၁ ကောရိန္သု
ကောရိန္သု အသင်းတော်ဟို ပေါလုရဲ့ ပထမပေးစာ
နိဒါန်း
ကောရိန္သု အသင်းတော်ဟို ပေါလုရဲ့ ပထမပေးစာ အား ခရစ်တော်မွေးဖွားပင်း ၅၅ ခုနှစ်ခန့်တွင် တမန်တော်ပေါလုဟ ရေးသားခဲ့အယ် (၁.၁)။ ဟေအရာမှာ ကောရိန့်မြို့ဆိ အသင်းတော်ဆေ ပေါလု ရေးခဲ့သော စာနေစောင်အနက်မှ ပထမဆုံးစာ ဖြစ်အယ်။ မာကေဒေါနိသို့ သွားရာခရီးနှိုက် သူဟ ကောရိန့်မြို့ဟို အလည်သွားရန် ရည်ရွယ်ပင်း ဧဖက်မြို့တွင် နေထိန်စဉ် ဟေစာဟို ရေးခဲ့ခြင်း ဖြစ်နိန်အယ် (၁၆.၅–၉)။
ဟေစာဟ အသင်းတော်ရဲ့ ကွဲပြားခြင်း၊ လိင်အကျင့် ယိုယွင်းခြင်း အပါအဝင် အသင်းတော်နဲ့ မကိုက်ညီသော အကျင့်စရိုက် အမျိုးမျိုးအကျောန်းဟို အသင်းတော် အဖွဲ့ဝင်အချို့ဆေမှ ပေါလု လက်ခံရဆိလဲ့ အစီရင်ခံစာအား ပြန်လည်ဖော်ပြခြင်း ဖြစ်အယ်။ ကောရိန့်မြို့ဟ ၎င်းရဲ့ လိင်အကျင့် ယိုယွင်းမှုကျောန့် လူသိများသော မြို့ဖြစ်လဲ့အတွက် အဲမြို့မှာဆိလဲ့ ကောရိန္သု အသင်းတော်ဟ ၎င်းပြဿနာများဟို ရင်ဆိုင်ရခြင်းမှာ အံ့ဩစရာ မဟုတ်ပေ။ ကောရိန္သု ပထမပေးစာတွင် ချစ်ခြင်းမေတ္တာနဲ့ ပတ်သက်လဲ့ ကျော်ကြားသော အခန်း (၁၃) ပါဝင်အယ်။
အကျောန်းအရာ အကျဉ်းချုပ်
၁။ ပေါလုဟ ကောရိန့်မြို့သားလို့ဟို နှုတ်ဆက်ပင်း သူလို့အတွက် ဘုရားသခင်ဟို ကျေးဇူးတင်အယ် (၁.၁–၉)
၂။ အဲနောက်၊ သူဟ ကောရိန္သုအသင်းတော်တွင် ကွဲပြားမှုများနဲ့ ပတ်သက်ယွေ့ သူရဆိခဲ့သော အစီရင်ခံစာများဟို ပြန်လည်ဖော်ပြခဲ့အယ် (၁.၁၀—၄.၂၁)
၃။ အဲပင်းနောက်၊ သူဟ လိင်အကျင့် ယိုယွင်းမှုဆိုင်ရာ ပြဿနာများနဲ့ တရားရုံးသို့ တိုင်ကြားခြင်းများအကျောန်း ဆှင်းပြအယ် (၅.၁—၆.၂၀)
၄။ အဲပင်းနောက်၊ သူဟ လက်ထပ်ထိမ်းမြားခြင်း ကိစ္စများ၊ ရုပ်တုများဟို ယဇ်ပူဇော်ခြင်း၊ လူထုဆိုင်ရာ ဝတ်ပြုကိုးကွယ်ခြင်း၊ ဝိညာဉ်ဆုကျေးဇူးများနဲ့ ဆှင်ပြန်ထမြောက်ခြင်းဆိုင်ရာ သွန်သင်ချက် ပေးအယ် (၇.၁—၁၅.၅၈)
၅။ နောက်ဆုံးတွင်၊ သူဟ လက်တွေ့လုပ်ဆောင်ချက်နဲ့ ကိုယ်ရေးကိုယ်တာ ကိစ္စအချို့ဖြင့် နိဂုံးချုပ်အယ် (၁၆.၁–၂၄)
1
