6
1 Ɩlɛnɑ Mete wulɑʋ Tɑliyusi mʋ kɑwulɑɣɑ kɛ ɩ lʋlʋɣʋ pǝnɑɣɑ nɩɩtoso nɑ nɑɑlɛ nyǝŋkɑ tɑɑ.
Tɑniyɛɛlɩ kolontunɑɑ nyǝkɩ-ɩ kɑtɔkɑ
2 Ḿpʋ́ɣʋ́ Tɑliyusi fɑɣɑ ɩ tɛtʋ kɛ hɔɣɔlǝŋ nɩɩnʋwɑ nɑ hiu (120). Ɩlɛnɑ ɩ́ kpɑ pǝ nyɔɔŋ nyǝ́mɑ.
3 Ntɛnɑ ɩ́ kpɑ sɔsɑɑ nɑpǝlǝɣɩ nɑɑlɛ nɑ pǝ́ tǝlǝnɑ Tɑniyɛɛlɩ sɩ pɑ́ feŋiɣi sɔsɑɑ mpɛ pɑ tɔɔ, nɑ wulɑʋ pʋlʋ ɩ́ tɑɑ wɑkǝlɩ.
4 Amɑ Tɑniyɛɛlɩ nɑ́ tɛɛ mpɛ ɩnɩ nɑ nyɔɔŋ nyǝ́mɑ kɛ lǝmɑɣɑsǝlɛ tǝcɑɣɑcɑɣɑ. Ɩlɛnɑ wulɑʋ hʋʋ sɩ ɩ kɑ́ kpɑ-ɩ ɩ kɑwulɑɣɑ tǝnɑ pɑɑsǝnlʋ.
5 Ḿpʋ́ɣʋ́ pɑ nɑ nyɔɔŋ nyǝ́mɑ mpɛ pɑ pɛɛkɑ ɩsǝnɑ pɑɑ lɑ nɑ pɑ́ hiki Tɑniyɛɛlɩ tɔ. Pɑɑ kɑwulɑɣɑ tɔm nɑtǝlɩ tǝ tɑɑ, ɩlɛnɑ pɑ́ wɩɩ. Mpi tɔ, Tɑniyɛɛlɩ lɑkɑɣɑ ɩ tǝmlɛ kɛ teu kɛ́ ɩ tɑ cɔlǝsɩ nɑtǝlɩ.
6 Mpʋɣʋlɛ yǝlɑɑ mpɛ sɩ, ye pǝ tɑɣɑ Tɑniyɛɛlɩ ɩsɔ sɛɛʋ kiiŋ tɑɑ tǝ kɑɑ hiki tǝwɑɑnlɛ.
7 Ɩlɛnɑ pɑ́ polo wulɑʋ kiŋ nɑ pɑ́ sɛɛ-ɩ sɩ: Wulɑʋ, nyɑnɑ tɛtʋ.
8 Nyɑ́ kɑwulɑɣɑ tǝnɑ tɑɑ ɑkewenɑɑ sɔsɑɑ tǝnɑ cɑɑ sɩ, ń kpɑɑlǝnɑ toŋ sɩ, ye wei ɩ luŋɑ tʋɣʋ, yɑɑ yʋlʋ nɔɣɔlʋ kɛ kʋyɛɛŋ hiu nɑ nɑɑnʋwɑ tɑɑ, ye pǝ tɑɣɑ wulɑʋ nyɑ́, pɑ́ pɛtɩ pʋntʋ kɛ tɔɣɔlɑsɩ pʋ́ʋ́ɣʋ́ tɑɑ.
9 Mpʋ tɔ, mʋ kʋsǝsɩɩtʋ ntɩ. Nmɑɑ-tɩ nɑ ń tʋ niŋ. Nɔɣɔlʋ ɩ́ tɑɑ kpɛɛsɩ-tɩ. Mpi tɔ, Mete nyǝ́mɑ nɑ Pɛɛsɩ nyǝ́mɑ pɑ kiiu ɩɩ lɑɣɑsǝɣɩ.
10 Ḿpʋ́ɣʋ́ wulɑʋ Tɑliyusi mʋ tɔm ntɩ nɑ ɩ́ tʋ niŋ.
Tɑniyɛɛlɩ pɛtʋɣʋ kɛ tɔɣɔlɑsɩ pʋ́ʋ́ɣʋ́ tɑɑ
11 Tɑniyɛɛlɩ kutuluɣu kɑ kɛ ɑtɛ nɑ ɩsɔtɑɑ nyǝŋkʋ kɛ́ nɑ kʋ pǝtote tʋlǝnɑ Yosɑlɛm ɩcɑtɛ tɔɔ. Tǝnɑɣɑ ɩ kpɑɑkɑɣɑ nɑ ɩ́ luŋiɣi ɑkulɑ nɑ ɩ́ sɑŋ ɩ Ɩsɔ. Ɩ sǝlǝmɑɣɑ-ɩ pɑɑ kʋyɑkʋ ŋkuɣu tɔm tooso kɛ́. Ɩ nɩɩwɑ wulɑʋ tɔm ntɩ, ɩlɛnɑ ɩ́ polo Ɩsɔ sǝlǝmʋɣʋ ɩsɩɩ ɩ́ tɩɩ lɑkɩ tɔ.
