9
Yʋlʋ wei pɑ lʋlǝnɑ yʋlʋmtʋ tɔ
1 Yesu tɛɛkɑɣɑ ɩlɛnɑ ɩ́ nɑ́ yʋlʋ wei pɑ lʋlǝnɑ yʋlʋmtʋ tɔ.
2 Ḿpʋ́ɣʋ́ Yesu ɩfɑlɑɑ pɔɔsɑ Yesu sɩ: Tɑcɑɑ, ɑpɑlʋ ɩnɛ ɩnɩ ɩ lɑpǝnɑ ɩsɑɣɑtʋ yɑɑ ɩ cɑɑnɑɑ nɑ pɑ́ lʋlɩ-ɩ mpʋ?
3 Tǝnɑɣɑ Yesu cɔ-wɛ sɩ: Pǝ tɑ kɛ ɩsɩɩ ɩnɩ ɩ lɑpǝnɑ ɩsɑɣɑtʋ yɑɑ ɩ cɑɑnɑɑ. Amɑ pǝ lɑpɑ ḿpʋ́ɣʋ́ pǝ́cɔ́ Ɩsɔ tomɑ nɑnɑ nti ɩ kɑ lɑpɩ-ɩ tɔ tǝ kiŋ.
4 Pǝ nǝɣǝsǝnɑ tǝ lɑkɩ wei ɩ tilɑ-m tɔ ɩ tǝmɑ kɛ ilim tɑɑ. Pǝ tɑɣɑ pʋlʋ, ɑhoo cɑɑ yuɣu, ɩlɛ tǝmlɛ kɑɑ wɛɛ pǝsʋɣʋ tɔtɔ.
5 Kʋyɛɛŋ wei ɩ tɑɑ mɑ wɛ ɑntulinyɑ tɑɑ cǝnɛ tɔ, mɑɣɑlɛ kɔkɔ ŋkɑ kɑ nɑɑ yǝlɑɑ tǝnɑ tɔ.
6 Yesu tɛmɑ ḿpʋ́ɣʋ́ yɔɣɔtʋɣʋ, ɩlɛnɑ ɩ́ tɔ ntɑɣɑmɑ kɛ ɑtɛ, nɑ ɩ́ lɑ́ tɛɛliyɑ, nɑ ɩ́ tɑɑ yʋlʋm ɩnɩ ɩ ɩsɛ.
7 Nɑ ɩ́ tɔmɩ-ɩ sɩ: Polo nɑ ń sɑŋ nyɑ́ ɩsɛ kɛ Silowee lɩɩlɛ tɑɑ. (Hǝtɛ tǝnɛ tǝ hʋwɛɛ wɛɛ sɩ: Pɑ tilɑɑ.)
Yʋlʋm polɑɑ nɑ ɩ́ sɑŋ ɩ ɩsɛ, ɩlɛnɑ ɩ́ mǝlɩ nɑ ɩ́ nɑɑkɩ tǝcɛɩcɛɩ.
8 Ḿpʋ́ɣʋ́ yʋlʋm cɔlɔ nyǝ́mɑ mpɑ pɑɑ nyǝmɑ-ɩ lɔŋ sɩ ɩ kɛ́ pɑlɑ lɑtʋ tɔ, pɑ tɔmɑ sɩ: Pǝ tɑɣɑ ɩnɛ ɩnɩ ɩ kɑ cɑkɑɣɑnɑ nɑ ɩ́ lɑkɩ pɑlɑ?
9 Lɛlɑɑ sɩ ɩnǝɣɩ.
Lɛlɑɑ sɩ: Aɑɩ pǝ tɑɣɑ ɩnɩ, ɩ nǝɣǝsǝlɛ kɛ́.
Amɑ ɑpɑlʋ ɩnɩ ɩ cɔwɑ sɩ: Mɑ mɑɣɑmɑɣɑ kɛ́.
10 Tǝnɑɣɑ pɑ pɔɔsɑ-ɩ sɩ: Ɩsǝnɑɣɑ n lɑpɑ nɑ nyɑ́ ɩsɛ ɑnɩ ɑ kuli?
11 Ḿpʋ́ɣʋ́ ɩ cɔ-wɛ sɩ: Apɑlʋ wei pɑ yɑɑ sɩ Yesu tɔ, ɩnɩ ɩ lɑpǝnɑ tɛɛliyɑ nɑ ɩ́ tɑɑ mɑ ɩsɛ, nɑ ɩ́ tɔ-m sɩ mɑ́ polo Silowee lɩɩlɛ tɑɑ nɑ mɑ́ sɑŋ mɑ ɩsɛ. Mɑ polɑɑ nɑ mɑ sɑŋ, ɩlɛnɑ mɑ́ sʋʋ nɑʋ.
