4
Pɑ yɑɑ Piyɛɛ nɑ Yohɑɑnɩ kɛ nɔnɔɣɔ
1 Piyɛɛ nɑ Yohɑɑnɩ pɑ tɔŋnɑ sɑmɑɑ kɛ yɔɣɔtǝnɑʋ kɛ mpʋ, ɩlɛnɑ kɔtǝlɑɑ nɑ Ɩsɔ tǝsɛɛlɛ tɑŋlɑɑ nyʋɣʋ tʋ nɑ Sɑtusee nyǝ́mɑ pɑ tɑlɑ.
2 Ḿpʋ́ɣʋ́ pǝ sɑlɑ-wɛ. Pǝ tɑɣɑ pʋlʋ tillɑɑ sɔsɑɑ nɑɑlɛ nɑ́ sɛɣɛsɑɣɑ sɑmɑɑ sɩ Yesu femɑ. Mpʋ tɔ sǝtɑɑ kɑ tɛ nɑ pɑ́ fe.
3 Tǝnɑɣɑ Yutɑ nyǝ́mɑ kpɑ-wɛ nɑ pɑ́ tǝkɩ-wɛɣɛ sɑlǝkɑ, sɩ pǝ́ femɑ ɩlɛ pɑɑ cɛkǝnɑ. Pǝ tɑɣɑ pʋlʋ, sɑɑ ɩnɩ tɔ pɩɩ tɛmɑ tɑɑnʋɣʋ.
4 Pɑɑ nɑ mpʋ mpɑ pɑ nɩɩwɑ Piyɛɛ fɑɑci tɔ, pɑ pɑɣɑlɛ mʋwɑ. Hɑlǝnɑ mʋlɑɑ mpɛ pɑ tɑɑ ɑpɑlɑɑ tɑpɑ ɩsɩɩ iyisi kɑkpɑsɩ (5000) kɛ mpʋ.
5 Tɛʋ femɑ, ɩlɛnɑ Yutɑ nyǝ́mɑ sɔsɑɑ nɑ nyʋɣʋ nyǝ́mɑ nɑ Ɩsɔ Tɔm sɛɣɛsǝlɑɑ sɔsɑɑ, pɑ koti Yosɑlɛm.
6 Pǝ kpɑɣɑʋ ɩsɩɩ kɔtʋlʋ sɔsɔ Anɑ, nɑ Kɑyifi, nɑ Yohɑɑnɩ, nɑ Alɛkǝsɑntǝlɩ-wɛɣɛ mpʋ nɑ kɔtʋlʋ sɔsɔ lʋlʋɣʋ nyǝ́mɑ tǝnɑ.
7 Ɩlɛnɑ pɑ́ lǝsɩ tillɑɑ sɔsɑɑ nɑ pɑ́ kɔnɑ-wɛɣɛ pɑ hɛkʋ tɑɑ, nɑ pɑ́ pɔɔsɩ-wɛ sɩ: Mpi ɩnɩ ɩ́ lɑpɑ ɩsǝntɔ tɔ, ɑwe heelɑ-mɛ sɩ ɩ́ lɑ mpʋ? Nɑ ɑwe toŋ tɑɑ kɛ́ ɩ tɩɩ lɑpǝnɑ mpʋ?
8 Tǝnɑɣɑ Feesuɣu Nɑŋŋtʋ toŋ kʋlǝnɑ Piyɛɛ nɑ ɩ́ tɔ-wɛ sɩ: Tɔʋ, tɛtʋ sɔsɑɑ nɑ nyʋɣʋ nyǝ́mɑ mɛ,
9 sɑŋɑ pɑ pɔɔsǝɣɩ-tʋɣʋ kʋpɑntʋ nti tǝ lɑpɑ kɑɑkɑlɑɣɑ tɔ tǝ tɔm, nɑ ɩsǝnɑ tǝ lɑpɑ nɑ kɑ́ kʋlɩ tɔ.
10 Ɩlɛ pǝ wɛɛ sɩ ɩ́ nyɩ tɔm ntǝɣɩ mǝ tǝnɑ. Ɩsɛɣɛlɩ yǝlɑɑ tǝnɑ ɩ́ nyɩ-tɩ tɔtɔ sɩ, Nɑsɑlɛtɩ Yesu Kilisiti wei ɩ́ kɑmɑ sǝm tesikɑ tɔɔ nɑ Ɩsɔ feesi-ɩ tɔ, ɩ toŋ tɑɑ kɛ́ yʋlʋ ɩnɛ ɩ hikɑ ɩ tɩ nɑ ɩ́ nɑɑ-ɩ mǝ hɛkʋ tɑɑ kɛ́ ɩsǝntɔ.
