☰ Soopu 42
42
Soopu tisɑɑ sɩ ɩ kɛ́ ɩcɑm
1 Ḿpʋ́ɣʋ́ Soopu cɔwɑ Tɑcɑɑ sɩ:
 
2 Mɑ nyǝmɑ́ sɩ n pǝsǝɣɩ pǝ tǝnɑ.
Ye n tʋwɑ mpi pǝ pǝlɛ n lɑkɩ-wǝɣɩ.
3 Mɑ́ tɑkɑɣɑɑnɑ nti mɑ sɩɩwɑ nɑ mɑ́ lɑkɩ tɔ tǝ tɔɔ,
nɑ kʋyɔɣɔtʋtʋ nti tǝ tɑɑ fɛɩ lǝmɑɣɑsɛɛ tɔ.
Tɑmpɑnɑ mɑ yɔɣɔtɑɑ kɛ́, mɑ tɑɑ cɛkǝnɑ.
Tǝmɑ sɔsɔɔnɑ wenɑ Ɩsɔ lɑpɑ tɔ ɑ tɛɛ-m kɛ́.
Ɩlɛ mɑ tɑɑ nyɩ-yɛ.
4 Ɩsɔ ke ŋkpɑŋŋ nɑ mɑ́ yɔɣɔtɩ.
Mɑɑ pɔɔsɩ-ŋ nɑ ń cɔ-m.
5 Pɑɑ yɔɣɔtɑ Ɩsɔ tɔm kɛ́
nɑ mɑ́ nɩɩnɑ mɑ ŋkpɑŋʋɣʋ.
Amɑ nɔɔnɔɔ kɛ́ mɑ nɑ-ɩ nɑ mɑ ɩsǝpǝle.
6 Pǝ tɔɔ kɛ́ mɑ nyǝɣǝsɑ mɑ tɩ.
Mɑ pɑsɑ mɑ tɩ nɑ mɑ́ cɑɣɑ tɛtʋ nɑ tɔlʋmɑ tɑɑ.
ƖSƆ MƎLƎNA SOOPU KƐ Ɩ WULE TAA
7 Wɑɑtʋ wei Tɑcɑɑ tɛmɑ Soopu kɛ yɔɣɔtǝnɑʋ kɛ mpʋ, ɩlɛnɑ ɩ́ tɔ Temɑŋ tʋ Ɩlifɑsɩ sɩ: Mɑ mʋ nyɑ́ nɑ nyɑ́ tɑɑpɑlɑɑ nɑɑlɛ nɑ pɑ́ɑ́nɑ́ kɛ́. Pǝ tɑɣɑ pʋlʋ, ɩ́ tɑ tǝŋ tɑmpɑnɑ nɑ ɩ́ yɔɣɔtɩ mɑ tɔm, ɩsɩɩ mɑ tǝmlɛ tʋ Soopu lɑpɑ tɔ. 8 Pǝ tɔɔ tɔ, ɩ́ cɑɑ lɑtǝcɛnɑɑ nɑɑtosompɔɣɔlɑɣɑ, nɑ ɩwɑɑŋ kɛ mpʋ tɔtɔ. Ɩ́ mɑɣɑnɑ Soopu nɑ ɩ́ lɑ mǝ nyɔɔŋ tɔɔ kɛ́ kɔtɑɣɑ ŋkɑ kɔkɔ lusɑ kɑ tǝnɑ tɔ, nɑ ɩ́ sǝlǝmǝnɑ-mɛ. Ɩlɛ Soopu tɔɔ, mɑ kɑɑ hɔ mǝ ŋkpɑŋʋɣʋ nɑ pǝ́ kɛɛsǝnɑ mǝ kpɑŋʋɣʋ lɑkɑsɩ. Mpi tɔ, ɩ́ tɑ́ tǝŋ tɑmpɑnɑ nɑ ɩ́ yɔɣɔtɩ mɑ tɔm ɩsɩɩ mɑ tǝmlɛ tʋ Soopu lɑpʋ tɔ.
