26
Koluŋɑ ɩcɑtɛ tɔm
1 Kʋyɑkʋ ŋkʋɣʋ pɑɑ yoo yontu kɛ Yutɑ tɛtʋ tɑɑ sɩ:
Tǝ wɛnɑ koluŋɑ ɩcɑtɛ.
Nyʋɣʋ yɑpʋ kɛ Ɩsɔ lɑpɑ ɩsɩɩ koluŋɑ nɑ kɑ pile.
2 Ɩ́ tʋlɩ nɔnɔɔsɩ, ɩ́ yele nɑ piitimnɑɑ mpɑ
pɑ tǝŋǝɣɩ tɑmpɑnɑ tɔ pɑ́ sʋʋ.
Piitimnɑɑ mpɑ pɑ lɑpɑ nɑɑni tɔ pɑ́ sʋʋ.
3 Wei ɩ sǝŋɑ tǝcɑ kɛ ɩ tɑɣɑnʋɣʋ tɑɑ tɔ.
N hɑɑkɩ-ɩ hɛɛsʋɣʋ mɑɣɑmɑɣɑ kɛ́.
Mpi tɔ, nyɑɣɑ ɩ tʋ nɑɑni.
4 Ɩ́ tʋ Tɑcɑɑ kɛ nɑɑni kɛ tɑm tɔɔ.
Ɩnɩ ɩ kentiɣinɑ ɩsɩɩ kʋkpɑmʋɣʋ kɛ pɑɑ wɑɑtʋ wei.
5 Ɩ tisɑ mpɑ pɑɑ wɛ kumlee tɔɔ kɛ́ hɑtoo ɩsɔtɑɑ tɔ.
Ɩ pǝsɑ kpɛntǝlɑsɩ kɛ ɩcɑtɛ nte pɑ tɑɑ kpǝtǝɣǝnɑ tɔ.
Ɩ tisɑ-tɛɣɛ hɑtoo ɑtɛɣɛ nɑ tǝ́ tɔɣɔ tɛtʋ.
6 Wɑhɑlɑ nyǝ́mɑ fɛlɑ-tɛɣɛ nɔɔhɛɛ.
Kʋnyɔntʋnɑɑ pɑɑ-tɛɣɛ nɔɔhɛɛ.
Kɑntǝkɑɣɑ kʋyɛɛŋ tɑɑ sǝlǝmʋɣʋ
7 Siɣisilu mpɑɑʋ kɛ́ tɑmpɑnɑ mpɑɑʋ kɛ́.
N kɛ́ tɑmpɑnɑ kɛ́.
Nyɑ́ hɛɛkǝnɑ mpɑɑʋ ŋku siɣisilu tǝŋǝɣɩ tɔ.
8 Tɑcɑɑ, nyɑɣɑ tǝ tekiɣi mpɑɑʋ ŋku
n hʋlɑ-tʋ sɩ tǝ tǝŋ tɔ kʋ tɑɑ.
Tǝ yɑɑ-ŋ, tǝ sǝlǝmǝɣɩ-ŋ.
Mpi tǝ nyɩɩlǝɣɩ tɔɣɔlɛ.
9 Mɑ nyɩɩlǝɣɩ-ŋ ɑhoo kɛ́,
nɑ mɑ́ pɛɛkǝɣɩ-ŋ hɑtoo mɑ lotu tɑɑ.
Wɑɑtʋ wei n hʋʋkǝnɑ tɛtʋ tɔɔ tɔ.
Antulinyɑ yǝlɑɑ kpɛlǝmǝɣɩ siɣisuɣu tǝŋʋɣʋ.
10 Ye pɑ́ hʋlǝɣɩ ɩsɑɣɑʋ kɛ suulu,
ɩɩ cɛkǝɣǝnɑ tɑmpɑnɑ tǝŋʋɣʋ tɔm.
Ɩ hɑɑkɩ ɩ tǝɣɩ ɩsɑɣɑtʋ tɑɑ kɛ́
siɣisuɣu tɛtʋ tɑɑ kɛ́.
Ɩɩ nɑɑkɩ Tɑcɑɑ sɔsɔɔntʋ tɔm.
11 Tɑcɑɑ n teɣetiɣi niŋ kɛ́, ɩlɛ mpɛ pɑɑ nɑɑ mpʋ.
Amɑ pɑɑ nɑ́ ɩsǝnɑ n pɑɑsǝɣǝnɑ nyɑ́ yǝlɑɑ tɔm tɔ.
Ɩlɛnɑ fɛɛlɛ pɩɩ-wɛ.
Kɔkɔ ŋkɑ n kɑ tɑɣɑnɑ nyɑ́ kolontunɑɑ tɔɔ tɔ kɑ́ nyɑɣɑ-wɛ.
