8
Tɑniyɛɛlɩ toosee nɑɑlɛ nyǝnɑ
1 Ḿpʋ́ɣʋ́ Tɑniyɛɛlɩ mɑ́, mɑ tɑsɑ toosuɣu kɛ wulɑʋ Pɛlǝtɑsɑɑ kɑwulɑɣɑ pǝnɑɣɑ tooso nyǝŋkɑ tɑɑ.
2 Mɑ toosɑɑ kɛ́ sɩ, mɑ wɛ Ɩlɑm tɛtʋ hɔɣɔlʋɣʋ tɑɑ. Koluŋɑ ɩcɑtɛ sɔsɔɔlɛ Susi tɑɑ kɛlɛ mɑ sǝŋɑ Wulɑyi pɔɣɔ nɔɣɔ.
3 Ɩlɛnɑ mɑ́ nɑ́ ɩwɑɑʋ sǝŋɑ pɔɣɔ ŋkɛ kɑ nɔɣɔ, nɑ kʋ wɛnɑ hǝŋ kʋtɑɣɑlǝŋ. Amɑ ɩ tɑɑ lɛŋkʋ tɑ nyɔ lɔŋ pǝyele kʋ kǝlɑ lɛŋkʋ.
4 Ḿpʋ́ɣʋ́ kʋ sʋʋ yɔkʋɣʋ kɛ ilim tǝtʋlɛ nɑ pǝ ntɔɣɔŋ nɑ pǝ mpǝtǝŋ hɔɣɔlǝŋ. Wontuɣu nɑkʋlɩ kʋ tɑ pǝsɩ nɑ kʋ́ tɑŋ-kʋ. Pǝ́cɔ́ nɔɣɔlʋ tɑ pǝsɩ nɑ ɩ́ yɑ mpɑ kʋ yɔkǝɣɩ mpʋ tɔ. Kʋ lɑkɑɣɑ ɩsǝnɑ kʋ luɣu wɛɛ tɔɣɔ, nɑ kʋ toŋ sɔɔsǝɣɩ.
5 Mɑ tɔŋnɑ mpi mɑ nɑwɑ mpʋ tɔ pǝ tɔm mɑɣɑsʋɣʋ kɛ mpʋ. Ɩlɛ mɑ tutɑ pǝŋtʋlʋɣʋ lɩɩnɑ ilim tǝtʋlɛ tɔɔ kɛlɛ. Kʋ tɔŋɑɣɑ heelim tɔɔ kɛ́ lɔŋlɔŋ kɛ́ nɑ kʋ́ cɔɔkɩ tɛtʋ. Kʋ wɛnɑ hǝlʋɣʋ toŋ nyǝŋkʋ nɑkʋlǝɣɩ kʋ ɩsɛ hɛkʋ tɑɑ.
6 Ḿpʋ́ɣʋ́ kʋ kpǝtǝnɑ hǝŋ nɑɑlɛ ɩwɑɑʋ ŋku mɑ nɑ kʋ sǝŋɑ pɔɣɔ nɔɣɔ tɔ. Ɩlɛnɑ kʋ pukinɑ kʋ tɔɔ nɑ sewɑ nɑ kʋ toŋ tǝnɑ.
7 Kʋ tɑlɑ-kʋ ɩlɛnɑ kʋ niki-kʋɣʋ yɔkʋɣʋ hɑlǝnɑ kʋ pɛlɩ kʋ hǝŋ nɑɑlɛ. Ɩwɑɑʋ tɑ pǝsɩ-kʋ pǝ́cɔ́ nɔɣɔlʋ tɑ wɑɑsɩ-kʋ. Ɩlɛnɑ pǝŋtʋlʋɣʋ hu-kʋɣʋ ɑtɛ nɑ kʋ́ fɛlɩ-kʋɣʋ nɔɔhɛɛ.
8 Ḿpʋ́ɣʋ́ kʋ lɑpɑ toŋ kɛ sɔsɔm. Kʋ tomɑ pɩɩ teu ɩlɛnɑ kʋ hǝlʋɣʋ sɔsɔɔʋ ŋkʋ kʋ pɛlɩ kpɑkpɑɑ. Ɩlɛnɑ hǝŋ toŋ nyǝŋ liɣiti nyɔ kʋ lonte tɑɑ. Nɑ ɩ́ nyǝnǝɣǝnɑ ɑntulinyɑ hɔɣɔlǝŋ tǝnɑ tɑɑ.
