3
Yutɑ kɑwulɑɣɑ wɑkǝlʋɣʋ tɔm
1 Ɩɩ nɑɑkɩ mpi Tɑcɑɑ Pǝ tǝnɑ pǝ tʋ kɑ́ lǝsɩ
Yutɑ tɛtʋ nɑ Yosɑlɛm ɩcɑtɛ pǝ tɑɑ tɔɣɔlɔ.
Ɩ kɑ́ lǝsɩ pǝ tǝnɑ mpi pǝ wɑɑsǝɣɩ yǝlɑɑ kɛ teu tɔ.
Pǝ kpɑɣɑʋ tɔɣɔnɑɣɑ tǝnɑ nɑ lʋm tǝnɑ tɔ.
2 Akɑnɑɑ nɑ yoolɑɑ nɑ hʋʋlɑɑ,
nɑ Ɩsɔ kʋyɔɣɔtʋtʋ tɛlǝsǝlɑɑ
nɑ nɑlɑɑ nɑ kʋkpɑtǝlɑɑ.
3 Nɑ yoolɑɑ nɩɩlɛ nɑ nɑɑnʋwɑ nyʋɣʋ nyǝ́mɑ nɑ kʋpɑɣɑlɑɑ,
nɑ lɑɣɑtʋ tɑsǝlɑɑ, nɑ mpɑ pɑ lɑkɩ niŋ tǝmɑ nɑ cɑŋǝm tɔ,
nɑ topotopo nyǝ́mɑ sɔsɑɑ.
4 Tɑcɑɑ kɑ́ kpɑ-wɛɣɛ ɑwɑɑsɑ kɛ ɑwulɑɑ,
nɑ piyɑ ŋmɑkǝlǝɣɩ-wɛ.
5 Yǝlɑɑ kɑ muɣuliɣi tǝmɑ.
Ɩfepiyɑ kɑ́ kʋlɩ kʋkpɑtǝlɑɑ tɔɔ,
nɑ tɛtɛlɑtɑɑ nɑ́ɑ́ kʋlɩ kʋpɑɣɑlɑɑ tɔɔ.
6 Hɑlɩ lʋlʋɣʋ kʋlʋmʋɣʋ tʋ kɑ́ kpɑ ɩ tɛɛtʋ nɑ ɩ́ tɔmɩ-ɩ sɩ:
Nyɑ́ wɛnɑ toko tɔ, lɑ tɑ wulɑʋ
nɑ ń pɑɑsǝnɑ sɑmɑɑ yɛlɛyɛlɛ ɩnɛ.
7 Amɑ ɩ́lɛ́ ɩ kɑ́ mɑ kɑpukɑ kɛ kʋyɑkʋ ŋkʋ sɩ:
Mɑ tɑ kɛ kɔɔlɛ lɑtʋ.
Pǝyele mɑ fɛɩnɑ tɔɣɔnɑɣɑ, yɑɑ toko kɛ mɑ tɛ.
Mpʋ tɔ, ɩ́ tɑɑ kpɑ-m wulɑʋ.
8 Yosɑlɛm cɛŋlǝɣɩ, Yutɑ hotɑɑ.
Mpi tɔ, pɑ kʋlǝɣɩ Tɑcɑɑ teeli tɔɔ kɛ́
pɑ yɔɣɔtɑɣɑ nɑ pɑ kʋlɑpǝlɛ tɑɑ.
9 Ɩsǝnɑ pɑ ɩsɛntɑɑ wɛɛ tɔ,
mpʋ pǝ kʋɣʋnɑ pɑ tɔm.
Pɑ lɑkɩ pɑ kɑwɑlɑɣɑ kɛ́ tǝkeelee ɩsɩɩ Sɔtɔm
nyǝ́mɑ pɑɑ ŋmɛsǝɣɩ. Pɑ tɔm wɛ wɑɩyo kɛ́.
Mpi tɔ, mpɛ pɑ tɑɣɑnǝnɑ pɑ mɑɣɑmɑɣɑ pɑ wɑkǝlʋɣʋ.
10 Ɩ́ yɔɣɔtɩ sɩ: Pɩɩ cɑɣɑnɑ siɣisilu.
Mpi tɔ, ɩ kɑ́ tɔɣɔ ɩ tǝmlɛ kʋlʋlʋm.
11 Amɑ ɩsɑɣɑʋ tɔm nɑ́ wɛ wɑɩyo kɛ́, pǝ kɑɑ cɑɣɑnɑ-ɩ.
Mpi tɔ, ɩ wɛ mpɑɑʋ ɩsɑɣɑʋ tɑɑ kɛ́.
Pɩɩ lɛɛtɩ-ɩ ɩ kʋlɑpǝlɛ.
12 Ḿpʋ́ɣʋ́ Tɑcɑɑ tɔmɑ sɩ:
Piyɑ ŋmɑkǝlǝɣǝnɑ mɑ yǝlɑɑ.
Alɑɑ tɔkǝnɑ kɑwulɑɣɑ kɛ pɑ tɔɔ.
Pɑ nyʋɣʋ nyǝ́mɑ tolisiɣi-wɛɣɛ
nɑ pɑ́ wɑkǝlǝɣɩ mpɑɑʋ ŋku pɑ tǝŋǝɣɩ tɔ.
