31
Mpɑ pɑ pɛɛkǝɣɩ wɑɑsʋɣʋ kɛ Icipiti tɔ
1 Ḿpʋ́ɣʋ́ Tɑcɑɑ tɑsɑɑ sɩ:
Mpɑ pɑ tiiki Icipiti sɩ pɑ́ sǝnɑ-wɛ tɔ,
pɑ tɔm wɛ wɑɩyo kɛ́.
Kpɑɣɑnǝŋ kɛ pɑ tɛɛlǝɣɩ,
pɑ lɑkɩ yoou kɛɛkɛnɑɑ kɛ nɑɑni kɛ pɛlɛ pɑ pɑɣɑlɛ tɔɔ.
Pɑ tɛɛlǝɣɩ kpɑɣɑnǝŋ cɑɣɑlɑɑ kɛ pɑ toŋ tɔɔ.
Pɑɑ sɑŋ tekuɣu kɛ Ɩsɛɣɛlɩ Ɩsɔ nɑŋŋ tʋ mɑ́.
Pǝyele pɑɑ pɛɛkǝɣɩ Tɑcɑɑ mɑ́.
2 Pǝyele mɑ́ tɔtɔ mɑ kɛ́ lǝmɑɣɑsɛɛ tʋ,
mɑ kɔŋnɑ mpusi.
Mɑ́ yɔɣɔtɑ nti mɑɑ lɑɣɑsǝɣɩ.
Mɑ kʋlǝɣɩ ɩsɑɣɑlɑtɑɑ tɛɛsɩ tɔɔ.
Mɑ wɑkǝlǝɣɩ mpɑ pɑɑ tǝŋǝɣɩ siɣisuɣu tɔ pɑ sǝnɑʋ.
3 Icipiti nyǝ́mɑ kɛ yǝlɑɑ kɛ́,
pɑ tɑ kɛ Ɩsɔ.
Pɑ kpɑɣɑnǝŋ kɛ́ nɑntʋ kɛ́,
ɩ fɛɩnɑ tomɑ lɛnnɑ tɔtɔ.
Ye Tɑcɑɑ mɑ́ mɑ kʋsɑ niŋ,
kentilu seliɣi kɛ́.
Wei pɑ kentɑɑ tɔ,
ɩ́lɛ́ ɩ hotiɣi kɛ́,
nɑ pɑ tǝnɑ pɑ́ sɩ.
Tɑcɑɑ tike wɑɑsǝɣǝnɑ Yosɑlɛm
4 Ḿpʋ́ɣʋ́ Tɑcɑɑ heelɑ Ɩsɑyii mɑ́ sɩ:
Ɩsɩɩ tɔɣɔlɑɣɑ yɑɑ kɑ
pǝyɑɣɑ kpɑɑkʋɣʋ kɑ tɔɣɔnɑɣɑ nɑ kɑ́ nyɩɩsǝɣɩ tɔ.
Pɑɑ tiikilɑɑ kotɑɑ nɑ pɑ́ kʋlɩ kɑ tɔɔ.
Pɑ nɔɔsɩ ɩɩ nyɑɑsǝɣɩ-kɛ.
Pǝyele pɑ pɑɣɑlɛ ɩɩ tɔɔkɩ kɑ lɑŋlɛ.
Ḿpʋ́ɣʋ́ Atɛ nɑ ɩsɔtɑɑ tʋ mɑ,
mɑɑ tii Siyɔŋ pʋɣʋ tɔɔ,
mɑɑ tii Siyɔŋ pulɑɣɑ tɔɔ nɑ mɑ́ yoo.
5 Ɩsɩɩ sumɑsɩ hɛtʋɣʋ sɩ keŋ
nɑ sɩ́ tɑkǝɣɩ sɩ tǝpɑpǝlɛ tɔ.
Ḿpʋ́ɣʋ́ Atɛ nɑ ɩsɔtɑɑ tʋ mɑ́,
mɑɑ kenti Yosɑlɛm tɔɔ
nɑ mɑ́ wɑɑsɩ-ɩ nɑ mɑ́ yɑpɩ-ɩ.
6 Ɩsɛɣɛlɩ piyɑ mɛ ɩ́ kɔɔ nɑ tǝ́ mǝlɩ, Tɑcɑɑ wei tǝ kisɑɑ tɔ ɩ tɛɛ.
7 Kʋyɑkʋ ŋkʋ pɑɑ wei ɩ kɑ́ lɔ ɩ tɩɩŋ kʋlɑlɑɑŋ wʋlɑ nyǝŋ nɑ liɣitee nyǝɣǝtʋ nyǝŋ wei ɩ lupinɑ ɩ niŋ tɔ.
8 Lɑɣɑtɛ nte tǝ tɑ kɛ yʋlʋ nyǝntɛ tɔ
ńtɛ́ tɩɩ tɔɣɔnɑ Asilii nyǝ́mɑ.
Lɑɣɑtɛ nte yʋlʋ niŋ tɑ lɑ tɔ ńtɛ́ tɩɩ wɑkǝlǝnɑ-wɛ.
Asilii nyǝ́mɑ kɑ́ se lɑɣɑtɛ.
Ɩsɛɣɛlɩ nyǝ́mɑ kɑ tʋ Asilii yoolɑɑ kɛ tǝlɑsɩ tǝmɑ.
9 Mpɑ pɑɑ kentɑɣɑɑ-wɛ ɩsɩɩ kʋkpɑmǝŋ tɔ pɑɑ senɑ
lɑŋwɑkǝllɛ.
Sɔɣɔntʋ kɑ pɩɩ pɑ nyʋɣʋ nyǝmɑ kɛ tuutɑ tɛɛ.
Tɑcɑɑ mɑ́ mɑ yɔɣɔtǝnɑ mpʋ.
Mɑ wɛnɑ kɔkɔ kɛ Siyɔŋ tɑɑ.
Mɑ wɛnɑ mɑmɑlukile kɛ Yosɑlɛm tɑɑ.