baluwa jhake kwa kumpe Timocheyo malaghilo gha kujhomolela, mu chula jha 4-6.
1
1 Ne Pauli, natenga jwa Yecho Kilichitu kwa nhwilo gwa Chapanga ndi Nkomboche gwito na Yecho Kilichitu ndi lihobholelo lito.
2 Ninnyandikila Timocheyo mwanango jwa chakaka mu kihobholelo.
Ninnyope umbone na kiya na uteeke kuhumii kwa Chapanga Tate gwito na Yecho Kilichitu Bhambo gwito.
Lupwato panane jha mabholo ghuwange
3 Mbala ntame kwenio ku Epecho, ngita punipembelikiya punikibha nikajhenda ku Makedoniya. Bhabhii bhando bhange kwenio bhibhola mabholo ghuwange, makanakiye bhando bheniya.
4 Mwalobholela bhaleka kulingukiya kwamahele mu ibheluko pamonga na malobhe gha akahoko, gheniya ghileta kutaungana tu, ghichenga jhe lihengo lya Chapanga mu kihobholelo.
5 Kilebhe kikolongwa cha malaghalikilo ghango ndi upalo, ghuubhoka mumwojho gwambone, na kuhaghuu na kuhenga ghambone na kihobholelo cha uchakaka.
6 Bhando bhange bhahobhalile na kughalambukila mu malongocho gha kimbebhebhe.
7 Bhipala kubhehe bhabhola bha malaghalikilo gha Mucha, nambo bhimanya ndeka chibhalongela amu malobhe ghabhe bhene amu mambu ghibhajhoha.
8 Tumanya Malaghalikilo ndi ghambone, anda ghatumike chiipalwa.
9 Helahela tumanya kubhehe Lilaghalikilo liletitwe kwa nhwalo gwa bhando bhambone jhe, nambo kwa bhando bhangakamuu lilaghalikilo, bhangajhokanikiya, bhangannyopa Chapanga na akahako, bhando bhibhakengama gha nnema na bhangamanya ndela jha Chapanga, bhando bhibhakoma akatate bhabhe na akama jhe bhabhe, amu bhibhakoma bhando.
10 Lilaghalikilo liletitwe kunhwalo gwa bhibhahenga ngongola, bhibhagholoka na akanalome ajhabhe, bhibhakwatuu bhando, akawange na bhilapii kuwange amu bhihenga kilebhe chochoha chikibhii kuyeto na mabholo gha uchakaka.
11 Mabholo gheniya ghabhii mu Lilobhe lya Mbone lya Chapanga jhuna ung'alicho ndi lilobhe limbekiwe nenga natangachila bhando.
Kiya jha Chapanga kwa Pauli
12 Ninchenguu Yecho Kilichitu Bhambo gwito jwambekii makakala kunhwalo amwene ne ndi nihobholeka, ngahagwila nintumikila,
13 pamonga na makacho ninighita na kwang'aha na kwatende chanake bhando bhinnyeketeketii Kilichitu. Nambo Chapanga ngamonila kiya, kwa nhwalo nakibha nalindindilima kabhele nanga kihobholelo.
14 Nambo Bhambo gwito ngandweleya twe umbone, ngambekiya kihobholelo na upalo mu kulombana na Kilichitu Yecho.
15 Lilobhe lende ndi lya chakaka, kabhele ipalwa kujheketelwa na kuhobholeka: Kilichitu Yecho pahikita pannema pano kwakombola bhando bhubhabhii na uhakaho. Na nenga nnemwite hake kupeta bhando bhoha,
16 nambo Chapanga ngamonila kiya ndi kupala Kilichitu Yecho alangiye luhimbililo lwoha kwa nenga mii nauhakaho kupeta bhoha, ngita nnandanikiho kwa bhala bhoha bhibhapala kunnyeketela na kupokela ughome gwa machiko ghoha ghangapeta.
17 Kwa Munahota Nkolongwa jwangawegha machiko ghoha ghangapeta, jwangahwe, jwanga bhonekana, ndi Chapanga kanjika ndo, kwa jwenio kubhii na ichima na ung'alicho gwa machiko ghoha ghangapeta! Amina.
18 Timocheyo ndi mwanango mu kihobholelo, ninkamuwa nhwilo ghongo, kwa malobhe gha ulondole ghighalongilwa panane jhino makacho mughakengame ndi uhoto kuikengelela ngondo jha Malobhe gha Mbone,
19 na mukikamulile kihobholelo chino na kupala mme na mwojho gwa kuhaghula ghakuhenga ghighabhii ghambone. Bhando bhange bhakanite gheniya, yenio bhakihangabhine kihobholelo chabhe.
20 Pakate jhabhe ndi Humeneyo na Alekichanda, bheniya ninkamwii Limbembela, abhabhole kupala bhakoto kunnigha Chapanga.