11 Nɑ Yesu ɩnɩ ɩ tɔm kɛ pɑ ŋmɑɑwɑ Ɩsɔ Tɔm tɑɑ sɩ:
Nmɑlɑɑ mɛ, ɩ́ kɑ lɔwɑ pǝlɛ nte tɔ,
ńtɛ́ tǝ pǝsǝnɑ ntɛɣɛ kite tɛɛ pǝlɛ sɔsɔɔlɛ.
12 Ɩ tike tǝkoŋ ɩ yɑkǝnɑ yǝlɑɑ nyɔɔŋ. Pǝ tɑɣɑ pʋlʋ, hǝtɛ tǝnɛ tǝ pɑɑsi, lɛntɛ fɛɩ ɑntulinyɑ tǝnɑ tɑɑ nte Ɩsɔ hʋlɑ yǝlɑɑ sɩ tǝ́ yɑɑ-tɛ nɑ pǝ́ yɑ tɑ́ nyɔɔŋ tɔ.
13 Ḿpʋ́ɣʋ́ kotuɣu sɔsɑɑ mpɛ pɑ nɑwɑ ɩsǝnɑ Piyɛɛ nɑ Yohɑɑnɩ pɑ yɔɣɔtǝnɑ ɑpɑlʋtʋ tɔ, ɩlɛnɑ piti kpɑ-wɛɣɛ sɔsɔm. Pǝ tɑɣɑ pʋlʋ, pɑ mɑɣɑmɑɣɑ pɑ nyǝmɑ́ sɩ Piyɛɛ nɑ Yohɑɑnɩ pɑ kɛ́ yǝlɑɑ kɛ yem kɛ́, pɑ tɑ lɑ ceu nɔɣɔlʋ. Ɩlɛnɑ pɑ́ tɔɔsɩ sɩ pɑɑ kɛ́ Yesu tǝŋlɑɑ.
14 Pǝ́cɔ́ yʋlʋ wei ɩ kɑ hikɑ ɩ tɩ tɔ, ɩ sǝŋɑ pɑ ɩsɛntɑɑ tǝnɑ. Ɩlɛ pɑ tɑ nyɩ nti pɑɑ yɔɣɔtɩ tɔ.
15 Ɩlɛnɑ kotuɣu sɔsɑɑ tɔ Piyɛɛ nɑ Yohɑɑnɩ sɩ pɑ́ lɩɩ tǝhʋʋlɛ tɑɑ. Pǝ kɑɑsɑ mpɛ ɩlɛnɑ pɑ niki tǝ sɑɑwɑlɑ.
16 Sɩ: Ɩsǝnɑɣɑ tii lɑnɑ yǝlɑɑ pɑnɛ ɩnɩ? Pǝ tɑɣɑ pʋlʋ, Yosɑlɛm yǝlɑɑ tǝnɑ tɛmɑ nyǝm sɩ mpɛ pɑ lɑpǝnɑ piti tǝmlɛ sɔsɔɔlɛ tǝnɛ, pǝ́cɔ́ pǝ fɛɩ tɩɩ kpɛɛsɩ.
17 Ɩlɛ tii kisinɑ-wɛɣɛ tǝpʋlʋpʋlʋ sɩ ye pɑ tɑsɑ nɔɣɔlʋɣʋ Yesu hǝtɛ tǝnɛ tǝ tɔm heeluɣu pɑɑ nɑ. Pǝ tɑɑ kɔɔ nɑ tǝ tɔm sɔɔsɩ yɑʋ kɛ yǝlɑɑ tɑɑ.
18 Ḿpʋ́ɣʋ́ kotuɣu sɔsɑɑ yɑɑ Piyɛɛ-wɛ, nɑ pɑ́ kisinɑ-wɛ tǝpʋlʋpʋlʋ sɩ pɑ́ tɑɑ tɑsɑ Yesu hǝtɛ ńtɛ́ tǝ tɔm yɔɣɔtʋɣʋ yɑɑ sɛɣɛsʋɣʋ kɛ pɑɑ fǝŋ mɑɣɑmɑɣɑ.