12 Tǝnɑɣɑ pɑ pɔɔsɑ-ɩ sɩ: Leɣe ɑpɑlʋ ɩnɩ ɩ wɛɛ? Ɩlɛnɑ ɩ́ cɔ sɩ: Mɑ tɑ nyɩ.
Fɑlisɑnɑɑ pɔɔsʋɣʋ kɛ yʋlʋm wɑɑʋ tɔm
13 Ḿpʋ́ɣʋ́ pɑ kpɑɣɑ wei ɩnɩ ɩ kɑ kɛ́ yʋlʋm tɔ nɑ pɑ́ ponɑ-ɩ Fɑlisɑnɑɑ kiŋ.
14 Pǝ tɑɣɑ pʋlʋ, kʋyɑkʋ kʋhɛɛsʋɣʋ wule kɛ Yesu lɑpɑ tɛɛliyɑ nɑ ɩ́ kulinɑ ɑpɑlʋ ɩnɩ ɩ ɩsɛ.
15 Pǝ tɔɔ ɩnɩ ɩ mɑɣɑmɑɣɑ kɛ Fɑlisɑnɑɑ nɑ́ lɛlɑ-ɩ pɔɔsʋɣʋ kɛ ɩsǝnɑ pǝ lɑpɑ nɑ ɩ ɩsɛ kuli tɔ. Ɩlɛnɑ yʋlʋm cɔ-wɛ sɩ: Tɛɛliyɑ kɛ ɩ tɑɑ mɑ ɩsɛ, ɩlɛnɑ mɑ́ sɑŋ nɑ pǝnɛ mɑ́ nɑɑkɩ.
16 Tǝnɑɣɑ Fɑlisɑnɑɑ tɑɑ lɛlɑɑ nɑ́ tɔmɑ sɩ: Pǝ tɑɣɑ Ɩsɔ kiŋ kɛ ɑpɑlʋ wei ɩnɩ ɩ lɑkɩ mpʋ tɔ ɩ lɩɩnɑɑ. Mpi tɔ, ɩɩ tǝŋǝɣɩ kʋyɑkʋ kʋhɛɛsʋɣʋ kiiŋ.
Lɛlɑɑ sɩ: Ye ɩ kɑ kɛ́ ɩsɑɣɑʋ ɩsǝnɑɣɑ ɩ kɑ pǝsɑɑ nɑ ɩ́ lɑ́ piti tǝmɑ ɑnɛ ɑ tɑkɑnɑɑ kɛ mpʋ?
Hɑlɩ pɑ́ cɑŋ pɑ fɑɣɑ pɑ tɑɑ pɑ tike.
17 Ḿpʋ́ɣʋ́ Fɑlisɑnɑɑ tɑsɑ yʋlʋ wei ɩ ɩsɛ pǝ kulɑ mpʋ tɔɣɔ pɔɔsʋɣʋ sɩ: Nɑ nyɑ́ hʋʋkɩ suweɣe ɑpɑlʋ wei ɩnɩ n tɔŋ sɩ ɩ kulɑ nyɑ́ ɩsɛ tɔ ɩ tɔɔ? Ɩ́lɛ́ ɩ cɔ-wɛ sɩ: Ɩ kɛ́ Ɩsɔ kʋyɔɣɔtʋtʋ tɛlǝsʋlʋ kɛ́.
18 Amɑ Yutɑ nyǝ́mɑ mpɛ pɑ tɑ mʋ-tɩ sɩ ɑpɑlʋ ɩnɩ ɩ kɑ kɛ́ yʋlʋm kɛ́ nɑ ɩ ɩsɛ kuli, hɑlǝnɑ pɑ́ kɔnɑ ɩ cɑɑ nɑ ɩ too.
19 Nɑ pɑ́ pɔɔsɩ-wɛ sɩ: Ntɔŋ mǝ pǝyɑɣɑ kɛ ɩnɛ ɩnǝɣɩ tǝkpem nɑ? Pǝ́cɔ́ ɩ́ tɔŋ sɩ ɩ́ lʋlɑ-ɩ nɑ yʋlʋmtʋ yɛɛ? Tɔʋ, ɩlɛ ɩsǝnɑɣɑ pǝ lɑpɑ nɑ ɩ́ nɑɑkɩ pǝnɛ?
