9
Sɔɔlɩ Lɑɣɑsʋɣʋ
(Tillɑɑ Tǝmlɛ 22:6-16; 26:12-18)
Amɑ Sɔɔlɩ nɑ́ tɔŋnɑ Tɑcɑɑ tǝŋlɑɑ kʋɣʋ kpɛɛsʋɣʋ nɑ ɩsǝlɛ kʋsɛɛmlɛ. Ḿpʋ́ɣʋ́ ɩ kʋlɑɑ nɑ ɩ́ polo kɔtʋlʋ sɔsɔ kiŋ, nɑ ɩ́ sǝlǝmɩ-ɩ sɩ: Lɑ-m tɑkǝlɑɣɑ, nɑ mɑ́ polɑ Tɑmɑsɩ, nɑ mɑ́ mɑɣɑnɑ Yutɑ nyǝ́mɑ tǝkotilenɑɑ tɑɑ kɛ́ mpɑ pɑ tǝŋǝɣɩ Tɑcɑɑ mpɑɑʋ tɔ, pɑɑ ɑpɑlɑɑ pɑɑ ɑlɑɑ, mɑ kpɑ-wɛ nɑ mɑ́ hɔkɔ nɑ mɑ́ ponɑ Yosɑlɛm.
Wɑɑtʋ wei Sɔɔlɩ wɛ mpɑɑʋ tɑɑ nɑ ɩ́ kpǝtǝnɑ Tɑmɑsɩ, ɩlɛ pǝ lɩɩnɑ ɩsɔ kɛlɛ nɑ pǝ́ lɑ ɩ ɩsɛntɔɔ tǝnyɑlulu ɩsɩɩ kɔkɔ kɛ tɔm kʋlʋm tɔɔ nɑ pǝ nɑ́ nɑ pǝ́ cɔɔnɑ-ɩ. Ḿpʋ́ɣʋ́ ɩ hotɑ ɑtɛ nɑ ɩ́ nɩɩ pǝ pɔɔsǝɣɩ-ɩ sɩ: Sɔɔlɩ Sɔɔlɩ pepe tɔɔ kɛ́ n tʋɣʋ-m kʋnyɔŋ kɛ mpʋ?
Tǝnɑɣɑ Sɔɔlɩ pɔɔsɑɑ sɩ: Tɑcɑɑ nyɑɣɑ ɑweɣe ye?
Ɩlɛnɑ pǝ́ cɔ Sɔɔlɩ sɩ: Mɑɣɑ Yesu wei n tʋɣɩ kʋnyɔŋ tɔ. Kʋlɩ nɑ ń polo ɩcɑtɛ tɑɑ, pɑɑ heeli-ŋ nti n kɑ lɑ tɔ.
Ḿpʋ́ɣʋ́ pǝ tǝnmsɑ mpɑ pɑ tǝŋɑɣɑ Sɔɔlɩ tɔ nɑ pɑ́ sǝŋɑ yem. Pɑ nɩɩkɑɣɑ pǝ yɔɣɔtǝɣɩ, ɑmɑ pɑɑ nɑɑkɩ nɔɣɔlʋ. Tǝnɑɣɑ sɔɔlɩ kʋlɑ ɑtɛ nɑ ɩ́ nyǝnǝɣɩ yem ɩɩ nɑɑkɩ. Ɩlɛnɑ pɑ́ tɔkɩ ɩ niŋ tɑɑ nɑ pɑ́ hɔmɩ-ɩ nɑ pɑ́ ponɑ Tɑmɑsɩ. Nɑ ɩ́ cɑɣɑ kʋyɛɛŋ toosoɣo yʋlʋmlɛ tɛɛ, ɩ tɑ tɔɣɔ, ɩ tɑ nyɔɔ.
