40
Ɩsɔ tǝyɑɣɑ kʋfɑlɑɣɑ tɔm
1 Ḿpʋ́ɣʋ́ Ɩsɛɣɛlɩ nyǝ́mɑ kuuu pǝnɑɣɑ hiu nɑ kɑkpɑsɩ nyǝŋkɑ, ɩsɔtʋ kɑncɑɑlɑɣɑ nyǝŋ kʋyɑkʋ nɑɑnʋwɑ nyǝŋkʋ*fɑ*. Yosɑlɛm ɩcɑtɛ lɛɛkʋɣʋ pǝnɑɣɑ nɑɑnʋwɑ nɑ liɣiti nyǝŋkɑ. Tɑcɑɑ Ɩsɔ toŋ tii mɑ tɔɔ nɑ ɩ́ ponɑ-m tǝnɑ.
2 Ɩsɔ lɑpɑ nɑ pǝ́ lɑ-m toosee tɑkɑ, nɑ ɩ́ tɛɛnɑ-m Ɩsɛɣɛlɩ tɛtʋ tɑɑ. Ḿpʋ́ɣʋ́ pǝ sɩɩ-m pʋɣʋ kʋkʋlʋɣʋ nɑkʋlɩ kʋ tɔɔ. Nɑ mɑ́ nɑ́ kutuluŋ nɑ ilim mpǝtǝŋ tɔɔ, ɩsɩɩ ɩcɑtɛ.
3 Ɩsɔ ponɑ-m tǝnɑ, ɩlɛnɑ mɑ́ nɑ́ ɑpɑlʋ nɔɣɔlʋ. Ɩ nǝɣǝsǝnɑ kɛ́ ɩsɩɩ nyǝɣǝlʋɣʋ kʋsɛɛmʋɣʋ. Nɑ ɩ́ tɔkɑ ɩ niŋ tɑɑ kɛ́ kpoŋkpontu toŋ nyǝntʋ nɑtǝlɩ tǝ ŋmǝnɑɣɑ. Nɑ kpɑ́tʋ́ɣʋ́ kʋmɑɣɑsʋɣʋ, nɑ ɩ́ sǝŋɑ nɔnɔɣɔ.
4 Ntɛnɑ ɑpɑlʋ ɩnɩ ɩ yɑɑ-m sɩ: Yʋlʋ nyɑ́, nyǝnɩ teu nɑ ń ké ŋkpɑŋʋɣʋ nɑ ń nɩɩ nti mɑ cɑɑ-ŋ heeluɣu tɔ. Mpi tɔ, pǝ kɔnɑ-ŋ cǝnɛɣɛ sɩ n nɑ́. Pǝ wɑɑlɩ ɩlɛnɑ ń heeli Ɩsɛɣɛlɩ nyǝ́mɑ kɛ mpi n nɑwɑ tɔ.
Tɑɣɑ nɑ ɑwɑlɩ tɔɔ nɔnɔɔsɩ
5 Mpi mɑ nɑɑkɑɣɑ tɔɣɔlɔ: Koluŋɑ cɔɔnɑ tǝyɑɣɑ kɛ́, nɑ kɑ́ tɑ́. Ɩlɛnɑ ɑpɑlʋ nɔɣɔlʋ nɑ́ɑ́ tɔkɑ kpɑ́tʋ́ɣʋ́ kʋmɑɣɑsʋɣʋ kɛ ɩ niŋ tɑɑ. Kʋ tɑɣɑlǝŋ kɛ mɛɛtǝlǝnɑɑ tooso*fɑ*. Ḿpʋ́ɣʋ́ ɩ mɑɣɑsɑ koluŋɑ wɑŋ nɑ kɑ kʋŋkʋlʋmǝŋ. Ɩlɛnɑ pǝ́ lɩɩ mɛɛtǝlǝnɑɑ tooso tooso. kɛ pɑ mɑɣɑsǝɣɩ. Amɑ Lǝkpɑ tɑɑ pɑɑ mɑɣɑsǝɣɩ mpʋ.
