6
Ɩsɑyii sʋʋʋ kɛ Ɩsɔ tǝmlɛ tɑɑ
1 Osiyɑsɩ sǝm pǝnɑɣɑ kɛ Ɩsɑyii mɑ́, mɑ nɑ́ Tɑcɑɑ kɛ toosee tɑkɑ tɑɑ. Mɑ nɑ-ɩ kɛ́ nɑ ɩ́ cɑɣɑ ɩ kumte sɔsɔɔlɛ tɔɔ, nɑ ɩ kpɑɩ suwɑ ɩ tǝyɑɣɑ.
2 Nɑ ɩsɔtɑɑ tɑŋlɑɑ nɑpǝlɩ, mpɑ pɑ wɛnɑ keŋ nɑɑtoso nɑɑtoso tɔ, pɑ sǝŋɑɑ nɑ pɑ́ cɔɔnɑ Ɩsɔ. Keŋ nɑɑlɛ kɑ tɑkǝnɑ pɑ ɩsɛntɔɔ, nɑ nɑɑlɛɣɛ pɑ nɔɔhɛɛ tɔɔ. Ɩlɛnɑ pɑ́ kʋlǝɣǝnɑ nɑɑlɛ.
3 Ḿpʋ́ɣʋ́ pɑ yɔɣɔtɑɣɑ nɑ pɑ́ cɔɔkɩ tǝmɑ nɑ nɔɔsɩ sɔsɔɔnsɩ sɩ:
Pǝ tǝnɑ pǝ tʋ Tɑcɑɑ kɛlɛ Nɑŋŋ tʋ Nɑŋŋ tʋ Nɑŋŋ tʋ.
Nyɑ́ teu suwɑ tɛtʋ tǝnɑ tɑɑ kɛ́.
4 Ɩsɔtɑɑ tɑŋlɑɑ nɔɔsɩ selɑɣɑ Ɩsɔ tǝyɑɣɑ kite tɛɛ, nɑ nyɔɔsɩ nyɑlɑ kɑ tɑɑ.
5 Ḿpʋ́ɣʋ́ Ɩsɑyii mɑ́, mɑ tɔmɑ sɩ: Hɑɩ, mɑ tɔm tɛmɑ. Mpi tɔ, mɑ kʋyɔɣɔtʋtʋ fɛɩ teu. Mɑ yǝlɑɑ mpɑ pɑ hɛkʋ tɑɑ mɑ wɛɛ tɔ, pɛlɛ pɑ kʋyɔɣɔtʋtʋ fɛɩ teu tɔtɔ. Pǝyele mɑ nɑnɑ mɑ ɩsǝpǝle kɛ Pǝ tǝnɑ pǝ tʋ Tɑcɑɑ wulɑʋ.
6 Amɑ ɩsɔtɑɑ tɑŋlɑɑ mpɛ pɑ tɑɑ lɛlʋ kʋlɑ hʋntʋ, nɑ ɩ́ kɔɔ mɑ kiŋ. Ɩ tɔkɑ ɩ niŋ tɑɑ kɛ́ mɑmɑtɛ nte ɩ lǝsɑ kɔtɑɣɑ tǝlɑtɛ tɔɔ tɔ, nɑ kpǝtǝlʋɣʋ.
7 Ɩlɛnɑ ɩ́ nyɔtɔ mɑ nɔɣɔ nɑ ɩ́ tɔ sɩ:
Mɑmɑtɛ tokinɑ nyɑ́ nɔɣɔ, nyɑ́ ɩsɑɣɑtʋ nɑ nyɑ́ kɑwɑlɑɣɑ kpiisɑɑ.
8 Ntɛnɑ Ɩsɑyii mɑ́, mɑ nɩɩ Tɑcɑɑ pɔɔsɑɑ sɩ:
Aweɣe mɑɑ tili? Awe kɑ́ lɑ tɑ́ nɔɣɔ tɔɔ tʋ?
Ɩlɛnɑ mɑ́ cɔ sɩ: Mɑɣɑlɔ tili-m.
9 Ḿpʋ́ɣʋ́ ɩ tɔmɑ-m sɩ:
Polo ń heeli Ɩsɛɣɛlɩ yǝlɑɑ sɩ,
pɑɑ ɩ́ nɩɩ ɩsǝnɑ, ɩ́ kɑɑ cɛkǝnɑ.
Pǝyele pɑɑ ɩ́ nyǝnɑ ɩsǝnɑ ɩ́ kɑɑ nɑ́.
10 Mɑ kʋ mǝ lǝmɑɣɑsɛɛ tɑɑ, sɩ ɩ́ tɑɑ cɛkǝnɑ.
Mɑ tǝkɑ mǝ ŋkpɑŋŋ, sɩ ɩ́ tɑɑ nɩɩ nɑtǝlɩ.
Mɑ wiisɑ mǝ ɩsɛ, sɩ ɩ́ tɑɑ nɑ pʋlʋ.
Pǝ́ tɑɑ kɔɔ nɑ ɩ́ kɛɛsǝnɑ mɑ tɔɔ nɑ mɑ́ wɑɑ-mɛ.
11 Ḿpʋ́ɣʋ́ Ɩsɑyii mɑ́, mɑ pɔɔsɑɑ sɩ:
Tɑcɑɑ, pǝlee kɛ́ mpʋ ɩnɩ pɩɩ sɩɩ tǝnɑɣɑ?
Ɩlɛnɑ ɩ́ cɔ-m sɩ:
Wɑɑtʋ wei pɩɩ kpiisi ɑcɑlɛɛ nɑ pǝ́ kʋ́ yǝlɑɑ,
nɑ tɛɛsɩ wɛɛ kpɛtɛ,
nɑ cɑcɑkǝŋ wɛɛ kpɛtɛ, nɔɣɔlʋ fɛɩ tɔ.
12 Tɑcɑɑ mɑ́ mɑɑ lǝsɩ tɛtʋ yǝlɑɑ,
nɑ mɑ́ ponɑ-wɛɣɛ pooluŋ,
nɑ pǝ́ kɑɑsɩ-tǝɣɩ kpɛtɛ.
13 Ye pǝ kɑɑsɑ yʋlʋ kʋlʋm kɛ nɑɑnʋwɑ tɑɑ,
pɑɑ kʋ ɩ́lɛ́ tɔtɔ.
Amɑ pɩɩ kɑɑsɩ yǝlɑɑ mpɛ ɩsɩɩ pɑ sɛtʋɣʋ tʋɣʋ
nɑ pǝ́ yele kite nɑ tǝ́ nɛɣɛtǝɣɩ tɔ.
Kite ńtɛ́ tɩɩ lɑ ɑkpɑɑlɛ kʋfɑtɛ nte tǝ kɛ́ Ɩsɔ nyǝntɛ tɔ.