4
Ḿpʋ́ɣʋ́ Tɑcɑɑ yɔɣɔtɑɑ sɩ:
Sɑmɑlii ɑlɑɑ mpɑ mɛ ɩ yɑsǝlɑɑ tǝlǝpǝlǝpɩ
ɩsɩɩ Pɑsɑŋ nyǝ́mɑ nɑɑŋ tɔ,
ɩ́ ke ŋkpɑŋŋ nɑ ɩ́ nɩɩ.
Ɩ́ lɛɛkǝɣɩ ɑcɑmɑɑ,
nɑ ɩ́ muɣuliɣi kʋnyɔntʋnɑɑ.
Ɩlɛnɑ ɩ́ tɔŋ mǝ pɑɑlɑɑ sɩ pɑ́ cɛ sʋlʋm nɑ ɩ́ nyɔɔ.
Tɑcɑɑ Ɩsɔ mɑ́,
mɑ tuunɑ mɑ hǝtɛ nɑŋŋ nyǝntɛ sɩ,
kʋyɑkʋ ŋku pɑɑ lǝsɩ mǝ nɔɣɔ nɑ mǝ sukɑ
ɩsɩɩ kulɑɣɑ nɑ tinte tɔ, kʋ tɔŋɑ kɔntɛ.
Pɑɑ lǝsɩ-mɛ nɑ ɩcɑtɛ koluŋɑ kɑfɛɛŋ.
Pɑɑ ponɑ-mɛɣɛ ilim ntɔɣɔŋ tɔɔ.
Tɑcɑɑ mɑ́, mɑ yɔɣɔtǝnɑ mpʋ.
Acɛsɑɑcɛsɑɑ ɩsɔ sɛɛlɑɑ
Ḿpʋ́ɣʋ́ Tɑcɑɑ tɔmɑ sɩ:
Ɩsɛɣɛlɩ nyǝ́mɑ mɛ,
ɩ́ cɛsɩ nɑ ɩ́ puki Petɛɛlɩ yɑɑ Kilikɑɑ
sɩ ɩ́ lɑkɩ Ɩsɔ kɛ́ tǝmlɛ,
nɑ ɩ́ tɔŋnɑ-m pǝntǝnɑʋ kɛ mpʋ.
Ɩ́ hɑ mǝ kʋhɑɑŋ kɛ pɑɑ tɑnɑŋ ŋku,
ɩlɛnɑ ɩ́ kɔnɑ mǝ kʋhɑhɑm kɛ tooso nyǝŋkʋ wule,
pǝyele ɩ́ wɑkǝlǝnɑ-m.
Ɩ́ hɑ mǝ sɛɛtʋ kʋhɑʋ nɑ mǝ kʋkʋsʋm potopotonɑɑ.
Ɩ́ kpɑɑlǝnɑ nɔɣɔ sɔsɑɣɑ sɩ ɩ́ hɑɑkɩ-m luɣu kʋlʋmʋɣʋ
kʋcɔɔʋ nɑ pɑɑ wei ɩ́ nɩɩ.
Ɩsɑɣɑtʋ ntǝɣɩ ɩ sɔɔlɑɑ.
Ɩsɔ Tɑcɑɑ mɑ́, mɑ yɔɣɔtǝnɑ mpʋ.
Ɩsɛɣɛlɩ nyǝ́mɑ lɑŋkpɩɩsǝŋ
Ḿpʋ́ɣʋ́ Tɑcɑɑ yɔɣɔtɑɑ sɩ:
Mɑ yelɑɑ nɑ nyɔɣɔsɩ lɩɩ mǝ ɑcɑlɛɛ tɑɑ,
nɑ ɩ́ lɑŋ sɩ ɩ́ suu mǝ nɔɣɔ pʋʋɣʋ.
Pɑɑ nɑ mpʋ ɩ́ tɑ́ mǝlǝnɑ mɑ tɔɔ.
Tɑcɑɑ mɑ́ mɑ yɔɣɔtǝɣǝnɑ mpʋ.
 