6 Ɩlɛnɑ ɩ́ polo ilim tǝlɩɩlɛ tɔɔ nɔnɔɣɔ. Ḿpʋ́ɣʋ́ ɩ kpɑ kumlee, nɑ ɩ́ mɑɣɑsɩ nɔnɔkpete lumɑŋ, nɑ pǝ́ lɩɩ mɛɛtǝlǝnɑɑ tooso.
7 Tɑŋlɑɑ kutuluŋ mɑlɑ tǝtɛɛlɛ hɛkʋ tɑɑ nyǝntɛ nɔnɔɣɔ kɛ́. Kutuluŋ tɑɣɑlǝŋ nɑ ɩ wɑŋ kɑ wɛ mɛɛtǝlǝnɑɑ tooso tooso kɛ́. Koloosi nsi sɩ fɑɣɑ kutuluŋ ɩnɩ tɔ, sɩ yɑsǝlɑɣɑ nɑ́ wɛ mɛɛtǝlǝnɑɑ tooso nɑ hɔɣɔlʋɣʋ hɔɣɔlʋɣʋ. Nɔnɔɣɔ nɑkǝlɩ kɛlɛ kɑ tɑɣɑlǝŋ wɛ mɛɛtǝlǝnɑɑ tooso. Kɛlɛɣɛ n tɛɛkɩ nɑ pǝ́cɔ́ ń tɑlɑ kutuluɣu ŋku kʋ sǝŋɑ Ɩsɔ tǝyɑɣɑ ɩsɛntɑɑ tɔ.
8-9 Ḿpʋ́ɣʋ́ ɑpɑlʋ ɩnɩ ɩ mɑɣɑsɑ pǝ tɑɑ kutuluɣu ŋkʋ. Kʋ lumɑŋ kɑ wɛ mɛɛtǝlǝnɑɑ liɣiti, nɑ kʋ koloosi yɑsǝlɑɣɑ kɛ mɛɛtǝlɩ kʋlʋm. Nɔnɔɣɔ nɑ pǝ tɑɑ tɔɔ kutuluɣu ntɛ́ ŋku kʋ kǝlɑ Ɩsɔ tǝyɑɣɑ kɛ kpǝtǝnɑʋ tɔ.
10 Ilim tǝlɩɩlɛ nɔnɔɣɔ tɑŋlɑɑ kutuluŋ nɑɑtoso kɑ wɛ teitei kɛ́. Ɩlɛnɑ ɩ́ tʋ́ mpɑɑʋ kɛ hɛkʋ, tooso nɑ cǝnɛ tooso nɑ cǝnɛ. Koloosi nsi sɩ fɑɣɑ hɛkʋ tɑɑ tɔ, sǝlɛ sɩ yɑsǝlɑɣɑ nɑ́ɑ́ wɛ teitei kɛ́.
11 Ḿpʋ́ɣʋ́ ɑpɑlʋ ɩnɩ ɩ mɑɣɑsɑ pɑtǝmɑ wei ɩ tɔɔ nɔnɔɣɔ tʋlǝɣɩ tɔ. Ɩlɛnɑ pǝ́ lɩɩ mɛɛtǝlǝnɑɑ kɑkpɑsɩ. Tǝtɛɛlɛ hɛkʋ tɑɑ nyǝntɛ wɑŋ tǝnɑ kpɛntɑ mɛɛtǝlǝnɑɑ nɑɑtoso nɑ hɔɣɔlʋɣʋ.
12 Tɑŋlɑɑ kutuluŋ wɑŋ nɑ ɩ tɑɣɑlǝŋ kɑ wɛ teitei kɛ́. Mɛɛtǝlǝnɑɑ tooso tooso. Nɑ koluŋɑ kɑɣɑ tǝtɛɛlɛ kɔŋkɔmǝŋ nɑɑlɛ tɔɔ nɑ kɑ kʋŋkʋlʋmǝŋ wɛ mɛɛtǝlɩ hɔɣɔlʋɣʋ.