9 Mpʋɣʋlɛ Ɩlifɑsɩ, nɑ Pilitɑ, nɑ Sofɑɑ pɑ polɑɑ nɑ pɑ́ lɑ ɩsɩɩ Tɑcɑɑ heelɑ-wɛ tɔ, nɑ ɩ́lɛ́ ɩ mʋ Soopu sǝlǝmʋɣʋ.
10 Soopu tɛmɑ ḿpʋ́ɣʋ́ ɩ tɑɑpɑlɑɑ kɛ sǝlǝmǝnɑʋ, ɩlɛnɑ Tɑcɑɑ mǝlǝnɑ Soopu kɛ ɩ wule tɑɑ. Ḿpʋ́ɣʋ́ Ɩsɔ hɑ-ɩ ɩ wɛnɑʋ ŋku ɩ kɑ wɛnɑ tɔ kʋ tɔm nɑɑlɛ. 11 Ɩlɛnɑ Soopu tɑɑlʋnɑɑ, nɑ ɩ newɑɑ ɑlʋnyǝmɑ, nɑ ɑpɑlʋnyǝmɑ, nɑ mpɑ pɑɑ nyǝmɑ-ɩ hɑtoo lɔŋ tɔ, pɑ́ kɔɔ ɩ tǝyɑɣɑ tɑɑ nɑ ɩ́ nɑ-wɛ pɑ́ tɔɣɔ. Ɩlɛnɑ pɑ́ wii ɩ kʋnyɔŋ, nɑ pɑ́ sɔɔsɩ-ɩ ɑpɑlʋtʋ kɛ wɑhɑlɑnɑɑ mpɑ Tɑcɑɑ kɑ tʋ-ɩ tɔ pɑ tɔɔ. Pǝ wɑɑlɩ kɛ́ pɑɑ wei ɩ hɑ-ɩ pɑ tɛ liɣitee nyǝɣǝlʋɣʋ nɑ wʋlɑ kukuule.
12 Ḿpʋ́ɣʋ́ Tɑcɑɑ koolɑ Soopu pɩɩsɩ kɑntǝkɑɣɑ nyǝnsɩ kɛ kʋpɑntʋ, nɑ pǝ́ kǝlɩ kɑncɑɑlɑɣɑ nyǝnsɩ. Ɩ kɑ wɛnɑ heeŋ kɛ iyisi nɑɑnʋwɑ nɑ liɣiti (14000), nɑ yooyoonɑɑ kɛ iyisi nɑɑtoso (6000), nɑ nɑɑŋ kʋhɑlǝŋ kɛ iyɑɣɑ (1000), nɑ kpɑŋɑsɩ ɑlʋnyǝnsɩ kɛ iyɑɣɑ (1000). 13 Ḿpʋ́ɣʋ́ Soopu lʋlɑ ɑpɑlʋpiyɑ kɛ nɑɑtosompɔɣɔlɑɣɑ, nɑ ɑlʋpiyɑ kɛ tooso. 14 Ɩlɛnɑ ɩ́ yɑɑ kɑncɑɑlɑɣɑ pɛɛlɔ sɩ Yemimɑ (Alukuku), nɑ nɑɑlɛ nyǝŋ sɩ Kesiyɑ (Yɑɑye), nɑ tooso nyǝŋ sɩ Kelɑɑ-Hɑpuki (Cǝlɑʋfulɑɣɑ). 15 Tɛtʋ tǝnɑ tɑɑ, ɑlɑɑ nɑpǝlɩ pɑ tɑɑ fɛɩ nɑ pɑ́ tewɑ ɩsɩɩ Soopu pɛɛlɑɑ mpɛ. Ḿpʋ́ɣʋ́ pɑ cɑɑ hɑ-wɛɣɛ pɑ kpɑncoou kɛ teitei ɩsɩɩ pɑ tɑɑlʋnɑɑ.
16 Pǝlɛ pǝ wɑɑlɩ kɛ́ Soopu tɑsɑ pɩɩsɩ nɩɩnʋwɑ nɑ nɩɩlɛ (140) kɛ tɔɣɔʋ. Hɑlǝnɑ ɩ́ nɑ́ ɩ piyɑ piyɑ, nɑ sǝlɛ sɩ piyɑ piyɑ. 17 Soopu pɩɩsɩ tɔɔwɑɣɑ, nɑ ɩ́ kpɑtǝlɩ teu tǝkuŋkuŋku, ɩlɛnɑ ɩ́ sɩ́.
☰