9 Ḿpʋ́ɣʋ́ hǝlʋɣʋ sǝkpeluɣu nɑkʋlɩ kʋ nyɔ hǝŋ ɩnɩ ɩ tɑɑ lɛŋkʋ tɔɔ. Ɩlɛnɑ kʋ́ pɩɩ sɔsɔm nɑ kʋ́ tɑlɑ ilim tǝlɩɩlɛ nɑ pǝ ntɔɣɔŋ tɔɔ nɑ tɛtʋ kʋpɑntʋ tɔɔ.
10 Ḿpʋ́ɣʋ́ kʋ kpɑ ɩsɔtʋlʋŋɑsɩ kiŋ nɑ kʋ́ pɛtɩ lɛŋsɩ kɛ ɑtɛ nɑ kʋ fɛlɩ-sǝɣɩ nɔɔhɛɛ.
11 Ɩlɛnɑ kʋ́ kpɑ ɩsɔtʋlʋŋɑsɩ cɑɑ tɔɔ. Kʋ kʋwɑ ɩ tɑnɑŋ nɑ tɑɑnɑɣɑ kɔtɑsɩ nɑ kʋ́ yɔkɩ ɩ Ɩsɔ tǝsɛɛlɛ.
12 Ḿpʋ́ɣʋ́ pɑ tʋ ɩsɔtɑɑ yǝlɑɑ nɑ kɔtɑɣɑ tɑm nyǝŋkɑ kɛ kʋ niŋ tɑɑ kɛ́ kʋ ɩsɑɣɑtʋ tɔɔ. Ɩlɛnɑ kʋ́ fɛlɩ tɑmpɑnɑ Ɩsɔ sɛɛʋ kɛ nɔɔhɛɛ, nɑ kʋ́ wɑɑ kʋ tǝmɑ tɑɑ.
13 Ḿpʋ́ɣʋ́ mɑ nɩɩ ɩsɔtɑɑ tillu nɔɣɔlʋ ɩ yɔɣɔtɑɣɑ. Ɩlɛnɑ lɛlʋ pɔɔsɩ-ɩ sɩ: Pǝlee kɛ́ pɑɑ tɑsɑ kɔtɑɣɑ kɛ lɑpʋ? Nɑ pɑ́ tɑɣɑnɩ Ɩsɔ tǝsɛɛlɛ nɑ pɑ́ fɛlɩ ɩsɔtʋlʋŋɑsɩ kɛ nɔɔhɛɛ?
14 Ḿpʋ́ɣʋ́ ɩ cɔ-ɩ sɩ: Tɑnɑŋ nɑ tɑɑnɑsɩ iyisi nɑɑlɛ, nɑ ŋmʋnʋɣʋ nɩɩnʋwɑ (2300) wɑɑlɩ. Pǝlɛ pǝ wɑɑlɩ kɛ́ pɑɑ tɑɣɑnɩ Ɩsɔ tǝsɛɛlɛ.
Tɑniyɛɛlɩ toosee nɑɑlɛ nyǝnɑ hʋwɛɛ kilisuɣu
15 Wɑɑtʋ wei Tɑniyɛɛlɩ mɑ́, mɑ toosɑ mpʋ, nɑ mɑ́ pɛɛkǝɣɩ mɑ toosee ɑnɩ ɑ hʋwɛɛ ɩlɛ, mɑ tutɑ nɔɣɔlʋɣʋlɛ mɑ ɩsɛntɑɑ nɑ ɩ́ nǝɣǝsǝnɑ yʋlʋ.
16 Nɑ mɑ́ nɩɩ nɔɣɔlʋ kpɛɛsɑ-ɩ nɑ pɔɣɔ wulɑyi wɑɑlɩ sɩ: Kɑpǝyɛɛ, sɛɣɛsɩ-ɩ toosee ɑnɩ ɑ hʋwɛɛ.
17 Ḿpʋ́ɣʋ́ ɩsɔtɑɑ tillu ɩnɩ ɩ kpǝtǝnɑ-m nɑ sɔɣɔntʋ kpɑ-m. Ɩlɛnɑ mɑ́ hoti mɑ nɔɣɔ tɔɔ. Ntɛnɑ ɩ́ tɔ-m sɩ: Yʋlʋ pǝyɑɣɑ, nɩɩ teu yooo. Toosee ɑnɛ ɑ kɛ́ ɑntulinyɑ tɛm tɔm kɛ́.
18 Ɩ yɔɣɔtɑɣɑnɑ-m mpʋ, ɩlɛnɑ mɑ ɩsɛ pili nɑ mɑ́ kɑ́ nyʋɣʋ. Ɩlɛnɑ ɩ́ kʋsɩ-m nɑ ɩ́ sǝŋsɩ-m.