1 ဘုရားသခင်ရဲ့ အလိုတော်အားဖြင့် ခရစ်တော် ယေရှုရဲ့ တမန်တော်အရာနှိုက် ခန့်ထားသော ငါ ပေါလုနဲ့ ငါ့ညီ သုဿင်ဆေမှ —
2 ကောရိန့်မြို့ဆိ ဘုရားသခင်ရဲ့ အသင်းတော်ဝင်အပေါင်းလို့ဆေဟို လည်းကောင်း၊ အရပ်ခပ်သိမ်းမှ ငါလို့နဲ့ သူလို့ရဲ့ သခင် ယေရှု ခရစ်တော်ဟို ကိုးကွယ်သောသူ အပေါင်းလို့နဲ့တကွ ခရစ်တော် ယေရှုနဲ့ တလုံးတဝတည်း ဆိသောအားဖြင့် ဘုရားသခင်ရဲ့ လူအဖြစ် ရွေးချယ်ခြင်း ခံရသောသူအပေါင်းလို့ဆေဟို လည်းကောင်း စာရေးလိုက်ပါအယ်။
3 ငါလို့အဖ ဘုရားသခင်နဲ့ သခင် ယေရှု ခရစ်တော်ဆေမှ ကျေးဇူးတော်နဲ့ ငြိမ်သက်ခြင်းဟ နင်လို့နှိုက် ဆိပါစေသော။
ခရစ်တော်နှိုက် ကောင်းချီးမင်္ဂလာများ
4 ခရစ်တော် ယေရှုအားဖြင့် နင်လို့အား ပေးသော ဘုရားသခင်ရဲ့ ကျေးဇူးတော်ကျောန့် ငါဟ နင်လို့အတွက် ငါ့ဘုရားသခင်ဟို အစဉ် ကျေးဇူးတင်အယ်။
5 အကျောန်းမှာ နင်လို့ဟ ခရစ်တော်နဲ့ တလုံးတဝတည်း ဆိသဖြင့် ပြောဆိုသမျှနဲ့ အသိပညာဆိသမျှလို့နှိုက် ကြွယ်ဝခြင်းသို့ ရောက်လေပီ။
6 ခရစ်တော်နဲ့ ပတ်သက်သော သတင်းစကားဟ နင်လို့အထဲနှိုက် ခိုင်မြဲစွာ တည်ဆိနေအယ်။
7 ငါလို့ သခင် ယေရှု ခရစ်တော် ပေါ်ထွန်းလာမဲ့ အချိန်ဟို စောင့်မျှော်နေသလို နင်လို့ မခံရလဲ့ ကောင်းချီးမင်္ဂလာ တစုံတခုမျှ မဆိ။
8 ငါလို့ သခင် ယေရှု ခရစ်တော်ရဲ့ နေ့နှိုက် နင်လို့ဟ အပစ်တင်ခွင့်နဲ့ ကင်းလွတ်စေမဲ့အကျောန်း ကိုယ်တော်ဟ နင်လို့အား အဆုံးတိုင်အောန် ခိုင်ခံ့မြဲမြံစေလိမ့်မယ်။
9 ကိုယ်တော်ဟ နင်လို့အား မိမိရဲ့ သားတော် တည်းဟူသော ငါလို့ရဲ့ ယေရှု ခရစ်တော်နဲ့ မိတ်သဟာယ ဖွဲ့စေရန် နင်လို့ဟို ခေါ်သော ဘုရားသခင်ဟ သစ္စာနဲ့ ပြေ့စုံအယ်။
အသင်းတော်အတွင်း ကွဲပြားခြင်း
10 ညီအကို မောင်နှမလို့၊ ငါလို့ သခင် ယေရှု ခရစ်တော်ရဲ့ နာမဟို အမှီပြုယွေ့ နင်လို့အား တောင်းပန်အယ်။ စိတ်ဝမ်းကွဲပြားမှု မဆိစေရန် နင်လို့အား စကားအပြောအဆိုတွင် ညီညွတ်မှု ဆိကြလော့။ စိတ်ကူးတခုတည်း ရည်ရွယ်ချက် တခုတည်းဖြင့် စည်းလုံးမှု ဆိကြလော့။
