17
Tɑmɑsɩ ɩcɑtɛ nyǝ́mɑ nɑ Ɩsɛɣɛlɩ nyǝ́mɑ pɑ kɑwulɑsɩ pɑsʋɣʋ
1 Ḿpʋ́ɣʋ́ Tɑcɑɑ yɔɣɔtɑ Tɑmɑsɩ ɩcɑtɛ tɔm sɩ:
Pɩɩ kɔɔ tɔ, pɑ kɑɑ tɑsɑ Tɑmɑsɩ kɛ yɑɑʋ sɩ ɩcɑtɛ.
Tɩɩ pǝsɩ ncɑɑlɛ huɣule kɛ́.
2 Pɑ lɔwɑ Alowɛɛ ɑcɑlɛɛ.
Kɑlǝkǝŋ hǝntǝɣɩ ɑ tɑɑ tǝpɑmm,
nɔɣɔlʋ ɩɩ nyɑɑsǝɣɩ-ɩ.
3 Pɩɩ kɔɔlɩ Ɩfǝlɑyim nyǝ́mɑ kpɑntɛ.
Pɩɩ lɛɛkɩ Tɑmɑsɩ nyǝ́mɑ kɑwulɑɣɑ.
Nɑ mpi pɩɩ kɑɑsɩ Silii nyǝ́mɑ tɔ
pǝ kɑɑ tɛɛ Ɩsɛɣɛlɩ nyǝ́mɑ nyǝm.
Nti Pǝ tǝnɑ pǝ tʋ Tɑcɑɑ yɔɣɔtɑɑ tɔɣɔlɛ.
4 Kʋyɑkʋ ŋkʋ Ɩsɛɣɛlɩ nyǝ́mɑ kɑɑ wɛɛ yuŋ.
Pǝyele pɑɑ tɛ tɑɑsɩ.
5 Ɩsɛɣɛlɩ kɑ́ wɛɛ kɛ́ ɩsɩɩ tɑɑlɛ wente pɑ kʋmɑ tɔ.
Yɑɑ Lefɑyim tɛtɛkǝlɛ tɑɑ tɑɑlɛ nte tǝ wɛ kpɛtɛ tɔ.
6 Pɩɩ kɑɑsɩ Ɩsɛɣɛlɩ yǝlɑɑ kɛ ɑcɑlǝsɑ kɛ́.
Ɩsɩɩ pɑ kooluɣu tʋɣʋ ŋku
pɑ yɑɑ sɩ Olifi tɔ kʋ pee nɑ pukɑɣɑ,
nɑ pɑ́ kɑɑsɩ pee nɑɑlɛ nɑ tooso kɛ́
comcom nɔɣɔ tɑɑ, nɑ pee liɣiti
nɑ kɑkpɑsɩ kɛ piliŋɑsɩ tɔɔ tɔ.
Ɩsɛɣɛlɩ Ɩsɔ Tɑcɑɑ mɑ́ mɑ yɔɣɔtǝnɑ mpʋ.
7 Kʋyɑkʋ ŋkʋɣʋ yǝlɑɑ kɑ kɛɛsɩ ɩsɛ nɑ Ɩsɛɣɛlɩ Ɩsɔ Nɑŋŋ tʋ wei ɩ kɛ́ mǝ ŋmɑlʋ tɔ ɩ tɔɔ.
8 Ɩ́ kɑɑ tɑsɑ tekuɣu kɛ mǝ niŋ kʋlɑpǝm. Pɑɑ tǝlɑɑlɛnɑɑ, pɑɑ pɑ tʋɣʋ Asǝtɑtɩ nɑ ilim pǝ lɛɛsʋɣʋ.
9 Kʋyɑkʋ ŋkʋɣʋ Ɩsɛɣɛlɩ nyǝ́mɑ mɛ ɩ́ kɑ́ lɔ mǝ koloosi ɑcɑlɛɛ. Ɩsɩɩ Hifi nyǝ́mɑ nɑ Amolii nyǝ́mɑ kɑ lɔʋ pɑ nyǝnɑ kɛ too lɔŋ tɑɑ kɛ́ sɑɑ wei Ɩsɛɣɛlɩ nyǝ́mɑ mɛ ɩ́ lɛɛkɑ-yɛ tɔ. Ɩlɛnɑ pǝ́ kɑɑsɩ wʋlɑɣɑ tɛtʋ tike.
10 Mpi tɔ, Ɩsɛɣɛlɩ nyǝ́mɑ mɛ ɩ́ sɔɔ mǝ Ɩsɔ
wei ɩ yɑpɑ-mɛ nɑ ɩ́ kentiɣi mǝ tɔɔ tɔ.
Hɑlǝnɑ ɩ́ hɑlɑ tɩɩŋ kʋlɑlɑɑŋ tɑɑlɛ
nɑ ɩ́ sɔ lɛsɛŋ tɩɩŋ kpɑɩ nyǝŋ.
11 Kʋyɑkʋ ŋku ɩ́ sɔ tɩɩŋ ɩnɩ tɔ,
ɩ́ sikɑ kɑlɑɑ nɑ ɩ́ cɔɔnɑ-ɩ.
Tɑnɑŋ ŋkʋ kʋ mɑɣɑmɑɣɑ kɛ tɩɩŋ
ɩnɩ ɩ tɛɛwɑ nɑ ɩ́ tʋ hɛtʋ.
Amɑ pǝ tɑlɑ tɔɣɔʋ ɩlɛ pʋlʋpʋ fɛɩ.
Wɑhɑlɑ ɩnɩ ɩ tɑkɑ fɛɩnɑ kɔɔlɛ.
Piitimnɑɑ cʋkɑ pǝ tɑɑ
12 Pepe tɔɔ kɛ́ piitimnɑɑ miitiɣi,
nɑ pǝ́ mʋtǝɣɩ ɩsɩɩ teŋku.
Piitimnɑɑ cʋkɑ pǝ tɑɑ kɛ́ mpʋ suwe.
Pɑ kɑlǝɣɩ kɔkɔtɛ ɩsɩɩ lʋm toŋ nyǝm.
13 Piitimnɑɑ kɑlǝɣɩ kɔkɔtɛ kɛ́ ɩsɩɩ lʋm sɔsɔɔm.
Ɩsɔ nyɑɑsǝɣɩ-wɛɣɛ nɑ pɑ́ hɑtǝlǝɣɩ pooluŋ.
Ɩsɩɩ pʋɣʋ heelim kpɑkʋɣʋ nyɩɩtʋ tɔ.
Yɑɑ ɩsɩɩ kɑcuculɑɣɑ kpɑkʋɣʋ mʋsʋɣʋ tɔ.
14 Pɩɩ kɔɔ tɑɑnɑɣɑ ɩlɛ, sɔɣɔntʋ ɑnɑɑm.
Ɩlɛnɑ pɑ́ sɑɑlɩ yem nɑ pǝ́ tɑ nyɑɑlǝtɑ.
Mpɑ pɑ ŋmɩɩlǝɣɩ tɑ́ nyǝm nɑ pɑ́ kuuki-wɩ tɔ,
mpi pɑɑ tɛɛsǝnɑ tɔɣɔlɛ.