19 Ḿpʋ́ɣʋ́ Piyɛɛ nɑ Yohɑɑnɩ pɑ cɔ kotuɣu sɔsɑɑ mpɛ sɩ: Mǝ mɑɣɑmɑɣɑ ɩ́ mɑɣɑsɩ-tǝɣɩ mǝ tɑɑ nɑ ɩ́ nɑ. Pepe kǝlɑ teu kɛ Ɩsɔ ɩsɛntɑɑ? Mɛɣɛ tǝ se yɑɑ Ɩsɔ?
20 Amɑ nti nti tɑ́ nɩɩwɑ nɑ tǝ nɑnɑ tɑ ɩsɛ tɔ, tɑ kɑɑ pǝsɩ nɑ tǝ́ su tǝ yɔɣɔtʋɣʋ.
21 Ḿpʋ́ɣʋ́ Kotuɣu sɔsɑɑ mpɛ pɑ tɑ nyɩ ɩsǝnɑ mpi pɑɑ lɑ Piyɛɛ-wɛ tɔ. Ɩlɛnɑ pɑ́ tɑsɑ-wɛɣɛ kpɑɑlʋɣʋ kɛ teu nɑ pɑ́ yele-wɛ. Pɑ tɑ hiki mpi pǝ tɔɔ pɑɑ hɔ pɑ ŋkpɑŋʋɣʋ tɔ. Mpi pǝ tɔɔ tɔ, yǝlɑɑ tǝnɑ sɑŋɑɣɑ Ɩsɔ kɛ́ pǝ tǝnɑ mpi pǝ lɑpɑ mpʋ tɔ pǝ tɔɔ kɛ́.
22 Apɑlʋ wei ɩnɩ piti tǝmlɛ lɑpɑ nɑ ɩ́ hiki ɑlɑɑfǝyɑ kɛ mpʋ tɔ, ɩ lʋlʋɣʋ pɩɩsɩ kɑ kǝlɑ nɩɩlɛ.
Ɩsɔ sɛɛlɑɑ sǝlǝmʋɣʋ
23 Kotuɣu sɔsɑɑ yelɑ Piyɛɛ nɑ Yohɑɑnɩ ɩlɛnɑ pɑ́ tɛɛ kpɑkpɑɑ kɛ pɑ tɑɑpɑlɑɑ kiŋ, nɑ pɑ́ kɛɛsɩ-wɛɣɛ tǝ tǝnɑ nti kɔtǝlɑɑ sɔsɑɑ nɑ nyʋɣʋ nyǝ́mɑ pɑ yɔɣɔtɑɑ tɔ.
24 Pɛlɛ pɑ nɩɩ-tǝɣɩ mpʋ, ɩlɛnɑ pɑ tǝnɑ pɑ́ sǝlǝmɩ Ɩsɔ sɩ: Hɑɩ, Tɑcɑɑ, nyɑ́ lɑpǝnɑ ɩsɔtɑɑ nɑ ɑtɛ nɑ teŋku nɑ pǝ tǝnɑ mpi pǝ wɛ pǝ tɑɑ tɔ.
25 Nyɑ́ yelinɑ nɑ Feesuɣu Nɑŋŋtʋ tʋ nyɑ́ tǝmlɛ tʋ tɑ lɔŋcɛ Tɑfiiti nɔɣɔ tɑɑ kɛ́ tɔm nɑ ɩ́ yɔɣɔtɩ sɩ:
Pepe tɔɔ kɛ́ piitimnɑɑ cʋkɑ pǝ tɑɑ nɑ kɑlɑmpɑɑnɩ kɛ́ mpʋ?
Pepe tɔɔ kɛ́ yǝlɑɑ nɑ́ pɑɑsǝnɑ nɔɔhɛɛ tɛɛ
kuuu kɛ yem kɛ́ mpʋ?
26 Atɛ ɑwulɑɑ sɔsɑɑ kɛlɑ tɔɔŋ.
Tɛtʋ tɔkǝlɑɑ nɑ́ pɛɛlɑ nɔɣɔ
nɑ pɑ́ kʋlɩ Tɑcɑɑ nɑ ɩ Mesii pɑ tɔɔ.
27 Tɑmpɑnɑ tɔɔ, Helɔtɩ, nɑ Pɔŋsɩ Pilɑtɩ, nɑ mʋʋlɑɑ, nɑ Ɩsɛɣɛlɩ piitim nyǝ́mɑ pɑ pɛɛlɑ nɔɣɔ kɛ nyɑ́ tǝmlɛ tʋ nɑŋŋ tʋ, wei n lǝsɑɑ sɩ ɩ́ lɑ Mesii tɔ, ɩ tɔɔ kɛ́ ɩcɑtɛ tǝnɛ tǝ tɑɑ.
