19
Icipiti nyǝ́mɑ lɑŋwɑkǝllɛ sɔsɔɔlɛ
1 Tɑcɑɑ yɔɣɔtɑ ntiɣi Icipiti nyǝ́mɑ tɔɔ tɔ.
Tɑcɑɑ cɑɣɑnɑ ntɛɣɛ ɩsɔŋmʋntʋ nti tǝ tɔŋ lɔŋlɔŋ tɔɣɔ kpɑɣɑnʋ, nɑ ɩ́ polo Icipiti.
Icipiti tɩɩŋ kʋlɑlɑɑŋ seliɣi nɑ yǝlɑɑ ɑpɑlʋtʋ nɑɑ le-wɛ.
2 Ḿpʋ́ɣʋ́ Tɑcɑɑ tɔmɑ sɩ:
Mɑɑ yele nɑ Icipiti nyǝ́mɑ kʋlɩ tǝmɑ tɔɔ.
Yʋlʋ kɑ́ kʋlɩ ɩ lʋlʋɣʋ tʋ tɔɔ,
nɑ lɛlʋ kʋlɩ ɩ tɑɑpɑlʋ tɔɔ.
Acɑlɛɛ kɑ́ kʋlɩ tǝmɑ tɔɔ,
nɑ kɑwulɑsɩ kɛ tǝmɑ tɔɔ.
3 Mɑɑ yele nɑ Icipiti nyǝ́mɑ mɛ mǝ lǝmɑɣɑsɛɛ le-mɛ,
nɑ mɑ́ liɣiti mǝ lɑɣɑtʋ. Ɩlɛnɑ ɩ́ pǝsǝnɑ mǝ tɩɩŋ tɔɔ nɑ
ɩ́ polo mǝ tʋwɑɑ tɛ.
Ɩ́ kɑ́ sʋsɩ kɔɣɔnɑŋŋ nɑ ɩ́ pɔɔsɩ pee.
4 Mɑɑ tʋ Icipiti nyǝ́mɑ kɛ ŋmɑkǝllʋ niŋ tɑɑ.
Nmɑkǝllʋ kɑ́ tɔɣɔ mǝ tɔɔ kɛ́ kɑwulɑɣɑ nɑ toŋ.
Pǝ tǝnɑ pǝ tʋ Tɑcɑɑ mɑ́ mɑ yɔɣɔtǝnɑ mpʋ.
5 Nili pɔɣɔ lʋm kɑ́ nyɔɔ,
nɑ kɑ́ wʋlɩ tǝkpɑnsɑŋ.
6 Nili pɔɣɔ sɔsɑɣɑ pusi kʋhɛlɑsɩ lʋm kɑ́ sɔŋ
nɑ lɔɔŋ kʋhɛhɛɛŋ lʋm nɑ́ɑ́ nyɔɔ.
Mʋlʋɣʋ nɑ sǝsǝncɑɑsɩ kɑ́ lontili,
7 nɑ pɔɣɔ ɑtɑmɑ lʋm nyɩɩtʋ tǝnɑ.
Nɑ pǝ́ kpɛnnɑ pɔɣɔ nɔɣɔ hɑlǝm tǝnɑ,
nɑ heelim mɑ-wɩ
nɑ pǝ́ wʋlɩ nɑ pǝ́ yele kpɛtɛ.
8 Tiinɑ kpɑlɑɑ tǝnɑ, pɑɑ kulɑsɩ nyǝtɑɑ,
pɑɑ puluŋ tʋlɑɑ, pɑ lɑŋɑ kɑ́ wɑkǝlɩ tǝtɔɣɔtɔɣɔ,
nɑ pɑ́ te nyɔɔŋ nɑ pɑ́ wii tǝkpoo.
9 Mpɑ pɑ mɑkɩ kpoŋkpontu toŋ nyǝntʋ
nɑ mpɑ pɑ lʋʋkɩ tǝ pɔɔŋ tɔ,
pɑ lɑŋɑ kɑ́ wɑkǝlɩ.