13 Ɩlɛnɑ ɑpɑlʋ ɩnɩ ɩ́ mɑɣɑsɩ pǝ kpɑɣɑʋ tɑŋlɑɑ kutuluŋ ɩnɩ ɩ tɑɑ lɛŋkʋ koluŋɑ, nɑ pǝ sɩɩnɑ lɛŋkʋ nyǝŋkɑ, nɑ tǝtɛɛlɛ nɑ cǝnɛ tɔɔ. Ɩlɛnɑ pǝ́ lɩɩ mɛɛtǝlǝnɑɑ nɑɑnʋwɑ nɑ nɑɑlɛ nɑ hɔɣɔlʋɣʋ.
14 Ḿpʋ́ɣʋ́ ɩ mɑɣɑsɑ tɔtɔɣɔ kutuluɣu ŋku kʋ wɛ mɛɛtǝlǝnɑɑ nɑɑnʋwɑ tɔ kʋ wɑŋ. Ɩsɔ tǝyɑɣɑ tɑɣɑ kɑ tʋ́ kutuluɣu ŋkʋɣʋ hɛkʋ kɛ́.
15 Pǝ kpɑɣɑʋ kɑncɑɑlɑɣɑ nɔnɔɣɔ kɛ ɑwɑlɩ tɔɔ koluŋɑ hɑlǝnɑ kutuluɣu ɑwɑlɩ tɔɔ koluŋɑ, nɑ pǝ́ polo tǝnɑɣɑ kɑnɛ tɔ. Ɩlɛnɑ pǝ́ lɩɩ mɛɛtǝlǝnɑɑ hiu nɑ kɑkpɑsɩ.
16 Pɑɑ kɑmɑ puluŋ kɛ tɑŋlɑɑ kutuluŋ ɩnɩ ɩ pǝtolee tɔɔ nɑ ɑwɑlɩ tɔɔ kɛ́. Nɑ koloosi kʋkɑɣɑsɩ nɑ kutuluɣu nyǝŋsɩ tɑɑ. Pɑ tʋlɑ-yɛɣɛ nɑ ɑ́ cɔɔ nɔnɔɣɔ nɑ ɑ́ tɑ. Ɩlɛnɑ pɑ́ lǝsɩ pɑɑŋ fotoonɑɑ kɛ pǝ tɑɑ tɔɔ koluŋɑ tɔɔ.
17 Ḿpʋ́ɣʋ́ ɑpɑlʋ ɩnɩ ɩ ponɑ-m Ɩsɔ kutuluɣu tɑɣɑ ɑwɑlɩ nyǝŋkɑ tɔɔ. Pɑɑ hǝlɑ-kɛɣɛ teu kɛ́ nɑ nɑŋŋ hiu nɑ nɑɑnʋwɑ tʋ-kɛɣɛ hɛkʋ.
18 Pɑ hǝlɑ hǝlǝtʋ ntǝɣɩ nɑ tǝ́ cɔɔ nɔnɔɔsɩ tǝnɑ. Ɩlɛ ɑwɑlɩ tɔɔ nyǝntʋ kǝlɑ kʋlʋɣʋ.
19 Ḿpʋ́ɣʋ́ ɑpɑlʋ ɩnɩ ɩ mɑɣɑsɑ tɑɣɑ wɑŋ. Pǝ kpɑɣɑʋ kɑncɑɑlɑɣɑ nɔnɔɣɔ tɔ hɑlǝnɑ pǝ́ sɩɩnɑ pǝ tɑɑ tɔɔ tɑɣɑ koluŋɑ. Ɩlɛnɑ pǝ́ lɩɩ mɛɛtǝlǝnɑɑ nɩɩlɛ nɑ nɑɑnʋwɑ. Ilim tǝlɩɩlɛ tɔɔ kɔŋkɔŋ kɛ ɩ cɑɑlǝnɑɑ. Ɩlɛnɑ ɩ́ tǝkǝnɑ pǝ ntɔɣɔŋ tɔɔ nyǝŋkʋ.