11 ညီအကို မောင်နှမလို့၊ နင်လို့ဟ အချင်းချင်း ခိုက်ရန်ဖြစ်လျက် ဆိကြကျောန်းဟို ခလောဣ အိုင်သားများဆေမှ ငါ ကြားသိရအယ်။
12 ငါဆိုလိုတာဟ တယောက်ဟ “ပေါလု တဘဲ့ ဖြစ်အယ်၊ နောက်တယောက်ဟ အာပေါလု တဘဲ့ ဖြစ်အယ်၊ နောက်တယောက်ဟ ကေဖ တဘဲ့ ဖြစ်အယ်၊ တခြားတယောက်ဟ ခရစ်တော်ရဲ့ တဘဲ့ ဖြစ်အယ်” ဟု နင်လို့ တဦးစီတိုင်း ပြောသောစကား ဖြစ်အယ်။
13 ခရစ်တော်ဟ ကွဲပြားသလော၊ ပေါလုဟ နင်လို့အတွက် လက်ဝါးကပ်တိုင်မှာ အသေခံပီလော။ အဲဟာ မဟုတ်ရင် နင်လို့ဟ ပေါလုရဲ့ နာမဟို အမှီပြုယွေ့ နှစ်ခြင်းဟို ခံယူကြပီလော။
14 ကရိပ္ပုနဲ့ ဂါယုမှ လွဲယွေ့ နင်လို့အထဲမှ စသူ့ဟိုမျှ ငါဟ နှစ်ခြင်း မပေးလဲ့အတွက် ဘုရားသခင်ဟို ကျေးဇူးတင်အယ်။
15 အဲလိုမို့ နင်လို့ဟ ငါရဲ့ နာမဟို အမှီပြုယွေ့ နှစ်ခြင်း ခံယူကြအယ်ဟု စသူမျှ မပြောနိန်။
16 သတေဖန်ရဲ့ အိုင်သူအိုင်သားလို့လည်း ငါ နှစ်ခြင်း ပေးခဲ့အယ်၊ အဲသူလို့မှ လွဲယွေ့ အခြားစသူ့ဟိုမျှ နှစ်ခြင်းပေးတာဟို ငါ မမှတ်မိ။
17 ခရစ်တော်ဟ ငါ့ဟို နှစ်ခြင်း ပေးစေရန် စေလွှတ်တာ မဟုတ်။ ခရစ်တော်ရဲ့ လက်ဝါးကပ်တိုင်တွင် အသေခံခြင်း တန်ခိုး အလကားကား မဖြစ်စေရန် လူလို့ရဲ့ ဉာဏ်ပညာနဲ့ယှဉ်သော စကားများဟို အသုံးမပြုဘဲ သတင်းကောင်းဟို ပြောရန် ငါ့ဟို စေလွှတ်ခြင်း ဖြစ်အယ်။
ဘုရားသခင်ရဲ့ တန်ခိုးတော်နဲ့ ဉာဏ်ပညာဖြစ်လဲ့ ခရစ်တော်
18 အကျောန်းမှာ လက်ဝါးကပ်တိုင်တွင် ခရစ်တော် အသေခံခြင်း တည်းဟူသော တရားဟ ဆုံးရှုံးမဲ့သူများအတွက် အနက်အဓိပ္ပာယ် မဆိလဲ့အရာ ဖြစ်အယ်၊ အားပေမဲ့ ကယ်တင်ခြင်း ခံသော ငါလို့အတွက် ဘုရားသခင်ရဲ့ တန်ခိုးတော် ဖြစ်အယ်။
19 ကျမ်းစာ ပြောတာဟ
“ပညာဆိလို့ရဲ့ ဉာဏ်ပညာဟို ငါ ဖျက်ဆီးမယ်
အသိပညာဆှင်လို့ရဲ့ အသိပညာဟိုလည်း ငါ ပယ်မယ်” ဟု ဖြစ်အယ်။
20 ပညာဆိဟ ပစာမှာ ဆိလုန်း။ ကျမ်းပြုဆရာဟ ပစာမှာ ဆိလုန်း။ ဟေလောကဆိ ဝေဖန်ရေးသူများဟ ပစာမှာ ဆိလုန်း။ ဘုရားသခင်ဟ လောကီဉာဏ်ပညာဟို မိုက်မဲစေတာ မဟုတ်လော။