20 Ḿpʋ́ɣʋ́ ɩ nyǝ́mɑ nɑ́ cɔwɑ sɩ: Tǝ nyǝmɑ-ɩ sɩ tɑ́ pǝyɑɣɑ kɛ-ɩ. Pǝ́cɔ́ tǝ lʋlɑ-ɩ nɑ yʋlʋmtʋ.
21 Amɑ tǝ tɑ nyɩ ɩsǝnɑ pǝ lɑpɑ nɑ kɑɣɑnɑ ɩ́ nɑɑkɩ tɔ. Pǝyele tǝ tɑ nyɩ wei ɩ kulɑ ɩ ɩsɛ tɔ. Ɩ mɑɣɑmɑɣɑ ɩ tɑ kɛ pǝyɑɣɑ, ɩ́ pɔɔsɩ-ɩ ɩ kɑ́ heeli-mɛɣɛ ɩsǝnɑ pǝ lɑpɑ tɔ.
22 Yʋlʋm nyǝ́mɑ nɑ́ yɔɣɔtɑ mpʋ, mpi tɔ, pɑ see Yutɑ nyǝ́mɑ. Pǝ tɑɣɑ pʋlʋ, Yutɑ nyǝ́mɑ kɑ pɛɛlɑ nɔɣɔ sɩ, ye wei ɩ tɛmɑ ɩ tɑɑ nɑ ɩ́ tisi sɩ Yesu kɛ́ Mesii, pɑɑ lǝsɩ pʋntʋ kɛ pɑ tǝkotile tɑɑ.
23 Pǝ tɔɔ kɛ́ ɩ nyǝ́mɑ nɑ́ tɔmɑ sɩ: Ɩ mɑɣɑmɑɣɑ ɩ tɑ kɛ pǝyɑɣɑ, ɩ́ pɔɔsɩ-ɩ.
24 Ḿpʋ́ɣʋ́ Fɑlisɑnɑɑ tɑsɑ ɑpɑlʋ wei ɩ kɑ kɛ yʋlʋm tɔɣɔ yɑɑʋ nɑ pɑ́ tɔmɩ-ɩ sɩ: Amɑ nɑ Ɩsɔ tɔɔ yɔɣɔtɩ tɑmpɑnɑ. Tǝ nyǝmɑ́ ɑpɑlʋ ɩnɛ ɩ tɔɔ sɩ ɩ kɛ́ ɩsɑɣɑʋ kɛ́.
25 Tǝnɑɣɑ ɑpɑlʋ ɩnɩ ɩ cɔ Fɑlisɑnɑɑ sɩ: Mɑ tɑ nyɩ sɩ ɩ kɛ́ ɩsɑɣɑʋ yɑɑ ɩ kɛ́ kʋpɑŋ tɔ. Amɑ kʋlʋmtʋ tike kɛ mɑ nyǝmɑ́ sɩ, mɑɑ kɛ́ yʋlʋm nɑ pǝnɛ pǝ tɑɑ mɑ nɑɑkɩ.
26 Ɩlɛnɑ pɑ́ pɔɔsɩ-ɩ sɩ: Pepeɣe ɩ lɑpɑ-ŋ? Ɩsǝnɑɣɑ ɩ lɑpɑ nɑ pǝ́cɔ́ nyɑ́ ɩsɛ kuli?
27 Ḿpʋ́ɣʋ́ ɩ cɔ-wɛ sɩ: Mɑ tɛmɑ-mɛɣɛ heeluɣu nɑ ɩ́ tɑ́ mʋ. Ɩlɛ pepe tɔɔ kɛ́ ɩ́ cɑɑ ɩ́ tɑsɑ-tǝɣɩ nɩɩʋ? Yɑɑ mǝ cɑɑ ɩ́ sɔɔsɩ ɩ ɩfɑlɑɑ tɔɔ tɔtɔ?
28 Tǝnɑɣɑ Fɑlisɑnɑɑ tʋʋ-ɩ nɑ pɑ́ tɔ sɩ: Nyɑ́ kɛnɑ yʋlʋ ɩnɩ ɩ ɩfɑlʋ. Amɑ tɑ kɛ́ Moisi ɩfɑlɑɑ kɛ́.
29 Tǝ nyǝmɑ́ sɩ, Ɩsɔ yɔɣɔtǝnɑ Moisi. Amɑ pǝ kɑɑsʋɣʋ yʋlʋ ɩnɩ tɔ, tǝ tɑ tɩɩ nyǝm ɩ tǝlɩɩlɛ.
30 Ḿpʋ́ɣʋ́ ɑpɑlʋ ɩnɩ ɩ cɔ-wɛ sɩ: Amɑ nti tǝ wɛ piti tɔɣɔlɛ sɩ, mǝ tɑ́ nyɩ ɩ tǝlɩɩlɛ, pǝyele ɩ kulɑ mɑɣɑ mɑ ɩsɛ.