20 Ɩlɛnɑ ɩ́ mɑɣɑsɩ ilim ntɔɣɔŋ tɔɔ nɔnɔɣɔ. Kɛlɛ kɑ nyǝnǝɣǝnɑ ɑwɑlɩ tɔɔ tɑɣɑ tɔɔ kɛ́. Kɑ wɑŋ nɑ kɑ tɑɣɑlǝŋ kɛ ɩ mɑɣɑsɑɑ.
21 Nɔnɔɣɔ ŋkɛ kɑɑ wɛnɑ tɑŋlɑɑ kutuluŋ nɑɑtoso kɛ́. Tooso nɑ kɔŋkɔŋ kʋnɛ, nɑ tooso nɑ kʋnɛ. Koloosi yɑsǝlɑɣɑ nɑ kutuluɣu wɑŋ, pɩɩ wɛ teitei kɛ́, ɩsɩɩ ilim tǝlɩɩlɛ tɔɔ nɔnɔɣɔ nyǝnsɩ. Nɔnɔɣɔ tɑɣɑlǝŋ tǝnɑ kpɛntɑ mɛɛtǝlǝnɑɑ hiu nɑ kɑkpɑsɩ. Kɑ wɑŋ kɛ mɛɛtǝlǝnɑɑ nɑɑnʋwɑ nɑ nɑɑlɛ nɑ hɔɣɔlʋɣʋ.
22 Kutuluɣu nɑ pǝtolee nɑ pǝ pɑ́ɑ́ŋ fotoonɑɑ wɛ teitei kɛ́, ɩsɩɩ nɔnɔɣɔ lɛŋkɑ nyǝ́mɑ. Yʋlʋ tɔŋ kumlee nɑɑtosompɔɣɔlɑɣɑ kɛ, ɩlɛnɑ ɩ́ kpɑ ilim ntɔɣɔŋ tɔɔ nɔnɔɣɔ.
23 Nkɛ ɩnɩ kɑ ɩsɛntɑɑ, lɛŋkɑ wɛɛ ŋkɑ yʋlʋ sʋʋkɩ nɑ ɩ tɑlɑ pǝ tɑɑ tɑɣɑ tɔɔ tɔ. Ɩsɩɩ pɩɩ wɛʋ nɑ ilim tǝlɩɩlɛ tɔɔ tɔ. Ḿpʋ́ɣʋ́ ɑpɑlʋ ɩnɩ ɩ mɑɣɑsɑ nɔnɔɔsɩ nsɩ sɩ hɛkʋ tɑɑ wɑŋ. Ɩlɛnɑ pǝ́ lɩɩ mɛɛtǝlǝnɑɑ nɩɩlɛ nɑ nɑɑnʋwɑ.
24 Ɩlɛnɑ ɩ́ ponɑ-m ilim mpǝtǝŋ tɔɔ hɔɣɔlʋɣʋ, nɑ mɑ́ nɑ́ nɔnɔɣɔ kʋfɑlɑɣɑ. Ḿpʋ́ɣʋ́ ɩ mɑɣɑsɑ tɑŋlɑɑ kutuluŋ, nɑ koloosi nɑ nɑŋ. Ɩlɛnɑ pǝ́ lɩɩ teitei ɩsɩɩ ɩ kɑ mɑɣɑsʋɣʋ kɑncɑɑlɑɣɑ nyǝŋsɩ tɔ.