12 Tɑcɑɑ nyɑ́ hɑɑkǝnɑ-tʋɣʋ hɛɛsʋɣʋ.
Mpi tɔ, nyɑ́ lɑkǝnɑ tɑ́ kʋlɑpǝm tǝnɑ nɑ pǝ́ lɑkɩ.
13 Tɑcɑɑ tɑ́ Ɩsɔ,
sɔsɑɑ lɛlɑɑ kɑ tɔɣɔ tɑ́ tɔɔ kɛ́ kɑwulɑɣɑ ɩsɩɩ nyɑ́.
Amɑ nyɑ́ tike nyɑ́ pɛɛlɛɛ tɔɔ kɛ́ tǝ yɑɑkɩ nyɑ́ hǝtɛ.
14 Mpɑ pɑ sǝpɑ tɔ pɑ kɑɑ fe.
Sǝtɑɑ kɑɑ kʋlɩ.
Mpi tɔ, n tʋ niŋ nɑ ń kʋ-wɛ.
N kpiisɑ-wɛ nɔɣɔlʋ kɑɑ tɔɔsɩ pɑ tɔɔ.
15 Tɑcɑɑ n lɑpɑ nɑ piitim huki.
Tɑcɑɑ n wɑlǝsɑ piitim.
N hʋlɑ nyɑ́ teeli.
N wɑlǝsɑ tɛtʋ tǝnɑsɩ kɛ toosi tǝnɑ tɑɑ.
16 Tɑcɑɑ tǝ pɛɛkɑ-ŋ tɑ lɑŋwɑkǝllɛ wɑɑtʋ.
N hɔmɑ tɑ ŋkpɑŋʋɣʋ, ɩlɛnɑ tǝ́ wiinɑ-ŋ sɩ ń wɑɑsɩ-tʋ.
17 Tɑcɑɑ tǝ lɑpɑ nyɑ́ ɩsɛntɑɑ kɛ́,
ɩsɩɩ lʋlʋɣʋ tɑkʋɣʋ ɑhonto tɔ.
Ɩ cɑɑkɩ lʋlʋɣʋ nɑ ɩ wiikinɑ wʋsɑsɩ.
18 Mpʋ tɔtɔɣɔ nɑ tɑ́,
pɩɩ wɛɛ sɩ tǝ lʋlɩ pʋlʋpʋ.
Lʋlʋɣʋ wʋsɑsɩ kpɑ-tʋ.
Amɑ heelim kɛ tǝ lʋlɑɑ.
Tǝ tɑ pǝsɩ nɑ tǝ́ kɔnɑ nyʋɣʋ yɑpʋ kɛ ɑtɛ.
Pǝyele tǝ tɑ lʋlɩ yǝlɑɑ kʋfɑmɑ kɛ ɑntulinyɑ tɑɑ.
Sǝtɑɑ feesuɣu nɑ ɩsɑɣɑtʋ kʋfɛlʋɣʋ
19 Mɑ yǝlɑɑ mɛ mǝ sǝtɑɑ kɑ fe.
Mǝ sǝtɑɑ mpɑ pɑɑ kɛ́ mɑ nyǝ́mɑ tɔ pɑɑ wɛɛnɑ weesuɣu.
Mpɑ mɛ ɩ́ hǝntɑ mʋsʋɣʋ tɑɑ tɔ ɩ́ kʋlɩ.
Ɩ́ yɑɣɑ lɑŋhʋlʋmlɛ kɑkiisɑsɩ.
Mpi tɔ, mǝ cɔlɔʋ kɛ tɑnɑŋ nyǝŋkʋ kɛ́.
Tɛtʋ kɑ́ mǝŋnɑ mpɑ pɑ sǝpɑ tɔ.
20 Mɑ yǝlɑɑ ɩ́ sʋʋ mǝ kutuluŋ tɑɑ,
ɩ́ tǝkɩ mǝ tɔɔ.
Ɩ́ ŋmɛlɩ tǝnɑɣɑ lɑɑsɑɣɑ tɔɔ.
Hɑlǝnɑ Tɑcɑɑ pɑ́ɑ́nɑ́ hɛɛ.
21 Pǝ tɑɣɑ pʋlʋ, Tɑcɑɑ lɩɩkɩ ɩ tǝcɑɣɑlɛ sɩ,
ɩ fɛlǝɣɩ ɑtɛ yǝlɑɑ kɛ pɑ ɩsɑɣɑtʋ.
Kʋyɑkʋ ŋkʋ tɛtʋ kɑ́ kɛɛlɩ yǝlɑɑ
mpɑ tɩɩ kʋwɑ tɔ pɑ tɔɔ.
Tɛtʋ kɑɑ tɑsɑ tɑkʋɣʋ kɛ mpɑ tǝ kʋwɑ tɔ.