Nyʋɣʋ nyǝ́mɑ hʋʋnɑʋ
13 Tɑcɑɑ kʋlɑɑ sɩ ɩ kɑlǝɣǝnɑ ɩ yǝlɑɑ.
Ɩ sǝŋɑɑ sɩ ɩ hʋʋkǝnɑ-wɛ.
14 Tɑcɑɑ yɑɑwɑ nɔnɔɣɔ kɛ yǝlɑɑ nyʋɣʋ nyǝ́mɑ nɑ pɑ ɑwulɑɑ,
nɑ ɩ́ tɔ-wɛ sɩ:
Mǝ kuntunɑ mɑ tɩɩŋ wei pɑ yɑɑ sɩ lɛsɛŋnɑɑ tɔ.
Ɩ́ lɛɛkɑ kʋnyɔntʋnɑɑ nyǝm nɑ ɩ suuli mǝ tɛɛsɩ.
15 Ɩlɛ pepe tɔɔ kɛ́ ɩ́ fɛlǝɣɩ
mɑ yǝlɑɑ kɛ nɔɔhɛɛ nɑ ɩ́
lɑkǝnɑ mʋsʋŋ kɛ kʋnyɔntʋnɑɑ?
Tɑcɑɑ Pǝ tǝnɑ pǝ tʋ yɔɣɔtǝnɑ mpʋ.
Tɑcɑɑ kɑlǝɣǝnɑ Yosɑlɛm ɑlɑɑ
16 Ḿpʋ́ɣʋ́ Tɑcɑɑ tɔmɑ sɩ:
Yosɑlɛm ɑlɑɑ mɛ ɩ́ kɛ́ ɩsǝcɑʋ nyǝ́mɑ kɛ́.
Ɩ́ tɔŋ nɑ ɩ́ hɔŋ luuŋ.
Mǝ ɩsǝpee nyǝnʋɣʋ kʋsǝɣɩ kʋnyɩɩlǝŋ.
Ɩ́ tɔŋ nɔɔhǝlɛ nɔɔhǝlɛ nɑ mǝ nɔɔkpɑlɑsɩ wiiki.
17 Tɑcɑɑ kɑ looli Ɩsɛɣɛlɩ ɑlɑɑ mɛ mǝ nyɔɔŋ nɑ pǝ́ yele-mɛɣɛ
ŋkoŋkolɑsɩ nɑ pǝ́ tʋ-mɛɣɛ fɛɛlɛ.
18 Kʋyɑkʋ ŋkʋɣʋ Tɑcɑɑ kɑ́ wɔɣɔsɩ mǝ kɑcɔkɑ wontu tǝnɑ. Pǝ kpɑɣɑʋ mǝ nɔɔkpɑlɑsɩ nɑ puluŋ wei ɩ́ suuki nyɔɔŋ tɔ, nɑ mǝ kɑcɔkɑ wontu nti tǝ kootɑɑ ɩsɩɩ ɩsɔtʋ kʋfɑlʋ tɔ.
19 Nɑ ŋkpɑnyɑpǝlɑsɩ, nɑ kpɑsɩ, nɑ tɛkɛntɛnɑɑ,
20 nɑ sɑɑlɑsɩ kʋtemɑsɩ, nɑ nɔɔhɛɛ tɑɑ yɔm, nɑ tɑmpɑlɑnɑɑ, nɑ tulɑɑlʋ kpɑlǝpɑnɑɑ, nɑ tǝlɑnɑɑ.
21 Nɑ mǝ mpee tɔɔ kukuwee, nɑ mɩɩnɑ tɔɔ nyǝnɑ,
22 nɑ ɑcimɑ wontu, nɑ kpɑɩnɑɑ, nɑ tokonɑɑ sɔsɑɑ mpɑ pɑ kentiɣi wɑtʋ tɔ, nɑ sɑɑlɑsɩ nɑ huluŋ,
23 nɑ tokonɑɑ sɔsɑɑ, nɑ toko nyɑɑnɑɑ nɑ nyʋɣʋ sɑɑlɑsɩ, nɑ luɣu tɛɛ nyǝnsɩ.
24 Tɑsǝtʋ sɔŋ kɑ́ lɛɛtɩ tulɑɑlʋ lonte,
nɑ ŋmǝnɑɣɑ kɛ tɑmpɑlɑ lonte.
Nkoŋkolɑɣɑ kɛ nyɔɔsɩ kʋhɔkɑsɩ lonte,
nɑ lǝ́yɑ́ɣɑ wontu kɛ ɑcimɑ nyǝntʋ lonte.
Ɩ́ nɑŋ fɛɛlɛ nɑ ɩ́
tɑɑ tokuɣu kɛ kɑcɔkɑ lonte.
Yosɑlɛm ɑlɑɑ leelɑɑ tɔm
25 Lɑɣɑtɛ kɑ́ tɔɣɔ Yosɑlɛm tɑɑ ɑpɑlɑɑ.
Yosɑlɛm yoolɑɑ tɑɑ yoolɑɑ kɑ́ sɩ tǝyoole.
26 Wɑɑtʋ ɩnǝɣɩ Siyɔŋ ɩcɑtɛ nɔnɔɔsɩ
kɑ́ wii nɑ sɩ́ cɑɣɑ lǝ́yɑ́ɣɑ.
Pɩɩ kpiisi nɔnɔɔsɩ, ɩlɛnɑ sɩ́ cɑɣɑ ɑtɛ.