25 Tǝnɑ tɔtɔ, pǝtolee kɑ wɛɛ kɛ́. A cɔɔnɑ kutuluɣu nɔnɔɣɔ. A wɛ teitei nɑ ilim ntɔɣɔŋ nɑ pǝ mpǝtǝŋ nyǝnɑ. Nɔnɔɣɔ tɑɣɑlǝŋ tǝnɑ kpɛntɑ mɛɛtǝlǝnɑɑ hiu nɑ kɑkpɑsɩ. Kɑ wɑŋ kɛ mɛɛtǝlǝnɑɑ nɑɑnʋwɑ nɑ nɑɑlɛ nɑ hɔɣɔlʋɣʋ.
26 Kumlee nɑɑtosompɔɣɔlɑɣɑ kɛ yʋlʋ tɔŋ nɑ ɩ́ kpɑ nɔnɔɣɔ ŋkɛ. Kɑ wɛnnɑ kutuluɣu sɔsɔɔʋ ɩsɛntɑɑ kɛ́. Pɑɑ lǝsɑ pɑ́ɑ́ŋ fotoonɑɑ kɛ tǝtɛɛlɛ hɛkʋ tɑɑ nyǝntɛ kɔŋkɔmǝŋ tɔɔ kɛ́.
27 Nɔnɔɣɔ lɛŋkɑ kɑ wɛ kɑnɛ ɩnɩ kɑ ɩsɛntɑɑ, ŋkɑ yʋlʋ sʋʋkɩ nɑ ɩ́ tɑlɑ pǝ tɑɑ tɑɣɑ tɔɔ tɔ. Apɑlʋ ɩnɩ ɩ mɑɣɑsɑ ilim mpǝtǝŋ tɔɔ nɔnɔɔsɩ nsɩ sɩ hɛkʋ tɑɑ. Ɩlɛnɑ pǝ́ lɩɩ mɛɛtǝlǝnɑɑ nɩɩlɛ nɑ nɑɑnʋwɑ.
Pǝ tɑɑ tɔɔ tɑɣɑ nɑ pǝ nɔnɔɔsɩ
28 Ḿpʋ́ɣʋ́ ɑpɑlʋ ɩnɩ ɩ tǝŋnɑ-m ilim mpǝtǝŋ nɔnɔɣɔ. Ɩlɛnɑ ɩ́ sʋʋnɑ-m pǝ tɑɑ tɑɣɑ tɔɔ. Ɩ mɑɣɑsɑ nɔnɔɣɔ ŋkɛ, ɩlɛnɑ kɑ tɑɣɑlǝŋ nɑ kɑ wɑŋ wɛɛ teitei nɑ ɑwɑlɩ tɔɔ koluŋɑ nɔnɔɣɔ.
29 Tɑŋlɑɑ kutuluŋ nɑ hɛkʋ tɑɑ koluŋɑ, nɑ nɑŋ pǝ tɑɣɑlǝŋ nɑ pǝ wɑŋ kɑ wɛ teitei kɛ́, ɩsɩɩ nɔnɔɔsɩ lɛŋsɩ. Ɩlɛnɑ pǝtolee cɔɔnɑ nɑŋ nɑ ɑ́ tɑ́. Nɔnɔɣɔ tɑɣɑlǝŋ tǝnɑ kɑ wɛ mɛɛtǝlǝnɑɑ hiu nɑ kɑkpɑsɩ. Kɑ wɑŋ kɛ mɛɛtǝlǝnɑɑ nɑɑnʋwɑ nɑ nɑɑlɛ nɑ hɔɣɔlʋɣʋ.
30-31 Nɑŋ tɑɑ kɛ́ n tǝŋǝɣǝnɑ nɑ ń tɑlɑ ɑwɑlɩ tɑɣɑ tɔɔ. Pɑɑ lǝsɑ pɑ́ɑ́ŋ fotoonɑɑ kɛ pǝ tɑɑ koluŋɑ tɔɔ kɛ́. Kumlee pǝlefɛɩ kɛ yʋlʋ kpɑɑkɩ nɑ ɩ́ tɑlɑ kutuluɣu tɑɑ.