10 Tɑcɑɑ tǝŋlʋ nɔɣɔlʋ ɩ kɑ wɛ Tɑmɑsɩ nɑ pɑ́ yɑɑ-ɩ sɩ Anɑniyɑsɩ. Ḿpʋ́ɣʋ́ pǝ lɑpɑ-ɩ ɩsɩɩ toosee tɑkɑ, nɑ ɩ́ nɑ́ Tɑcɑɑ, nɑ ɩ́lɛ́ ɩ yɑɑ-ɩ sɩ: Anɑniyɑsɩ.
Nɑ ɩ́ tisi sɩ: Tɑcɑɑ mɑɣɑlɔ.
11 Ɩlɛnɑ Tɑcɑɑ tɔmɩ-ɩ sɩ: Kʋlɩ tǝwɑkɑ nɑ ń tǝŋ hɑpǝlɛ nte pɑ yɑɑ sɩ Kʋsiɣisile tɔ, nɑ ń sʋʋ Yutɑɑsɩ tǝyɑɣɑ, nɑ ń pɔɔsɩ Tɑɑsɩ ɩcɑtɛ ɑpɑlʋ wei pɑ yɑɑ sɩ Sɔɔlɩ tɔ ɩ tɔɔ. Ɩ wɛ tǝnɑ nɑ ɩ́ tɔŋnɑ Ɩsɔ sǝlǝmʋɣʋ. 12 Pǝ lɑpɑ-ɩ ɩsɩɩ toosee tɑkɑ, nɑ ɩ́ nɑ́ nyɑ́ wei pɑ yɑɑ sɩ Anɑniyɑsɩ tɔ, nɑ ń sʋʋ sɩ n tǝnǝɣɩ-ɩ niŋ nɑ ɩ ɩsɛ kuli.
13 Ḿpʋ́ɣʋ́ Anɑniyɑsɩ tɔmɑ sɩ: Tɑcɑɑ, mɑ nɩɩ tǝŋlɑɑ pɑɣɑlɛ kiŋ kɛ ɑpɑlʋ ɩnɛ ɩ tɔm, nɑ ɩ ɩsɑɣɑtʋ nti tǝ tǝnɑ ɩ lɑpɑ nyɑ́ yǝlɑɑ kɛ Yosɑlɛm tɔ pǝ tɔm tɔtɔ. 14 Kɔtǝlɑɑ sɔsɑɑ hɑ-ɩ nɔɣɔ sɩ ɩ́ kɔɔ cǝnɛ tɔtɔ nɑ ɩ́ hɔkɔ mpɑ pɑ tɔkɑ nyɑ́ tɔm tɔ.
15 Tǝnɑɣɑ Tɑcɑɑ cɔ Anɑniyɑsɩ sɩ: Polo, mɑ lǝsɑ ɑpɑlʋ ɩnǝɣɩ sɩ mɑ lɑkɩ-ɩ nɑ ɩ́ heeliɣi mɑ tɔm kɛ piitimnɑɑ nɑ ɑwulɑɑ sɔsɑɑ nɑ Ɩsɛɣɛlɩ nyǝ́mɑ. 16 Mɑ mɑɣɑmɑɣɑ mɑɑ hʋlǝnɑ-ɩ kʋnyɔmǝŋ wei ɩ kɑ́ tɔɣɔ mɑ nyʋɣʋ tɔɔ tɔ.
17 Ḿpʋ́ɣʋ́ Anɑniyɑsɩ tɛɛwɑ. Ɩ kɔmɑ ɩ tɑlɑ tǝyɑɣɑ ŋkɛ kɑ tɑɑ, ɩlɛnɑ ɩ́ tǝnɩ ɩ niŋ kɛ Sɔɔlɩ tɔɔ nɑ ɩ́ tɔmɩ-ɩ sɩ: Mɑ tɑɑpɑlʋ Sɔɔlɩ, Tɑcɑɑ Yesu wei n kɔŋɑɣɑ nɑ ń nɑ́ mpɑɑʋ tɑɑ tɔ, ɩnɩ ɩ tilinɑ-m sɩ nyɑ́ ɩsɛ ɩ́ kuli nɑ Feesuɣu Nɑŋŋtʋ tomɑ hɑɣɑ nyɑ́ tɑɑ kɛ́ sɔsɔm.