31 Tǝ nyǝmɑ́ sɩ Ɩsɔ ɩɩ mʋɣɩ ɑsɑɣɑɑ nɔɔsɩ. Amɑ wei ɩ tʋɣɩ-ɩ teeli nɑ ɩ́ lɑkɩ ɩ luɣu nyǝntʋ tɔ, pʋntʋ nɔɣɔ kɛ ɩ mʋɣɩ.
32 Tuu tɔ, tǝ tɑ nɩɩtɑ sɩ nɔɣɔlʋ kulɑ yʋlʋ wei pɑ lʋlǝnɑ yʋlʋmtʋ tɔ ɩ ɩsɛ.
33 Pǝ tɔɔ kɛ́ ye ɑpɑlʋ ɩnɛ ɩ tɑɑ kɛ́ Ɩsɔ nyǝŋ ɩ tɑɑ pǝsɩ nɑ ɩ́ lɑ pʋlʋ.
34 Ḿpʋ́ɣʋ́ Fɑlisɑnɑɑ cɔ yʋlʋm sɩ: Hɑtoo pɑ lʋlʋɣʋ nyɑ́ tɔ, ɩsɑɣɑtʋ tike kɛ nyɑ́ nyǝmɑ́, nɑ nyɑɑ cɑɑ n sɛɣɛsɩ tɑ nɑ?
Ɩlɛnɑ Fɑlisɑnɑɑ tɔɣɔnɩ-ɩ pɑ Ɩsɔ tǝsɛɛlɛ tɑɑ.
Ɩsɛ nyǝ́mɑ sǝkpɛtʋɣʋ
35 Ḿpʋ́ɣʋ́ Yesu nɩɩwɑ sɩ pɑ tɔɣɔnɑ yʋlʋm ɩnɩ, ɩlɛnɑ ɩ́ kɔɔ ɩ́ suli-ɩ nɑ ɩ́ pɔɔsɩ-ɩ sɩ: N mʋ Yʋlʋ Pǝyɑɣɑ tɔm nɑ?
36 Tǝnɑɣɑ yʋlʋm cɔ-ɩ sɩ: Tɑcɑɑ, hʋlɩ-m wei pɑ yɑɑ mpʋ tɔ nɑ mɑ́ mʋ.
37 Ḿpʋ́ɣʋ́ Yesu tɔmɑ sɩ: N nɑ-ɩ mɛɛ, ɩ mɑɣɑmɑɣɑ kɛlɛ mɑ wei mɑ yɔɣɔtǝɣǝnɑ-ŋ ɩsǝntɔ tɔ.
38 Ɩlɛnɑ yʋlʋm tɔ sɩ: Tɑcɑɑ, mɑ mʋwɑ. Nɑ ɩ́ luŋi-ɩ ɑtɛ.
39 Ḿpʋ́ɣʋ́ Yesu tɔmɑ sɩ: Mɑ kɔmɑ ɑntulinyɑ tɑɑ cǝnɛɣɛ sɩ mɑ fɑkɩ tɑmpɑnɑ nyǝ́mɑ nɑ tɑsǝkǝlɛ nyǝ́mɑ, nɑ mpɑ pɑɑ nɑɑkɩ tɔ pɑ́ nɑ́, nɑ mpɑ pɑ nɑɑkɑɣɑ tɔ pɑ́ yʋlʋmɩ.
40 Fɑlisɑnɑɑ nɑpǝlɩ pɑɑ wɛ tǝnɑ nɑ pɑ́ nɩɩkɩ tɔm ntɩ, ɩlɛnɑ pɑ́ pɔɔsɩ Yesu sɩ: Pǝ kpɛŋnɑ tɑ́, tɑ́ kɛ́ yʋlʋmɑɑ tɔtɔ?
41 Ḿpʋ́ɣʋ́ Yesu cɔ Fɑlisɑnɑɑ sɩ: Ye tɑmpɑnɑ ɩ́ kɑ kɛ́ yʋlʋmɑɑ, ɩ́ tɑɑ wɛnɑ ɩsɑɣɑtʋ. Amɑ ɩsɩɩ ɩ tɔŋʋɣʋ sɩ ɩ́ nɑɑkɩ tɔ, pǝ tɔɔ kɛ́ mǝ ɩsɑɣɑtʋ wɛ tɑm.