32 Ḿpʋ́ɣʋ́ ɑpɑlʋ ɩnɩ ɩ tǝŋnɑ-m ilim tǝlɩɩlɛ nɔnɔɣɔ. Ɩlɛnɑ tǝ́ sʋʋ pǝ tɑɑ tɑɣɑ tɔɔ. Ɩ mɑɣɑsɑ nɔnɔɣɔ, ɩlɛnɑ ɩ́ mɑɣɑnɑ sɩ kɑnɑ kɑncɑɑlɑɣɑ nyǝŋsɩ wɑŋ nɑ sɩ tɑɣɑlǝŋ pǝ wɛ teitei.
33 Tɑŋlɑɑ kutuluŋ nɑ hɛkǝŋ tɑɑ koloosi, nɑ nɑŋ tɑɣɑlǝŋ nɑ pǝ wɑŋ kɑ wɛ teitei kɛ́, ɩsɩɩ nɔnɔɔsɩ lɛŋsɩ. Nɑ pǝtolee cɔɔnɑ nɑŋ ŋkʋ kʋ nɔnɔɣɔ. Nɔnɔɣɔ ŋkɛ kɑ tɑɣɑlǝŋ tǝnɑ kpɛntɑ mɛɛtǝlǝnɑɑ hiu nɑ kɑkpɑsɩ. Kɑ wɑŋ kɛ mɛɛtǝlǝnɑɑ nɑɑnʋwɑ nɑ nɑɑlɛ nɑ hɔɣɔlʋɣʋ.
34 Nɑŋ tɑɑ kɛ́ yʋlʋ tǝŋǝɣǝnɑ nɑ ɩ́ tɑlɑ ɑwɑlɩ tɑɣɑ tɔɔ. Pɑɑ lǝsɑ pɑ́ɑ́ŋ fotoonɑɑ kɛ pǝ tɑɑ koluŋɑ tɔɔ kɛ́. Ɩlɛnɑ pǝ tǝŋ hɛkʋ tɑɑ tǝtɛɛlɛ kɔŋkɔmǝŋ tɔɔ. Kumlee pǝlefɛɩ kɛ yʋlʋ kpɑɑ nɑ ɩ́ sʋʋ.
35 Apɑlʋ ɩnɩ ɩ ponɑ-m ilim ntɔɣɔŋ tɔɔ nɔnɔɣɔ, ɩlɛnɑ ɩ́ mɑɣɑsɩ kɛlɛ. Kɑ wɑŋ nɑ kɑ tɑɣɑlǝŋ kɑ wɛ teitei kɛ́ ɩsɩɩ lɛŋsɩ.
36 Nɔnɔɣɔ ŋkɛ kɛlɛ kɑ wɛnɑ tɑŋlɑɑ kutuluŋ tɔtɔ. Hɛkʋ tɑɑ koluŋɑ nɑ nɑŋ nɑ pǝtolee cɔɔ-kʋ nɑ pǝ́ tɑ́. Kɑ tɑɣɑlǝŋ tǝnɑ wɛ mɛɛtǝlǝnɑɑ hiu nɑ kɑkpɑsɩ. Kɑ wɑŋ kɛ mɛɛtǝlǝnɑɑ nɑɑnʋwɑ nɑ nɑɑlɛ nɑ hɔɣɔlʋɣʋ.
37 Nɑŋ tɑɑ kɛ́ n tǝŋǝɣǝnɑ nɑ ń lɩɩ ɑwɑlɩ tɑɣɑ tɔɔ. Ɩlɛnɑ pɑ́ lǝsɩ pɑ́ɑ́ŋ fotoonɑɑ kɛ pǝ tɑɑ koluŋɑ tɔɔ. Nɑ tǝtɛɛlɛ kɛ hɛkʋ tɑɑ. Kumlee pǝlefɛɩ kɛ yʋlʋ kpɑɑ nɑ pǝ́cɔ́ ɩ́ sʋʋ.