18 Ḿpʋ́ɣʋ́ pʋlʋpʋnɑɑ ɩsɩɩ hutu tɑkɑ kɔɔlɑ Sɔɔlɩ ɩsɛntɔɔ kɛ́ kpɑkpɑɑ nɑ pǝ́ hoti ɑtɛ nɑ ɩ́ sʋʋ nɑʋ. Ɩlɛnɑ ɩ́ kʋlɩ nɑ pɑ́ sɔ-ɩ Ɩsɔ lʋm. 19 Nɑ ɩ́ tɔɣɔ kʋtɔɣɔʋ nɑ ɩ́ hiki tomɑ.
Sɔɔlɩ lɑkɩ wɑɑsʋ kɛ Tɑmɑsɩ
Sɔɔlɩ cɑɣɑ Tɑcɑɑ tǝŋlɑɑ mpɑ pɑ wɛ Tɑmɑsɩ tɔ pɑ cɔlɔɣɔ wɛɛ nɑɑlɛ. 20 Ḿpʋ́ɣʋ́ Sɔɔlɩ sʋʋ wɑɑsʋ lɑpʋ tɑɑ kɛ́ kpɑkpɑɑ kɛ Yutɑ nyǝ́mɑ tǝkotilenɑɑ tɑɑ. Ɩ heelɑɣɑ tǝfoo kɛ́ sɩ Yesu kɛlɛ Ɩsɔ Pǝyɑlʋ. 21 Nɑ pɑ tǝnɑ mpɑ pɑ nɩɩ ɩ wɑɑsʋ ɩnɩ tɔ, piti kpɑ-wɛ nɑ pɑ́ tɔŋ sɩ: Pǝ tɑɣɑ ɩnɩ ɩ kɑ sɛɛsǝnɑ ɩsǝlɛ nɑ mpɑ pɑ tɔkɑ Yesu tɔm tǝnɛɣɛ Yosɑlɛm tɔɣɔ kʋnyɔŋ tʋɣʋ? Ɩsɩɩ ɩ kɑ kɔmɑ cǝnɛ sɩ ɩ kpɑɑ-wɛ nɑ ɩ́ hɔkɔ nɑ ɩ́ ponɑ kɔtǝlɑɑ sɔsɑɑ yɑ?
22 Pɑɑ nɑ mpʋ Sɔɔlɩ nɑ́ tɔŋnɑ wɑɑsʋ lɑpʋ nɑ ɩ toŋ sɔɔsǝɣɩ tɑm nɑ pǝ́ puki. Ɩ hʋlɑɣɑɑ Tɑmɑsɩ Yutɑ nyǝ́mɑ sɩ Yesu kɛlɛ Mesii. Ɩlɛnɑ pǝ́ mǝlɩ pɛlɛɣɛ liɣituɣu, pɑɑ nyǝŋ nti pɑ́ cɔ-ɩ tɔ.
23 Wɛɛ lɑpɑ nɑɑlɛ, ɩlɛnɑ Yutɑ nyǝ́mɑ cɑɣɑ nɑ pɑ́ tɑɣɑnɩ sɩ pɑ́ kʋ-ɩ. 24 Amɑ Sɔɔlɩ nɩɩ nti pɑ hɔkɑɑ nɑ pɑ́ sɩɩ tɔ. Nɑ ɩcɑtɛ koluŋɑ nɔnɔɔsɩ tɑŋɑ ilim nɑ ɑhoo sɩ pɑ́ hiki-ɩ nɑ pɑ́ kʋ-ɩ. 25 Ḿpʋ́ɣʋ́ ɑhoo nɑɑlɩ Sɔɔlɩ ɩfɑlɑɑ tʋ-ɩ sɔɔtɔkʋ sɔsɔɔʋ tɑɑ nɑ pɑ́ tisi-ɩ nɑ ɩcɑtɛ koluŋɑ nɑ ɩ́ tɛɛ.