21 အကျောန်းမှာ ဘုရားသခင်ရဲ့ ဉာဏ်ပညာအရ ဟေလောကဟ မိမိရဲ့ ဉာဏ်ပညာအားဖြင့် ဘုရားသခင်ဟို မသိခဲ့သောကျောန့် ဘုရားသခင်ဟ ဟောပြောခြင်းအမှုရဲ့ မိုက်မဲသောအရာအားဖြင့် ယုံကြည်သောသူလို့ဟို ကယ်တင်ရန် အလိုဆိအယ်။
22 ယုဒလူမျိုးလို့ဟ နိမိတ်လက္ခဏာများဟို တောင်းတတ်ကြအယ်။ လူမျိုးခြားလို့ဟ ဉာဏ်ပညာဟို ဆှာတတ်ကြအယ်။
23 ငါလို့ဟ လက်ဝါးကပ်တိုင်တွင် အသေခံသော ခရစ်တော်ရဲ့ အကျောန်းဟို ဟောပြောကြအယ်၊ အဲအကျောန်းအရာဟ ယုဒလူမျိုးလို့အတွက် မနှစ်မြို့စရာဖြစ်ပင်း လူမျိုးခြားလို့အတွက် အနက်အဓိပ္ပာယ် မဆိလဲ့အရာ ဖြစ်အယ်။
24 အားပေမဲ့ ယုဒအမျိုးသား ဖြစ်စေ၊ လူမျိုးခြား ဖြစ်စေ၊ ခေါ်သောသူလို့နှိုက် ဘုရားသခင်ရဲ့ တန်ခိုးတော်နဲ့ ဘုရားသခင်ရဲ့ ဉာဏ်ပညာဟူသော ခရစ်တော်ရဲ့ တရား ဖြစ်အယ်။
25 ဘုရားသခင်ရဲ့ မိုက်မဲခြင်းအရာဟ လူလို့ရဲ့ ပညာထက် ပိုယွေ့ ပညာဆိအယ်၊ ဘုရားသခင်ရဲ့ အားနည်းခြင်းအရာဟ လူလို့ရဲ့ ခွန်အားထက် ပိုယွေ့ အားကြီးအယ်။
26 ညီအကို မောင်နှမလို့၊ နင်လို့ဟို ခေါ်ခြင်းအရာဟို ဆင်ခြင်ကြလော့။ ခေါ်သောသူလို့တွင် လောကီပညာဆိအများ မပါ၊ ထင်ဆှားသော လူကြီးအများ မပါ၊ မင်းမျိုးနွယ်ဖြစ်သောသူအများ မပါ။
27 ဘုရားသခင်ဟ ပညာဆိလို့ဟို ဆှက်ကြောက်စေရန်၊ လောကီအရာနှိုက် မိုက်မဲသောသူလို့ဟို ရွေးကောက်အယ်။ အစွမ်းသတ္တိဆိသော သူလို့ဟို ဆှက်ကြောက်စေရန် လောကီအရာနှိုက် အားနည်းသောသူလို့ဟို ရွေးကောက်လေအယ်။
28 ဟေလောကအရာနှိုက် မြတ်သောသူလို့ဟို ဆှက်ကြောက်စေခြင်းငှါ နှိမ့်ချခြင်း ခံရသူများ၊ မထီမဲ့မြင်ပြုခြင်း ခံရသူများနဲ့ အပယ်ခံရသူများဟို ဘုရားသခင် ရွေးကောက်အယ်။
29 အဲကျောန့် ဘုရားသခင်ဆေ့နှိုက် စသူမျှ ဝါကြွားစရာအကျောန်း မဆိ။
30 ဘုရားသခင်ဟ နင်လို့အား ခရစ်တော် ယေရှုနဲ့ တလုံးတဝတည်း ဖြစ်စေအယ်၊ ခရစ်တော်အား ငါလို့ရဲ့ ဉာဏ်ပညာ ဖြစ်စေအယ်။ ကိုယ်တော်အားဖြင့် ဘုရားသခင်ဟ ငါလို့ဟို ဖြောင့်မတ်စေယွေ့ ငါလို့ဟ ဘုရားသခင်ရဲ့ လူစုတော်ဖြစ်လျက် ရွေးနုတ်ခြင်းဟို ရဆိကြအယ်။
31 အဲလိုမို့ ကျမ်းစာလာတာနဲ့အညီ၊ “စသူမဆို ဝါကြွားလိုရင် သခင်ဘုရားနှိုက်သာ ဝါကြွားစေ” ဟု ပြောထားအယ်။