12 Ḿpʋ́ɣʋ́ ɩ kolontunɑɑ mpɛ pɑ polɑ kpɑkpɑɑ, nɑ pɑ́ mɑɣɑnɑ ɩ tɔŋnɑ sǝlǝmʋɣʋ nɑ ɩ́ yɑɑkɩ Ɩsɔ.
13 Ɩlɛnɑ pɑ́ polo wulɑʋ kiŋ nɑ pɑ́ tɔ sɩ: Ɩsɩɩ n ŋmɑɑwɑ nɑ ń sɩɩ sɩ, ye wei ɩ sǝlǝmɑ Ɩsɔ nɔɣɔlʋ, yɑɑ yʋlʋ nɔɣɔlʋ, kɛ kʋyɛɛŋ hiu nɑ nɑɑnʋwɑ tɑɑ, nɑ pǝ́ tɑ́ kɛ́ nyɑ́, pɑɑ pɛtɩ pʋntʋ kɛ tɔɣɔlɑsɩ pʋ́ʋ́ɣʋ́ tɑɑ? Wulɑʋ sɩ: Ɛɛnnɑ. Mete nyǝ́mɑ nɑ Pɛɛsɩ nyǝ́mɑ kiiu ɩɩ lɑɣɑsǝɣɩ mɛɛ.
14 Ntɛnɑ pɑ́ heeli-ɩ sɩ: Mpɑ pɑ kɔmnɑ Yutɑ tɔ pɑ tɑɑ wei pɑ yɑɑ sɩ Tɑniyɛɛlɩ tɔ ɩɩ nyǝnǝɣɩ nyɑnɑ nyɑ́ kiiu kɛ pʋlʋ se. Hɑlɩ tɔm toosoɣo ɩ́lɛ́ ɩ sǝlǝmǝɣɩ ɩ Ɩsɔ kɛ́ pɑɑ kʋyɑkʋ ŋku.
15 Wulɑʋ nɩɩwɑ sɩ Tɑniyɛɛlɩ, ɩlɛnɑ ɩ lɑŋlɛ wɑkǝlɩ. Ḿpʋ́ɣʋ́ ɩ mɑɣɑsɑɑ sɩ ɩ́ wɑɑsɩ-ɩ. Hɑlǝnɑ ilim tʋɣʋ.
16 Ḿpʋ́ɣʋ́ yǝlɑɑ mpɛ pɑ́ mǝlɑ ɩ kiŋ nɑ pɑ pɔɔsɩ-ɩ nɑ ɩsǝlɛ kʋsɛɛmlɛ sɩ: Ntɔŋ n nyǝmɑ́ teu sɩ Mete nyǝ́mɑ nɑ Pɛɛsɩ nyǝ́mɑ pɑ kiiu ɩɩ lɑɣɑsǝɣɩ?
17 Ḿpʋ́ɣʋ́ wulɑʋ yelɑɑ nɑ pɑ́ kɔnɑ Tɑniyɛɛlɩ nɑ pɑ́ pɛtɩ-ɩ tɔɣɔlɑsɩ pʋ́ʋ́ɣʋ́ tɑɑ. Ɩlɛnɑ ɩ́ tɔmɩ-ɩ sɩ: Nyɑ́ Ɩsɔ wei ɩ tǝmlɛ n sɛɛsǝnɑ ɩsǝlɛ tɔ, ɩ tike ɩ pǝsǝɣǝnɑ nɑ ɩ́ yɑ-ŋ.
18 Ɩlɛnɑ pɑ tǝkɩ pǝlɛ kɛ tɔɣɔlɑsɩ pʋ́ʋ́ɣʋ́ ŋkʋ kʋ nɔɣɔ. Ḿpʋ́ɣʋ́ wulɑʋ nɑ ɑkewenɑɑ sɔsɑɑ pɑ yʋsɑ pǝlɛ tɔɔ sɩ nɔɣɔlʋ ɩ́ tɑɑ tʋlɩ.
19 Ḿpʋ́ɣʋ́ wulɑʋ mǝlɑ ɩ tǝyɑɣɑ nɑ ɩ́ sʋʋ mpʋ. Ɩ tɑ kpǝtǝnɑ ɩ ɑlɑɑ tɑɑ nɔɣɔlʋ. Pǝyele ɩ keelɑ tom.
