3
Ilongoche ya bhando bhibhannyeketii Kilichitu
1 Lilobhe lende ndi lya chakaka, mundo jwapala kubhehe kilongoche jwa bhando bhibhannyeketii Kilichitu, jwenio ighana lihengo lyambone.
2 Bhahe, kilongoche jwa bhando bhibhannyeketii Kilichitu ipalwa abhaha mundo jwantemulana ilebhe maha, abhaha na mwikeghe jhumo, abhaha jwahoto kukilongocha jwenio, jwajhokanikilwa na jwapokela akaghene na jwahoto kubhola bhando,
3 jwangalobhela amu mundo jwanga kijhonga, nambo abhaha jwanuu jwapala uteeke na angabhehe jhe jwakupala mbijha.
4 Ipalwa abhaha mundo jwahoto kwalongocha bhando bha pakajhake maha na aitenda yana yake bhannyokonikiye changa nkanila na ichima hake.
5 Anda mundo ahoto jhe kwalongocha maha bhando bha ukajhake, nahotolabho kulilongocha likunde lya bhando lilinnyeketii Chapanga?
6 Apalwa jhe kubhehe mundo jwannyeketii Kilichitu ngohengohe nhwalo ahoto kuloka na kuhadabulwa ngita chahadabwilwe Limbembela.
7 Ipalwa atopele na bhando bhangannyekete Kilichitu, kupala akoto kugwelele muhone na muntambo gwa Limbembela.
Bhakujhangatii mu lilongo lya bhando bhibhannyeketii Kilichitu
8 Bhakujhangatii mu lilongo lya bhando lilinnyeketii Kilichitu bhipalwa bhabha na matyangilo ghamaha, bhina kuhobholeka na bhilonge chakaka chika bhangalobhela divaye na bhando bhakupala tama jha kupata mbijha kwa ndela mboho,
9 bhipalwa bhaikamula kwa mwojho gwambone uchakaka mu kihobholelo chikiyekulilwe na Chapanga.
10 Hote bhipalwa bhajhigwa, anda bhabhonikine bhakwetii jhe malemo, mwaleke bhabha akajhangatii mu lilongo lya bhando bhibhannyeketii Kilichitu.
11 Akahana bhabhe hele bhipalwa bhabha na matyangilo ghambone, bhangang'wenya bhando, bhitemulana ilebhe maha na bhihobholeka mu ilebhe yoha.
12 Jwantangatii lihengo pa bhando bhibhannyeketii Kilichitu ipalwa abhaha na mwikeghe jhumo tu, na jwahoto kulongocha maha yana mundo na nyumba jhake.
13 Nhwalo jwantangatii lihengo maha ahoto kujhema nganganga nu kulonge lilobhe lya kihobholelo chake mu kulombana na Kilichitu Yecho changajhoghopa.
Lupwepo lukolongwa
14 Ninyandikii ghanga na kongo nihobholela kuhika kajhino machiko ghighabhandakii.
15 Nambo anda njeliwe, bhahe, ghanga ghininnyandikile itenda umanye chimitama munyumba jha Chapanga, ndi lilongo lya bhando lilinnyeketiii Kilichitu ndi Chapanga jwabhii ghome, jwenio ndi luheke na nchinge gwa uchakaka.
16 Ubhii jhe bwoghohe gwogwoha panane jha uyekulilo gwa lupwepo lwa kihobholelo chito chikibhii kikolongwa,
Akabhonakine muyegha jha kimundo,
jwakalangiwe na Uhuke gwa Chapanga kubhehe ndi jwambone,
akabhonikine na ntumiche jwa kunane kwa Chapanga.
Akatangichwe mu ilambo yoha,
akahobholike munnema gwoha,
akatolitwe kujhenda kunane kwa Chapanga mu ung'alicho.