2
Yonɑɑsɩ sǝlǝmʋɣʋ kɛ tinte lotu tɑɑ
1 Ḿpʋ́ɣʋ́ Tɑcɑɑ lɑpɑ nɑ tinte sɔsɔɔlɛ nɑtǝlɩ kɔɔ nɑ tǝ́ li Yonɑɑsɩ. Ḿpʋ́ɣʋ́ ɩ cɑɣɑ tǝ lotu tɑɑ kɛ́ kʋyɛɛŋ tooso nɑ ɑhoo tooso.
2 Ɩlɛnɑ ɩ́ sǝlǝmɩ ɩ Ɩsɔ Tɑcɑɑ kɛ tinte lotu tɑɑ sɩ:
3 Tɑcɑɑ, mɑ yɑɑ-ŋ mɑ wɑhɑlɑ tɑɑ nɑ ń nɩɩ.
Mɑ kiisɑ ɑtɛtǝlɛ tɑɑ nɑ ń nɩɩ mɑ nɔɣɔ.
4 N pɛtɑ-m lʋhǝyɑɣɑ tɑɑ kɛ́ teŋku hɛkʋ tɑɑ.
Lʋm kʋlɑɑ ɩsɩɩ koloosi nɑ pǝ́ tɑ-m,
lʋm koloosi tɛɛkɩ mɑ tɔɔ kɛ́ kʋlʋm kʋlʋm.
5 Mɑɑ hʋʋwɑ sɩ n tɔɣɔnɑ-m kɛ́,
mɑ kɑɑ tɑsɑ nyɑ́ tǝsɛɛlɛ kɛ nɑʋ.
6 Lʋm lipɑ-m nɑ pǝ́ tɑŋɩ-m tɔɣɔʋ.
Pǝ lipɑ-m nɑ sǝsǝncɑɑsɩ hɔkɔ mɑ nyʋɣʋ.
7 Mɑ tiiwɑ hɑlǝnɑ mɑ́ tɑlɑ pɔɔŋ kilɑ.
Atɛtǝlɛ nɔnɔɔsɩ tǝkɑɣɑ mɑ tɔɔ kɛ́ tɑm tɔɔ.
Amɑ mɑ Ɩsɔ Tɑcɑɑ nyɑ́, n lǝsɑ-m nɑ weesuɣu.
8 Wɑɑtʋ wei mɑ lǝsɑɣɑ cɑɑkɑɣɑ lɩɩʋ kɛ mɑ tɔnʋɣʋ tɑɑ tɔ.
Mɑ tisɑɣɑ feesuɣu ɩlɛnɑ mɑ́ tɔɔsɩ nyɑ́ tɔɔ.
Ɩlɛnɑ ń mʋ mɑ sǝlǝmʋɣʋ kɛ nyɑ́ tǝsɛɛlɛ tɑɑ.
9 Mpɑ pɑ lɑɑkɩ tɩɩŋ tɔ pɑ lɑŋǝɣɩ nyʋɣʋ yɑpʋ kɛ́.
10 Amɑ mɑɑ sɛɛ-ŋ kɛ́.
Mɑɑ lɑ-ŋ nyɑnɑ tǝmlɛ sɛɛtʋ kɔtɑsɩ,
Mɑɑ yoosi ɩsɩɩ mɑɑ sɩɩʋ nɔɣɔ tɔ.
Mpi tɔ, Tɑcɑɑ nyɑɣɑlɛ nyʋɣʋ yɑtʋ.
11 Ḿpʋ́ɣʋ́ Tɑcɑɑ tɔmɑ tinte sɩ tǝ́ polo tǝ́ tɔ Yonɑɑsɩ kɛ kʋteŋ tɔɔ.