15
Mowɑpʋ nyǝ́mɑ tɔɔ wulɑ
1 Mowɑpʋ nyǝ́mɑ tɔɔ kʋyɔɣɔtʋtʋ ntɔ:
Pɑ yɔkɑ Aɑɑ-Mowɑpʋ ɩcɑtɛ
nɑ pɑ́ kpiisi-tɛɣɛ ɑhoo kʋlʋmɛɛ.
Pɑ yɔkɑ Kii-Mowɑpʋ ɩcɑtɛ
nɑ pɑ́ kpiisi-tɛ tɔtɔɣɔ ɑhoo kʋlʋmɛɛ.
2 Tipɔŋ nyǝ́mɑ kpɑ tǝfɛɛnlɛ sɩ pɑ wiiki.
Mowɑpʋ nyǝ́mɑ tʋlɑ nɔɔsɩ kɛ Nepo pʋɣʋ tɑɑ,
nɑ Mɑtepɑ ɩcɑtɛ tɑɑ. Pɑ loolɑ pɑ nyɔɔŋ nɑ pɑ tɑntǝŋ.
3 Yǝlɑɑ suu lǝyɑɣɑ wontu,
ɩsɩɩ fɔlǝtɔnɑɑ tɑkɑ kɛ hɑpɛɛ tɔɔ.
Pɑ lukiɣi ɩsǝlʋm kɛ kutuluŋ pɑtɑnɑɑ tɔɔ
nɑ nɔnɔɔsɩ tɛɛ.
4 Hɛsǝpɔŋ nyǝ́mɑ nɑ Ɩlɑle nyǝ́mɑ pɑ mɑkɩ kɑpusi
nɑ Yɑhɑsɩ nyǝ́mɑ nɑ́ɑ́ nɩɩkɩ.
Pǝ kpɛnnɑ Mowɑpʋ yoolɑɑ
nɑ pɑ ɑpɑlʋtʋ le, nɑ pɑ huɣutiɣi lotu.
5 Mɑ yɑɑwɑ sɩ pɑ́ wɑɑsɩ Mowɑpʋ nyǝ́mɑ.
Pɑ sewɑ hɑlǝnɑ pɑ́ tɑlɑ Sʋwɑɑ nɑ Ɩkǝlɑ-Selisiyɑ.
Pɑ kpɑɑkɩ Luhiti tontoŋle nɑ wulɑ.
Pɑ cɑsǝɣɩ lɑŋwɑkǝllɛ kɑpusi kɛ Holonɑyim mpɑɑʋ tɑɑ.
6 Nimlim hite lʋm nyɔɔwɑ.
Nyɩɩtʋ lʋm nyǝntʋ wʋlɑ tǝ tǝnɑ.
Pʋlʋpʋ ɩɩ tɑsǝɣɩ nyɔʋ.
7 Pǝ tɔɔ kɛ́ pɑ kuuki pɑ nyǝm mpi pǝ kɑɑsɑ-wɛ tɔ,
nɑ pɑ́ pukinɑ hɑtoo tɩɩŋ kɑcǝkɑ wɑɑlɩ.
8 Mowɑpʋ nyǝ́mɑ kɑpusi nɩɩkɩ
pɑɑ timpiɣi pɑ tɛtʋ tɑɑ kɛ́.
Hɑlǝnɑ pǝ́ tɑlɑ Ɩkǝlɑyim ɩcɑtɛ
nɑ Ɩliim tɛtʋ tɑɑ lɔkɔ.
9 Timɔŋ ɩcɑtɛ pusi lʋm wɛ kɛ́ ɩsɩɩ cɑlǝm.
Pǝ́cɔ́ ɩ kɑ́ tɑsɑ-wɛɣɛ wɑhɑlɑ tʋɣʋ tɔtɔ.
Ɩ kɑ́ yele nɑ tɔɣɔlɑɣɑ kʋlɩ
Mowɑpʋ yǝlɑɑ kɑkɑɑsɑɣɑ tɔɔ.