10 Pǝ nɩɩ pɔɔŋ lʋʋlɑɑ.
Pɑ tǝnɑ mpɑ pɑ tɔkɑɣɑnɑ tǝmlɛ ntɛ́ tɔ,
pɑ ɑpɑlʋtʋ lepɑ.
11 Sowɑŋ ɩcɑtɛ ɑwulumpiyɑ kɛ
lǝmɑɣɑsɛɛ fɛɩnɑɑ kɛ́.
Icipiti wulɑʋ lɑɣɑtʋ tɑsǝlɑɑ
tɑsǝɣɩ kʋmɛlǝlɑɣɑtʋ kɛ.
Ɩsǝnɑɣɑ mǝ tɑɑ yʋlʋ pǝsǝɣɩ
nɑ ɩ́ tɔ Icipiti wulɑʋ sɩ:
Mɑɣɑ nyǝntʋ. Pǝyele mɑɣɑ lɔŋtɑɑ ɑwulɑɑ lʋlʋɣʋ tʋ?
12 Icipiti wulɑʋ, nyɑ́ nyǝntɑɑ mpɛ pɑ wɛ le?
Pɑ́ kuli nti Pǝ tǝnɑ pǝ tʋ Tɑcɑɑ mɑɣɑsɑɑ nɑ
ɩ́ sɩɩ Icipiti tɔɔ tɔ nɑ pɑ́ hʋlɩ-ŋ ɩlɛ.
13 Sowɑŋ ɑwulumpiyɑ mǝ kɛ́ kʋmɛlɛmǝŋ,
nɑ Mɑmfi nyǝ́mɑ mǝ tʋsǝɣɩ mǝ tɩ.
Ɩ́ kɛ́ kpekɑ nyɔɔŋ nyǝ́mɑ mpɑ
pɑ tolisiɣi Icipiti tɔɣɔ.
14 Tɑcɑɑ tisɑ ɑcufu kɛ mǝ tɑɑ,
nɑ ɩ́ tolisiɣi Icipiti kɛ ɩ kʋlɑpǝtʋ tǝnɑ tɑɑ.
Ɩ́ lɑkɩ teitei kɛ́ ɩsɩɩ sʋlʋnyɔɔlʋ
tutuɣu ɩ tɔtʋ tɑɑ tɔ.
15 Icipiti tʋ nɔɣɔlʋ ɩ kɑɑ pǝsɩ
nɑ ɩ́ lɑ pʋlʋ kʋpɑm.
Pɑɑ toŋ tʋ, yɑɑ kʋnyɔntʋ,
yɑɑ sɔsɔ, yɑɑ sǝkpelu.
Icipiti nyǝ́mɑ kɑ́ tɛɛsǝnɑ mpi tɔ
16 Kʋyɑkʋ nɑkʋlɩ, Pǝ tǝnɑ pǝ tʋ Tɑcɑɑ kɑ́ nyɑɑsɩ Icipiti nyǝ́mɑ mɛ nɑ niŋ tʋɣʋ. Sɔɣɔntʋ kɑ́ kpɑ-mɛ nɑ ɩ́ sele ɩsɩɩ ɑlɑɑ.
17 Yutɑ tɛtʋ kɑ́ wɛɛ-mɛɣɛ sɔɣɔntʋ pʋlʋɣʋ. Pɑɑ wɑɑtʋ wei kɛ́ pɑ yɔɣɔtɑ tǝ tɔm, ɩ́ tɔɔsǝɣɩ nti Pǝ tǝnɑ pǝ tʋ Tɑcɑɑ kɑ sɩɩwɑ sɩ ɩ kɑ lɑ-mɛ tɔɣɔ. Ɩlɛnɑ ɩ́ seliɣi.
18 Kʋyɑkʋ nɑkʋlɩ Icipiti ɑcɑlɛɛ kɑkpɑsɩ kɑ́ yɔɣɔtǝɣɩ Hepǝlɑ tɔm. Pɑɑ yɔɣɔtɩ nɑ pɑ́ sɩɩ sɩ: Tǝ kɛ́ Pǝ tǝnɑ pǝ tʋ Tɑcɑɑ nyǝ́mɑ. Acɑlɛɛ ɑnɩ ɑ tɑɑ lɛntɛ hǝtɛ ntɛ́ ilim ɩcɑtɛ.