38 Kutuluɣu nɑkʋlɩ kɩɩ wɛ ilim ntɔɣɔŋ tɔɔ nɔnɔɣɔ ɩsɛntɑɑ. Tǝnɑɣɑ pɑ nyɑɑlɑɣɑ tɔlɑ wenɑ pɑ kʋkɑɣɑ nɑ pɑ́ lɑkɩ kɔtɑɣɑ ŋkɑ kɔkɔ lusɑ kɑ tǝnɑ tɔ.
39 Tɑɑpǝlǝnɑɑ nɑɑlɛ kɑ wɛ nɑŋ ŋkʋ kʋ kɔŋkɔmǝŋ nɑɑlɛ tɔɔ kɛ́ koluŋɑ kite kɛ́ tǝkpɑm. Tɑɑpǝlǝnɑɑ mpɛ pɑ tɔɔ kɛ́ pɑ kʋkɑɣɑ kɔtɑɣɑ tɔlɑ. Ɩsɩɩ kɔtɑɣɑ ŋkɑ kɔkɔ lusɑ kɑ tǝnɑ tɔ, nɑ ɩsɑɣɑtʋ hɩɩsʋɣʋ nyǝŋsɩ.
40 Tɑɑpǝlǝnɑɑ liɣiti kɑ wɛ nɑŋ wɑɑlɩ tɔɔ tɔtɔ. Ye n pukinɑ ilim ntɔɣɔŋ nɔnɔɣɔ tǝsʋʋlɛ, n nɑɑkɩ-wɛɣɛ. Nɑɑlɛ nɑ kɔŋkɔŋ kʋnɛ, nɑɑlɛ nɑ kʋnɛ.
41 Tɑɑpǝlǝnɑɑ pǝlefɛɩ tɔɔ kɛ́ pɑ kʋkɑɣɑ kɔtɑɣɑ tɔlɑ. Liɣiti nɑ nɔnɔɣɔ kɔŋkɔŋ kʋnɛ, nɑ liɣiti nɑ kʋnɛ.
42 Pǝ́cɔ́ pǝ́ kɑɑsɩ kɔtɑɣɑ ŋkɑ kɔkɔ lusɑ kɑ tǝnɑ tɔ. Kɛlɛ kɑ tɑɑpǝlǝnɑɑ pɛɛ nyǝ́mɑ kɛ liɣiti tɔtɔ. Pɑɑ wei ɩ tɑɣɑlǝŋ sɛkɑ mɛɛtǝlɩ kʋlʋm kɛ pǝ́cɔ́. Nɑ ɩ wɑŋ kɛ mpʋ tɔtɔ. Pɑ kʋŋkʋlʋmǝŋ kɛ mɛɛtǝlɩ nɑ hɔɣɔlʋɣʋ hɔɣɔlʋɣʋ. Tɑɑpǝlǝnɑɑ mpɛ pɑ tɔɔ kɛ́ pɑ sɩɩkɑɣɑ wontu nti pɑ lɑkǝnɑ kɔtɑɣɑ ŋkɑ kɔkɔ lusɑ kɑ tǝnɑ tɔ. Nɑ kɔtɑsɩ lɛŋsɩ.
43 Pɑ lɑpɑ cɑŋǝm kɛ tɑɑpǝlǝnɑɑ mpɛ pɑ ntompee tɔɔ kɛ́, nɑ pɑ́ cɔɔ nɑ pɑ́ tɑ́. Pɑ tɔɔ kɛ́ pɑ sɩɩkɑɣɑ kɔtɑɣɑ nɑntʋ.
44 Ḿpʋ́ɣʋ́ ɑpɑlʋ ɩnɩ ɩ ponɑ-m pǝ tɑɑ tɑɣɑ tɔɔ. Nɑŋŋ nɑɑlɛ kɑ wɛ tǝnɑɣɑ. Lɛŋkʋ kɑ wɛ ilim ntɔɣɔŋ nɔnɔɣɔ kiŋ. Ɩlɛnɑ kʋ́ hɑ ilim mpǝtǝŋ kɛ siɣile. Lɛŋkʋ kɛ ilim mpǝtǝŋ nɔnɔɣɔ kiŋ. Ɩlɛnɑ kʋ́ hɑ siɣile kɛ ilim ntɔɣɔŋ.
