8
Pɑ ŋmili kolontu wɑɑlɩ, pɑ́ kuu wontu kɛ lɔŋ
1 Ḿpʋ́ɣʋ́ Tɑcɑɑ tɔmɑ Ɩsɑyii mɑ sɩ: Kpɑɣɑ kpɑɑtɑ, nɑ ń ŋmɑɑ ɩ tɔɔ kɛ́ ŋmɑɑtʋ kʋyɑsǝlǝtʋ nɑ pǝ́ nɑɑkɩ teu sɩ: Pɑ́ ŋmili kolontu wontu wɑɑlɩ, pɑ́ kuu wontu kɛ lɔŋ.
2 Ɩlɛnɑ mɑ́ hʋlɩ kpɑɑtɑ ɩnǝɣɩ ɑseetɑ nyǝ́mɑ nɑɑlɛ mpɑ mɑ wɛnɑ nɑɑni tɔ. Mpɛɣɛlɛ Kɔtʋlʋ Wuliyɑ nɑ Yepelekiyɑ pǝyɑlʋ Sɑkɑlɩ.
3 Ḿpʋ́ɣʋ́ mɑ nyǝmɑ́ mɑ ɑlʋ. Ɩ kɛ́ Ɩsɔ kʋyɔɣɔtʋtʋ tɛlǝsʋlʋ kɛ́. Ɩ lɑpɑ teu ɩlɛnɑ ɩ́ lʋlɩ ɑpɑlʋpǝyɑɣɑ, nɑ Tɑcɑɑ tɔ́ sɩ, mɑ́ yɑɑ-kɛ sɩ: Mɑsɛɛ Sɑkɑlɩ-Hɑsɩ-Pɑɑsɩ*fɑ*. kolontu wɑɑlɩ, pɑ́ kuu wontu kɛ lɔŋ.
4 Pǝ tɑɣɑ pʋlʋ tɔɔ, mpi sɩ pǝyɑɣɑ kɑ́ nyǝŋ yɔɣɔtʋɣʋ sɩ, pɑɑpɑ nɑ nnɑɑ tɔ, pɑ kuu Tɑmɑsɩ nɑ Sɑmɑlii pɑ wɛnɑʋ nɑ pɑ́ ponɑ Asilii wulɑʋ.
Asilii yoolɑɑ wɑtʋɣʋ
5 Ḿpʋ́ɣʋ́ Tɑcɑɑ tɑsɑ Ɩsɑyii mɑɣɑ heeluɣu tɔtɔ sɩ:
6 Mpi pǝ tɔɔ yǝlɑɑ pɑnɛ pɑ kisɑ Silowee
lɔɔʋ lʋm mpi pǝ kpeŋ tǝpɑmm,
nɑ pɑ́ lɔ ɑpɑlʋtʋ kɛ ɑwulɑɑ Lesɛŋ
nɑ Pekɑ pɑ tɔm tɑɑ tɔ.
7 Pǝ tɔɔ kɛ́ mɑɑ kpɑɑsɩ Asilii wulɑʋ nɑ ɩ yoolɑɑ pɑ toŋ.
Ɩsɩɩ Ɩfǝlɑtɩ pɔɣɔ sɔsɑɣɑ lʋm nɑ kɑ holɑ sɔɔsʋɣʋ,
nɑ pǝ́ wɑtɩ kʋtemiŋ tɔ.
8 Asilii nyǝ́mɑ kɑ́ wɑtɩ ɩsɩɩ lʋm nɑ ɩ́ li Yutɑ nyǝ́mɑ,
nɑ pǝ́ sɩɩnɑ pɑ luɣu tɛɛ.
Pɑɑ wɑlǝsɩ pɑ kʋtemiŋ kɛ pɑ tɛtʋ ɩwɑlɑʋ tɔɔ.
Ɩsɔ wɛ tɑ́ kiŋ.