Mɑ pɛmɑ-mɛɣɛ tɛʋ kɛ wɑɑtʋ wei mǝ kʋhɑlǝm nyɩɩlɑ-kʋ tɔ.
Mɑ hɑ ɩcɑtɛ lɛntɛ kɛ tɛʋ nɑ mɑ́ pɛ lɛntɛ.
Mɑ yelɑɑ nɑ tɑɑlɛ lɛntɛ lʋlɩ teu
nɑ lɛntɛ nɑ́ɑ́ wʋlɩ lʋm lɑŋʋɣʋ tɔɔ.
Acɑlɛɛ nɑɑlɛ yɑɑ tooso pukɑɣɑ
kʋlʋmtǝlɛ kiŋ sɩ ɑ́ hiki lʋm nɑ ɑ́ nyɔɔ.
Pɑɑ nɑ mpʋ pɩɩ tɑkɩ-yɛ.
Pǝyele ɩ́ tɑ́ mǝlǝnɑ mɑ tɔɔ.
Tɑcɑɑ mɑ́ mɑ yɔɣɔtǝnɑ mpʋ.
 
Mɑ yelɑɑ nɑ kulɑɣɑ nɑ kpɛɛlǝm
pǝ́ kʋ mǝ kʋtɔɣɔŋ,
nɑ kʋtoloŋ tɔɣɔ mǝ tɩɩŋ tɑwɑ pɑɣɑlɛ.
Pɑɑ nɑ mpʋ ɩ́ tɑ́ mǝlǝnɑ mɑ tɔɔ.
Tɑcɑɑ mɑ́ mɑ yɔɣɔtǝnɑ mpʋ.
10 Mɑ yelɑɑ nɑ kʋsǝkʋ kʋ mǝ tɔlɑ
ɩsɩɩ mɑɑ lɑpʋ Icipiti kɛ Moisi wɑɑtʋ tɑɑ tɔ.
Nɑ mɑ́ yele nɑ kolontu lɑ sɑkɑsɑkɑ
kɛ mǝ ɩfepiyɑ kɛ yoou tɑɑ,
nɑ ɩ́ kuu mǝ kpɑɣɑnǝŋ.
Nɑ sǝtɑɑ sɔŋ nyɑlɑ mǝ tǝsikile tɑɑ nɑ pǝ́ nɩɩ-mɛ.
Pɑɑ nɑ mpʋ ɩ́ tɑ́ mǝlǝnɑ mɑ tɔɔ.
Tɑcɑɑ mɑ́ mɑ yɔɣɔtǝnɑ mpʋ.
 
11 Mɑ wɑkǝlɑ pǝ tǝnɑɣɑ mǝ tɛ ɩsɩɩ
mɑɑ lɑpʋ Sɔtɔm nɑ Kɔmɔɔ tɔ.
Ɩlɛnɑ mǝ tɑɑ lɛlɑɑ fiti ɩsɩɩ pɑ
lǝsʋɣʋ tǝputuɣu kɛ kɔkɔ tɑɑ tɔ.
Pɑɑ nɑ mpʋ ɩ́ tɑ́ mǝlǝnɑ mɑ tɔɔ.
Tɑcɑɑ mɑ́ mɑ yɔɣɔtǝnɑ mpʋ.
 
12 Pǝ tɔɔ kɛ́ Ɩsɛɣɛlɩ nyǝ́mɑ mɛ
ɩ kɑ́ nɑ ɩsǝnɑ mɑɑ lɑnɑ-mɛ tɔ.
Ɩlɛ ɩ́ tɑɣɑnɩ mǝ tɩ nɑ ɩ́ sulu-m.
13 Mɑ lɑpǝnɑ pɔ́ɔ́ŋ, nɑ heelim,
nɑ mɑ́ hʋlɩ yǝlɑɑ kɛ mpi mpi mɑ luɣu wɛ lɑpʋ tɔ.
Mɑ pǝsǝɣɩ ilim kɛ ɑhoo,
nɑ mɑ́ tɔŋ tɛtʋ comcom nɔɔsɩ tɑɑ.
Mɑɣɑ Pǝ tǝnɑ pǝ tʋ Tɑcɑɑ Ɩsɔ mɑ́,
mɑ yɔɣɔtǝnɑ mpʋ.