45 Ɩlɛnɑ ɩ́ heeli-m sɩ: Nɑŋ ŋku kʋ kɛɛsǝnɑ ilim mpǝtǝŋ tɔɔ tɔ. Kʋ kɛ́ kɔtǝlɑɑ mpɑ pɑ lɑkɩ Ɩsɔ tǝyɑɣɑ tɑɑ kɛ́ tǝmlɛ tɔ pɑ nyǝŋkʋ kɛ́.
46 Amɑ ŋku kʋlɛ kʋ kɛɛsǝnɑ ilim ntɔɣɔŋ tɔɔ tɔ. Kʋlɛɣɛlɛ kɔtǝlɑɑ mpɑ pɑ pɑɑsǝɣǝnɑ kɔtɑɣɑ tǝlɑtɛ tɔ pɑ nyǝŋkʋ. Ɩlɛnɑ ɩ́ tɑsɑ sɩ, Lefii nyǝ́mɑ tɑɑ ɩlɛ, Sɑtɔkɩ tǝyɑɣɑ nyǝ́mɑ tike kɑ wɛnnɑ mpɑɑʋ sɩ, pɑ́ sʋʋ Ɩsɔ tǝyɑɣɑ tɑɑ nɑ pɑ́ lɑ ɩ tǝmlɛ.
Ɩsɔ tǝyɑɣɑ mɑɣɑmɑɣɑ
47 Ḿpʋ́ɣʋ́ ɑpɑlʋ ɩnɩ ɩ mɑɣɑsɑ pǝ tɑɑ tɑɣɑ. Kɑ wɑŋ nɑ kɑ tɑɣɑlǝŋ kɑ wɛ teitei kɛ́. Pɑɑ kɔŋkɔŋ ŋkuɣu mɛɛtǝlǝnɑɑ nɩɩlɛ nɑ nɑɑnʋwɑ. Ɩlɛnɑ kɔtɑɣɑ tǝlɑtɛ kɛ Ɩsɔ tǝyɑɣɑ ɩsɛntɑɑ.
48 Ḿpʋ́ɣʋ́ ɑpɑlʋ ɩnɩ ɩ sʋʋnɑ-m Ɩsɔ tǝyɑɣɑ nɔnɔɣɔ sɑkɑɣɑ tɛɛ. Ɩ mɑɣɑsɑ sɑkɑɣɑ ɑkelenɑɑ tɔ, pɑɑ wei ɩ yɑsǝlɑɣɑ wɛ mɛɛtǝlǝnɑɑ nɑɑlɛ nɑ hɔɣɔlʋɣʋ kɛ́. Nɔnɔɣɔ wɑŋ kɛ mɛɛtǝlɩ kʋlʋm nɑ hɔɣɔlʋɣʋ.
49 Nɔnɔɣɔ sɑkɑɣɑ tɑɣɑlǝŋ wɛ mɛɛtǝlǝnɑɑ nɑɑnʋwɑ nɑ wɑŋ kɛ mɛɛtǝlǝnɑɑ nɑɑtoso. Kumlee nɑɑnʋwɑ kɛ yʋlʋ kpɑɑkɩ nɑ ɩ́ sʋʋ. Ɩlɛnɑ ɑkelenɑɑ nɑɑlɛ tʋwɑ nɔnɔɣɔ kɛ hɛkʋ.