Yǝlɑɑ tǝmɑ kpɑɩ nyǝnɑ
9 Piitimnɑɑ mɛ, ɩ́ kiisi yoou kɑkiisɑsɩ,
sɔɣɔntʋ sɔsɔɔntʋ tɑŋɑ-mɛɣɛ.
Mpɑ mɛ mǝ wɛ tɛtʋ pooluŋ tɔ mɩɩ ke ŋkpɑŋŋ.
Ɩ́ tɑɣɑnɩ mǝ tǝɣɩ yoou tɔɔ,
sɔɣɔntʋ tɑŋɑ-mɛɣɛ.
10 Ɩ́ hɔkɔ nɑ ɩ́ sɩɩ, pɩɩ sɑɑlɩ yem kɛ́,
pǝ́cɔ́ pɑɑ ntiɣi ɩ́ kɑ́ yɔɣɔtɩ, tǝ kɑɑ lɑ.
Mpi tɔ, Ɩsɔ wɛ tɑ́ kiŋ.
Pǝlɛ kʋcopǝle
11 Ḿpʋ́ɣʋ́ Tɑcɑɑ kpɑ Ɩsɑyii mɑ́, nɑ ɩ́ kpɑɑlɩ-m sɩ mɑ́ tɑɑ
kɛɛnɑ yǝlɑɑ mpɛ pɑ yɑɑsi. Nti ɩ yɔɣɔtɑɑ tɔɣɔlɛ sɩ:
12 Ɩ́ tɑɑ nyǝnɩ wɑɑlɩ lɩɩʋ kɛ mpi
mpɛ pɑ nyǝnǝɣɩ wɑɑlɩ lɩɩʋ tɔ.
Ɩ́ tɑɑ nyɑnɑ mpi pɑ nyɑŋnɑ tɔ,
sɔɣɔntʋ ɩ́ tɑɑ kpɑ-mɛ.
13 Pǝ tǝnɑ pǝ tʋ Tɑcɑɑ tike kɛ ɩ́ kɑ́ nyǝnɩ kɑtɛ pʋlʋ,
nɑ ɩ́ nyɑnɑ-ɩ nɑ ɩ́ se-ɩ.
14 Ɩ́ kɛ́ Ɩsɔ tǝsɛɛlɛ kɛ́.
Amɑ ɩ kɑ́ pǝsɩ tɔtɔɣɔ kʋkpɑmʋɣʋ
ŋku kɩɩ co Yutɑ nyǝ́mɑ nɑ Ɩsɛɣɛlɩ nyǝ́mɑ tɔ.
Kʋlʋm ɩnɩ tɔtɔɣɔlɛ puluɣu
nɑ kɑtɔkɑ kɛ Yosɑlɛm nyǝ́mɑ.
15 Pɩɩ co pɑ pɑɣɑlɛ nɑ pɑ́ hoti nɑ pǝ́ wɑkǝlɩ-wɛ.
Kɑtɔkɑ kɑ́ puu-wɛ nɑ pɑ́ kpɑ-wɛ.
Kɔɣɔnɑŋ sʋsʋɣʋ kisinɑʋ
16 Ḿpʋ́ɣʋ́ Ɩsɑyii tɔmɑ sɩ: Mɑ tʋɣɩ tɔm tǝnɛɣɛ pʋlʋpʋ tɑɑ kɛ́. Mɑɑ kɑlǝsɩ mɑ kʋsɛɣɛsǝtʋ nti mɑ cɑɑkɩ sɛɣɛsʋɣʋ tɔ tǝ tɔɔ. Mɑ tǝŋlɑɑ tike kɛ mɑɑ heeli-tɩ.
