21
Pɑpiloni hotuɣu
1 Tɑcɑɑ yɔɣɔtɑ ntiɣi wʋlɑɣɑ tɛtʋ nti tǝ wɛ teŋku nɔɣɔ tɔ tǝ tɔɔ tɔ.
Kolontu lɩɩnɑ wʋlɑɣɑ tɛtʋ sɔɣɔntʋ nyǝntʋ tɑɑ.
Ɩsɩɩ kɑcuculɑɣɑ fɑkʋɣʋnɑ Nekɛfɩ tɛtʋ tɑɑ tɔ.
2 Pǝ kulɑ tɔm sɔɣɔntʋ nyǝntʋ tɔɔ nɑ pǝ́ hʋlɩ-m.
Nmɑkǝllʋ, ŋmɑkǝlɩ.
Wɑkǝllʋ, nɑ́ɑ́ wɑkǝlɩ.
Ɩlɑm nyǝ́mɑ, ɩ́ tii pɑ tɔɔ.
Mɛtɩ nyǝ́mɑ, mɩɩ tɑ ɩcɑtɛ.
Tɑcɑɑ kɑ́ sɩɩ tǝnɑɣɑ kɛ kʋnyɔmǝŋ wei
Pɑpiloni tʋwɑ piitimnɑɑ tɔ.
3 Pǝ tɔɔ kɛ́ mɑ lɑŋlɛ wɑkǝlǝɣɩ.
Pǝ wɩɩkɩ-m kɛ́ ɩsɩɩ lʋlʋɣʋ
wʋsɑsɩ tɑkʋɣʋ ɑlʋllʋ tɔ.
Wʋsɑsɩ toŋ nyǝnsɩ lɑkɩ nɑ mɑ́ nyɑŋ,
pɩɩ sɑŋ sɩ mɑ́ nɩɩ.
Mɑ seliɣi, pɩɩ sɑŋ sɩ mɑ́ nɑ́.
4 Mɑ lɑŋlɛ pǝsɑɑ, nɑ sɔɣɔntʋ sɔsɔɔntʋ kpɑ-m.
Ahoo nnɑ mɑɑ nyɩɩlɑɑ tɔ ɑ pǝsɑ sɔɣɔntʋ nyǝnɑ.
5 Pɑ pɔwɑ ɑtɛ pɔɔŋ nɑ pɑ́ sɩɩ tɔɣɔnɑɣɑ,
nɑ pɑ́ tɔkɩ nɑ pɑ́ nyɔɔkɩ.
Tǝnɑɣɑlɛ pɑ yɑɣɑ kɑpukɑ kɛ kpɑkpɑɑ sɩ:
Yoolɑɑ sɔsɑɑ mɛ, ɩ́ tɑɣɑnɩ mǝ kʋkentiŋ.
6 Ntɛnɑ Tɑcɑɑ heeli-m sɩ: Polo ń sɩɩ tɑŋlʋ,
ye ɩ nɑ mpi ɩ yɔɣɔtɩ.
7 Ye ɩ loosɑ yoou kɛɛkɛnɑɑ nɑ kpɑɣɑnǝŋ hɔŋ,
yɑɑ kpɑŋɑsɩ yɑɑ yooyoonɑɑ cɑŋɑ.
Ɩlɛ ɩ pɑɑsǝnɑ nɑ ɩ́ yɔɣɔtɩ nɑ pɑ́ nyɩ.
8 Tǝnɑɣɑlɛ tɑŋlʋ yɑɣɑ kɑpukɑ ɩsɩɩ tɔɣɔlɑɣɑ sɩ:
Tɑcɑɑ mɑ sǝŋɑ mɑ tǝtɑŋlɛ kɛ ilim nɑ ɑhoo kɛ́,
nɑ mɑ́ feŋiɣi.
9 Pɑ kɔŋnɑ ntɛ́ nɑ tǝnɑ tɔɔ,
nɑ pɑ́ cɑɣɑ yoou kɛɛkɛnɑɑ
nɑ kpɑɣɑnǝŋ hɔŋ.
Ntɛnɑ nɔɣɔlʋ mɑ kɑpukɑ sɩ:
Pɑpiloni ɩ́lɛ́ ɩ hotɑɑ, ɩ hotɑɑ.
Ɩ tɩɩŋ kʋlɑlɑɑŋ lɛɛsǝŋ yɔkɑ
ɑtɛɣɛ ɩ tǝnɑ tǝpʋtʋpʋtʋ.
10 Mɑ yǝlɑɑ mpɑ mɛ pɑ mɑpɑ ɩsɩɩ mǝlɑ kɛ kɑtɑɣɑ tɑɑ tɔ.
Nti Ɩsɛɣɛlɩ Ɩsɔ Tɑcɑɑ,
Pǝ tǝnɑ pǝ tʋ heelɑ-m tɔɣɔlɛ,
nɑ mɑ́ɑ́ tɛlǝsǝɣɩ-mɛ.
Ɩtɔm nyǝ́mɑ wɛ tɔm
11 Tɑcɑɑ yɔɣɔtɑ ntiɣi Tumɑ tɔɔ tɔ.
Nɔɣɔlʋ yɔɣɔtǝnɑ-m nɑ nɔɣɔ sɔsɑɣɑ nɑ Seyii tɛtʋ tɑɑ sɩ:
Tɑŋlʋ, wɑɑtʋnɑɑ ɩsǝnɑɣɑ pǝ kɑɑsɑ ɑhoo,
pǝlee kɛ́ ɑ tɛŋ?
12 Ɩlɛnɑ tɑŋlʋ cɔ sɩ:
Pɩɩ nyɑɑlɩ yɑ́ɑ́.
Amɑ pǝ tɑ nyɑɑlǝtɑ.
Ye mǝ luɣu wɛ kʋcɔcɔtʋ,
ɩlɛ ɩ́ tɑsɑ mǝlʋɣʋ kɛ wulee.
Tetɑŋ nɑ Ketɑɑ nyǝ́mɑ selɑɑ
13 Tɑcɑɑ yɔɣɔtɑ ntiɣi Alɑpʋ tɔɔ tɔ.
Ketɑɑ nyǝ́mɑ mɛ, mǝ nɑ mǝ yooyoonɑɑ cɑɑsɩ.
Ɩ́ polo nɑ ɩ́ sʋʋ nyɩɩtʋ tɑɑ kɛ́ ɑhoo,
nɑ ɩ́ ŋmɛlɩ tiikɑsɩ tɑɑ.
14 Temɑ nyǝ́mɑ mɛ,
ɩ́ sǝŋnɑ lʋm kɛ selɑɑ mpɑ lʋkɔtʋ kʋɣɩ tɔ.
Ɩ́ ponɑ-wɛɣɛ tɔɣɔnɑɣɑ.
15 Pǝ tɑɣɑ pʋlʋ, yoou toŋ nɑ lɑɣɑlɛɛ tʋʋlʋɣʋ,
nɑ tɔ́ɔ́ŋ pɑm tɔɣɔnǝnɑ-wɛ.
16 Pǝ tɑɣɑ pʋlʋ, pǝ kɑɑsɑ pǝnɑɣɑ kɛ teitei, ɩlɛnɑ Ketɑɑ nyǝ́mɑ teeli sɩɩ tǝnɑɣɑ.
17 Yǝlɑɑ pǝciiu tike kɛ pɩɩ kɑɑsɩ ɩ yoolɑɑ tɑɑ yoolɑɑ tɔtɔlɑɑ tɑɑ. Nti Tɑcɑɑ Ɩsɛɣɛlɩ Ɩsɔ yɔɣɔtɑɑ tɔɣɔlɛ.