Tɑniyɛɛlɩ lɩɩʋ nɑ ɑlɑɑfǝyɑ kɛ tɔɣɔlɑsɩ pʋ́ʋ́ɣʋ́ tɑɑ
20 Pǝ kɔmɑ ɩsɩɩ pǝ nyɑɑlǝɣɩ, ɩlɛnɑ wulɑʋ kʋlɩ lɔŋ nɑ ɩ́ polo tɔɣɔlɑsɩ pʋʋɣʋ nɔɣɔ.
21 Ɩ kpǝtǝnɑ-kʋ, ɩlɛnɑ ɩ́ yɑɑ Tɑniyɛɛlɩ nɑ lɑŋwɑkǝllɛ nɑ ɩ́ pɔɔsɩ sɩ: O oo Tɑniyɛɛlɩ. Ɩsɔ Weesuɣu tʋ wei ɩ tǝmlɛ n lɑkǝnɑ ɩsǝlɛ kʋsɛɛmlɛ tɔ. Ɩ pǝsɑɑ nɑ ɩ́ wɑɑsɩ-ŋ tɔɣɔlɑsɩ sǝkpɑŋ tɑɑ?
22 Ɩlɛnɑ Tɑniyɛɛlɩ cɔ, nɑ ɩ́ sɛɛ wulɑʋ sɩ: Tɑ cɑɑ, nyɑnɑ tɛtʋ.
23 Mɑ Ɩsɔ tilɑ ɩsɔtɑɑ tillu nɑ ɩ́ tǝkɩ tɔɣɔlɑsɩ nɔɔsɩ, sɩ tɑ lɑ-m pʋlʋ. Mpi tɔ, mɑ tɑ wɑkǝlǝnɑ-ɩ. Pǝ́cɔ́ mɑ tɑ pǝntǝnɑ nyɑ́ tɔtɔ.
24 Tǝnɑɣɑ wulɑʋ lɑŋlɛ hʋlʋmɑ kɑtɑtǝlɑɣɑ, nɑ ɩ́ tɔ sɩ, pɑ́ lǝsɩ Tɑniyɛɛlɩ. Ḿpʋ́ɣʋ́ pɑ lǝsɑ-ɩ. Pɑɑ hiŋɑɣɑ, kɑ fɛɩ ɩ tɔɔ. Mpi tɔ, Tɑniyɛɛlɩ tɛmɑ Ɩsɔ nɑ ɩ tɑɑ kɛ́.
25 Ɩlɛnɑ wulɑʋ yele nɑ pɑ́ kpɑ yǝlɑɑ mpɑ pɑ kuu Tɑniyɛɛlɩ nɔɔhɛɛ tɛɛ tɔ. Ɩlɛnɑ pɑ́ pɛtɩ pɑ́ nɑ pɑ ɑlɑɑ nɑ pɑ piyɑ kɛ tɔɣɔlɑsɩ pʋʋɣʋ tɑɑ. Nɑ tɔɣɔlɑsɩ te-wɛ nɑ sɩ́ sɑlɩ pɑ mʋwɑ, nɑ pɑ tɑ tɩɩ tiitɑ ɑtɛ.
26 Pǝlɛ pǝ wɑɑlɩ kɛ́ wulɑʋ Tɑliyusi ŋmɑɑ tɑkǝlɑɣɑ kɛ piitim nɑ nsǝmɑ tǝnɑ yǝlɑɑ, mpɑ pɑ wɛ ɑntulinyɑ tǝnɑ tɑɑ tɔ sɩ: Mɑ sɛɛ-mɛ.
27 Mɑ sɩɩkɩ mɑ kɑwulɑɣɑ tǝnɑ tɑɑ kɛ́ kʋsǝsɩɩtʋ. Pɑɑ wei ɩ́ nyɑnɑ Tɑniyɛɛlɩ Ɩsɔ nɑ ɩ́ se-ɩ.
Mpi tɔ, ɩnǝɣǝlɛ Ɩsɔ Weesuɣu tʋ nɑ ɩ wɛ tɑm tɔɔ.
Ɩ kɑwulɑɣɑ kɑɑ tɛ nɑ ɩ sɔsɔɔntʋ kɑ́ wɛɛ ḿpʋ́ɣʋ́ tɑm tɔɔ.
28 Ɩnɩ ɩ hɛtǝɣǝnɑ nɑ ɩ́ wɑɑsǝɣɩ.
Ɩ lɑkɩ piti tǝmɑ kɛ ɩsɔtɑɑ nɑ ɑtɛ.
Ɩnɩ ɩ wɑɑsǝnɑ Tɑniyɛɛlɩ kɛ tɔɣɔlɑsɩ nɔɣɔ tɑɑ.
29 Ḿpʋ́ɣʋ́ Tɑniyɛɛlɩ nyʋɣʋ kʋlɑ Tɑliyusi kɑwulɑɣɑ wɑɑtʋ tɑɑ, nɑ Pɛɛsɩ wulɑʋ Silusi wɑɑtʋ tɔtɔ.