17 Tɑcɑɑ hɑ Yɑkɔpʋ lʋlʋɣʋ nyǝ́mɑ kɛ siɣile kɛ lɑɑsɑɣɑ tɔɔ kɛ́. Ɩlɛ Tɑcɑɑ kɛ mɑ tɛɛlǝɣɩ nɑ mɑ tʋɣɩ-ɩ nɑɑni.
18 Mɑ nɑ piyɑ mpɑ Tɑcɑɑ hɑ-m tɔɣɔlɔ. Tǝ wɛ kɛ́ ɩsɩɩ Ɩsɔ kʋhʋlʋm mpi pǝ hʋ́lǝ́ɣɩ́ Ɩsɛɣɛlɩ tɑɑ sɩ Pǝ tǝnɑ pǝ tʋ Tɑcɑɑ wɛ Siyɔŋ pʋɣʋ tɑɑ tɔ.
19 Ye pɑ tɔmɑ-mɛ sɩ: Ɩ́ pɔɔsɩ mpɑ pɑ sʋsǝɣɩ nɑ pɑ́ yɑɑkɩ ɑtɛtʋnɑɑ, nɑ pɑ heeliɣi cele tɔm tɔ. Pɑ wɛlǝtǝɣɩ pɑ luuŋ tɛɛ kɛ́ nɑ pɑ́ mʋtǝɣɩ yem. Ɩlɛ ɩ́ cɔ-wɛ sɩ: Pǝ wɛ teu sɩ tǝ́ pɔɔsɩ sǝtɑɑ kɛ weesiŋ nyǝ́mɑ tɔm nɑ? Ɩsɔ kɛ́ tɩɩ pɔɔsɩ yɑɑ sǝtɑɑ?
20 Ɩlɛ ɩ́ kɑ́ cɔ-wɛ sɩ: Tɑcɑɑ tɔm nɑ ɩ sɛɣɛsʋɣʋ tɑɑ kɛ́ tɩɩ mǝlɩ. Ye wei ɩ kisɑ mpʋ pʋntʋ kɑɑ fe tɛʋ.
Sǝkpɛtʋɣʋ tɑɑ tɔntɛ
21 Pɑɑ cɔɔ tɛtʋ tɑɑ kɛ́,
nɑ ɩkɑɑlɛ kpɑ-wɛ nɑ nyɔɣɔsɩ pɩɩ-wɛ,
hɑlǝnɑ pɑ́ tʋʋ pɑ wulɑʋ nɑ pɑ Ɩsɔ.
Ɩlɛnɑ pɑ́ kpɑɑsɩ pɑ ɩsɛ nɑ ɩsɔtɑɑ.
22 Ɩlɛnɑ pɑ́ tisi-yɛ nɑ ɑtɛ,
nɑ pɑ́ nɑ́ lɑŋwɑkǝllɛ nɑ sǝkpɛtʋɣʋ
nɑ nǝɣǝsɛɛ sɔsɔɔnɑ.
Ɩlɛnɑ pɑ́ ponɑ-wɛɣɛ sǝkpɛtʋɣʋ ɑnɑɑm tɑɑ.
23 Wei ɩ wɛ sǝkpɛtʋɣʋ kʋnɛ kʋ tɑɑ tɔ,
ɩɩ pǝsǝɣɩ nɑ ɩ́ fiti.
Pɑ lʋlɑ-tʋɣʋ pǝyɑɣɑ
Hɑtoo lɔŋ tɑɑ ɩlɛ,
Sɑpulɔŋ nɑ Nɛfǝtɑli pǝ hɔɣɔlǝŋ nyǝ́mɑ
kɑ wɛ fɛɛlɛ tɑɑ kɛ́.
Amɑ pɑɑ tɛ nɑ pɑ kʋsɩ nyɔɔŋ.
Pǝ kpɑɣɑʋ teŋku wei ɩ wɛ ilim tǝlɩɩlɛ tɔ,
hɑlǝnɑ Yɑɑtɑnɩ pɔɣɔ wɑɑlɩ.
Pɑɑ nɑ Kɑlilee timpiwɛ mʋʋlɑɑ wɛɛ tɔ,
pɑɑ kʋsɩ nyɔɔŋ kɛ tǝnɑ.