19 Kʋyɑkʋ nɑkʋlɩ ɩ́ kɑ́ ŋmɑ Tɑcɑɑ kɛ kɔtɑɣɑ tǝlɑtɛ kɛ Icipiti tɛtʋ tɑɑ. Ɩ́ kɑ́ siki-ɩ pǝlɛ kɛ tɛtʋ toŋɑ tɔɔ.
20 Ńtɛ́ tɩɩ tɔɔsǝɣǝnɑ Icipiti nyǝ́mɑ mɛ sɩ: Pǝ tǝnɑ pǝ tʋ Tɑcɑɑ wɛ mǝ tɛ. Nɑ wɑɑtʋ wei Icipiti nyǝ́mɑ kɑ yɑɑ Tɑcɑɑ sɩ: Yɑ-tʋɣʋ tɑ ŋmɑkǝllʋ niŋ tɑɑ tɔ. Ɩsɔ kɑ́ tilinɑ-mɛɣɛ wɑɑsʋlʋ nɑ ɩ́lɛ́ ɩ́ hɛtɩ-mɛ.
21 Wɑɑtʋ ɩnǝɣɩ Tɑcɑɑ kɑ́ hʋlɩ ɩ tǝɣɩ Icipiti nyǝ́mɑ mɛ, nɑ mɩɩ nyɩ Ɩsɔ wɛɛtʋ nɑ ɩ́ sɛɛ-ɩ. Ɩ́ kɑ́ lɑpɩ-ɩ kɔtɑsɩ nɑ ɩ́ hɑ-ɩ kʋcɔɔŋ, nɑ ɩ́ sɩɩ-ɩ nɔɔsɩ nɑ ɩ́ tɔkɩ-sɩ.
22 Tɑcɑɑ kɑ́ hɔ Icipiti nyǝ́mɑ mɛ mǝ ŋkpɑŋŋ. Ɩ kɑ́ wɑɑ-mɛ nɑ mɩɩ mǝlǝnɑ ɩ tɔɔ. Ɩsɔ kɑ́ mʋɣɩ mǝ kʋsǝlǝmʋtʋ nɑ ɩ́ wɑɑ-mɛ.
23 Kʋyɑkʋ nɑkʋlɩ hɑpǝlɛ kɑ́ lɩɩ Icipiti, nɑ tǝ́ puki Asilii. Icipiti nyǝ́mɑ nɑ Asilii nyǝ́mɑ ɩ́ kɑ́ polo tǝmɑtɛ, nɑ ɩ́ kpɛntɩ nɑ ɩ́ sɛɛkɩ Tɑcɑɑ.
24 Kʋyɑkʋ ŋkʋ Ɩsɛɣɛlɩ nyɑɑ sɔɔsɩ Asilii nɑ Icipiti pɑ tɔɔ nɑ ɩ́ lɑ tooso. Tɑcɑɑ kɑ́ kooli tɛtʋ tǝnɑɣɑ kʋpɑntʋ kɛ Ɩsɛɣɛlɩ tɔɔ.
25 Pǝ tǝnɑ pǝ tʋ Tɑcɑɑ kɑ́ kooli tɛtʋnɑɑ mɛ mǝ tooso kɛ́ kʋpɑntʋ sɩ: Mɑ kooliɣi mɑ yǝlɑɑ Icipiti nyǝ́mɑ kɛ kʋpɑntʋ. Mɑɑ kooli Asilii nyǝ́mɑ mpɑ mɑ lɑpǝnɑ mɑ niŋ tɔɣɔ kʋpɑntʋ. Mɑɑ kooli Ɩsɛɣɛlɩ nyǝ́mɑ mpɑ mɑ lǝsɑɑ tɔɣɔ kʋpɑntʋ.