28 Mpi tuu lɔŋ nyɑ́ tomɑ tɑɑ n nɔkɑɑ nɑ ń mɑɣɑsɩ nɑ ń sɩɩ tɔ, pǝ mɑɣɑmɑɣɑ kɛ pɑ lɑpɑ tǝkɛlɛ.
29 Tɑcɑɑ, pǝnɛntɛ nyǝnɩ kpɑɑlʋɣʋ mpi pɑ kpɑɑlɑ-tʋ nɑ ɩsǝlɛ kʋsɛɛmlɛ tɔ, nɑ ń yele nɑ nyɑ́ tǝmlɛ nyǝ́mɑ tɑ́ tǝ heeli nyɑ́ tɔm nɑ tɩɩ nyɑŋnɑ pʋlʋɣʋ pɑɑ pǝcɔ.
30 Tʋ nyɑ́ niŋ nɑ kʋtɔntʋnɑɑ hikiɣi ɑlɑɑfǝyɑ, nɑ ń yele nɑ yǝlɑɑ nɑɑkɩ nyɑ́ kɔkɔlɔ nyǝm nɑ nyɑ́ piti tǝmɑ kɛ nyɑ́ tǝmlɛ tʋ nɑŋŋtʋ Yesu toŋ tɑɑ.
31 Tillɑɑ tɛmɑ sǝlǝmʋɣʋ, ɩlɛnɑ lonte nte tǝ tɑɑ pɑɑ kotɑɑ tɔ tǝ́ sele. Ḿpʋ́ɣʋ́ Feesuɣu Nɑŋŋtʋ toŋ kʋlǝnɑ pɑ tǝnɑ. Ɩlɛnɑ pɑ́ sʋʋ Ɩsɔ Tɔm heeluɣu nɑ pɑɑ nyɑŋnɑ pʋlʋ.
Ɩsɔ sɛɛlɑɑ tɑlǝɣɩ pɑ tǝnɑɣɑ pɑ wɛnɑʋ
32 Ɩsɔ sɛɛlɑɑ kpekǝle tǝnɑ kɑ kɑɑ lotu nɑ lǝmɑɣɑsǝlɛ kʋlʋmtǝlɛ kɛ́ tǝkpɑtɑɑ. Pɑ tɑɑ nɔɣɔlʋ tɑɑ fɑɣɑsǝɣɩ nɑ ɩ́ nyǝnǝɣɩ ɩ kʋwɛnɑm ɩsɩɩ ɩ tike ɩ nyǝm. Amɑ pɑ nyǝnɑɣɑ pǝ tǝnɑ mpi pɑɑ wɛnɑ tɔɣɔ ɩsɩɩ pɑ tǝnɑ pɑ nyǝm.
33 Tillɑɑ kɛɛsɑɣɑɑ Tɑcɑɑ Yesu fem tɔm nɑ ɑpɑlʋtʋ kɛ́, nɑ Ɩsɔ kɑ́ wɛ pɑ tǝnɑ pɑ wɑɑlɩ kɛ́ teu.
34 Pɑ tɑɑ nɔɣɔlʋ tɑɑ lɑŋ pʋlʋ. Pǝ tɑɣɑ pʋlʋ tɔɔ, mpɑ pɑɑ wɛnɑ tɛtʋnɑɑ yɑɑ tɛɛsɩ tɔ pɑ pɛɛtɑɣɑɑ kɛ́ nɑ pɑ́ kɔŋnɑ pǝ liɣitee,
35 nɑ pɑ́ cɛlǝɣɩ tillɑɑ. Ye pǝ cɑɑlɑ wei pɑ wɑɑsǝnɑ-ɩ.
36-37 Mpʋ ɩnɩ pǝ yelinɑ Lefii tʋ nɔɣɔlʋ, wei pɑ yɑɑkɑɣɑ sɩ Yosɛɛfʋ nɑ pɑ́ lʋlɑ-ɩ Sipili tɔ, ɩ́ pɛɛtɑ ɩ tɛtʋ nɑtǝlɩ nɑ ɩ́ mǝŋnɑ pǝ liɣitee nɑ ɩ́ cɛlɑ tillɑɑ. Ɩnǝɣɩ tillɑɑ kɑ cuɣusɑɑ sɩ Pɑɑnɑpɑsɩ. (Apɑlʋtʋ hɑlʋ kɛ pɑ yɑɑ mpʋ nɑ pɑ tɛ tɑɑ.)