19 Ḿpʋ́ɣʋ́ ɩ tɔmɑ-m sɩ: Mɑɑ heeli-ŋ mpi pɩɩ kɔɔ Ɩsɔ pɑ́ɑ́nɑ́ wɑɑtʋ tɔ. Mpi tɔ, pɑ tɛmɑ ɑ wɑɑtʋ sɩɩʋ kɛ́.
20 Ɩwɑɑʋ ŋku n nɑwɑ nɑ kʋ wɛnɑ hǝŋ nɑɑlɛ tɔ, kʋ kɛ́ Mete nyǝ́mɑ nɑ Pɛɛsɩ nyǝ́mɑ pɑ ɑwulɑɑ kɛ́.
21 Pǝŋtʋlʋɣʋ nɑ́ kɛ́ Kǝlɛɛkɩ kɑwulɑɣɑ. Kʋ ɩsɛ hɛkʋ tɑɑ hǝlʋɣʋ sɔsɔɔŋkʋ ŋkʋɣʋlɛ kɑncɑɑlɑɣɑ wulɑʋ.
22 Kʋ hǝlʋɣʋ sɔsɔɔŋkʋ ŋkʋ kʋ pɛlɑɑ, nɑ hǝŋ liɣiti wei ɩ nyɔ kʋ lonte tɑɑ tɔɣɔlɛ, kɑwulɑsɩ nsi sɩɩ tɛ nɑ sɩ kʋlɩ piitim mpɩ pǝ tɑɑ tɔ. Amɑ sɩ kɑɑ hiki tomɑ kɛ mpʋ.
23 Ye pǝ tɑlɑ pɑ kɑwulɑsɩ tɛm wɑɑtʋ nɑ pɑ ɩsɑɣɑtʋ pɩɩwɑ teu wulɑʋ ɑcilɑɣɑtʋ tʋ nɑ kɑlɑmpɑɑnɩ tʋ nɔɣɔlʋ ɩ kɑ́ kʋlɩ.
24 Ɩ tomɑ kɑ́ sɔɔsɩ, ɩlɛ pǝ kɑɑ lɩɩnɑ ɩ mɑɣɑmɑɣɑ ɩ kiŋ. Ɩ kɑ́ wɑkǝlɩ sɔsɔm kɛ́ pǝ kɑɑ wɛɛ nyǝnʋɣʋ, nɑ ɩ́ wɑɑkɩ ɩ kʋlɑpǝm tǝnɑ tɑɑ. Hɑlǝnɑ ɩ́ kpɛnnɑ toŋtʋnɑɑ nɑ Ɩsɔ yǝlɑɑ nɑ ɩ́ kʋ́.
25 Ɩ ɑcilɑɣɑtʋ kɑtɑtǝlɑɣɑ kɛ ɩ kɑ tʋsǝnɑ yǝlɑɑ. Ɩ kɑlɑmpɑɑnɩ kɛ́ ɩ kɑ́ kʋnɑ yǝlɑɑ pɑɣɑlɛ mpɑ pɑ hʋʋ sɩ pɑ cɑɣɑnɑ pɑ tɩ tɔ. Hɑlǝnɑ ɩ́ kʋlɩ Awulɑɑ Wulɑʋ tɔɔ. Wɑɑtʋ ɩnǝɣɩ pɩɩ wɑkǝlɩ-ɩ, pǝ kɑɑ lɩɩnɑ yʋlʋ kiŋ.
26 Tɑnɑŋ nɑ tɑɑnɑsɩ nsɩ sɩ tɔm wɛ tɑmpɑnɑ kɛ́. Ɩlɛ sɩɩ-tǝɣɩ nyɑ́ tɑɑ. Mpi tɔ, tǝ wɑɑtʋ tɑtɑtɑ.
27 Ḿpʋ́ɣʋ́ pǝ yɔɔlɑ-m nɑ pǝ́ pǝsɩ-m kʋtɔntʋ kɛ wɛɛ pɑɣɑlɛ. Pǝ cɛpɑ mɑ tɔɔ, ɩlɛnɑ mɑ́ mǝlɩ wulɑʋ tǝmlɛ tɑɑ. Toosee ɑnɩ ɑ wɑkǝlɑ mɑ lɑŋlɛ kɛ ḿpʋ́ɣʋ́ mɑ tɑ cɛkǝnɑ-yɛ.